Con Cristiannan Por Yuda Esnan di Edad Avansá

“NOS no ta entregá, pero maske e homber cu nos ta di pafó ta bai gastando, siguramente e homber cu nos ta di paden ta bai renobando su mes dia tras dia. . . . Nos ta tene nos bista fihá, no riba e cosnan cu ta ser mirá, pero riba e cosnan cu no ta ser mirá. Pasobra e cosnan cu ta ser mirá ta temporal, pero e cosnan cu no ta ser mirá ta eterno.” Asina apostel Pablo a bisa den su segundo carta n’e corintionan.—2 Corintio 4:16-18.

Den tempu di antigua, homber i muhé di fe a tene nan bista riba e cosnan cu no ta ser mirá, cua a incluí tur e cosnan cu nan Dios, Jehova, a primintí di haci na su debido tempu. Den e buki di Hebreo, Pablo ta papia masha bon di esakinan, kendenan a mantené nan fe te n’e tempu di nan morto—i algun di nan a yega na edad masha haltu. E ta señalá na nan como un ehempel pa nos, bisando: “Den fe tur esakinan a muri, aunke nan no a haña e cumplimentu dje promesanan, pero nan a mira nan djaleu i a ricibí nan cu gustu.”—Hebreo 11:13.

Awe nos ta masha cerca di cumplimentu dje profecianan aki. Pero nos tin esnan enfermo i di edad avansá entre nos cu no ta sinti nan sigur cu nan lo ta personalmente na bida pa mira e fin dje mal sistema aki. Kisas algun di esakinan tambe lo muri den fe sin mira cumplimentu di tur e promesanan durante nan bida actual. Pa ruman asina e palabranan di Pablo na 2 Corintio 4:16-18, citá ariba, por ta un gran animacion.

Jehova ta corda riba tur su lealnan, incluyendo esnan enfermo i di edad avansá. (Hebreo 6:10) Esnan di mas edad cu ta fiel ta ser mencioná cu onor na varios lugá den Bijbel, i den e Ley di Moises, mencion special ta ser hací dje onor cu mester mustra esnan di edad. (Levítico 19:32; Salmo 92:12-15; Proverbio 16:31) Entre e cristiannan di promé, esnan di edad avansá a ser tratá cu respet. (1 Timoteo 5:1-3; 1 Pedro 5:5) Un buki di Bijbel ta contené un bunita descripcion dje cuido amoroso i sacrificio-propio conmovedor cu un muhé hóben a mustra pa su suegra di edad avansá. E buki apropiadamente ta carga nomber dje muhé hóben ei, Rut.

Un Yudante Dedicá

Bida tabata amargo pa Noemí di edad avansá. Un hamber a fors’é, huntu cu su famia chikitu, pa laga amigu i herencia atras na Huda i pa bai biba banda oost di Riu Jordan den e tera di Moab. Aki Noemí su casá a muri, lagand’e so cu dos yu homber. Cu tempu, esakinan a crece i casa, pero despues nan tambe a muri. Noemí a keda sin heredero pa cuid’é.

E tabata demasiado bieu pa cuminsá un bida di famia nobo i bida a parce di ofrecé masha tiki. Inegoistamente, e kier a manda Rut i Orpa, biuda di su dos yu hombernan, bek pa cas di nan mama pa nan por haña esposo pa nan mes. Su so lo a bolbe bek na su pais natal. Awe tambe, algun di esnan di mas edad ta sinti nan deprimí, specialmente si nan a perde sernan kerí den morto. Mescos cu Noemí, nan por tin mester di un hende pa cuida nan, pero nan no kier ta un carga.

Sin embargo, Rut no a bandoná su suegra. El a stima e muhé mas bieu aki i el a stima Jehova, e Dios cu Noemí a adorá. (Rut 1:16) Pues huntu nan a cuminsá e biahe bek pa Huda. Den e pais ei, tabatin un areglo amoroso bou dje Ley di Jehova cu hende pober por a recogé, of colectá, loke a sobra den e camponan despues cu e cosecha a ser trecí paden. Rut, kende tabata mas yong, a ofrecé su mes boluntariamente pa haci e trabou aki, bisando: “Laga ami bai, por fabor.” El a traha incansablemente p’e beneficio di ámbos.—Rut 2:2, 17, 18.

Rut su fieldad i amor pa Jehova tabata un animacion fuerte pa Noemí, kende a cuminsá pensa den un manera positivo i constructivo. Su conocementu dje Ley i custumbernan dje pais tabata útil awor. El a duna conseho sabí na su yudante dedicá pa asina e muhé mas hóben, mediante un matrimonio levirato, por a gana bek e herencia dje famia i haña un yu homber pa continuá e liña di famia. (Rut, capítulo 3) Rut ta un ehempel bunita pa esnan cu ta haci sacrificio pa cuida esnan enfermo of di edad avansá. (Rut 2:10-12) Den e congregacion awe, di igual manera por haci hopi pa yuda esnan enfermo i di edad avansá. Con?

