Capitulo 14
Ken Su Autoridad Bo Mester Reconocé?
1, 2. Tur forma di autoridad ta perhudicial? Splica.
“AUTORIDAD” ta un palabra ofensivo pa hopi hende. Esaki ta comprendibel, pasobra autoridad hopi bes ta ser abusá—na trabou, den e famia, i dor di gobiernonan. E Bijbel realísticamente ta bisa: “Hende a dominá hende pa su mes daño.” (Eclesiástes 8:9) Sí, hopi a dominá otronan dor di actua den un manera tiránico i egoista.
2 Pero no ta tur autoridad ta perhudicial. Por ehempel, por ser bisá cu nos curpa ta ehercé autoridad riba nos. E ta “manda” nos hala rosea, come, bebe i drumi. Esaki ta opresivo? No. Cumpliendo cu e demandanan aki ta pa nos beneficio. Aunke sumision na nos necesidadnan físico por ta sin cu nos ta pensa riba dje, tin otro formanan di autoridad cu ta rekerí nos sumision boluntario. Considerá algun ehempel.
E AUTORIDAD SUPREMO
3. Pakico Jehova ta ser yamá corectamente “Señor Soberano”?
3 Mas cu 300 biaha den e Bijbel, Jehova ta ser yamá “Señor Soberano.” Un soberano ta un persona cu ta poseé autoridad supremo. Kico ta duna Jehova e derecho pa e státus aki? Revelacion 4:11 ta contestá: “Bo ta digno, Jehova, asta nos Dios, pa ricibí e gloria i e onor i e poder, pasobra bo a crea tur cos, i pa causa di bo boluntad nan a existí i a ser creá.”
4. Con Jehova ta scoge pa ehercé su autoridad?
4 Como nos Creador, Jehova tin e derecho pa ehercé su autoridad manera e ta scoge. Esaki por parce spantoso, specialmente ora nos tuma na cuenta cu Dios tin un “abundancia di energia dinámico.” E ta ser yamá “Dios Todopoderoso”—un término cu na hebreo ta transmití e idea di forsa dominante. (Isaías 40:26; Génesis 17:1) Sin embargo, Jehova ta mustra su forsa den un manera bondadoso, pasobra su cualidad mas sobresaliente ta amor.—1 Juan 4:16.
5. Pakico no ta difícil pa someté na Jehova su autoridad?
5 Aunke Jehova a spierta cu lo e trece castigu riba malbadonan no repentí, Moises tabata conoc’é principalmente como “e Dios berdadero, e Dios fiel, cu ta warda pacto i bondad amoroso den e caso di esnan cu stim’é i esnan cu ta warda su mandamentunan.” (Deuteronomio 7:9) Djis imaginá! E Autoridad Supremo dje universo no ta forsa nos pa sirbi’é. Mas bien, nos ta ser atraí na dje pa motibu di su amor. (Romanonan 2:4; 5:8) Sometiendo nos mes na e autoridad di Jehova ta asta un placer, pasobra su leynan semper ta obra finalmente pa nos beneficio.—Salmo 19:7, 8.
6. Con e cuestion di autoridad a lanta den e hofi di Eden, i cu ki resultado?
6 Nos promé mayornan a rechasá e soberania di Dios. Nan kier a dicidí pa nan mes loke tabata bon i loke tabata malu. (Génesis 3:4-6) Como resultado, nan a ser expulsá for di nan cas paradísico. Despues di esei Jehova a permití hende crea structuranan di autoridad cu lo a capacitá nan pa biba den un sociedad ordená, aunke imperfecto. Cua ta algun dje autoridadnan aki, i te na ki grado Dios ta spera pa nos someté na nan?
