E Punto Di Bista Cristian Di Autoridad

“No tin autoridad sino di Dios.”​—⁠ROMANO 13:⁠1.

AUTORIDAD ta enlazá cu e puesto di creador. E palabra “autoridad” ta relacioná cu e palabra “autor,” cu kier men “esun cu ta originá, ta trahá, of ta duna existencia.” E Supremo cu a duna existencia na tur creacion, bibiente i no bibiente, ta Jehova Dios. Innengablemente e ta e Autoridad Supremo. Cristian berdadero tin e mesun sintimento di persona celestial cu ta declara: “Bo ta digno, Jehova, asta nos Dios, pa recibi gloria i onor i poder, pasobra bo a crea tur cos, i pa causa di bo boluntad nan ta existi i tabata creá.”​—⁠Revelacion 4:⁠11.

² E simple echo cu hopi gobernante humano di promé a purba di legaliza nan autoridad declarando cu nan tabata dios of representante di un dios a admiti den silencio cu ningun hende a nace cu e derecho di manda riba otro hende.a (Jeremías 10:23) E único fuente legítimo di autoridad ta Jehova Dios. Cristo a bisa Poncio Pilato, e gobernador romano di Hudea: “Bo no por tin ningun autoridad contra mi amenos cu e ta duná na bo djariba.”​—⁠Juan 19:⁠11.

“Ningun autoridad sino di Dios”

³ Apóstol Pablo a skirbi na hende cristian bibando bao di dominacion dje imperio romano: “Laga tur alma keda sumiso na autoridad superior, pasobra no tin autoridad sino di Dios; autoridad cu ta existi, Dios a pone den nan posicion relativo.” (Romano 13:⁠1) Kico Jesús kier men ora el a bisa cu autoridad di Pilato tabata duná na dje “djariba”? I di ki manera Pablo a considera cu Dios a pone autoridad político di su tempo den nan puesto? Nan kier men cu Jehova Dios ta personalmente responsabel pa nombramento di cada gobernante político individual di mundo?

⁴ Con esei por tá, ya cu Jesús a yama Satanás “e gobernante dje mundo aki,” i apóstol Pablo a yamé “e dios dje sistema di cosnan aki”? (Juan 12:31; 16:11; 2 Corintio 4:⁠4) Además, ora Satanás a tenta Jesús, el a ofrecé “autoridad” riba “tur reino dje tera habitá,” bisando cu tal autoridad tabata entregá na dje. Jesús a rechaza su oferta, pero e no a nenga cu tal autoridad ta di Satanás pa duna na ken cu e kier.​—⁠Lucas 4:​5-8.

⁵ Jehova Dios a entrega gobernacion dje mundo aki na Satanás ora el a lagué sigi biba despues di su rebelion i despues cu el a tenta Adam i Eva i a hácinan rebela contra Su soberanía. (Génesis 3:​1-6; compara cu Éxodo 9:​15, 16.) P’sei, e palabra di Jesús i di Pablo tin cu nifica cu despues cu e promé pareha humano den Eden a rechaza e teocrácia, of gobernacion di Dios, Jehova Dios a permiti hende rebelde crea organizacion autoritativo cu a haci posibel pa nan biba den un arreglo social ordená. Tabatin bez, cu, afin di cumpli cu su propósito, Jehova Dios a causa e caimento di cierto gobernante of gobierno. (Daniel 2:​19-21) El a permiti otronan retene nan poder. E Scritura ta bisa di gobernante kende nan existencia Jehova Dios ta tolerá cu “Dios a pone [nan] den nan posicion relativo.”

