E Dios Cu No Sa Gaña A sostenémi

SEGUN CU MARY WILLIS A CONTÉ

Efecto dje depresion económico mundial a alcanza e interior di Western Australia na 1932. E aña ei, ora ainda mi tabatin 19 aña di edad so, Ellen Davies cu mi a recibi un asignacion di predicá den un territorio di 100.000 km cuadrá. Nos lugar di cuminza tabata e pueblecito di Wiluna mas cu 950 km nortoost di nos cas di Perth, capital di Western Australia.

RIBA camina ei, Ellen cu mi tabata biahá cu un cariñoso wardador di trein den e último bagón. Ora e trein a para cant’i camina pa laga otro trein pasa, e wardador a bísanos bondadosamente pa cuanto tempo nos tabatin cu spera. Esei a dúnanos oportunidad pa baha i duna testimonio na hende cu a biba den pueblo isolá cant’i camina di trein. Por fin nos a yega ne pueblo di minero di Wiluna durante un tempestad di stof.

Sin embargo, e stacionamento dje trein na Wiluna tabata casi 3 km for di centro dje pueblo. Ningun di nos dos tabata mucho robusto, i nos tabatin tres cartón pisá di literatura i també dos maleta. Kico nos por haci? Nos a colga un cartón na un palu, i cada uno di nos a hiba un punta dje palu. Asina nos a hiba e tres cartón, un pa un. Nos a haci siete biahe, tres pa bai i bini, i uno pa hiba nos maleta pe tres km te ne pueblo. Nos a para pa sosega frecuentemente pasobra nos man tabatin dolor.

Apesar dje stof, dolor di man, i pia cansá, nos a goza e desafío i e adventura. Nos dos a kere cu Jehova tabata cu nos, cu e tabata sostenénos pa trata cu tal introduccion vigoroso na predicacion den lugar remoto. Pronto nos a mira su bendicion riba nos trabao, també, pasobra nos esfuerzo durante e biahe ei a resulta den un hoven, Bob Horn, aceptando e berdad bíblico. Nos ta alegra cu Bob por a pasa varios aña den e sirbishi di Betel i cu el a sigi sirbi Jehova fielmente pa casi 50 aña te na su morto na 1982.

Nos a sali for di Wiluna i a predica den pueblo riba camina di mas cu 725 km te na Geraldton na costa. Djei nos a bolbe pa Perth. Algun anochi nos a drumi riba banki den stacion di trein i un biaha nos asta a drumi den montón di yerba secu cant’i camina di trein.

Nos a trece un slopi yen di pan di trigo trahá na cas. Esei tabata nos cuminda principal pe promé mitá di nos biahe. Tabatin bez cu nos a paga pa nos cuminda labando tayó i haciendo floer limpi den pension i restaurant. Na otro tempo nos a traha den solo cayente pikiendo diferente sorto di bonchi. Contribucion di hende interesá cu a acepta literatura bíblico a yuda paga gasto.

Loke a fortalecémi pa mantene fe den Jehova Dios i keda feliz tratando cu hopi situacion dificultoso den e tempo ei tabata ehempel i entrenamento den hubentud for di mi mama.

Un herencia cristian

Mi mama tabatin fe fuerte den e Creador, i tanto leu den pasado cu mi por corda, el a papia cu nos tocante dje. Sin embargo, su fe a haya un prueba severo ora nos ruman mayor di siete aña di edad a muri den un accidente trágico na scol. Pero, en bez di bira amarga tocante Dios, mama a cuminza un estudio sincero di e Bijbel. E tabata kier siña, si tabata posibel, e motibo di tal tragedia. Su buscamento di berdad bíblico a recibi recompensa, i el a simboliza su dedicacion ne Dios berdadero, Jehova, cu bautismo bao di awa un poco despues di 1920.

Dje tempo ei padilanti, su comunicacion cu nos hopi bez a duna énfasis ne siguranza di cumplimento di promesa di Dios. El a úrginos pa semper tene presente di cu maske kico ta sosode, ‘Dios no por gaña.’ (Tito 1:⁠2) Como resultado, mi ruman muher menor i mi dos ruman homber mayor hunto cu nos famía i nietonan, ta alabador di Jehova Dios awe. Mi tin dos sobrino, Alan i Paul Mason cu ta sirbi como superintendente biahero.

