Con hende por ta den e imagen di Dios?

“DIOS a procede di crea e homber den su imagen, den imagen di Dios el a creé; macho i hembra el a créanan,” segun e registro inspirá, pero kico e kier men? Di ki manera Dios a crea e promé homber i muher den e imagen di Dios?​—⁠Génesis 1:⁠27.

Nan tabata den e semehanza di Dios físicamente? No, esei tabata imposibel. Hende ta humano, di carni, diseñá pa biba riba tera. Dios ta spiritu, bibando den e gloria celestial inimaginable cu ningun hende por sikiera acercá. (Éxodo 33:​18-20; 1 Corintio 15:50) Di ki manera, anto, hende tabata trahá den e imagen di Dios? Pasobra Dios a duna hende a capacidad di eherce atributo sobresaliente di Dios​—⁠amor, husticia, sabiduría, i poder​—⁠i també otro calidadnan.

Calidad di Jehova

Calidad di Jehova Dios ta reflehá den tur creacion di dje, pero nan tabata manifestá dramáticamente den su tratamento cu e promé pareha humano, Adam i Eva. (Romano 1:20) Su amor ta keda manifestá pasobra el a crea e tera net bon pa hende biba riba dje. Jehova a crea pe homber un esposa perfecto pa ser su compañé i mama di su yiunan. El a pone nan dos den un hofi bonita i a dúnanan un abundancia di tur loke tabata necesario pa sigi biba i ser feliz. Mas maraviyoso cu tur, Dios a dúnanan a oportunidad di biba pa semper.​—⁠Génesis 2:​7-9, 15-24.

E sabiduría di Dios ta ser manifestá den e prueba cu el a duna e promé pareha humano. Pa nan permanece como miembro dje famía universal di Jehova i pa nan biba pa semper como e mayornan dje raza humano, nan tabatin cu ser ehemplar den fieldad i den e adoracion berdadero. P’sei, Jehova Dios a dúnanan e oportunidad di demonstra e condicion di nan curazón bao di un prueba apropiado​—⁠nan no mag come dje palu di conocimento di bon i malu. Tabata ki sabí di parti di Jehova pa permiti hende duna prueba di nan obedencia i amor pe promé cu el a dúnanan privilegio maraviyoso cu Dios tabatin pensá!

E husticia di Dios ta ser manifesta den su insistencia riba norma halto pa su creacion i su nengamento di compromete tal norma. Esei tabata manifestá ora Dios a duna Adam i Eva tur oportunidad pa haci loke ta recto. I ora nan no a haci esei, su husticia ta ser manifestá den su sentencia di nan pa recibi e castigo cu Dios a declara pa rebelion.

E poder di Jehova tabata manifestá ora el a ehecuta e sentencia. Satanás, e rebelde principal, a indica cu Jehova Dios ta mentiroso, i Satanás a ofrece gran cosnan na Eva pe desobedece Dios. (Génesis 3:​1-7) Pero Satanás no por a cumpli cu su promesa. E no por a stroba Jehova Dios di expulsa Adam i Eva for dje hofi di Eden, i e no por a stroba cumplimento dje palabra di Dios dirigí na Adam: “Bo ta stof i lo bolbe na stof.” (Génesis 3:19) Sin embargo, Jehova Dios no a ehecuta e sentencia di morto mesora, i den esei el a haci mas manifestacion di su amor. El a permiti Adam i Eva e tempo pa produci yiu pa medio di locual su propósito original pa humanidad lo ser cumplí eventualmente.​—⁠Génesis 1:⁠28.

Finalmente, e husticia, amor, poder, i sabiduría di Jehova Dios tabata manifestá den su promesa di produci un simía cu por destrui obra di Satanás i deshaci dje resultado tristu dje promé rebelion contra soberanía divino. (Génesis 3:15) Ki un Creador maraviyoso nos tin!