“E AUTORIDADNAN SUPERIOR”
7. Ken ta “e autoridadnan superior,” i con nan posicion ta relacioná cu e autoridad di Dios?
7 Apostel Pablo a skirbi: “Laga tur alma sea sumiso na e autoridadnan superior, pasobra no tin autoridad sino dor di Dios.” Ken ta e “autoridadnan superior”? Pablo su palabra den siguiente versículonan ta mustra cu nan ta autoridadnan gobernamental humano. (Romanonan 13:1-7; Tito 3:1) Jehova no a originá autoridadnan gobernamental di hende, pero Dios a permití nan existí. P’esei Pablo por a skirbi: “E autoridadnan existente a ser poné den nan posicion relativo dor di Dios.” Kico esaki ta indicá tocante tal autoridad terenal? Cu e ta secundario, of inferior, na Dios su autoridad. (Juan 19:10, 11) P’esei, ora tin un conflicto entre ley di hende i ley di Dios, cristiannan mester ser guiá dor di nan concenshi bíblicamente entrená. Nan “mester obedecé Dios como gobernante mas bien cu hende.”—Echonan 5:29.
8. Con bo ta beneficiá dje autoridadnan superior, i con bo por mustra bo sumision na nan?
8 Sin embargo, hopi biaha, e autoridadnan superior gobernamental ta actua como ‘minister di Dios pa nos, pa nos bon.’ (Romanonan 13:4) Den ki maneranan? Wel, pensa dje cantidad di servicionan cu e autoridad superior ta percurá, manera postkantoor, polis i brandweer, higiena, i educacion. “Ta p’esei boso ta paga belasting tambe,” Pablo a skirbi, “pasobra nan ta Dios su sirbidornan público sirbiendo constantemente pa e propósito aki.” (Romanonan 13:6) Relacioná cu belasting of cualkier otro obligacion legal, nos mester “comportá nos mes onradamente.”—Hebreonan 13:18.
9, 10. (a) Con e autoridadnan superior ta pas den e areglo di Dios? (b) Pakico lo ta robes pa oponé e autoridadnan superior?
9 Tin biaha, e autoridadnan superior ta malusá nan poder. Esaki ta absolvé nos di nos responsabilidad pa permanecé den sumision na nan? No, e no ta haci’é. Jehova ta mira e maldad dje autoridadnan aki. (Proverbionan 15:3) E echo cu e ta tolerá gobierno humano no ta nificá cu e ta ignorá su corupcion; tampoco e ta spera di nos pa haci esei. En berdad, Dios pronto lo “machicá i pone un fin na tur e reinonan aki,” reemplasando nan cu e reinado di su mes gobierno hustu. (Daniel 2:44) Pero miéntras cu esaki no sosodé ainda, e autoridadnan superior ta sirbi un propósito útil.
10 Pablo a splica: “Esun cu oponé e autoridad a tuma un posicion contra e areglo di Dios.” (Romanonan 13:2) E autoridadnan superior ta Dios su “areglo” den e sentido cu nan ta mantené un midi di ordu, pasobra sin dje lo reina cáos i anarkia. Oponiendo nan lo ta contra e Scritura i sin sentido. Pa ilustrá: Imaginá cu bo a pasa dor di un operacion i e cosénan ta teniendo e herida cerá. Aunke e cosénan ta straño pa e curpa, nan ta sirbi un propósito pa un tempu limitá. Kitando nan prematuramente lo por ta perhudicial. Di igual manera, autoridadnan gobernamental humano no tabata parti dje propósito original di Dios. Sin embargo, tanten cu su Reino no ta gobernando e tera completamente ainda, gobiernonan humano ta mantené e comunidad uní, ehecutando un funcion cu ta pas den e boluntad di Dios pa e tempu actual. Nos mester keda anto sumiso na e autoridadnan superior, miéntras nos ta duna prioridad na Dios su ley i autoridad.
AUTORIDAD DEN E FAMIA
11. Con lo bo splica e principio di hefatura?
11 E famia ta e unidad básico di sociedad humano. Den dje un esposo i esposa por haña compañerismo recompensador, i yunan por ser protehá i entrená pa madures. (Proverbionan 5:15-21; Efesionan 6:1-4) Tal areglo onorabel mester ser organisá den un manera cu ta laga miembronan di famia biba den pas i armonia. Jehova su manera di cumpli cu esaki ta pa medio dje principio di hefatura, resumí den e palabranan aki, hañá na 1 Corintionan 11:3: “E cabes di tur homber ta Cristo; en buelta e cabes di un muher ta e homber; en buelta e cabes di Cristo ta Dios.”