Deseo den hubentud pa evangeliza

Mi no tabata un bon studiante i mi a kita for di scol na 1926 ne edad di 13 aña. Pero, mi a desaroya un deseo fuerte pa comparti loke mi a siña tocante e Bijbel cu otro hende. Papa a kere cu mi no tabatin suficiente educacion pa yuda otro hende, pero mama a bisa: “Aunque e solamente ta bisa hende dje binidero gera di Armagedón i cu hende manso lo heredá e tera, esei ta anuncia e Reino di Dios.” Pues, mi a cuminza participa den e trabao di cas pa cas como un tiener, aunque mi no a bautiza te 1930. Pronto despues, mi a cuminza den e trabao di evangelizá di tempo completo den e territorio rond di Perth.

E sigiente aña, 1931, nos a cuminza usa e nomber nobo Testigo di Jehova. Pero, hopi doño di cas tabata contra nos uso dje nomber sagrado di Dios i a reaccioná severamente. Sin embargo, mi a sigi den e ministerio apesar di encuentro desagradabel. Mi a tene confianza di cu Dios no ta gaña ora e ta priminti cu sirbidor di dje por ‘depende dje fortaleza cu e ta duna.’​—⁠1 Pedro 4:11; Filipense 4:⁠13.

Identificacion dje “multitud grandi”

Na 1935, mi a recibi un asignacion ne otro banda dje continente grandi di Australia. Pues, pa hopi aña despues mi a sirbi como evangelizador pionero rond dje districto di New England dje estado di New South Wales, mas cu 4.000 km for di mi cas di antes den Perth.

Te na 1935 mi a participa di emblema di pan sin zuurdeeg i biña corrá ne Conmemoracion anual dje morto di Jesús. Aunque esei tabata considerá como e cos correcto pa haci, specialmente pa celoso evangelizador di tempo completo, mi nunca a keda convencí di cu mi tabatin e speranza celestial. Anto, na 1935, tabata hací claro na nos di cu tin un recogimento di un multitud grandi cu e speranza di biba pa semper riba tera. Hopi di nos a alegrá di comprende cu nos tabata parti dje multitud grandi, i nos no a sigi participa di emblema. (Juan 10:16; Revelacion 7:⁠9) E berdad bíblico tabata briya progresivamente mas briyante, net manera Jehova Dios a priminti.​—⁠Proverbio 4:⁠18.

Moda nobo di predica

Rond di 1935 nos a cuminza usa tocadisco den nos ministerio. Pues, nos tabatin cu arma nos bicicleta fuerte dilanti i patrás pa hiba no solamente un tocadisco pisá, sino també pa disco i literatura. Mi tabatin cu tene mashá cuidao ora mi bicicleta tabata completamente cargá pasobra si el a bolter, e tabata mucho pisá pa mi hiza atrobé!

Rond dje tempo ei nos també a cuminza loke tabata yamá marcha informador. Mientras cu nos a marcha den fila na caya mayor dje stad, nos a colga poster nos dilanti i patrás, cu a desplegá lema atractivo. Mi a haya cu tal trabao tabata un prueba specialmente dificultoso di fe, specialmente ora mi tabata detení i encarcelá un anochi den un cuarto chikito di prisón den e pueblo di Lismore. Tabata humiliante pa ser hibá dilanti raad su mañan sin sikiera permití pa peña mi cabei! Pero, un biaha mas Jehova a sostenémi manera el a primintí. E caso tabata rechazá pa motibo cu e único acusacion dje poliz cu a detenémi tabata cu mi poster tabata ofensivo pa su religion.

Bolbiendo pabao

Un poco despues di 1940, mi a recibi un asignacion atrobé como predicador pionero den pueblo chikito den Western Australia. Mi a sigi disfruta di experencia memorable i bendicion spiritual ei. Durante mi asignacion na Northam, mi a contra cu Flo Timmins, un ama di cas yen di trabao, rond di 11 km den campo. El a acepta e buki Reconciliation i pronto el a bira un testigo dedicá di Jehova Dios. E ta activo ainda den e sirbishi di Reino, i su yiu muher cu ne tempo ei tabatin cuater aña di edad so, a crece pa bira un evangelizador pionero special.

