E Rescate di Cristo Dios Su Caminda di Salbacion

“Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.”—JUAN 3:16.

1, 2. Describí e situacion difícil cu a desaroyá relacioná cu e rasa humano.

IMAGINA cu bo ta sufri di un enfermedad cu sigur lo caba cu bo bida a ménos cu bo operá. Con lo bo sinti bo si e gastunan di operacion ta hopi mas haltu cu loke bo por paga? Kico si asta tur e recursonan combiná di bo famia i amigunan no por pagu’é? Ta frustrante pa haña bo confrontá cu un dilema asina den cua bo bida ta na peliger!

² Esaki ta ilustrá un situacion cu a desaroyá relacioná cu e rasa humano. Nos promé mayornan, Adam cu Eva, a ser creá perfecto. (Deuteronomio 32:4) Nan tabatin e prospecto di biba pa semper i di cumpli cu e propósito di Dios: “Sea fructífero i bira hopi i yena e tera i domin’é.” (Génesis 1:28) Sin embargo, Adam cu Eva a rebelá contra nan Creador. (Génesis 3:1-6) Nan desobedencia a trece picá no solamente riba Adam cu Eva mes, sino tambe riba nan yunan cu no a nace ainda. E homber fiel Job a bisa despues: “Ken por producí hende limpi for di hende cu no ta limpi? No tin ningun.”—Job 14:4.

3. Con morto a plama na tur hende?

³ Pues picá ta manera un enfermedad cu a contagiá cada un di nos, pasobra Bijbel ta declará cu “tur a peca.” E condicion aki a pone cu nos bida ta na peliger. Sí, “e salario cu picá ta paga ta morto.” (Romanonan 3:23; 6:23) Ningun di nos por scapa for di dje. Tur ser humano ta peca, i p’esei, tur ser humano ta muri. Como desendiente di Adam, nos a nace den e situacion difícil aki. (Salmo 51:5) Pablo a skirbi cu “pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.” (Romanonan 5:12) Pero esaki no ta nificá cu nos ta sin speransa pa salbacion.

Eliminando Picá i Morto

4. Pakico hende mes no por eliminá enfermedad i morto?

⁴ Kico ta necesario pa eliminá picá i su consecuencia, cu ta morto? Ta bisto cu e mester ta algu mas cu cualkier hende por percurá. E salmista a lamentá: “E pago pa un bida humano ta muchu grandi. Loke e por paga hamas lo ta suficiente pa libr’é di bai graf, pa lagu’e biba pa semper.” (Salmo 49:8, 9, Today’s English Version) Ta cierto cu kisas nos por alargá nos bida cu un par di aña cu un dieta saludabel i cuido médico, pero ningun di nos por cura nos condicion pecaminoso heredá. Ningun di nos por boltu e efectonan debilitador dje proceso di bira bieu i restorá nos curpa n’e perfeccion cu Dios tabatin originalmente p’e. Pablo sigur no tabata exagerando ora el a skirbi cu pa motibu dje picá di Adam, creacion humano “a ser sometí na banidad”—of manera Beibel na papiamentu koriente ta traducié, “a pèrdè su meta berdadero.” (Romanonan 8:20) Pero afortunadamente, e Creador no a bandoná nos. El a haci un manera pa eliminá picá i morto una bes pa semper. Con?

5. Con e Ley duná na Israel a reflehá respet profundo pa husticia?

⁵ Jehova ta “un stimadó di husticia i rectitud.” (Salmo 33:5) E código di Ley cu el a duna Israel ta reflehá un respet profundo pa balansa i husticia imparcial. Por ehempel, den e conhunto di leynan aki, nos ta lesa cu ‘mester duna bida pa bida.’ Cu otro palabra, si un israelita a mata un persona, nan lo mester a kita su mes bida na lugá di esun cu el a kita. (Exodo 21:23; Númeronan 35:21) Esei lo a satisfacé husticia divino.—Compará cu Exodo 21:30.