Organisacion Ta Balioso

Den e congregacion cristian di antigua, nan a tene un lista di biudanan den necesidad di sosten material. (1 Timoteo 5:9, 10) Di manera similar awe, den algun caso ancianonan lo por traha un lista di esnan enfermo i di edad avansá cu mester di atencion special. Den algun congregacion un anciano a ser pidí pa percurá pa esaki como su responsabilidad special. Ya cu hopi ruman di edad avansá, mescos cu Noemí, no ta incliná pa busca yudansa, un ruman asina lo mester ta ábil den analisá un situacion i—cu tacto i discrecion—haci sigur cu e cosnan necesario ta ser hací. Por ehempel, lo e por wak si e Salon di Reino tin percuracion amplio pa esnan enfermo i di edad avansá. Si ta práctico, lo e por considerá asuntunan manera un caminda di subida pa rolstoel, facilidad di toilet apropiado, ‘headphone’ pa esnan medio surdu i un lugá pa stul special. E ruman aki lo por haci sigur tambe cu tur cu ta incapas pa yega Salon di Reino por fia un caset grabá dje reunionnan of scucha nan via coneccion cu telefon.

Por tin tambe un necesidad pa organisá transporte pa reunion i congreso. Un ruman muhé di edad tabatin un problema debí cu esun cu tabata hib’é regularmente na reunion no tabata disponibel. E mester a yama hopi hende na telefon promé cu finalmente el a haña un cabe’i boto i p’esei a cuminsá sinti cu e tabata un carga. Un areglo cu un anciano kende lo por a percurá pa tur asuntu asina lo a aliviá su berguensa.

E anciano aki tambe lo por pidi varios famia pa nan bishitá esnan di edad na turno. Den e manera aki muchanan lo siña cu cuido pa esnan di edad avansá ta parti dje bida cristian. Ta bon pa mucha siña carga e responsabilidad aki. (1 Timoteo 5:4) Un superintendente di circuito a bisa: “Den mi experencia, masha poco mucha of hóben ta bishitá esnan di edad of enfermo riba nan propio iniciativa.” Kisas nan simplemente no ta pensa riba dje, of nan por sinti nan insigur encuanto kico pa haci of bisa; mayornan por siña nan esaki.

Corda si, cu mayoria ruman di edad lo gusta pa sa di antemano cu un ruman ta biniendo. Esaki ta duna nan e goso adicional di spera un bishitante. Si e bishitantenan ta trece refresco i co’i pasa boca, manera cofi of bolo i ta limpia lihé despues, nan ta evitá un carga extra riba esnan di edad. Un pareha di edad, cu pleno vigor ainda, tin un dia regular cada siman riba cua nan ta paketá un macutu chikitu i ta sali pa haci un seri di bishita na esnan di edad den e congregacion. Nan bishitanan ta ser apreciá mashá.

P’e beneficio di esnan di edad, hopi congregacion ta tene un Studio di Buki di Congregacion durante oranan di dia. Na un lugá algun famia i publicadornan soltero a ser pidí si nan lo ta dispuesto i capas pa sostené un grupo asina i e resultado tabata un grupo di studio di buki caminda esnan di edad i esnan hóben por a percurá pa otro.

No mester laga p’e ancianonan so tuma iniciativa den e área aki. Nos tur mester ta conciente dje necesidadnan di esnan enfermo i di edad avansá. Nos por saludá nan na Salon di Reino i tuma tempu pa papia cu nan. Un invitacion pa un asociacion informal por ta bon biní. Of nos por invitá nan pa compañá nos pa un picnic of asta un vacansi. Un Testigo hopi biaha a hiba publicadornan di edad cuné den su auto ora e ta sali for di stad pa haci bishita di negoshi. Ta importante pa yuda esnan di edad sigui sinti cu nan ta enbolbí. No permití nan hala tras, manera Noemí tabata incliná na haci, cua lo acelerá e proceso di bira bieu i verkalking.

Esnan hóben cu ta hendikep of enfermo tambe mester di atencion. Un Testigo kende tabatin tres yu homber cu enfermedad incurabel, di cua dos a muri caba, a bisa: “Por ta difícil pa un congregacion sigui mustra interes ora un persona tin un enfermedad cu ta dura pa un periodo largu di tempu. Pakico no asigná algun publicador hóben confiabel pa considerá e texto diario i lesa un capítulo for di Bijbel tur dia cu nan amigu na cama? Esnan hóben, incluyendo pioneronan, por bai na turno.”

Ora Morto Ta Parce Inevitabel

Sirbidornan di Jehova semper a enfrentá morto cu curashi, sea cu ta debí na enfermedad of persecucion. Ora esnan sufriendo cuminsá sinti cu morto kisas ta masha cerca, ta natural pa nan experenciá emocionnan diferente. Despues di nan morto, nan famianan tambe lo pasa atrabes di un periodo di ahuste, tristesa i aceptacion. Pues, hopi biaha ta bon p’e persona enfermo papia abiertamente tocante morto, manera Jacob, David i Pablo a haci.—Génesis, capítulo 48 i 49; 1 Rey 2:1-10; 2 Timoteo 4:6-8.

