Bo Ta Corda?

Bo a disfrutá di lesamentu dje reciente edicionnan di E Toren di Vigilancia? Si ta asina, lo bo haña ta interesante pa recordá lo siguiente:

▫ Pakico e spionnan israelita a scoge pa hospedá n’e cas di Rahab e muher di mal bida?

E spionnan israelita a biba segun e Ley di Dios, pues nan no a hospedá na cas di Rahab pa motibunan inmoral. Nan probablemente a razoná cu nan presencia den cas di un muher di mal bida tin ménos chens di lanta sospecho den e stad. E echo cu su cas tabata trahá riba e muraya dje stad lo a facilitá huida. Pero riba tur cos, Jehova a guia nan na un pecador kende su curason tabata asina faborablemente afectá dor di informenan di trato divino cu e israelitanan cu el a repentí i a cambia su caminda.​—⁠15/12, página 24-5.

▫ Con rabia ta afectá bo salú?

Studionan ta indicá cu rabia ta producí hormon di tension. Frecuente explosionnan di rabia por causa un desekilibrio entre e formanan di colesterol protectivo i esnan perhudicial, exponiendo nos na rísico di haña malesa di curason i di ader.​—⁠15/12, página 32.

▫ Ki sugerencianan lo yuda nos aumentá nos plamamentu dje revistanan Toren di Vigilancia i ¡Despertad!?

Sea conciente dje Toren di Vigilancia i ¡Despertad!; tene e presentacion simpel; sea flexibel dor di prepará algun presentacion breve; pone un meta personal.​—⁠1/1, página 24-5.

▫ Pakico Moises ta un ehempel teocrático asina excelente pa nos sigui?

Moises a busca e guia di Jehova riba asuntunan. E no tabatin ambicion personal sino tabata interesá den e gloria di Jehova. E tabatin un fe firme, i e nunca a lubidá cu Jehova tabata e berdadero Gobernante dje nacion di Israel.​—⁠15/1, página 11.

▫ Cua ta algun manera den cua siñansa divino ta triunfá?

Siñansa divino ta triunfá dor di impartí na Jehova su pueblo un comprendimentu progresivo dje berdad. E ta trece hende na lus spiritual, i e ta mustra e mansunan con pa adorá Dios “cu spiritu i cu berdad.” (Juan 4:24) Siñansa divino ta triunfá tambe riba pruebanan i e mundu malbado.​—⁠1/2, página 10-12.

▫ Kico ta e clave pa dunamentu di conseho exitoso?

E clave ta respet apropiado p’e otro persona i su derecho pa ser tratá den un manera digno. P’esei, un consehero cristian mester ta bondadoso i firme pero mester bisti esun cu ta ricibí conseho recipiente cu dignidad.​—⁠1/2, página 28.

▫ Di ki manera e Iglesia Católico Romano a yega na aceptá e Asuncion di Maria como un doctrina?

Den e promé siglonan despues di Jesus su morto, e idea di Asuncion di Maria na cielu tabata completamente desconocí den pensamentu dje cristiannan. Sin embargo, despues cu e siñansa di Trinidad a bira doctrina oficial di iglesia, Maria a haña un papel cada bes mas importante. E teoria di Asuncion no a ser aceptá como dogma sino te dia 1 di november, 1950, ora Papa Pio XII a anunciá: “Nos ta defini’é como un dogma revelá dor di Dios.”​—⁠Munificentissimus Deus.​—⁠15/2, página 26-7.

▫ Den Jeremías capítulo 24, kico e dos macutonan di figu, e bon figunan i esnan cu tabata malu, a representá?

E bon figunan a representá e hudiunan cu inicialmente a ser hibá presu na Babilonia, for di cua un resto lo a regresá na Huda. E mal figunan a representá Rey Sedekías i esnan cu tabata cuné kendenan a rebelá contra Rey Nabucodonosor apesar di a haci un huramentu den e nomber di Dios. Den un manera comparabel, nos ta haña den tempu moderno e resto di Israel spiritual, kendenan a producí bon fruta den nan bida, na contraste cu e clero di cristiandad, kendenan a producí fruta putrí.​—⁠1/3, página 14-16.

▫ Ken e cuartodécimonan tabata, i pakico nan ta di interes pa cristiannan awe?

Despues di tempu dje apostelnan, tabatin algun hende cu a celebrá e Cena di Señor riba 14 di Nisan cada aña, siguiendo e patronchi apostólico. Nan a bira conocí como e “di diescuaternan,” of cuartodécimonan. Esaki ta di interes awe, pasobra e ta mustra cu asta despues cu e apostelnan a muri, tabatin algun hende cu a sigui e curso corecto di conmemorá Jesus su morto un biaha pa aña riba 14 di Nisan.​—⁠15/3, página 4-5.

▫ Ken tabata William Whiston?

E tabata un escolástico briyante di siglo 18 na Inglatera, un compañé íntimo di Sir Isaac Newton. Whiston a traducí e Scritura Griego Cristian, a oponé abiertamente e siñansa dje doctrina di Trinidad, i tabata duna les den astronomia i matemática. Pero probablemente hende ta corda Whiston mas tantu pa su traduccion na ingles dje skirbimentunan dje historiador hudiu Flavio Josefo.​—⁠15/3, página 26-8.

▫ Con hende a ser trahá den e imágen di Dios? (Génesis 1:⁠27)

Hende a ser trahá cu e abilidad pa ehercé Dios su cualidadnan sobresaliente di amor, husticia, sabiduria i poder​—⁠i tambe otro cualidadnan.​—⁠1/4, página 25.