Esfuerzo pa imita Dios

Aunque hende no ta perfecto mas, nan por sigi manifesta calidad di Dios. P’sei, Pablo a anima hende cristian di su dia: “Bira imitador di Dios, como yiunan stimá.” (Efesio 5:⁠1) Pero, através di historia e mayoría a demonstra un gran falta di respet pa calidad di Dios. Den e tempo di Noé caba, hende a bira asina corrupto cu Jehova a determiná di destrui tur humanidad fuera di Noé i su famía. Noé tabata “un homber husto. El a resulta di ser sin falta den hende contemporario di dje,” i el a demonstra su amor di Dios, cumpliendo cu mandamento di Dios.a “Noé a procede di haci conforme cu tur loke Dios a manda. El a haci precisamente asina.” (Génesis 6:​9, 22) Noé a manifesta amor pa su próhimo i su pegamento na husticia, birando “un predicador di husticia.” (2 Pedro 2:⁠5) El a manifesta sabiduría i a usa su forza física correctamente cumpliendo cu instruccion di Dios di traha un arca enorme, warda cuminda den dje, colecciona bestia, i drenta den e arca ora Jehova a bisé. Además, el a demonstra su amor pa husticia pasobra e no a laga beciña malbado corrumpié.

E Bijbel ta duna detaye di hopi otro hende cu di igual manera a demonstra calidad divino. Esun principal tabata Jesucristo, cu tabata perfectamente den e imagen di Dios i p’sei por a bisa: “Ken cu a mirámi a mira e Tata.” (Juan 14:⁠9) Entre otro calidad cu Jesús a manifesta, su amor tabata sobresaliente. Amor pa su Tata i pa humanidad a conmovele pa sali for di su habitacion celestial i biba como hende riba tera. Amor a conmovele pa glorifica su Tata cu su conducta recto i predica e bon nobo di salbacion pa humanidad. (Mateo 4:23; Juan 13:31) Anto, amor a conmove Jesús pa ofrece su bida perfecto pe salbacion di humanidad, i, mas importante, pe santificacion dje nomber di Dios. (Juan 13:⁠1) Den su esfuerzo pa imita Dios, por tin un mihor ehempel pa sigi cu Jesucristo?​—⁠1 Pedro 2:⁠21.

Con nos por ta mas den semehanza di Dios awe?

Con nos djawe por manifesta calidad di Dios i asina comportános den su imagen? Wel, considera promé e calidad di amor. Jesús a bisa: “Bo mester stima Jehova bo Dios cu tur bo curazón i cu tur bo alma i cu tur bo mente.” Con nos ta mustra amor pa Dios? Apóstol Juan a contesta: “Esaki ta loke e amor di Dios ta nifica, pa nos warda su mandamento; i toch su mandamento no ta un carga pisá.”​—⁠Mateo 22:37; 1 Juan 5:⁠3.

Naturalmente, pa nos obedece mandamento di Jehova Dios, nos tin cu conocénan. Esei ta enbolbe lezamento, studiamento, i meditacion riba e Palabra di Dios, e Bijbel, i riba literatura bíblica. Mescos cu e salmista, nos mester por bisa: “Cuanto mi ta stima bo ley! Tur e dia largu esei ta mi interés intenso.” (Salmo 119:97) Mientras cu nos ta bai mas i mas profundo den e comprendimento dje Palabra di Dios, nos ta wordu yená cu e moda di pensa di Dios. Nos ta yega di stima husticia i odia maldad. (Salmo 45:⁠7) Esei ta unda Adam a hera e camina. El a conoce e ley di Jehova, pero e no a stimé suficiente pa sigié. Ora nos ta leza e Palabra di Dios, nos mester puntra nos mes constantemente, ‘Di ki manera esei ta aplica na mi? Kico mi por haci pa mi conducta ser mas na armonía cu calidad di Dios?’

Jesús a bisa també: “Bo mester stima bo próhimo mescos cu bo mes.” (Mateo 22:39) Tur hende sano ta stima nan mes i ta deseá lo mihor pa nan mes. Esei no ta malu. Pero, nos ta manifesta e mesun amor pa nos próhimo? Nos ta sigi e instruccion bíblico: “No nenga di haci bon pa hende cu nos ta debé, ora ta sosode cu ta den e poder di bo man pa hacié”?​—⁠Proverbio 3:27; Galatio 6:⁠10.

Kico dje calidad di sabiduría? Nos esfuerzo pa manifesta tal calidad ta resulta den estudio di Bijbel pasobra esei ta e depósito di sabiduría divino. Salmo 119:​98-100 ta bisa: “Bo mandamento ta hacími mas sabí cu mi enemigonan, pasobra te na tempo indefinitivo e ta di mi. Mi a yega di haya mas perspicacia cu tur mi maestronan, pasobra bo recordatorio ta di interés intenso pa mi. Mi ta comportámi cu mas comprendimento cu homber di mas edad, pasobra mi a observa bo mes ordunan.” Den Proverbio 3:​18, sabiduría ta ser pintá como “un palu di bida.” Si nos ta gana sabiduría i ta ehercé, nos lo recibi e aprobacion di Dios i e recompensa di bida eterna.​—⁠Eclesiastés 7:⁠12.