12, 13. Ken ta e cabes di famia, i kico por ser siñá for di Jesus su manera di ehercé hefatura?
12 E esposo ta e cabes di famia. Sin embargo, tin un cabes riba dje—Jesucristo. Pablo a skirbi: “Esposonan, sigui stima boso esposanan, mescos cu Cristo tambe a stima e congregacion i a entregá su mes p’e.” (Efesionan 5:25) Un esposo ta reflehá su sumision na Cristo ora e ta trata su esposa den e manera cu Jesus semper a trata e congregacion. (1 Juan 2:6) Gran autoridad a ser duná na Jesus, pero e ta eherc’é cu e mayor suavedad, amor, i razonabilidad. (Mateo 20:25-28) Como hende, Jesus nunca a abusá di su posicion di autoridad. E tabata “di genio suave, i humilde di curason,” i el a yama su siguidornan “amigunan” en bes di “esclabo.” “Lo mi refrescá boso,” el a primintí nan, i esei ta loke el a haci.—Mateo 11:28, 29; Juan 15:15.
13 Jesus su ehempel ta siña esposonan cu hefatura cristian no ta un posicion di dominio severo. Mas bien, e ta un di respet i di amor di sacrificio propio. Esaki claramente ta excluí maltrato físico of verbal di bo casá. (Efesionan 4:29, 31, 32; 5:28, 29; Colosensenan 3:19) Si un homber cristian maltratá su esposa pues, su otro bon obranan lo ta sin balor, i su oracionnan lo ser strobá.—1 Corintionan 13:1-3; 1 Pedro 3:7.
14, 15. Con e conocimentu di Dios ta yuda un esposa pa ta sumiso na su esposo?
14 Ora un esposo ta imitá Cristo su ehempel, ta mas fácil pa su esposa cumpli cu e palabranan di Efesionan 5:22, 23: “Laga esposanan sea sumiso na nan esposonan como na e Señor, pasobra un esposo ta cabes di su esposa mescos cu Cristo tambe ta cabes dje congregacion.” Mescos cu un esposo mester ta sumiso na Cristo, un esposa mester ta sumiso na su esposo. Tambe e Bijbel ta haci claro cu esposanan capas ta merecé onor i elogio pa nan sabiduria divino i nan diligencia.—Proverbionan 31:10-31.
15 E sumision di un esposa cristian na su esposo ta relativo. Esaki ta nificá cu e mester obedecé Dios mas bien cu hende si siendo sumiso den un cierto asuntu lo resultá den violacion di ley divino. Asta e ora ei, un esposa su posicion firme mester ser mesclá cu un “spiritu ketu i suave.” Mester ta bisto cu e conocimentu di Dios a haci’é un mihó esposa. (1 Pedro 3:1-4) Mescos ta cierto di un homber cristian kende su esposa no ta creyente. Su cumplimentu cu principionan bíblico lo mester haci’é un mihó esposo.
16. Con yunan por imitá e ehempel cu Jesus a pone tempu e tabata un hóben?
16 Efesionan 6:1 ta describí e rol di yunan, declarando: “Sea obediente na boso mayornan den union cu e Señor, pasobra esaki ta hustu.” Yunan cristian ta sigui e ehempel di Jesus, kende a keda sumiso na su mayornan segun cu el a crece. Como un mucha obediente, el “a sigui progresando den sabiduria i den crecementu físico i den fabor cu Dios i cu hende.”—Lucas 2:51, 52.
17. E manera cu mayornan ta ehercé autoridad por tin cua efecto riba nan yunan?
17 E manera cu mayornan ta atendé nan responsabilidad lo por tin un influencia riba si nan yunan lo respetá autoridad of lo rebeldiá contra dje. (Proverbionan 22:6) Pues ta apropiado pa mayornan puntra nan mes, ‘Mi ta eherciendo mi autoridad amorosamente of severamente? Mi ta permisivo?’ Ta ser sperá di un mayor piadoso p’e ta amoroso i cu consideracion, tog firme i pegando na principionan piadoso. Apropiadamente, Pablo a skirbi: “Tatanan, no iritá boso yunan [literalmente, ‘no provocá boso yunan na rabia’], pero sigui cria nan den e disiplina i reglamentu mental di Jehova.”—Efesionan 6:4; Colosensenan 3:21.
