Un Bida Ricu I Recompensador Den E Sirbishi Di Jehova

SEGUN CU LEO KALLIO A CONTÉ

Tabata aña di 1914, i un dia bonita cerca e fin dje tempo di calor tabata terminá den nos pueblo di Turku, un stad den Finlandia. Di ripiente, e trankilidad tabata destrozá pe noticia di cu un gera grandi a cuminza. Pronto e cayanan tabata yen di hende considerando e nificacion dje suceso. Cara serio di hende grandi a haci nos, e muchanan, pensa riba loke lo sosode. Mi tabatin nuebe aña di edad, i mi ta corda cu wega pacífico dje muchanan a cambia na wega di gera.

AUNQUE Finlandia no a participa den Gera Mundial I (1914-1918), gera civil a destrui e país na 1918. Miembro di famía i amigo di antes a usa arma contra otro debí na diferente punto di bista político. Nos famía di siete a experimenta tal odio. Mi tata, cu tabata francu den expresion di su opinion, tabata arestá i sentenciá na siete aña di prisón. Despues e tabata declará inocente, pero ya caba su salud tabata destruí.

Nos famía a sufri di hamber i enfermedad durante e tempo terribel. Tres ruman muher menor cu mi a muri. E ruman mayor di mi tata, cu a biba den e stad di Tampere, a tende di nos afliccion i a invita mi tata i mama i e dos yiu bibo ainda pa bini i biba cerca dje.

Hopi aña despues, mientras cu mi a biba den Tampere ainda, mi a cera conocí cu un mucha muher encantante yamá Silvi. E tabatin un pasado similar cu esun di mi. Su tata tabata matá den e gera civil, i despues un amigo íntimo di su famía Kaarlo (Kalle) Vesanto dje pueblo di Pori, a recibié, su ruman muher mayor, i su mama den su cas. El a haci arreglo pe mama di Silvi haya trabao i pe yiu muhernan bai scol. Despues, Silvi a bai biba den Tampere pa haya trabao, i nos a cera conocí cu otro ei.

Un anochi cu a cambia mi bida

Na 1928, Silvi a bira mi comprometida, i un dia nos a bai na Pori pa bishita Kalle Vesanto i su famía. Ningun otro suceso a afecta mi bida asina decisivamente. Kalle tabata doño di cabai di carreda i a córrenan pero el a bandona e negoshi. E i su esposa a bira publicador celoso dje bon nobo dje Reino di Dios. E Anuario de 1990 de los testigos de Jehová ta duna relato dje manera cu el a paga hende pa pinta e palabra “Miyones di hende cu ta biba awor lo no muri nunca” riba e muraya exterior di su cas di dos piso. Palabra di dje tabata dje tamaño cu hende na bordu di trein cu a pasa lihé por a leza fácilmente.

E anochi ei Kalle i ami a papia te madrugá. Mi a puntra, “Pakico? Pakico? Pakico?,” i Kalle a splica. Ami literalmente a siña e berdad básico bíblico den un solo anochi. Mi a skirbi texto cu a splica varios siñanza. Despues, ora mi a bai cas, mi a tuma un buki di nota i a skirbi tur texto palabra pa palabra. Door cu mi no a conoce e Bijbel ainda, mi a usa e buki di nota pa duna testimonio na hende ne sitio di construccion unda mi a traha. Mientras cu mi a desenmascara e siñanza di religion falso, hopi bez mi a hayámi repitiendo e palabra di Kalle: “Boso realmente a ser gañá!”

Kalle a dunámi direccion di un casita den Tampere unda mas cu 30 Studiante di Bijbel a tene reunion. Mi a sconde den un skina cerca e porta cant’i ruman Andersson, doño dje casita. Mi asistencia no tabata cu regularidad, pero oracion a yudámi. Ora mi tabatin dificultad serio na trabao, mi a pidi un biaha: “Por fabor, Dios, si bo ta yudámi vence e dificultadnan, mi ta priminti di asisti na tur reunion.” Pero, cosnan a blo empeorá. Anto mi a comprende cu mi tabata pone condicion pa Jehova, di manera cu mi a cambia mi oracion pa: “Sea loke sea cu ta sosode, mi ta priminti di asisti na tur reunion.” Anto dificultad a mengua, i mi a asisti cu regularidad na reunion.​—⁠1 Juan 5:⁠14.

Nos ministerio na principio

Na 1929, Silvi i mi a casa, i na 1934 nos dos a simboliza nos dedicacion na Jehova Dios cu bautismo bao di awa. Den e tempo ei nos ministerio a inclui e hibamento di toca disco i disco na cas di pueblo i puntra bondadosamente si nos por presenta un discurso bíblico gratis. Hopi bez hende a invitános pa drenta mesora, i despues di a scucha e discurso grabá, nan a participa den un conbersacion i a acepta algun di nos literatura.

