Informe Di Proclamador Di Reino

“Un monumento pe spiritu di cooperacion”

CERCA e punta di mas zuid di Spaña tin un barranca enorme di calichi manera toren yamá Peñón di Gibraltar. Pa cientos di aña, e barranca tabata un testigo mudo di pleitamento político i desacuerdo internacional. Na contraste, recientemente e Peñón di Gibraltar tabata testigo di un manifestacion di cooperacion i unidad rara bez mirá den e mundo djawe.

Solamente 3 km for dje Peñón ta situá e pueblo di La Línea, Spaña. Tabatei cu e construccion di un Salón di Reino di Testigo di Jehova a reuni hunto cientos di trahador boluntario ansioso pa contribui nan tempo i energía. Mientras cu nan a traha pa edifica un lugar adecuado pe adoracion dje Creador, Jehova Dios, asta e testigo mahestuoso di Peñón di Gibraltar a bira chikito den importancia compará cu e proyecto di construccion na progreso.

Proclamador di Reino den e parti di mundo ei a manda e sigiente informe:

“Nuebe cien trahador boluntario entusiasmá a traha dia i anochi, cuminzando diabierne atardi, dia 24 di September di 1993. Ya caba siet’or’ diadomingo atardi, un borchi nobo identificando e edificio como un Salón di Reino di Testigo di Jehova tabata poní i e bonita edificio nobo tabata ser usá pa net su promé reunion público.

“Hopi Testigo di Gibraltar ei cerca a cruza e frontera pa yuda nan rumanan spañol. Un trahador boluntario, natural di Gibraltar, a splica cu: ‘Desunion político no ta fria e spiritu di nos hermandad internacional.’ El a agrega: ‘Varios aña pasá, rumanan di La Línea a bini pa yuda nos traha nos Salón di Reino den Gibraltar, pues awor nos ta keda contentu pa mústranan bondad na buelta.’

“Pa duna apoyo na esfuerzo desenfrená dje dos congregacion di Testigo di Jehova i cientos di trahador diplomá dje region di Andalusia, e stad di La Línea a decidi di contribuí e pida di terreno necesario. E alcalde di La Línea a splica durante un bishita ne sitio di construccion: ‘Tradicionalmente, autoridad spañol local semper a contribui terreno pe construccion di misa católico. Pakico no haci mescos pa otro organizacion religioso? Mi ta keda mashá impresioná pe inegoísmo di trahador boluntario, i mi ta kere cu nan ta merece nos apoyo. Nos tin mester di mas di tal spiritu den e mundo desuní djawe.’

“El a mencioná e Salón di Reino como ‘un monumento pe spiritu di cooperacion.’ En berdad, e aspecto di mas impresivo no tabata e dibuho arquitectural ni e tamaño dje edificio. Mas bien, loke a impresioná hopi hende den e comunidad tabata e echo di cu trahador boluntario a haci tur e trabao i a lanté den 48 ora so!”

A keda bisto cu Testigo di Jehova den La Línea i den su becindario ta cumpli fielmente cu e palabra di Galatio 6:10. Den e texto apóstol Pablo a conseha otro hende creyente: “Realmente, anto, mientras cu nos tin tempo favorable pe, láganos obra loke ta bon pa cu tur, pero specialmente pa cu esnan relacioná cu nos den e fe.”