Bo Ta Dignifica Otronan den Dunamento di Conseho?

TA DI cuanto balor i di cuanto beneficio ora bo ta ser consehá cu dignidad! Segun Eduardo: “Conseho duná cu bondad, consideracion, i interés ta resulta den bon relacion.” Warren a declara, “Ora bo ta sinti cu e consehero ta mustra onor i respet, i ta keda dispuesto pa scucha bo banda dje cuenta, e conseho ta hopi mas fácil pa acepta.” Norman a bisa: “Ora un consehero ta tratámi cu respet, mi ta sintími liber pa acudi na dje, i pidi conseho di dje.

Hende tin derecho natural di dignidad

Conseho cariñoso, amistoso, i amoroso en berdad ta bon biní. E dunamento di conseho na otronan ne manera cu bo kier recibi conseho ta beneficioso. (Mateo 7:12) Un bon consehero ta dedica tempo pa scucha i purba di comprende hende cu e ta consehá​—⁠nan pensamento, nan posicion, i nan sintimento​—⁠en bez di critica i condena.​—⁠Proverbio 18:⁠13.

Consehero djawe, incluyendo anciano cristian, tin cu keda alerto pa dignifica esnan cu nan ta consehá. Pakico? Simplemente pa motibo cu e actitud prevalente di humanidad ta di trata cu otro hende sin mustra respet. Esei ta contagioso. Hopi bez esnan di ken bo ta spera tratamento cu dignidad ta net esnan cu no ta duné, sea cu nan ta hende profesional, lider religioso, of otronan. Por ehempel, na un lugar di empleo, kitamento di empleado for di trabao ta traumático i ta causa tension tanto pe empleador como pe empleado. E ta perhudicá bo respet propio, specialmente si bo ta kitá sin dignidad. Supervisor cu tin cu haci esei tin cu siña con pa anuncia e “mensahe duro di manera cu e ta comunica na moda claro, breve i profesional, i ta mantene sin herida e dignidad dje persona,” segun e curant The Vancouver Sun. Sí, tur hende ta merece tratamento cu dignidad.

E Asamblea General di Nacion Uní ta proclama: “Tur ser humano ta nace liber i igual den dignidad i derecho. Nan tin e don di facultad di razona i di concenshi i mester actua pa cu otro den un spiritu di hermandad.” Siendo cu e dignidad di hende ta bao di atake, ta pa un bon motibo cu e Carta di Nacion Uní i e introduccion dje Declaracion Universal di Derecho Humano ta reconoce tal calidad. Nan ta afirma “fe den derecho humano fundamental, den e dignidad i balor di hende humano.”

Jehova a crea hende cu dignidad natural

Jehova ta un Dios di dignidad. Su Palabra inspirá ta declará correctamente, “Dignidad i splendor ta dilanti dje,” i, “[Su] dignidad ta ser declará mas halto cu cielo.”​—⁠1 Crónica 16:27; Salmo 8:⁠1.

Como un Dios digno i Soberano Universal, e ta onra tur su creacion cu dignidad, den cielo i riba tera. Sobresaliente entre esnan cu ta recibi tal onor ta su Yiu glorificá i reinante, e Rey, Cristo Jesús. David a skirbi proféticamente: “Bo ta pone riba dje dignidad i splendor.”​—⁠Salmo 21:5; Daniel 7:⁠14.

Lamentablemente, tal derecho humano básico a recibi hopi abuso den tur e pasado. Un angel fuerte, cu su accion, a bira Satanás e Diabel, a desafiá e derecho, husticia, i dignidad dje soberanía di Dios. Ora el a haci esei, el a manifesta un falta di respet pa Jehova Dios i a desonra su nomber digno mientras cu el a desafiá su derecho di goberna. Arrogantemente, el a montoná demasiado dignidad na su mes. Mescos cu e Diabel, rey humano poderoso, tal como Nabucodonosor di tempo bíblico, a broma di nan ‘poder i nan mahestad.’ Nan a ataca e dignidad di Jehova, i a atribui dignidad irrazonabel na nan mes. (Daniel 4:30) E gobernacion opresivo di Satanás, imponí riba e mundo di humanidad, a ataca i ta sigi ataca e dignidad di hende.

Bo dignidad a ser ofendí? Ora bo a haya conseho, bo a sintíbo demasiado culpable, bergonzá, desonrá, of degradá? Segun Andrés, “Mi no a sinti expresion di interés den mi, ni compasion, ni dignidad. Mi sintimento tabata cu mi no ta sirbi pa nada.” El a agregá, “E resultado tabata un sintimento di frustracion i ansha, i asta desconsuelo.” Laura a bisa: “Ta difícil pa acepta conseho for di un persona cu no ta interesá den bo bienestar.”

P’es motibo, superintendente cristian ta ser consehá pa trata e tao di Dios cu respet i onor. (1 Pedro 5:​2, 3) Si situacion ta presenta den locual ta necesario i beneficioso pa conseha otro hende, con bo por proteha bo mes contra e pensamento i conducta di hende di mundo cu, sin vacila, ta ataca e dignidad di otro hende? Kico por yudábo conserba e dignidad di otro hende cristian, i també di bo mes?​—⁠Proverbio 27:6; Galatio 6:⁠1.

