“Ta parce cu nos simplemente no por comunicá!”

MIGUEL, un abogado, tabatin cu ser un comunicador dinámico. Su trabao a exigi esei. Pero, despues di 16 aña di matrimonio, Miguel a keda obligá di reconoce cu ora el a yega cas cerca su señora, Adrián, su aptitud di comunica a parce di somenta. Segun Miguel, “Adrián i mi semper tabata keha i tira palabra pa otro, semper pleitando na desacuerdo, i mi a kere cu esei simplemente lo caba cu nos. Mi a puntra si esei ta matrimonio, e atake continuo di mal contentu i provocacion. Si esei tabatin cu ser nos suerte pe resto di nos bida hunto, mi tabata cla pa kita—sin chanza. Mi simplemente no por enfrenta 20, 30, of 40 aña di tal clase constante di provocacion i tension.”

Di ningun manera tabata Miguel i Adrián so cu tabatin pensamento asina. Hopi pareha ta experimenta esei ora nan relacion ta varia entre combate i tregua. Conbersacion di mas senciyo ta explota den gera verbal. Nan ta “tende” loke e otro no ta bisa. Nan ta bisa loke nan no kier men. Nan ta ataca i ta acusa, anto ta retira na un silencio di rencor. Nan no ta separa, pero nan berdaderamente no ta “un solo carni.” (Génesis 2:24) Nan relacion ta den un empate. Baimento patrás lo nifica separacion; baimento padilanti lo nifica confronta nan problema frontalmente. Pa evita e dolor di un decision of otro, pareha asina ta conformánan cu e decision di keda na un distancia for di otro unda nan por mantene un balanza emocional sigur.

Pareha asina tin mester di ‘alcanza direccion apto’ den nan matrimonio. (Proverbio 1:5) Tal direccion ta obtenible den e Palabra di Dios, e Bijbel. E segundo carta di Pablo pa Timoteo ta afirma cu e Bijbel ta “probechoso pa siña, pa reprende, pa rectifica.” (2 Timoteo 3:16) Esei ta resulta di ser e caso den e curacion di fayo den comunicacion matrimonial, manera nos lo mira.