Cristian di promé i autoridad romano

⁶ Cristian di promé no a unínan cu secta hudío cu a conspira i a bringa contra romano cu a domina Israel. En cuanto autoridad romano, cu nan sistema legal di ley, mantenecion di ordu riba tera i lamá; trahamento di hopi acueducto, camina, i brug útil; i en general gobernando pe bienestar dje pueblo, hende cristian a consideránan di ser e ‘minister di Dios pa nan bienestar.’ (Romano 13:​3, 4) Ley i ordu a produci un clima cu a haci posibel pa hende cristian predica e bon nobo na tur parti, manera Jesús a manda. (Mateo 28:​19, 20) Cu un concenshi limpi, nan por a paga belasting cu romano a cobra, aunque algun dje placa tabata usá pa propósito cu Dios no a aproba.​—⁠Romano 13:​5-7.

⁷ Un lezamento cuidadoso dje promé siete versículo di Romano capítulo 13 ta revela cu “autoridad superior” político tabata “minister di Dios” pa elogiá esnan cu a haci bon i castiga esnan cu a practica loke ta malu. Contexto ta mustra cu Dios, i no autoridad superior, ta determina loke ta bon i loke ta malu. P’sei, si e emperador romano of cualkier autoridad político a exigi loke Dios a prohibí of, na contraste, a prohibi loke Dios ta exigi, nan no tabata actua como minister di Dios mas. Jesús a bisa: “Paga . . . loke ta di César na César, pero loke ta di Dios na Dios.” (Mateo 22:21) Si e gobierno romano a exigi loke a pertenece na Dios, tal como adoracion of e bida di hende, cristian berdadero a sigi e conseho apostólico: “Nos mester obedece Dios como gobernante mas bien cu hende.”​—⁠Echo 5:⁠29.

⁸ E nengamento di cristian di promé di practica adoracion dje emperador i idolatría, bandona nan reunimento hunto, i no predica e bon nobo, a resulta den persecucion. Generalmente hende ta kere cu apóstol Pablo tabata ehecutá bao di ordu di emperador Nerón. Otro emperador, notablemente Domiciano, Marco Aurelio, Septimio Severo, Decio, i Diocleciano, també a persigi hende cristian di promé. Ora tal emperador i autoridad bao di nan a persigi hende cristian, nan siguramente no tabata actua como “minister di Dios.”

⁹ Tur esei ta sirbi pa ilustra cu aunque autoridad superior político ta sirbi di algun manera como “e arreglo di Dios” pa mantene un arreglo social humano ordená, nan ta sigi como un parti dje sistema di cosnan di mundo di locual Satanás ta dios. (1 Juan 5:19) Nan ta pertenece ne organizacion político mundial cu e “bestia salbahe” di Revelacion 13:​1, 2 ta simboliza. E bestia ta recibi su poder i autoridad for dje “dragón grandi,” Satanás e Diabel. (Revelacion 12:⁠9) Lógicamente, anto, sumision cristian na tal autoridad ta relativo, i no ta absoluto.​—⁠Compara cu Daniel 3:​16-18.

Respet apropiado pa autoridad

¹⁰ Sin embargo, esei no kier men cu hende cristian mester adopta un actitud insolente i desafiador pa cu autoridad superior político. Ta cierto cu hopi hende asina no ta necesariamente digno di recibi respet den nan bida privá, ni asta den nan bida público. Pero, e apóstolnan, mediante nan ehempel i nan conseho, a mustra cu homber cu autoridad mester ta tratá cu respet. Ora Pablo a presenta dilanti rey Herodes Agripa, culpable di incesto, el a papia cuné mustrando e onor apropiado.​—⁠Echo 26:​2, 3, 25.

¹¹ Pablo asta a bisa cu ta apropiado pa menciona autoridad di mundo den nos oracion, specialmente ora nan ta ser peticioná pa tuma decision cu ta afecta nos bida i nos actividad cristian. El a skirbi: “P’sei mi ta urgi, foral, pa súplica, oracion, rogamento, ofrenda di agradicimento, ser hací en cuanto tur sorto di hende, en cuanto rey i tur esnan cu ta den puesto halto; pa nos por sigi hiba un bida calmo i ketu cu plena debocion piadosa i seriedad. Esei ta excelente i aceptabel den bista di nos Salbador, Dios, kende su boluntad tá pa tur sorto di hende ser salbá i yega na un conocimento exacto dje berdad.” (1 Timoteo 2:​1-4) E resultado di nos actitud respetuoso tocante tal autoridad por tá cu nan ta permitínos mas libertad pa cumpli cu nos trabao di purba di salba “tur sorto di hende.”