Cu permiso di autoridad, nos a toca e mesun discurso bíblico cu loudspeaker den parque. I na suburbio nos a pone loudspeaker riba dak di cas of chimenea. Na otro tempo nos a tócanan cant’i lagún unda pueblo a reuni den grupo grandi. Nos simplemente a pone loudspeaker den boto i a rema poco poco cerca e oriya. Riba diadomingo nos a bai campo cu bus, armá cu loudspeaker i hopi literatura.

Un cambio poniendo nos fe na prueba

Na 1938, mi a drenta e sirbishi di tempo completo como pionero, pero també mi a sigi traha como meslá. E sigiente primavera mi a recibi un invitacion dje oficina di sucursal dje Sociedad pa bira un sirbidor biahero, yamá awor superintendente di circuito. E decision pa acepta no tabata fácil pasobra mi a gusta traha cu nos congregacion den Tampere. Además, nos tabata doño di nos cas; nos tabatin un yiu homber di seis aña di edad, Arto, cu pronto lo cuminza bai scol; i Silvi a gusta su trabao como asistente den tienda. Pero, despues di a consulta cu otro, mi a acepta e otro privilegio di sirbishi di Reino.​—⁠Mateo 6:⁠33.

Anto un otro tempo dificultoso a cuminza. Gera a cuminza dia 30 di November di 1939, ora soldad soviético a drenta Finlandia. E gera, yamá e Gera di Winter, a sigi te Mart di 1940, ora Finlandia a acepta un pacto di paz. Ta parce cu asta naturaleza a drenta den e gera, pasobra esei tabata e winter di mas friu cu mi por corda. Mi a usa bicicleta pa bai di un congregacion pa otro mientras cu e temperatura a baha te na -30° C!

Na 1940 e trabao di Testigo di Jehova tabata prohibí den Finlandia. Despues hopi Testigo di Jehova finlandés hoven tabata encarcelá i obligá di permanece ei den situacion inhumano. Agradecidamente, mi por a sirbi e congregacionan durante tur e segundo gera mundial, desde 1939 te 1945. Hopi bez tabata necesario pa ser separá for di Silvi i Arto pa hopi luna alabez. Además, tabatin e peliger constante di detencion pe participacion den trabao ilegal.

Probablemente mi a parce straño, corriendo bicicleta cargá cu maleta, sacu di literatura, i toca disco cu disco. Un motibo cu mi a hiba disco tabata pa duna prueba, den e caso di detencion, di cu mi no tabata un spion ruso cu a baha cu paracaída. Comprende cu mi por a defendémi bisando cu si mi a bini cu paracaída, esei por a kibra e disconan.

No obstante, ora mi tabata bishitá un becindario cu a haya advertencia tocante spion, un famía di Testigo di Jehova a mirámi como uno. Mi a bati nan porta riba un anochi scur den winter, i nan tabatin mucho miedu pa habrié. P’sei mi a pasa anochi den stal di bestia, derá bao di hooi pa no muri di friu. Su manece e equibocacion di indentidad tabata solucioná, i mi mester bisa cu durante e resto di mi bishita, miembro dje famía a mustrámi hospitalidad extra special!

Durante e añanan di gera, solamente ruman Johannes Koskinen i mi a sirbi congregacion den e central i nort di Finlandia. Cada un di nos tabatin territorio enorme pa bishita, mas cu 600 km largu. Nos tabatin tanto congregacion pa bishitá cu nos por a pasa solamente dos of tres dia cerca cada congregacion. Rara bez trein tabata puntual, i tabatin poco bus i tanto yen cu tabata straño cu nos a yega nos destino.

Scapacion pa cabei

Un biaha, na principio dje Gera di Winter, mi a bai ne oficina di sucursal den Helsinki i a obtene cuater cartón pisá di literatura prohibí pa hiba cu mi na trein pa entregá ne congregacionan. Ora mi tabata ne stacion di trein di Riihimäki, alarma di atake di avion a sona. Soldad den e trein a bisti nan bistí blancu di sneu, i pasahero tabata bisá pa baha for dje trein un bez i bai den campo abierto dilanti dje stacion.

Mi a pidi soldad hiba mi cartónan, bisando nan di nan importancia. Cuater di nan a coge un cartón, i nos a corre mas cu 200 meter den sneu den campo. Nos a cai na suela, i un hende a gritámi: “Hey, hende civil, no move mes! Si avion ta mira movemento, nan lo basha bomba riba nos.” Mi tabatin e curiosidad di wak na laira unda mi a conta 28 avion!

Di ripiente e tera a tembla bao di explosion di bomba. Aunque e stacion a scapa, e trein cu a trécenos a recibi bomba. E trein kibrá i reil troci a presenta un bista mahós! Su manece mi por a sigi mi camina cu e cartónan, i soldad a sali cu otro trein. Un soldad a bira testigo di Jehova despues dje gera, i el a bisámi cu e soldadnan a papia despues tocante e hende civil straño cu cartón.