6. (a) Den ki sentido por yama Adam un matadó? (b) Ki clase di bida Adam a perde, i ki tipo di sacrificio lo ta necesario pa satisfacé husticia?

⁶ Ora Adam a peca, el a bira un matadó. Den ki sentido? Den e sentido cu el a pasa su condicion pecaminoso—i p’esei morto—na tur su desendientenan. Ta pa motibu dje desobedencia di Adam cu n’e momento aki mes, nos curpa ta deteriorando, i ta move sin stop den direccion di graf. (Salmo 90:10) Adam su picá tin un implicacion asta mas serio ainda. Corda, loke Adam a perde pa su mes i pa su yunan no tabata un bida comun i coriente di un 70 pa 80 aña. El a perde bida perfecto—sí, bida eterno. P’esei, si ‘mester duna bida pa bida,’ ki clase di bida lo mester a ser duná pa satisfacé husticia den e caso aki? Lógicamente, lo mester tabata un bida humano perfecto; un bida cu, mescos cu esun di Adam, tabatin e potencial di producí yu humano perfecto. Un bida humano perfecto ofrecí como sacrificio no solamente lo a satisfacé husticia, sino tambe lo a haci posibel pa eliminá picá completamente i tambe su consecuencia, cu ta morto.

Cubriendo e Costo di Picá

7. Describí e nificacion dje palabra “rescate.”

⁷ Bijbel ta referí n’e prijs cu ta rekerí pa libra nos for di picá como “un rescate.” (Salmo 49:7) Na papiamentu e término ei por referí n’e pago cu un secuestradó ta exigí a cambio di un persona cu el a secuestrá. Claro cu e rescate cu Jehova a percurá no ta encerá un secuestro. Pero e idea di paga un prijs ta keda mescos. De echo, e forma di verbo dje palabra hebreo traducí como “rescate” ta nificá literalmente “cubri.” Pa expiá pa picá, e rescate mester cuadra precis cu loke lo e tin di cubri: Adam su bida humano perfecto.

8. (a) Describí e principio di cumpra bek. (b) Con e principio di cumpra bek ta relacioná cu nos como pecadó?

⁸ Esaki ta na armonia cu un principio hañá den e Ley di Moises: e principio di cumpra bek. Si un israelita a cai den pobresa i a bende su mes den sclabitud cu un no-israelita, un pariente lo por a cumpr’é bek (of, rescat’é) dor di paga un prijs cu a ser considerá di igual balor cu e esclabo. (Levítico 25:47-49) Bijbel ta bisa cu como hende imperfecto nos ta “esclabo di picá.” (Romanonan 6:6; 7:14, 25) Kico ta necesario pa cumpra nos bek? Manera nos a mira, e pérdida di un bida humano perfecto lo a rekerí e pago di un bida humano perfecto—nada mas, nada ménos.

9. Den ki manera Jehova a haci percuracion pa cubri picá?

⁹ Naturalmente, como hende nos ta nace imperfecto. Ningun di nos ta igual cu Adam; ningun di nos por paga e prijs di rescate cu husticia ta exigí. Manera nos a mencioná den e introduccion, ta como si fuera nos tin un enfermedad cu ta pone nos bida na peliger i nos no tin moda di paga p’e operacion cu por cur’é. Den un situacion asina, nos lo no ta gradicidu si un persona intercedé pa nos i cubri e costo? Esei ta precis loke Jehova a haci! El a haci percuracion pa rescatá nos for di picá, una bes i pa semper. Sí, e ta dispuesto pa duna nos loke nos mes hamas lo por logra. Den ki manera? Pablo a skirbi: “E don cu Dios ta duna ta bida eterno mediante Cristo Jesus nos Señor.” (Romanonan 6:23) Juan a describí Jesus como “e Lamchi di Dios cu ta kita picá di mundu.” (Juan 1:29) Laga nos mira con Jehova a usa su Yu stimá pa paga e prijs di rescate.