¹² Apóstol Pedro a skirbi: “Pa causa di Señor somete boso na tur creacion humano: sea na rey como uno superior of na gobernador como uno cu el a manda pa duna castigo na malechor pero pa elogiá hacidor di bon. Pasobra asina ta e boluntad di Dios, cu door di haci bon boso ta bosalá e papiamento ignorante di hende irrazonabel. Sea como hende liber, i toch tene boso libertad, no como un disfraz pa maldad, sino como esclabo di Dios. Onra hende di tur sorto, tene amor pa tur e asociacion di rumanan, keda den temor di Dios, duna onor ne rey.” (1 Pedro 2:​13-17) Ki un conseho balanzá! Nos ta debe sumision total na Dios como esclabo di dje; i nos ta rindi sumision relativo i respetuoso na autoridad político mandá pa castiga malechor.

¹³ Tabata descubrí cu hopi autoridad seglar tin idea incorrecto mashá straño tocante Testigo di Jehova. Ta generalmente asina pa motibo di informacion incorrecto di parti di enemigo malicioso dje pueblo di Dios. Of por tá cu tur loke nan sa tocante nos nan a siña for di comunicacion público, locual no ta sin discriminacion den nan reportahe. Tin bez cu nos por elimina tal prehuicio cu nos actitud respetuoso i, ora ta posibel, duna autoridad un cuadro exacto dje trabao i creencia di Testigo di Jehova. Pa funcionario ocupá, e foyeto Los testigos de Jehová en el siglo veinte ta duna un splicacion breve. Pa mas informacion, bo por ofrece e buki Los testigos de Jehová, proclamadores del Reino de Dios, un instrumento excelente cu ta merece un lugar den cashi di buki di tur biblioteca local i nacional.

Autoridad den cas cristian

¹⁴ Ta keda bisto cu siendo cu Dios ta manda hende cristian pa mustra e debido respet pa autoridad di mundo, ta necesario també pa nan respeta e estructura di autoridad cu Dios a establece den famía cristian. Apóstol Pablo a skirbi cu palabra breve e principio di hefatura cu ta prevalece den e pueblo di Jehova Dios djawe. El a skirbi: “Mi kier pa boso sa cu e cabez di tur homber ta Cristo; pero e cabez di muher ta homber; pero e cabez di Cristo ta Dios.” (1 Corintio 11:⁠3) Esei ta e principio di teocrácia, of gobernacion di Dios. Kico e ta encerra?

¹⁵ Respet pa teocrácia ta cuminza na cas. Esposa cristian cu no ta mustra e debido respet pa autoridad di nan esposo​—⁠sea cu e ta un otro creyente of no​—⁠no ta teocrático. Pablo a conseha hende cristian: “Keda sumiso un na otro den temor di Cristo. Esposa keda sumiso na nan esposo mescos cu na Señor, pasobra esposo ta cabez di nan esposa mescos cu Cristo també ta cabez dje congregacion, e siendo salbador di tal cuerpo. Realmente, mescos cu e congregacion ta sumiso na Cristo, asina esposa també keda na nan esposo den tur cos.” (Efesio 5:​21-24) Mescos cu homber cristian tin cu keda sumiso ne hefatura di Cristo, muher cristian mester reconoce e sabiduría di sumision ne autoridad di nan esposo cu Dios a dúnanan. Esei por resulta den satisfaccion interno profundo pa esposa i, mas importante, e bendicion di Jehova Dios.