Principio cu ta conserba dignidad

E Palabra di Dios no ta sin conseho tocante esei. Un consehero apto ta pone plena confianza den e conseho dje Palabra di Dios, en bez di acudi ne sabiduría di mundo. E Scritura Sagrado ta contene conseho balioso. Ora bo ta sigi tal conseho, e ta dignifica tanto e consehero como esun cu ta ser instruí. Pues, e instruccion cu Pablo a duna Timoteo, un superintendente cristian, tabata: “No critica severamente homber di mas edad. Al contrario, urgié como tata, homber mas hoven como ruman, hende muher di mas edad como mama, hende muher mas hoven como ruman cu tur pureza.” (1 Timoteo 5:​1, 2) Ora bo ta pega na tal norma, cuanto tristeza, ofensa, i bochorno bo por evita!

Ripara cu clave pa bon éxito den consehamento ta e respet apropiado pe otro persona i su derecho di ser tratá na moda digno, i amoroso. Anciano cristian, incluyendo superintendente biahero, mester haci esfuerzo pa sigi tal conseho, haciendo esfuerzo pa determiná pakico hende cu tin mester di reahuste ta pensa i ta actua manera nan ta haci. Nan mester deseá di tende nan punto di bista, i haci tur esfuerzo pa evita di bergonzá, degradá, of desonrá esun cu ta recibi e conseho.

Como anciano, duna di conoce na bo ruman cu bo ta interesá den dje i kier yudé cu su problema. Esei ta loke un bon dócter ta haci ora bo ta bishita su oficina pa un examinacion fisical. E idea di kita bo paña den un camber friu, i stéril por hacíbo sinti bergüenza i humiyá. Cuanto bo ta aprecia un dócter cu ta apreciá bo respet propio i ta dignificábo door di dunábo un bistí mientras cu e ta haci examinacion necesario pa determiná e causa di bo enfermedad! Di igual manera, consehero cristian cu ta mustra respet apropiado pa hende ta bondadoso i firme, pero ta bisti e persona cu dignidad. (Revelacion 2:​13, 14, 19, 20) Net lo contrario ta conseho cu ta severo, friu, i sin compasion i ta manera dócter cu ta hacíbo kita bo paña i hacíbo sinti bergüenza, desonrá, i faltando dignidad.

Superintendente dje Scol di Ministerio Teocrático ta specialmente cuidadoso pa consehá cu dignidad. Ora nan ta consehá ruman di mas edad, nan ta refleha e mesun amor cu nan ta mustra pa nan mes mayornan. Nan ta mustra consideracion, amabilidad, i cariño. Tal compasion ta necesario. E ta produci un ambiente saludable i apropiado pa duna i recibi conseho.

Anciano, tene presente cu conseho práctico ta lanta hende, ta animá, ta edificá, i ta positivo. Efesio 4:29 ta bisa: “No laga ningun palabra corrumpí sali foi boso boca, sino tur palabra cu ta bon pa edificacion conforme cu e necesidad, pa duna loke ta favorable na oyentes.”

No ta necesario pa usa palabra, moda di papia, of razonamento severo. Mas bien, respet pe otro persona i un deseo pa conserbá su sintimento di balor i respet personal ta impulsábo pa presentá asuntonan na moda positivo i constructivo. Introduci e conseho cu encomendacion sincero i berdadero pa bon abilidad of calidad cu e persona tin, en bez di enfatizá un punto di bista cu ta hacié sintié frustrá i sin balor. Si bo ta sirbi como anciano, usa bo ‘autoridad pa edifica i no pa kibra.’​—⁠2 Corintio 10:⁠8.

Sí, efecto di cualkier conseho di superintendente cristian mester tá di duna e animacion necesario, i loke ta favorable. E conseho no mester desanimá ni “spanta.” (2 Corintio 10:⁠9) Asta hende cu a comete un malecho serio tin cu recibi un midí di respet propio i dignidad. Conseho mester ta balanzá cu palabra bondadoso, pero firme, di reprendimento afin di conmovele pa arrepenti.​—⁠Salmo 44:15; 1 Corintio 15:⁠34.

Significantemente, e Ley di Dios duná na Israel ta contene e mesun principionan. El a permiti conseho i asta disiplina fisical, pero alabez a conserba e derecho di hende na un midí di dignidad personal. E Ley a permiti zota cu bara “na cantidad cu ta corresponde cu e malecho,” pero no demasiado. Un límite tabata poní ne cantidad di bara duná, pa malechor no ser “realmente desonrá.”​—⁠Deuteronomio 25:​2, 3.

Jesús també tabatin e costumber di compasioná e sintimento di malechor arrepentí. Isaías a profetiza di Jesús: “Lo e no kibra caña machicá; i lo e no paga mecha di linen cu flam swak. Lo e saca husticia pegando ne berdad.”​—⁠Isaías 42:3; Mateo 12:​17, 20; Lucas 7:​37, 38, 44-50.