Un poco tempo despues nan a detene ruman Koskinen biahando pa sirbi e congregacion chikito den Rovaniemi den nort di Finlandia, promé cu el a baha for dje trein. Nan a hibé prisón, unda nan a traté malu. Ora e tempo a yega pa mi sirbi e mesun congregacion, mi a haci arreglo pa baha for dje trein ne stacion chikito di Koivu. Ruman Helmi Pallari a haci arreglo pa mi ei pa sigi e resto dje camina den un garoshi cu a hiba lechi. Mi bishita ne congregacion di Rovaniemi tabatin bon éxito. Pero, ora mi a bai mi a contra cu dificultad.

Riba camina pe stacion di trein, mi compañé i mi a encontra dos homber militar cu tabata inspecciona documento di tur hende cu a pasa. Mi a bisa: “No wak nan. Tene bo bista fihá stret dilanti.” Nos a pasa meimei di nan como si nan no a existi. Anto nan a cuminza corre den nos direccion pa coge nos. Pero, ne stacion di trein, mi por a evitánan den e multitud i subi un trein corriendo. No a falta excitacion den e trabao di circuito den e tempo ei!

Nan a detenémi un biaha i a hibámi ne oficina di reclutamento. Nan intencion tabata pa mandámi ne frontera di gera. Pero e telefón a ring, i e oficial militar cu tabata tene entrevista a cogé. Mi por a tende e boz ne telefón grita: “Pa ki diabel bo ta sigi manda homber enfermo cu no ta sirbi pa nada? Tur loke nos por haci ta di mándanan bek. Nos tin mester di hende cu por traha!” Agradecidamente, mi tabatin cu mi un certificado médico cu a declara un problema di salud cu mi tabatin. Ora mi a presenta esei, nan a lagámi bai i asina mi por a sigi sin strobacion den mi trabao bishitando congregacion.

Yudando na un huzgamento

Histeria dje gera a sigi furiosamente, i mi amigo Ahti Laeste tabata arestá. Su casá a yamámi. Ora mi a bai na nan cas, mi a haya den su papelnan un documento dje poliz local dunando Ahti permiso pa presenta discurso grabá den parque público dje stad. Nos a yega ne corte cu e documento. Despues di a leza e acusacion, mi a pasa e documento pa ruman Laeste. E huez a manda un soldad trece un tocadisco i varios grabacion di presentacion bíblico pe corte scucha. Despues di a scucha cada presentacion, e huez a bisa cu e no por mira nada malu den loke tabata bisá.

Anto Ahti, su esposa, i mi tabata sacá afó pa spera e decision dje corte. Nos a para ei den suspenso. Finalmente nos a tende un boz bisa: “E acusado, por fabor drenta e sala dje corte.” Ruman Laeste tabata declará inocente! Nos curazón tabata berdaderamente yen di gratitud na Jehova Dios mientras cu nos a sigi cu nos trabao, hermano i hermana Laeste cu nan trabao den e congregacion local i ami den e trabao di circuito.

E gera a caba ​—⁠nos sirbishi a sigi

E prohibicion di nos trabao di predica tabata kitá ora e gera a termina, i e rumanan a sali for di prisón. Durante mi hopi aña di sirbishi, mi a keda profundamente impresioná cu e papel cu ruman muher cristian ta hunga den e sirbishi di Reino i apoyando nan casá. Mi a keda specialmente agradecido pe sacrificio i apoyo di Silvi. Como resultado, mi por a sigi den e sirbishi di circuito pa 33 aña sin interrupcion i despues sirbi como pionero special.

Tanto Silvi como ami a anima Arto pa cuminza e sirbishi di pionero ora el a caba scol, pa siña inglés, i pa asisti na Galad, e scol bíblico di Watchtower na América. El a gradua foi Galad na 1953. Despues el a casa cu Eeva, i hunto nan a participa den varios forma di sirbishi di tempo completo, incluyendo e sirbishi di circuito, di Betel, i como pionero special. Na 1988 nan a bai biba den Tampere, unda nos a biba, pa yuda cuida Silvi i mi mientras cu nan a sigi sirbi como pionero special.

Silvi i mi a disfruta di un bida ricu i bendicioná cu mashá memoria pa animános, aunque nos fortaleza awor a mengua hopi. Ta mashá recompensador pa corda e aumento cu nos a mira. Ora mi a cuminza bishita e congregacionan na 1939, tabatin 865 publicador di Reino den Finlandia, pero awor tin mas cu 18.000!

Mi no tabata sa ayá na 1938 ora mi a drenta den e ministerio di tempo completo cu 55 aña despues lo mi sigi disfruta di participacion den dje. Apesar di nos edad avanzá, nos ta sigi cu e poder di Jehova, sperando e recompensa primintí. Nos ta confia den e palabra dje salmista: “Jehova ta bon; su bondad amoroso ta te na tempo indefinitivo, i su fieldad di generacion tras generacion.”​—⁠Salmo 100:⁠5.

[Caption on page 21]

Leo i Silvi Kallio a simboliza nan dedicacion na Jehova Dios na 1934

[Caption on page 23]

Un portret reciente di Leo i Silvi ora nan ta yega 60 aña di sirbishi dedicá