Un Rescate en Cambio pa Hopi

DIA 31 di Mart di 1970 un avion comercial tabata secuestrá cerca Ceru Fudji den Hapón. Nuebe miembro di un grupo yamá faccion haponés dje ehército corrá a hiba mas cu 120 pasahero i miembro dje tripulacion como rehén i a exigi pasashi sano i salbo pa Nortcorea.

Ora e avion a baha den Seúl, República di Corea, Shinjiro Yamamura, vice minister di transporte di Hapón a ofrece di risca su bida pa salba hende rehén. Secuestrador a conbini pa acepté como un garantía pa nan mes siguridad, i a duna libertad na tur rehén, menos e tripulacion. Anto nan a sigi nan buelo pa Pyongyang, unda nan a entrega na autoridad di Nortcorea. Sr. Yamamura i e piloto a bolbe na Hapón despues sano i salbo.

Den e caso ei, un solo persona a sirbi como un intercambio pe bida di mas cu 120 rehén. Esei por yúdanos comprende con un solo hende por a duna su bida como rescate en cambio pa hopi. Pero, pa comprende e doctrina bíblico dje rescate, nos tin cu examina e asunto mas a fondo.

Entre otro cosnan, nos tin cu studia cuidadosamente e origen di picá. Segun e Bijbel: “Pa medio di un solo homber picá a drenta den mundo i morto mediante picá, i asina morto a plama na tur hende pasobra nan tur a peca.” (Romano 5:12) Con esei a sosode? E homber mencioná ei tabata Adam, e promé hende cu Dios a crea. Bo por leza e relato histórico di su creacion i loke a resulta den su dwalmento for di ley di Dios. Esei ta pará skirbí den e promé tres capítulo dje buki bíblico di ­Génesis.

E relato ta mustra cu tabatin un instigador invisibel ora Adam a comete e picá original. Pa satisface su mes pasion pa poder, e instigador a conspirá pa domina Adam i cualkier yiu cu e por haya. E instigador tabata Satanás e Diabel. E ta ser yamá també e “colebra original” pasobra el a usa un colebra pa haci Adam peca. (Revelacion 12:9) Aunque e Creador amoroso di humanidad a bisa Adam pa respeta e derecho di Dios di decidi loke ta bon i loke ta malu, e colebra a gaña Eva, casá di Adam, pe desobedece Dios. Anto Eva a tenta su esposo pa desobedece. Den su hacimento di esei, Adam a declara su independencia foi Dios, birando pecador boluntariamente, i a pasa solamente un bida pecaminoso na su yiunan.

Nos ta sufri di consecuencia di esei ainda. Di ki manera? Wel, e Creador a decreta hustamente cu si Adam i Eva a scoge desobedencia deliberadamente, e resultado lo ta morto. P’sei, ora Adam a peca, el a bende tur humanidad na picá i morto.—Génesis 2:17; 3:1-7.

Con humanidad por ta rescatá for di tal estado pecaminoso? Jesucristo a bini na mundo pa “duna su alma como rescate en cambio pa hopi,” i esei a habri e camina pa salba humanidad.—Mateo 20:28.

Cubrimento i Liberacion

E Bijbel ta mustra cu e proceso di rescata humanidad ta exigi dos paso: (1) recumpramento i (2) libramento. Skirbiendo tocante e palabra griego (lyʹtron) traducí como “rescate,” escolástico bíblico Albert Barnes a bisa: “E palabra rescate kier men literalmente un prijs pagá pe salbacion di hende catibo. Den gera, ora enemigo ta hiba preso, e placa cu nan ta exigi pa nan liberacion ta ser yamá rescate; es decir, esei ta e medio via locual nan ta ser duná libertad. Pues, cualkier cos cu ta libertá hende for di un estado di castigo, of sufrimento, of picá, ta ser yamá un ­rescate.”

Sí, “cualkier cos cu ta libertá hende” por ta yamá lyʹtron. Asina e palabra griego ta destaca e accion of proceso di liberacion.a

Apóstol Pablo a usa e palabra relacioná an·tiʹly·tron pa enfatizá e balor dje prijs pagá como rescate. Den 1 Timoteo 2:6, el a skirbi cu “[Jesús] a duna su mes como un rescate correspondiente pa tur.” E diccionario bíblico di Parkhurst, Greek and English Lexicon to the New Testament, ta bisa tocante esei: “Den un sentido estricto, e ta nifica un prijs pagá pa rescatá catibo for di enemigo; també, e clase di intercambio den locual e bida di un hende ta ser rescatá cu e bida di un otro.” Énfasis ta ser duná ei ne naturaleza correspondiente dje prijs dje rescate pagá of na su eficacia balanzando e balanza di husticia. Di ki manera e sacrificio di rescate di Jesús por ta considerá como un “rescate correspondiente”?