Dunando mas énfasis ne necesidad di compasion ta e palabra di Jesús den su Sermón di Monte: “Tur loke boso kier pa hende haci cu boso, boso també mester haci mescos cu nan.” (Mateo 7:12) Tal principio cu ta promove bon relacion ta asina importante cu e ta ser yamá en general e Regla di Oro. Como anciano cristian, con e por yudábo trata otronan cu bondad i dignidad den dunamento di conseho?

Tene presente cu abo també ta haci equibocacion. Manera Santiago a bisa, “tur hende ta trompica hopi bez.” (Santiago 3:⁠2) Cordamento di esei por yudábo templa bo palabra i domina bo sintimento ora ta necesario pa bo papia cu otro hende tocante nan falta. Tuma na cuenta nan sensibilidad. Esei por yudábo evita demasiado crítico, halando atencion na fout of defecto menor. Jesús a enfatiza esei ora el a bisa: “No huzga pa boso no ser huzgá; pasobra cu e huicio cu locual boso ta huzga, boso lo ser huzgá; i cu e midí cu locual boso ta midi, nan lo midi pa boso.”​—⁠Mateo 7:​1, 2.

Dignifica otronan​—⁠opone e Diabel

Satanás ta planeá táctico pa kita bo dignidad, pa produci sintimento di degradacion, inutilidad, i desesperacion. Tuma nota dje manera cu el a usa agente humano pa estimulá emocion negativo den fiel Job. Elifaz hipócrita a acusa: “[Jehova] no tin fe den su sirbidornan, i e ta acusa cu su mensaheronan [angel santo] tin falta. Cuanto mas tanto esnan cu ta biba den cas di torto [hende pecador], cu tin fundeshi den e stof! Bo ta aplastánan mas rápidamente cu un barbulet.” (Job 4:​18, 19) Pues, segun Elifaz, Job no tabatin mas balor den bista di Dios cu un barbulet. Realmente, e conseho di Elifaz i su compañénan, leu di edifica, por a priva Job di asta su memoria di un mihor tempo. Segun nan opinion, e fieldad, entrenamento di famía, relacion cu Dios, i obra caritativa di Job di pasado no tabatin ningun balor.

Mescos den e dia djawe, malechor arrepentí ta specialmente víctima di tal sintimento, i ta existi e peliger di ser ‘tragá pa demasiado tristeza.’ Anciano, ora boso ta conseha hende asina, “confirma boso amor” pa nan, permitiendo nan conserba un grado di dignidad. (2 Corintio 2:​7, 8) Guillermo a admiti, “Tratamento cu un falta di dignidad ta haci difícil pa acepta conseho.” Ta necesario pa fortalece nan kerimento cu nan tin balor den bista di Dios. Hácinan corda cu Jehova Dios “no ta inhusto pé lubida boso trabao i e amor cu boso a mustra pa su nomber” durante nan añanan di fiel sirbishi di pasado.​—⁠Hebreo 6:10.

Cua factor adicional por yudábo dignifica otronan ora bo ta duna conseho? Reconoce cu tur hende tin e derecho natural di dignidad, siendo cu nan ta creá den e imagen di Dios. Nan tin balor den e bista di Jehova Dios i Jesucristo; e dos percuracion, dje rescate i dje resureccion, ta apoyá tal echo. Jehova ta agrega mas dignidad na hende cristian “asignando na [nan] un ministerio,” usando nan pa suplica un generacion malbado pa haci paz cu Dios.​—⁠1 Timoteo 1:⁠12.

Ancianonan, corda cu e mayoría grandi di boso rumanan cristian ta miembro prospectivo dje fundeshi di un sociedad humano nobo riba un tera limpi. Como hende precioso cu tanto balor, nan ta merece e onor asigná na nan. Ora bo ta consehánan, corda con tanto Jehova como Jesús ta mustra consideracion pa nan, i sigi hunga bo papel yudando bo rumanan conserba un sintimento di dignidad i balor propio apesar di desafíonan di Satanás.​—⁠2 Pedro 3:13; compara cu 1 Pedro 3:⁠7.

[Kuadro na página 29]

Conseho Cu Ta Dignificá

(1) Duna encomendacion legítimo i sincero. (Revelacion 2:​2, 3)

(2) Sea bon scuchador. Identificá na moda claro i bondadoso e problema i e motibo dje conseho. (2 Samuel 12:​1-14; Proverbio 18:13; Revelacion 2:4)

(3) Funda bo conseho riba e Scritura. Sea positivo, razonabel, i animador, i mustra compasion. Mantene sin herida e dignidad i balor propio di recibidor di conseho. (2 Timoteo 3:16; Tito 3:2; Revelacion 2:​5, 6)

(4) Duna recibidor di conseho e siguranza di cu bendicion ta resulta di aceptacion i aplicacion di conseho. (Hebreo 12:​7, 11; Revelacion 2:7)

[Plachi na página 26]

Anciano cristian tin cu dignificá otronan den dunamento di conseho