“Un Rescate Corespondiente”

10. Con profecianan relacioná cu un “simia” a bin enfocá riba José cu Maria?

¹⁰ Direct despues dje rebelion den Eden, Jehova a anunciá su propósito pa producí un “simia,” of desendiente, cu lo a rescatá humanidad for di picá. (Génesis 3:15) Atrabes di un seri di revelacion divino, Jehova a identificá e liña di famia cu lo a producí e simia aki. Cu tempu, e revelacionnan aki a enfocá riba José cu Maria, un pareha comprometí cu tabata biba na Palestina. Un angel a bisa José den un soño cu Maria tabata na estado pa medio di spiritu santu. E angel a bisa: “Lo e duna lus na un yu, i bo mester yam’é Jesus, pasobra lo e salba su pueblo di nan picánan.”—Mateo 1:20, 21.

11. (a) Con Jehova a percurá pa su Yu nace como un hende perfecto? (b) Pakico Jesus por a percurá “un rescate corespondiente”?

¹¹ Esaki sigur no tabata un embaraso comun i coriente, pasobra Jesus tabatin un existencia prehumano den shelu. (Proverbionan 8:22-31; Colosensenan 1:15) Jehova su poder milagroso a transferí e bida di Jesus p’e matris di Maria, haciendo posibel p’e Yu stimá di Dios aki nace como ser humano. (Juan 1:1-3, 14; Filipensenan 2:6, 7) Jehova a guia asuntunan di manera cu e picá di Adam lo no a mancha Jesus. Al contrario, Jesus a nace perfecto. P’esei e tabata poseé loke Adam a perde: bida humano perfecto. Por fin, un ser humano cu por a cubri e prijs di picá! I esei ta exactamente loke Jesus a haci dia 14 di nísan di aña 33 E.C. Riba e dia histórico ei, Jesus a permití su opositornan mat’é, percurando asina “un rescate corespondiente.”—1 Timoteo 2:6.

E Balor di Bida Humano Perfecto

12. (a) Describí e diferencia crucial entre e morto di Jesus i esun di Adam. (b) Con Jesus a bira e “Tata Eterno” pa hende obediente?

¹² Tin un diferencia entre e morto di Jesus i esun di Adam, un diferencia cu ta resaltá e balor dje rescate. Adam su morto tabata merecí pasobra el a desobedecé su Creador deliberadamente. (Génesis 2:16, 17) Na contraste, Jesus su morto tabata totalmente inmerecí pasobra “e no a cometé picá.” (1 Pedro 2:22) P’esei, ora Jesus a muri, e tabatin algu di inmenso balor cu e pecadó Adam no tabata poseé ora el a muri, esta, e derecho riba bida humano perfecto. Pues, Jesus su morto tabatin balor sacrificial. Ora el a subi na shelu como un persona spiritual, el a presentá e balor di su sacrificio na Jehova. (Hebreonan 9:24) Haciendo esei, Jesus a cumpra humanidad pecaminoso bek i a bira nan Tata nobo, reemplasando Adam. (1 Corintionan 15:45) Cu bon motibu, Bijbel ta yama Jesus e “Tata Eterno.” (Isaías 9:6) Pensa riba loke esei ta nificá! Adam, un tata pecaminoso, a plama morto na tur su desendientenan. Jesus, un Tata perfecto, ta usa e balor di su sacrificio pa duna bida eterno na hende obediente.

13. (a) Ilustrá con Jesus a cancelá e debe cu Adam a hinca nos aden. (b) Pakico Jesus su sacrificio no ta cubri e picá di nos promé mayornan?