Un Rescate Correspondiente

Adam a bende tur humanidad, incluyendo nos, na picá i morto. E prijs of castigo, cu el a paga tabata su bida humano perfecto, cu e posibilidad di biba pa semper. Pa paga e debe, e prijs di un otro bida humano perfecto—un rescate correspondiente—tabatin cu ser pagá. Sin embargo, ningun hende nací di hende imperfecto por a percura e bida humano perfecto necesario. (Job 14:4; Salmo 51:5) No obstante, den su sabiduría, Dios a percura e solucion pe problema. El a transplantá e bida perfecto di su Yiu unigénito celestial den e matriz di un birgen pe nace como un homber perfecto. (Lucas 1:30-38; Juan 3:16-18) E siñanza di cu Jesús a nace di un birgen no ta un cuenta inventá pa halza e fundador di un religion. Mas bien, e ta splica un paso lógico cu Dios a tuma pa percura e rescate.

Pe por rescatá humanidad, Jesús tabatin cu mantene su mes sin mancha durante tur e tempo cu e tabata riba tera. El a haci esei. Anto el a muri un morto sacrificial. Asina Jesús a paga e prijs di su bida humano perfecto pa libertá humanidad. (1 Pedro 1:19) Pues, nos por bisa correctamente cu “un hende a muri pa tur.” (2 Corintio 5:14) Sí, “mescos cu tur hende ta muri den Adam, asina també tur hende ta ser hací bibo den Cristo.”—1 Corintio 15:22.

Un Hende en Cambio pa Hopi

Den e caso dje secuestro mencioná anteriormente, rehén no tabatin manera pa libertá nan mes, aunque nan tabata ricu. Yudanza djafó tabata necesario, i e hende cu a sirbi como un intercambio tabatin cu satisface cierto condicion. Mescos ta cierto di manera hopi mas profundo en relacion cu e rescate necesario pa rescata humanidad. Un salmista a skirbi: “Hende . . . cu ta sigi broma dje abundancia di nan riqueza, ningun di nan di ningun manera por rescatá sikiera un ruman, ni duna Dios un rescate pe; (i e prijs di rescate di nan alma ta asina precioso cu el a caba te na tempo indefinitivo).” (Salmo 49:6-8) En realidad, humanidad tin mester di yudanza djafó. E bida di un solo hende ta suficiente pa rescata tur humanidad con tal cu e ta satisface condicion necesario pa balanzá e balanza di husticia di Dios. Jesucristo ta e único hende perfecto cu por a satisface tal requisito.

Jehova Dios a percura pe liberacion di humanidad mediante e rescate cu Jesucristo a paga. Pero, Dios a haci mas. El a leza e sentencia di morto pa Satanás e Diabel, esun cu a hiba humanidad na picá. (Revelacion 12:7-9) Pronto Jehova lo cera den abismo esun culpable i finalmente ehecuta huicio ‘tirando é den e tanki di candela i swafel,’ locual ta simboliza destruccion eterno. (Revelacion 20:1-3, 7-10, 14) Cu eliminacion di tal persona spiritual malbado i cu e aplicacion dje rescate, humanidad lo disfruta di no solamente liberacion for dje gara di picá i morto sino també for dje influencia di Satanás. Cu tal libertad i e plena aplicacion dje sacrificio di rescate di Cristo, humanidad obediente lo progresá te na perfeccion humano.

E Percuracion dje Rescate i Abo

Ora hopi hende dje Oriente ta siña tocante e sacrificio di rescate di Jesucristo, nan ta mustra un gratitud profundo pa loke Dios a haci pa nan. Kazuo ta un ehempel. Su bida tabata concentrá riba tragamento di verdunner di ferf pe sintié drogá. Ora e tabata bao di efecto di dje, el a kibra su auto bez tras bez. Tres amigo di dje a comete suicidio despues cu nan a ruiná nan salud. Kazuo també a purba di comete suicidio. Despues, el a cuminza studia e Bijbel. Conmoví pe berdad cu el a siña, el a decidi di drecha su bida. El a lucha contra e bicio di daña su salud cu verdunner di ferf, i a sufri di hopi recaimento. El a keda na dos: su deseo carnal i e deseo di drecha su bida. Ki contentu el a keda cu e por a pidi Dios pordón mediante e mérito dje sacrificio di rescate di Jesucristo! Pa medio di oracion i cu e yudanza di su amigonan cristian, Kazuo a vence su bicio i awor ta sirbi Jehova Dios como un predicador feliz cu un concenshi limpi.

Bo ta corda Chisako, mencioná den e principio dje artículo anterior? Mediante un estudio di Bijbel, e també a yega di comprende e arreglo amoroso dje rescate. El a keda conmoví profundamente ora el a siña cu Dios a duna su Yiu pe liberacion di humanidad for di picá. Chisako a dedica su bida na Jehova Dios. Asta awor, ne edad di 77, e ta dedica mas cu 90 ora tur luna pa bisa otro hende tocante e gran amor di Jehova Dios i dje bondad inmerecida cu e ta mustra.

E rescate mester ta importante pa bo també. Pa medio di dje, Dios ta habri e camina pa berdadero libertad pa humanidad—libertad for di picá i morto. Un futuro magnífico di bida eterna den Paradijs riba tera ta spera tur hende cu ta acepta e sacrificio di rescate di Jesucristo. Haci fabor di ponébo na contacto cu Testigo di Jehova i examina pa bo mes con bo por disfruta di libertad for di picá i morto mediante e percuracion amoroso dje rescate.

[Nota]

[Rekonosementu di plachi na página 5]

Cortesía di Mainichi Shimbun