Pero, tabatin otro experencia inolvidable. Un biaha, mi compañé i mi tabata cruzando un brug den Northam den nos kitrín, ora di ripiente e cabai a basha carreda, hibando nos spantá over e awa bruto dje rio Avon leu bao di nos. Despues di mas cu 1 km, e cabai a cuminza camna normal.

Casamento i un famía

Na 1950, mi a casa cu Arthur Willis, cu també tabata un pionero pa hopi aña. Nos a establecénos den Western Australia den e pueblo chikito di Pingelly, unda nos tabata bendicioná cu un yiu homber, Bently, i un yiu muher, Eunice. Ora e yiunan tabata cerca di caba scol, Arthur a decidi di bira pionero atrobé. E bon ehempel di nan tata a anima nos dos yiu pa cuminza traha como pionero regular ora nan tabata capaz.

Hopi bez Arthur a hiba e yiunan na territorio leu den campo pa predica. Tabatin bez cu el a pasa un siman of mas den e territorio, pasando anochi den campamento. Durante nan ausencia, mi a keda cas pa atende ne negoshi di muebel dje famía, haciendo posibel pa nan tres traha como pionero.

Ministerio den yiu di tera

Un maínta net despues cu e famía a bolbe for di un biahamento den campo, nos a recibi un bishita inesperá. E bishitante tabata un yiu di tera, yamá aborígenes, cu a puntra na inglés kibrá: “Kico mi mester haci pa bolbe?” Na principio nos a keda confundí. Anto Arthur a reconocé como un homber cu hopi aña promé tabata expulsá for dje congregacion cristian pa burachería. Desde e tempo ei el a haya e fama di un gran burraché cu hopi debe.

Arthur a splica loke e homber mester haci pa haya reestablecimento den e organizacion limpi di Jehova Dios. El a bai ketu sin papia hopi, i nos tur a pensa kico lo e haci. Ningun di nos a spera loke a pasa den e sigiente poco luna. E cambio cu e homber a haci tabata casi increíbel! E no solamente a recobra di su problema di bebemento sino el a bishita hende den e districto, a hácinan corda debe cu e tabatin, anto a paga loke el a debe! Awe e ta un ruman den e fe atrobé, i a sirbi pa un tempo como evangelizador pionero.

Tin hopi yiu di tera den Pingelly, i nos ta disfruta di un ministerio mashá satisfactorio, yudando tal pueblo humilde siña i acepta e berdad dje Palabra di Dios. Cuanto fortaleza mi fe a haya participando den dunamento di yudanza na hopi yiu di tera di Australia, yudando nan siña e berdad!

Un congregacion tabata fundá den Pingelly, i na principio, e mayor parti di miembro di dje tabata yiu di tera. Nos tabatin cu siña hopi di nan leza i skirbi. Tabatin hopi discriminacion contra nan leu ayá atrás, pero poco poco hende di stad a cuminza respeta testigo yiu di tera pa nan bida limpi i pasobra nan tabata ciudadano digno di confianza.

E yudanza continuo di Jehova

Arthur, mi estimado esposo, cu a sirbi Dios fielmente pa 57 aña, a muri den e promé parti di 1986. Tur comerciante di Pingelly i e pueblo dje districto tabatin hopi respet pe. Una bez mas Jehova a sostenémi i a dunámi e fortaleza pa wanta e pérdida inesperá.

Mi yiu, Bently, ta sirbi como anciano den e parti di nort di Western Australia, unda e i su esposa, Lorna, a cria nan famía den e berdad. Un otro fuente grandi di gozo pa mi ta cu mi yiu muher, Eunice, ta sigi den e sirbishi di tempo completo te ne dia djawe. E i su esposo, Jeff, ta sirbi como pionero. Mi ta biba cerca nan awor i tin e bendicion di traha como pionero auxiliar continuamente.

Pa mas cu 60 aña, mi a experimenta e cumplimento dje promesa amoroso di Jehova pa fortalece su sirbidornan i yúdanan trata cu cualkier circunstancia cu por enfrentánan. E ta satisface tur necesidad cu nos tin, con tal cu nos no ta duda of keda malagradicido. Mi fe a wordu fortalecí ora mi a sinti e man di Dios obrando, i mi a mira con e ta duna bendicion mas ayá cu loke nos por comprende. (Malaquías 3:10) Berdaderamente, Dios no por gaña!

[Caption on page 27]

Mary Willis na 1933

[Caption on page 29]

Mary i Arthur na tempo despues