¹³ Pero, con e morto di un hende so por cubri e picánan di hopi hende? (Mateo 20:28) Den un artículo di algun aña pasá, nos a ilustrá e rescate den e manera aki: “Imaginá un fábrica grandi cu cientos di empleado. Un gerente desonesto dje fábrica ta manda e negoshi fayit; e fábrica ta cera su portanan. Cientos di hende ta sin trabou awor i no por paga nan recibunan di luna. Nan casá, yunan, i, sí, esnan cu e negoshi debe, tur ta sufri pa motibu dje corupcion dje solo homber ei! Despues ta sali un benefactor ricu cu ta paga e debe dje compania i ta habri e fábrica bek. Cancelacion dje solo debe ei, na su turno, ta trece alivio completo p’e hopi empleadonan, nan famia i esnan cu e negoshi debe. Pero e gerente original ta haña chens di participá den e prosperidad nobo? No, e ta den prizon i pues a perde su empleo pa semper! Di igual manera, cancelacion dje solo debe di Adam ta trece beneficio pa miyones di su desendientenan, pero no pa Adam.”

14, 15. Pakico nos por bisa cu Adam i Eva a peca deliberadamente, i con nos situacion ta diferente for di nan?

¹⁴ Esaki ta hustu. Corda, Adam cu Eva a peca deliberadamente. Nan a scoge pa desobedecé Dios. Na contraste, nos a nace den picá. Nos no tabatin opcion. Ni maske cuantu nos trata, nos no por evitá completamente di peca. (1 Juan 1:8) Tin bes nos por sinti mescos cu Pablo, kende a skirbi: “Ora mi ta deseá di haci loke ta corecto, loke ta malu ta presente cu mi. Realmente mi tin deleite den e ley di Dios segun e homber cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hiba mi catibu n’e ley di picá cu ta den mi miembronan. Homber infelis cu mi ta!”—Romanonan 7:21-24.

¹⁵ Ma, dor dje rescate, nos tin speransa! Jesus ta e simia pa medio di ken, manera Dios a primintí, “tur nacion dje tera siguramente lo bendicioná nan mes.” (Génesis 22:18; Romanonan 8:20) Jesus su sacrificio ta habri porta pa oportunidadnan maraviyoso pa esnan cu ta ehercé fe den dje. Laga nos considerá algun di esakinan.

Beneficiando for dje Rescate di Cristo

16. Apesar di nos condicion pecaminoso, ki beneficionan nos por disfrutá di dje awor debí n’e rescate di Jesus?

¹⁶ E escritor bíblico Santiago ta reconocé cu “nos tur ta trompecá hopi biaha.” (Santiago 3:2) Sin embargo, pa motibu dje rescate di Cristo, nos por haña pordon pa nos erornan. Juan ta skirbi: “Si un hende cometé un picá, nos tin un yudante cerca e Tata, Jesucristo, un hustu. I e ta un sacrificio di reconciliacion pa nos picánan.” (1 Juan 2:1, 2) Claro cu nos no mag di ta indiferente pa cu picá. (Hudas 4; compará cu 1 Corintionan 9:27.) Pero, si nos peca, nos por habri nos curason na Jehova, cu e confiansa cu e ta “cla pa pordoná.” (Salmo 86:5; 130:3, 4; Isaías 1:18; 55:7; Echonan 3:19) Pues, e rescate ta permití nos sirbi Dios cu un concenshi limpi i ta haci posibel pa nos acerk’é den oracion den e nomber di Jesucristo.—Juan 14:13, 14; Hebreonan 9:14.

17. Debí n’e rescate, ki bendicionnan ta posibel den futuro?

¹⁷ E rescate di Cristo ta habri caminda p’e propósito di Dios cumpli: pa hende obediente biba pa semper den Paradijs riba tera. (Salmo 37:29) Pablo a skirbi: “Maske cuantu promesa tin di Dios, nan a bira Sí pa medio di dje [Jesus].” (2 Corintionan 1:20) Ta berdad cu morto a “reina como rey.” (Romanonan 5:17) Pero e rescate ta percurá un base pa Dios eliminá e “último enemigu” aki. (1 Corintionan 15:26; Revelacion 21:4) Jesus su rescate por asta beneficiá esnan cu a muri. Jesus a bisa: “E ora ta bini den cua tur esnan cu ta den grafnan conmemorativo lo tende [Jesus] su bos i lo sali.”—Juan 5:28, 29; 1 Corintionan 15:20-22.

