Bo Por Haya Consuelo den Tempo di Angustia
CON nos mester considera sintimento di angustia? Si nos ta dedicá na Jehova Dios, nos mester consideránan como algo straño debí na nos maraviyoso speranza i nos recursonan spiritual? Tal sintimento kier men cu nos ta spiritualmente incapaz pe sirbishi di Dios?
“Elías tabata un homber cu sintimento mescos cu esnan di nos,” segun loke disípel Santiago a skirbi. (Santiago 5:17) Aunque Dios a usa Elías di manera extraordinario, asta e fiel profeta a sinti angustia. Na un ocasion Elías a sclama “Ta basta! Awor, O Jehova, kita mi alma, pasobra mi no ta mihor cu mi antepasadonan.” (1 Rey 19:4) Job, e homber cu a warda su integridad, Ana, e hende muher fiel, i otro sirbidor leal di Jehova Dios a experimenta angustia. Asta David, e salmista piadoso, a pidi: “E angustia di mi curazón a aumenta; ai, sacámi for dje presion riba mi.”—Salmo 25:17.
E uso cu Jehova Dios ta haci di hende den su sirbishi no ta hácinan totalmente liber di preocupacion. Ainda nan tin debilidad humano i sintimento i por experimenta angustia ora nan ta bao di prueba. (Echo 14:15) No obstante, sirbidor di Dios tin yudanza cu ta mihor cu loke otro hende tin pa enfrenta presion emocional. Láganos considera algun ehempel bíblico pa mira loke a yuda cierto hende vence nan desconsuelo mental i sintimento di angustia.
Un Apóstol Angustiá a Haya Consuelo
Apóstol Pablo a conoce e sintimento di desconsuelo. El a bisa: “Realmente, ora nos a yega Macedonia, nos carni no a haya alivio . . . Tabatin pelea pafó, miedu padén. No obstante Dios, cu ta consola esnan abatí, a consolános cu e presencia di Tito.” (2 Corintio 7:5, 6) E desconsuelo di Pablo tabata causá pa varios situacion angustiador cu a sosode ne mesun tempo. Tabatin “pelea pafó”—persecucion severo cu a pone nan bida mes den peliger. (Compara cu 2 Corintio 1:8.) Además, tabatin “miedu padén” den e forma di preocupacion tocante e congregacionan, tal como esun den Corinto.
Un poco luna promé, Pablo a skirbi su promé carta na hende cristian corintio. Den dje el a condena varios situacion mashá malu den e congregacion i aparentemente a keda preocupá tocante con corintio lo reacciona na su carta. Sin embargo, Pablo a keda consolá ora Tito a yega for di Corinto cu un informe favorable tocante nan reaccion. Di igual manera, Jehova Dios por usa un sirbidor di dje djawe pa trece bon noticia pa nos i aliviá nos angustia.
Con pa Considera Asignacion cu Dios ta Duna
Cierto hende cristian tin un medida di angustia tocante nan ministerio. Realmente, algun sirbidor di Jehova Dios a kere cu asignacion cu Dios ta duna lo ser demasiado exigente pa nan cumpli cu nan. Por ehempel, Moisés a sintié inadecuado pa ser e representante di Dios pa israelita den Egipto. Entre otro cosnan, el a bisa cu e no tabata un orador elocuente. (Éxodo 3:11; 4:10) Pero, cu confianza den Dios i cu Arón como su portaboz, Moisés a cuminza cumpli cu su asignacion.
Cu tempo, Moisés no a depende mas riba Arón. Di igual manera, algun ruman ta haya cu e ministerio cristian ta dificultoso na principio, pero nan ta recibi entrenamento i ta bira evangelizador apto. Por ehempel, hopi Testigo di Jehova hoven a crece pa bira predicador di tempo completo como pionero i misionero. Ta un consuelo pa nos sa cu nos por semper confia Jehova Dios pe capacitá predicador cristian i capacitánan pa nan cumpli cu e asignacion cu Dios ta dúnanan.—Zacarías 4:6; 2 Corintio 2:14-17; Filipense 4:13.
Consuelo Ora Remordimento ta Afligínos
Kizás nos ta keda desanimá pasobra nos tin duele cu nos no a haci mas den e sirbishi di Dios. Un ruman cu a keda inactivo pa hopi aña a cuminza participa den e sirbishi di feld atrobé. Un poco despues, el a bira seriamente malu i tabatin cu keda permanentemente riba cama. E ruman desconsolá a bisa: “Mas promé, ora cu mi por a ser activo, mi a evita mi responsabilidad. Awor, ora mi kier bira activo, mi no por.”