18. Con mayornan mester duna disiplina?
18 Mayornan mester scudriñá nan métodonan di entrenamentu, specialmente si nan ta deseá pa nan yunan sea obediente i asina trece goso pa nan. (Proverbionan 23:24, 25) Den e Bijbel, disiplina ta primeramente un forma di instruccion. (Proverbionan 4:1; 8:33) E ta conectá cu amor i suavedad, no cu rabia i brutalidad. P’esei, mayornan cristian mester actua cu sabiduria i dominá nan mes ora di disipliná nan yunan.—Proverbionan 1:7.
AUTORIDAD DEN E CONGREGACION
19. Con Dios a percurá pa bon ordu den e congregacion cristian?
19 Siendo cu Jehova ta un Dios di ordu, ta razonabel cu lo e percurá liderato autoritativo i bon organisá pa su pueblo. Conforme cu esei, el a nombrá Jesus como Cabes dje congregacion cristian. (1 Corintionan 14:33, 40; Efesionan 1:20-23) Bou di Cristo su liderato invisibel, Dios a autorisá un areglo via cua ancianonan nombrá den cada congregacion ta pastoreá e tou cu empeño, di buena gana, i amorosamente. (1 Pedro 5:2, 3) Sirbidornan ministerial ta yuda nan den vários manera i ta rindi sirbishi balioso den e congregacion.—Filipensenan 1:1.
20. Pakico nos mester ta sumiso na ancianonan cristian nombrá, i pakico esaki ta probechoso?
20 Relacioná cu ancianonan cristian, Pablo a skirbi: “Sea obediente na esnan cu ta hibando delantera den boso i sea sumiso, pasobra nan ta vigilando boso alma como esnan cu lo rindi cuenta; pa nan por haci esaki cu goso i no cu suspiro, pasobra esaki lo ta severamente dañoso pa boso.” (Hebreonan 13:17) Sabiamente, Dios a confia superintendentenan cristian cu e responsabilidad pa percurá pa e necesidadnan spiritual di esnan den e congregacion. E ancianonan aki no ta componé un clase di clero. Nan ta sirbidornan i esclabonan di Dios, sirbiendo e necesidad di nan co-adoradornan, mescos cu nos Doño, Jesucristo, a haci. (Juan 10:14, 15) Sabiendo cu hombernan bíblicamente cualificá ta interesá den nos progreso i crecementu spiritual, ta animá nos pa cooperá i pa ta sumiso.—1 Corintionan 16:16.
21. Con ancianonan nombrá ta trata pa yuda compañeronan cristian spiritualmente?
21 Tin biaha, carnénan por dual of haña nan den peliger dor di factornan perhudicial di mundu. Bou dje liderato dje Wardador Principal, ancianonan como subwardador ta alerto na e necesidadnan di esnan bou di nan cuido i diligentemente ta duna nan atencion personal. (1 Pedro 5:4) Nan ta bishitá miembronan dje congregacion i ta ofrecé palabranan di animacion. Sabiendo cu e Diabel ta busca pa kibra e pas dje pueblo di Dios, ancianonan ta ehercé e sabiduria djariba tratando cu cualkier problema. (Santiago 3:17, 18) Nan ta traha duru pa mantené union i unidad di fe, algu cu Jesus mes a pidi p’e den oracion.—Juan 17:20-22; 1 Corintionan 1:10.
22. Cua yudansa e ancianonan ta percurá den casonan di malecho?
22 Kico si un cristian ta sufri algun maldad of ta bira desanimá pa motibu di a cometé un picá? Conseho trankilisante for dje Bijbel i e ancianonan su oracion sincero na su fabor por yuda pa restor’é na salú spiritual. (Santiago 5: 13-15) E hombernan aki, nombrá pa spiritu santu, tambe tin e autoridad pa duna disiplina i reprendé cualkier persona cu ta sigui un curso di malecho of cu ta pone e spiritualidad i limpiesa moral dje congregacion na peliger. (Echonan 20:28; Tito 1:9; 2:15) Pa por mantené e congregacion limpi, lo por ta necesario pa individuonan raportá picánan serio. (Levítico 5:1) Si un cristian cu a cometé un picá grave ta aceptá disiplina i reprendementu basá riba e Scritura i ta duna prueba di berdadero repentimentu, lo e ser yudá. Naturalmente, un violador persistente i no repentí dje ley di Dios ta ser expulsá.—1 Corintionan 5:9-13.