18. Ki efecto trágico picá tabatin riba hende, i con esaki lo ser eliminá den Dios su mundu nobo?

¹⁸ Pensa ki dushi lo ta pa experenciá bida manera e mester tabata—liber dje ansiedadnan cu ta aplastá nos awe! Picá a saca nos for di armonia no solamente cu Dios, sino tambe cu nos mes mente, curason i curpa. Sin embargo, Bijbel ta primintí cu den Dios su mundu nobo, “ningun residente lo bisa: ‘Mi ta malu.’” Sí, malesa físico i emocional lo no plaga humanidad mas. Pakico? Isaías ta contestá: “E pueblo cu ta biba den e tera lo ta esnan pordoná pa nan eror.”—Isaías 33:24.

E Rescate—Un Expresion di Amor

19. Con nos mester reaccioná individualmente n’e rescate di Cristo?

¹⁹ Amor a impulsá Jehova p’e manda su Yu stimá. (Romanonan 5:8; 1 Juan 4:9) En buelta, amor a impulsá Jesus p’e “purba morto pa tur hende.” (Hebreonan 2:9; Juan 15:13) Cu bon motibu, Pablo a skirbi: “E amor cu e Cristo tin ta obligá nos . . . El a muri pa tur afin cu esnan cu ta biba no biba mas pa nan mes, sino pa esun cu a muri pa nan i a ser lantá.” (2 Corintionan 5:14, 15) Si nos ta apreciá loke Jesus a haci pa nos, nos lo mustra esei. Al fin i al cabo, e rescate ta haci posibel pa nos ser rescatá for di morto! Sin duda nos no kier pa nos accionnan implicá cu nos ta considerá e sacrificio di Jesus di balor comun.—Hebreonan 10:29.

20. Mencioná algun manera den cua nos ta observá Jesus su “palabra.”

²⁰ Con nos por demostrá aprecio sincero p’e rescate? Djis promé cu su aresto, Jesus a declará: “Si un hende ta stima mi, lo e observá mi palabra.” (Juan 14:23) Jesus su “palabra” ta incluí su mandamentu pa nos participá celosamente den cumpli cu e comision: “Bai, pues, i haci disipel di hende di tur nacion, bautisando nan.” (Mateo 28:19) Obedencia na Jesus ta rekerí tambe pa nos mustra amor pa nos rumannan spiritual.—Juan 13:34, 35.

21. Pakico nos mester asistí n’e celebracion di Memorial dia 1 di april?

²¹ Un dje mihó maneranan cu nos por mustra aprecio p’e rescate ta dor di asistí n’e Memorial dje morto di Cristo, cu e aña aki lo ser tení dia 1 di april.a Esaki tambe ta parti di Jesus su “palabra,” pasobra ora el a instituí e celebracion aki, Jesus a manda su siguidónan: “Sigui haci esaki na mi recuerdo.” (Lucas 22:19) Dor di asistí n’e suceso sumamente importante aki i dor di presta sumo atencion na tur loke Cristo a manda, nos lo demostrá nos conviccion firme cu e rescate di Jesus ta Dios su caminda di salbacion. Di berdad, “no tin salbacion den ningun otro.”—Echonan 4:12.

[Nota]

Bo Por Corda?

◻ Pakico hende mes no por sali for di nan condicion pecaminoso?

◻ Den ki manera Jesus ta “un rescate corespondiente”?

◻ Con Jesus a usa su derecho riba bida humano perfecto pa nos beneficio?

◻ Ki bendicionnan humanidad lo ricibí pa motibu dje rescate di Cristo?

[Plachi na página 15]

Solamente un ser humano perfecto, ekivalente di Adam, por a satisfacé husticia

[Plachi na página 16]

Siendo cu Jesus tabatin derecho riba bida humano perfecto, su morto tabatin balor sacrificial