¹⁶ Yiu teocrático ta feliz mustrando e respet apropiado pa nan mayornan. Tabata profetizá dje generacion di hovenan den e último dianan di cu nan lo ser “desobediente na mayornan.” (2 Timoteo 3:​1, 2) Pero e Palabra inspirá di Dios ta bisa pa yiu cristian: “Yiunan, sea obediente na boso mayornan den tur cos, pasobra esei ta mashá agradabel den Señor.” (Colosense 3:20) Respet pa autoridad di mayornan ta agrada Jehova Dios i ta resulta den su bendicion.

¹⁷ Esei tabata ilustrá den e caso di Jesús. E relato di Lucas ta bisa: “El a baha cu [su mayornan] i a yega na Nazaret, i a sigi sumiso na nan. . . . I Jesús a sigi progresa den sabiduría i crecimento físico i den e fabor di Dios i di hende.” (Lucas 2:​51, 52) Jesús tabatin 12 aña di edad ne tempo ei, i e verbo griego usá ei ta enfatizá cu el a “sigi sumiso” na su mayornan. P’sei su sumision no a termina ora el a bira tiener. Si boso cu ta hoven kier progresa den spiritualidad i den fabor di Jehova i hende deboto, boso lo mustra respet pa autoridad padén i pafó di boso cas.

Autoridad den e congregacion

¹⁸ Mencionando e necesidad pa ordu den e congregacion cristian, Pablo a skirbi: “Dios no ta un Dios di desordu, sino di paz. . . . Laga tur cos sosode decentemente i cu arreglo [of, “cu ordu,” nota].” (1 Corintio 14:​33, 40) Pa tur cos tuma lugar na moda ordená, Cristo, e Cabez dje congregacion cristian, a delega autoridad na homber di fe. Nos ta leza: “El a duna algun como apóstol, algun como profeta, algun como evangelizador, algun como wardador i maestro, afin di reahusta e santonan, pa trabao ministerial . . . Pero, papiando e berdad, láganos cu amor crece den tur cos den esun cu ta e cabez, Cristo.”​—⁠Efesio 4:​11, 12, 15.

¹⁹ Den e tempo di fin aki, Cristo a nombra e “esclabo fiel i prudente” colectivo riba “tur loke ta di dje,” of riba interés di Reino riba tera. (Mateo 24:​45-47) Mescos cu den e promé siglo, tal esclabo ta ser representá pa un cuerpo gobernante di homber cristian ungí na locual Cristo a duna autoridad pa tuma decision i nombra otro superintendente. (Echo 6:​2, 3; 15:⁠2) També, e Cuerpo Gobernante ta delega autoridad na Comité di Sucursal, superintendente di districto i di circuito, i anciano den cada un dje mas cu 73.000 congregacion di Testigo di Jehova den tur e mundo. Tur homber cristian deboto ei ta merece nos apoyo i respet.​—⁠1 Timoteo 5:⁠17.

²⁰ En cuanto e respet cu nos ta debe esnan cu tin autoridad den e congregacion cristian, nos por haci un comparacion interesante cu e sumision cu nos ta debe autoridad seglar. Ora un persona ta viola un ley humano cu Dios ta aprobá, e castigo cu “esnan cu ta goberna” ta duna, realmente ta un expresion indirecto dje rabia di Dios “riba hende cu ta practica loke ta malu.” (Romano 13:​3, 4) Si Jehova ta rabia ora hende ta viola ley humano i ta falta respet apropiado pa autoridad di mundo, cuanto mas desagradá Dios ta keda si hende cristian dedicá ta despreciá principio bíblico i ta mustra falta di respet pa otro hende cristian cu tin autoridad!