No ta sabí pa nos haci lo mihor posibel awor en bez di gasta energía emocional riba loke a sosode den e pasado? Santiago i Hudas, mitá ruman carnal di Jesús no a bira creyente te cu despues di su morto i resureccion. Si nan tabatin algun duele tocante esei, e no a kítanan di ser sirbidor di Dios i asta skirbidor di Bijbel.
Nunca Neglisha Oracion
Ora e pueblo di Dios ta keda desconsolá, nan mester haci oracion fervorosamente. Realmente, e Scritura ta contene hopi oracion hací den tempo di angustia. (1 Samuel 1:4-20; Salmo 42:8) Algun hende por pensa: ‘Mi ta keda asina desconsolá cu mi no por haci oracion.’ Anto, pakico no considera Jonás? Ora e tabata den e barica dje piscá, el a bisa: “Ora mi alma a desmaya den mi, Jehova tabata esun cu mi a corda. Anto mi oracion a drenta cerca bo, den bo tempel santo. . . . Cu e boz di agradicimento lo mi sacrificá na bo. Loke mi a hura, lo mi paga. Salbacion ta pertenece na Jehova.” (Jonás 2:4-9) Sí, Jonás a haci oracion, i Dios a consolé i a salbé.
Aunque un hermana den Suecia tabata un pionero pa hopi aña, di ripiente el a sintié desanimá i gastá apesar di un ministerio recompensador. El a menciona su desconsolacion den oracion na Jehova. Un poco dia despues, el a recibi un yamada di telefón di un ruman den e oficina di sucursal dje Sociedad Watch Tower. El a puntra si e por duna yudanza ei pa mas o menos un dia pa siman en relacion cu un extension di Betel. E hermana a bisa despues: “E ambiente di Betel i e oportunidad di mira e trabao di extension i mi participacion den dje a dunámi e forza extra cu mi a falta.”
Si nos ta keda desconsolá, ta bon pa corda cu oracion ta un manera pa combati desconsuelo. (Colosense 4:2) Dunando contesta na nos oracion, Jehova Dios por habri un porta cu ta hiba na mas actividad den su sirbishi, of e por bendiciona nos ministerio cu un aumento di productividad. (1 Corintio 16:8, 9) En todo caso, “e bendicion di Jehova—esei ta loke ta haci hende ricu, i e no ta agrega ningun dolor cuné.” (Proverbio 10:22) Esei siguramente ta lanta nos spiritu.
Duda ta Afligíbo?
De bez en cuando, un sirbidor di Jehova Dios por tene duda. Si esei ta sosodénos, nos no mester conclui un bez cu nos a perde e fabor di Dios. Jesús no a rechaza apóstol Tomás ora el a duda informacion di testigo ocular dje resureccion di su Maestro. Mas bien, Jesús a yuda Tomás amorosamente pa vence su duda. I ki emocioná Tomás a keda ora el a comprende cu Jesús tabata na bida!—Juan 20:24-29.
Cu nan siñanza falso, kehamento, etc., “hende malbado” cu a drenta ketu den e congregacion cristian dje promé siglo tabata causando duda penoso den algun hende. P’sei, disípel Hudas a skirbi: “Sigi mustra misericordia na algun cu tin duda; sálba[nan] door di ráncanan for di candela.” (Hudas 3, 4, 16, 22, 23) Pa adorador socio di Hudas—specialmente anciano di congregacion—sigi recibi e consideracion misericordioso di Dios, nan tabatin cu mustra misericordia na esnan dudoso cu a merece tal misericordia. (Santiago 2:13) Nan bida eterna tabata den e wega, pasobra nan tabata den peliger dje “candela” di destruccion eterno. (Compara cu Mateo 18:8, 9; 25:31-33, 41-46.) I ki gozo bo ta sinti ora bo ta duna yudanza bondadoso na creyente socio cu tin duda i nan ta bira fuerte spiritualmente!