23. Kico superintendentenan cristian ta percurá pa e bienestar dje congregacion?
23 E Bijbel a profetisá cu bou di Jesucristo como Rey, hombernan spiritualmente maduro lo ser nombrá pa percurá consuelo, proteccion, i refrescamentu pa Dios su pueblo. (Isaías 32:1, 2) Nan lo hiba delantera como evangelisador, wardador, i maestronan pa di e manera ei promové crecementu spiritual. (Efesionan 4:11, 12, 16) Aunke superintendentenan cristian tin biaha ta reprendé, rectificá i exhortá compañeronan creyente, aplicacion dje ancianonan su siñansa saludabel basá riba Dios su Palabra ta yuda mantené tur riba e caminda di bida.—Proverbionan 3:11, 12; 6:23; Tito 2:1.
ACEPTA JEHOVA SU PUNTO DI BISTA DI AUTORIDAD
24. Riba cua cuestion nos ta ser probá diariamente?
24 E promé homber i muher a ser probá riba e cuestion di sumision na autoridad. No ta un sorpresa cu un prueba similar ta enfrentá nos tur dia. Satanas e Diabel a promové un spiritu di rebelion den humanidad. (Efesionan 2:2) El a haci e curso di independencia parce atractivamente superior cu e curso di sumision.
25. Kico ta e beneficionan di rechasá e spiritu rebelde di mundu i di ta sumiso na autoridad cu Dios ta ehercé of ta permití?
25 Sin embargo, nos mester rechasá e spiritu rebelde di mundu. Haciendo esei, nos lo haña cu sumision divino ta trece bendicionnan ricu. Por ehempel, nos lo evitá e ansiedadnan i frustracionnan cu ta comun pa esnan cu ta busca problema cu autoridadnan seglar. Nos lo reducí e friccion cu ta prevalecé den hopi famia. I nos lo disfrutá dje beneficionan di un asociacion caluroso i amoroso cu nos compañeronan cristian creyente. Riba tur cos, nos sumision piadoso lo resultá den un bon relacion cu Jehova, e Autoridad Supremo.
TEST BO CONOCIMENTU
Con Jehova ta ehercé su autoridad?
Ken ta “e autoridadnan superior,” i con nos ta keda sumiso na nan?
Ki responsabilidad e principio di hefatura ta pone riba cada miembro di famia?
Con nos por mustra sumision den e congregacion cristian?
[Kuadro na página 134]
SUMISO, NO REBELDE
Pa medio di nan actividad di predicacion público, Testigonan di Jehova ta señalá na e Reino di Dios como humanidad su único speransa pa berdadero pas i seguridad. Pero e proclamadornan celoso aki dje Reino di Dios, di ningun manera ta rebeldiá contra e gobiernonan bou di cua nan ta biba. Al contrario, e Testigonan ta entre e ciudadanonan di mas respetuoso i wardador di ley. “Si tur e denominacionnan religioso tabata manera testigonan di Jehova,” un oficial den un pais africano a bisa, “nos lo no tabatin asesinato, ladronicia, delincuencia, prizonero i bomnan atómico. Portanan lo no ser di lok dia den, dia afó.”
Reconociendo esaki, funcionarionan den hopi pais a permití e trabou di predicá dje Testigonan sigui sin ser strobá. Den otro paisnan, prohibicion of restriccion a ser kitá ora e autoridadnan a realisá cu Testigonan di Jehova tin un bon influencia. Ta manera apostel Pablo a skirbi tocante obedencia n’e autoridadnan superior: “Sigui haci loke ta bon, i boso lo haña elogio di dje.”—Romanonan 13:1, 3.