²¹ En bez di recibi desaprobacion di Dios adoptando un actitud rebelioso of independiente, nos ta sigi e conseho di Pablo duná na hende cristian den Filipos: “P’sei, mi stimánan, mescos cu boso semper a obedece, no solamente durante mi presencia, sino awor cu mucho mas prontitud durante mi ausencia, sigi traha pa alcanza boso mes salbacion cu temor i temblamento; pasobra Dios ta esun cu, pa causa di su complacencia, ta actua den boso pa boso tin tanto e deseo como e actuacion. Sigi haci tur cos liber di kehamento i argumento, pa boso yega di ser liber di culpa i inocente, yiunan di Dios sin mancha den un generacion perverso i corrupto, den locual boso ta luza como iluminador den e mundo.” (Filipense 2:​12-15) Distinto dje generacion perverso i corrupto djawe cu ta trece riba su mes un crisis en cuanto autoridad, e pueblo di Jehova Dios ta someténan sin tarda na autoridad. Asina nan ta cosecha beneficio grandi, manera nos lo mira den e sigiente artículo.

[Footnotes]

[Study Questions]

1. E palabra “autoridad” ta relacioná cu kico, p’sei, pakico nos por bisa cu Jehova Dios ta e Autoridad Supremo?

2. Den un sentido, con gobernante humano di promé a admiti cu nan no tabatin derecho natural pa domina nan próhimo, i kico Jesús a bisa Poncio Pilato?

3. Kico apóstol Pablo a bisa tocante “autoridad superior,” i declaracion di Jesús i di Pablo ta haci cua pregunta presenta?

4. Kico Jesús i Pablo a yama Satanás, i Jesús no a nenga cua declaracion di Satanás?

5. (a) Con nos tin cu comprende e palabra di Jesús i di Pablo tocante autoridad humano? (b) Den ki sentido “Dios a pone [autoridad superior] den nan posicion relativo”?

6. Con cristian di promé a considera autoridad romano, i pakico?

7, 8. (a) Kico lezamento cuidadoso di Romano 13:​1-7 ta revela, i kico e contexto ta mustra? (b) Den cua circunstancia autoridad romano no a actua como “minister di Dios,” i den tal caso cristian di promé a adopta cua actitud?

9. (a) Kico ta keda cierto di autoridad superior político, i e bestia político ta recibi su poder i autoridad for di ken? (b) Kico nos por bisa lógicamente tocante sumision cristian na autoridad superior?

10, 11. (a) Con Pablo a mustra cu nos mester ta respetuoso pa cu homber cu autoridad? (b) Di ki manera i pakico nos por haci oracion “en cuanto rey i tur esnan cu ta den puesto halto”?

12, 13. (a) Pedro a duna cua conseho balanzá tocante autoridad? (b) Con nos por contraresta “e papiamento ignorante di hende irrazonabel” cu ta crea prehuicio contra Testigo di Jehova?

14, 15. (a) Cua base tin pa autoridad den famía cristian? (b) Esposa cristian mester tin cua actitud tocante nan esposo, i pakico?

16, 17. (a) Con yiu criá den famía cristian por distingi nan mes for di hopi hoven djawe, i cua motibo nan tin? (b) Con Jesús tabata un ehempel excelente pa hovenan djawe, i nan ta ser animá pa haci kico?

18. Ken ta Cabez dje congregacion cristian, i el a delega autoridad na ken?

19. (a) Ken Cristo a nombra riba tur pertenencia terrenal di dje, i el a duna autoridad special na ken? (b) Cua delegacion di autoridad ta tuma lugar den e congregacion cristian, i esei ta exigi kico di nos parti?

20. Cua ehempel ta mustra cu Jehova Dios ta desaprobá di hende cu ta falta respet pa otro hende cristian cu tin autoridad?

21. Nos ta keda contentu pa sigi cua conseho bíblico, i kico nos lo considerá den e sigiente artículo?

[Caption on page 18]

Jesús a bisa: “Paga loke ta di César na César”

[Caption on page 22]

Haci repaso

◻ Ken ta e Autoridad Supremo, i pakico su autoridad ta legítimo?

◻ Den ki sentido “Dios a pone [autoridad superior] den nan posicion relativo”?

◻ Na ki tempo autoridad superior no ta “minister di Dios” mas?

◻ Cua estructura di autoridad ta existi den famía cristian?

◻ Cua delegacion di autoridad ta existi den e congregacion cristian?