Si prueba penoso ta hácinos duda cu Dios ta cu nos, nos tin cu ser específico den nos oracion. Den tal circunstancia, láganos persevera pidiendo Jehova sabiduría. E ta duna generosamente sin reprochános pa nos falta di sabiduría i pidimento di dje. Nos mester “sigi pidi cu fe, sin duda nada,” pasobra ken cu duda ta “manera ola di lamá cu bientu ta hiba p’aki i p’ayá” den tur direccion. Hende asina no ta recibi nada di Dios pasobra nan ta indeciso, “vacilante” den oracion i den tur nan camina. (Santiago 1:5-8) Pues, láganos tene fe di cu Jehova Dios lo yúdanos considera nos dificultadnan correctamente i soportánan. Texto por ta halá na nos atencion den conbersacion cu otro hende creyente of durante un estudio bíblico. E percuracion di Dios por guia sosodimento cu por yúdanos mira loke nos mester haci. Angel por participa den dunamento di guía, of nos por recibi guía via e spiritu santo. (Hebreo 1:14) E cos principal ta di pidi sabiduría cu plena confianza den nos Dios amoroso.—Proverbio 3:5, 6.
Corda cu Jehova Dios ta Duna Consuelo
Den oracion, Pablo a depende di Jehova i tabata sa cu e ta e Fuente di consuelo. E apóstol a skirbi: “Bendito sea e Dios i Tata di nos Señor Jesucristo, e Tata di tierna misericordia i e Dios di tur consuelo cu ta consolános den tur nos tribulacion, pa nos por consola esnan den cualkier sorto di tribulacion pa via dje consuelo cu locual nos mes ta ser consola pa medio di Dios.”—2 Corintio 1:3, 4.
E Dios di tur consuelo sa dje afliccion cu sirbidor di dje ta experimenta i kier dúnanan alivio. Den e caso dje preocupacion di Pablo riba corintionan, alivio a bini pa medio di Tito, su socio cristian. Esei ta un manera pa nos ser consolá awe. Pues, ora nos ta keda angustiá, nos mester evita di isola nos mes. (Proverbio 18:1) Asociacion cu otro hende cristian ta un manera cu Dios ta usa pa consolános. Nos por pensa: ‘Mi ta tanto desanimá cu mi no tin e forza pa asocia cu amigonan cristian.’ Sin embargo, nos mester combati tal sintimento i no prívanos dje consuelo cu otro creyente por ofrece.
No Entrega!
Kizás algun di nos no a experimenta un dificultad cu tabatin tanto impacto cu el a hácinos sufri di desconsuelo severo. Pero enfermedad debilitador, e morto di bo casá, of un otro situacion mashá dificultoso por causa angustia emocional. Si esei ta sosode, no conclui cu nos necesariamente ta enfermo spiritualmente. Un persona desconsolá por ta bon capacitá pe sirbishi di Dios, i asta por yuda otronan spiritualmente. Pablo a urgi e rumanan pa “papia palabra di consuelo cu alma deprimi,” i no cu sospecho pensa cu nan a haci algo malu i ta spiritualmente enfermo. (1 Tesalonisense 5:14) Aunque desconsuelo ta ser asociá aveces cu malecho i sintimento di culpa, esei no ta e caso cu esnan cu ta sirbi Dios cu un curazón puro. Nan adoracion, kizás rindí cu dificultad extremo, ta aceptabel pa Jehova Dios. E ta stímanan i ta bini pa yúdanan cu e yudanza i consuelo necesario.—Salmo 121:1-3.
Esnan cu ta compone e resto di Israel spiritual a keda severamente angustiá bao di dificultad na aña 1918. (Compara cu Galatio 6:16.) Nan organizacion pa haci e predicacion tabata casi destruí, algun di nan tabata encarcelá inhustamente, i hopi socio di antes a bira apóstata desleal, i opositor. Además, e ungínan fiel no a comprende pakico Dios a permiti tur esei sosode. Pa basta tempo nan a ‘sembra simía cu lágrima,’ pero nan no a entrega. Nan a sigi sirbi Jehova i també a examina nan mes. Cu cua resultado? Nan ‘a drenta cu un sclamacion gozoso, treciendo nan bohí.’ (Salmo 126:5, 6) E ungínan sa awor cu Dios a permiti tal prueba afin di purificánan pe binidero trabao di cosécha internacional.
Si nos ta bira angustiá pasobra varios dificultad ta atacános, nos por beneficiá di experencia dje resto ungí. En bez di entregá, láganos sigi haci loke ta husto, aunque nos tin cu haci esei cu yoramento. Cu tempo, lo tin un salida for di nos dificultad, i nos lo ‘drenta cu un sclamacion gozoso.’ Sí, nos lo tene gozo—un fruta di spiritu santo di Dios—pasobra nos a wanta e dificultad. Pa nos, Jehova Dios siguramente lo resulta di ser e “Dios di tur consuelo.”