Un Testigo kende ta un dokter a skirbi: “Nos mester ta masha abierto rib’e asuntu aki. Nunca den mi carera mi a haña cu tabata bon pa sconde for di un pashent e echo cu e ta malu pa muri.” No obstante, nos mester comprendé loke e pashent mes kier sa i ki ora e kier sa esaki. Algun pashent ta indicá claramente cu nan ta conciente cu morto ta cerca i cu nan mester considerá nan pensamentu i sintimentunan tocante esaki. Otronan ta parce di insistí riba speransa i nan amigunan ta haci bon di spera huntu cu nan.—Compará cu Romano 12:12-15.

Un persona cu ta cerca di muri por ta asina cansá of confundí cu ta difícil p’e haci oracion. Un pashent asina probablemente lo haña consuelo di sa for di Romano 8:26, 27 cu Dios ta comprendé “kehamentu no expresá.” Jehova sa cu bou di tal tension un persona por tin dificultad pa haña palabra pa un oracion.

Ora ta posibel, ta importante pa resa cu un pashent. Un ruman homber ta conta: “Ora mi mama tabata muriendo i no tabatin e forsa mas pa papia, el a indicá dor di dobla su mannan cu e tabata kier pa nos resa cuné. Despues di nos oracion, nos a canta un dje canticanan di Reino, pasobra mi mama semper a gusta música mashá. Na promé instante, nos tabata neuri e tono i despues nos a canta e palabranan poco poco. El a disfrutá claramente di dje. Sin duda, e canticanan aki cu nos ta conectá cu nos bida como Testigo di Jehova ta incorporá sintimentunan cu lo por ta difícil pa expresá di otro manera.”

Papiando cu un persona muriendo ta rekerí amor, tacto i sintimentu. Un bishitante por prepará cosnan edificante i fortalecedor-di-fe pa mencioná, i e mester ta alerto pa evitá papiamentu negativo tocante otro hende i nan problemanan. Tambe, e duracion dje bishita mester ser ahustá na loke ta razonabel i apropiado. Si e pashent ta parce inconciente, ta bon pa corda cu ainda lo e por tende loke ta ser bisá. Pues paga tinu cu loke bo ta papia.

Un Responsabilidad cu Nos Ta Compartí

Cuido di esnan enfermo i esnan di edad avansá ta un responsabilidad pisá. Pa esnan mas cerca dje pashent, e ta exigente, tantu físicamente i emocionalmente. Nan mester i ta merecé comprendimentu i yudansa for dje resto dje congregacion. Esnan cu ta percurá pa miembronan di famia enfermo of co-creyentenan ta haciendo loke ta corecto, asta ora esei ta nificá cu nan ta perde algun reunion of cu nan participacion den e ministerio di veld ta baha pa un periodo. (Compará cu 1 Timoteo 5:8.) Nan lo ser fortalecí p’e actitud comprensivo dje congregacion. Tin biaha un ruman homber of muhé lo por tuma over temporalmente di manera cu esun cu ta duna cuido regular por asistí na un reunion of disfrutá di poco ora refrescante den e trabou di predicacion.

Naturalmente, si abo mes ta esun enfermo bo tambe por haci algu. Desesperacion i sintimentu di impotencia relacioná cu bo enfermedad por hací bo amargo, pero amargura ta isolá un persona i ta core cu otronan. Na lugá di esei bo por purba expresá aprecio i ser cooperativo. (1 Tesalonicense 5:18) Resa pa otronan cu ta pasando doló. (Colosense 4:12) Meditá riba e berdadnan maraviyoso di Bijbel i considerá nan cu bishitantenan. (Salmo 71:17, 18) Keda ansiosamente al tanto dje progreso fortalecedor-di-fe di Dios su pueblo. (Salmo 48:12-14) Duna gradicimentu na Jehova pa e desaroyonan felis aki. Meditando riba e cosnan aki por duna nos dianan of añanan final un bunitesa di nan mes, mescos cu ora solo bahando ta manda un lus asta mas profundo i mas cayente cu e solo di merdia.

Nos tur mester lucha pa mantené e speransa cu, specialmente den tempu difícil, ta protehá nos mente manera un helm. (1 Tesalonicense 5:8) Ta bon pa meditá riba e speransa di resureccion i su fundeshi firme. Nos por mira padilanti cu siguransa i expectativa ansioso n’e dia ora lo no tin malesa of debilidad mas debí na biehes. E ora ei, tur hende lo sinti bon. Asta e mortonan lo regresá. (Juan 5:28, 29) E “cosnan cu no ta ser mirá” aki nos ta mira cu wowo di nos fe i nos curason. Nunca perde bista di nan.—Isaías 25:8; 33:24; Revelacion 21:3, 4.