Kico di husticia? Den e mundo malbado aki, husticia ta un calidad vital pa hende cu kier agrada Dios. Jesús a stima husticia i a odia maldad. (Hebreo 1:⁠9) Cristian djawe ta haci mescos. Husticia ta conmovénan pa aprecia calidad correcto. Nan ta evita e camina inhusto di mundo i ta haci cumplimento dje boluntad di Dios e cos mas importante den nan bida.​—⁠1 Juan 2:​15-17.

En cuanto poder, nos tur tin un midí di dje. Nos naturalmente tin poder física i intelectual, i mientras cu nos ta crece como hende cristian, nos ta desaroya poder den un sentido spiritual. Jehova ta aumenta nos poder cu su spiritu santo te ne grado cu nos, aunque nos ta swak, por cumpli cu e boluntad di Jehova. Pablo a bisa: “Mi tin forza pa tur cos pa medio di esun cu ta dunámi poder.” (Filipense 4:13) E mesun fortaleza ta disponibel pa nos si nos ta reza pidiendo e spiritu di Jehova.

Predicando e bon nobo

Nos manifestacion dje cuater atributo principal di Dios ta fácil pa mira den nos obedencia ne mandamento: “Bai pues i haci disípel di hende di tur nacion, bautizando nan den e nomber dje Tata i dje Yiu i dje spiritu santo, siñando nan pa warda tur loke mi a manda boso. I, mira! mi ta cu boso tur dia te ne conclusion dje sistema di cosnan.” (Mateo 28:​19, 20) Tal trabao educativo ta hiba bida na hende cu ta responde. Ki un demonstracion excelente di amor pa hende cu na principio nos casi no ta conoce mes!

Además, tal siñamento ta e camina di sabiduría. E ta produci fruta cu ta wanta. Di cua otro trabao bo por bisa: “Haciendo esei lo bo salba bo mes i també esnan cu ta scuchábo”? (1 Timoteo 4:16) No tin perdedor den e trabao di haci disípel. Tanto esnan cu ta scucha como esnan cu ta predica ta gana bendicion eterno.

En cuanto husticia, hende cristian ta siña principio husto i recto na studiante di Bijbel. Nos ta yúdanan sirbi Jehova, “e Dios di husticia.” (Malaquías 2:17) Hende djawe cu ta dedica nan bida pa sirbi Jehova Dios i ta cumpli cu nan dedicacion den fieldad ta ser declará husto, hustificá, resultando den nan sobrebibencia di Armagedón.​—⁠Romano 3:24; Santiago 2:​24-26.

Ki un demonstracion di poder ta e predicacion i siñamento dje bon nobo mundialmente! (Mateo 24:14) Awante ta necesario pa predica continuamente den territorio unda e mayor parti di hende no kier scucha. Pero Jehova Dios, cu su spiritu, ta duna e fortaleza necesario pa wanta te ne fin.​—⁠Isaías 40:​30, 31; Mateo 24:13; Lucas 11:⁠13.

Ta cierto cu como desendiente imperfecto di Adam, nos no por eherce tal calidad excelente perfectamente. Pero, no lubida, hende tabata creá den e imagen di Dios, i si nos ta haci esfuerzo pa ser mas i mas manera Dios, anto nos, en parti, ta cumpli cu e motibo di nos existencia. (Eclesiastés 12:13) Si nos ta forza pa haci nos posibel i ta pidi pordón ora nos no ta alcanza, anto nos por spera di sobrebiba pa drenta den e husto mundo nobo di Dios, unda nos por eventualmente alcanza perfeccion. Anto, nos lo ta den un tera paradísico yená cu hende perfecto, tur manifestando calidad di Jehova Dios plenamente. Ki un gozo! Finalmente, den e sentido completo dje expresion, hende lo ta den e imagen di Dios.

[Footnotes]

[Caption on page 25]

Jesús a mústranos con pa cultiva calidad divino di Jehova Dios

[Caption on page 26]

Finalmente, den e pleno sentido dje expresion, hende lo ser den e imagen di Dios