Loke Cristiandad a Sembra den Africa
NA AÑA 1867 un francés católico yamá Charles Lavigerie a yega na Africa como arzobispo recién nombrá di Algeria. El a bisa, “Dios a scoge Francia pa haci Algeria e cuna di un nacion grandi i cristian.”
E soño di Lavigerie a extende mas ayá cu Algeria. Realmente, el a manda misionero na otro banda dje desierto pe doel di “uni Africa central i Nortáfrica den e bida común di cristiandad.”
Entre tanto, misionero protestante tabata traha caba den oost, west, i zuid di Africa. Nan tabatin cu soporta hopi dificultad, tal como atake crónica di malaria, cu su síntoma di calafriu, sodamento, i delirio. Hopi a muri di maleza tropical pronto despues di a yega, debilitá lihé pa enfermedad tropical. Pero otronan a sigi bini. Segun Adlai Stevenson, “Ken cu ta biahá den Africa ta ser recordá constantemente dje heroísmo di misionero. . . . Nan a lucha contra cayentura geel, disentería, parásito i . . . mi a mira . . . nan graf—den tur parti di Africa.”
Logramento di Misionero
Ora misionero a penetra den Africa, nan a ripara cu mayoría di tur tribu no a conoce letter. Segun Ram Desai den su buki na inglés Cristianismo den Africa cu africano ta mira, “dje aproximadamente ocho cien idioma [africano], cuater so tabata skirbí promé cu misionero a yega.” Pues, misionero a inventa un manera pa skirbi tal idioma no skirbí. Anto nan a produci buki di instruccion i a cuminza siña e pueblo con pa leza. Pa haci esei, nan a traha scol den tur Africa.
Misionero també a traha hospital. Ram Desai a reconoce cu, “No tin ningun otro agencia cu por iguala nan logramento di obra humanitaria.” Además di cuido médico, africano a busca producto material europeo. Algun misionero a establece negoshi, pasobra nan a kere cu esei por yuda conberti hende. Por ehempel, e Mision di Basilea di Suiza a establece un negoshi den Ghana. Nan a descubri cu mata di cacao a crece bon ei, i awe Ghana ta número tres den mundo produciendo cacao.
Un logramento sobresaliente di misionero di cristiandad tabata nan traduccion di Bijbel. Pero publicacion dje mensahe bíblico ta encerra un otro responsabilidad serio. Apóstol cristian Pablo a mustra esei, puntrando: “Abo, . . . esun cu ta siña otro, no ta siña bo mes? Abo, esun cu ta predica ‘No horta,’ bo ta horta?” E Bijbel ta adverti cu hende mes cu ta siña cristianismo tin cu cumpli cu principio excelente skirbí den e Palabra di Dios.—Romano 2:21, 24.
Kico dje mision di cristiandad den Africa? E ta onra e Dios dje Bijbel, of e ta haci representacion falso di siñanza cristian?