Bo Mester Resa na Jesus?

ALGUN hende ta haña ta apropiado pa resa na Jesus. Na Alemania hopi hende a ser siñá como mucha cu promé cu nan come nan mester pone nan mannan huntu i gradicí Jesucristo.

Segun Bijbel, Jesus en berdad ta ocupá un puesto masha haltu den cielu. Sin embargo, esei ta nificá cu nos mester resa na dje? Kisas bo ta entre esnan cu, debí na bo amor pa Jesus, ta dirigí oracion na dje. Pero kico Jesus mes ta pensa tocante tal oracionnan?

Na promé lugá, pakico e preguntanan aki ta lanta mes? Pasobra Bijbel ta bisa cu Jehova Dios ta e “Tendedor di oracion.” Nada straño anto, cu sirbidornan di Dios den tempu antiguo, manera e israelitanan, a resa solamente na Jehova Dios, e Todopoderoso.​—⁠Salmo 5:​1, 2; 65:⁠2.

Cosnan a cambia ora Jesus, e Yu di Dios, a bini na tera pa libra humanidad for di picá i morto? No, oracionnan a sigui ser dirigí na Jehova. Ora Jesus tabata riba tera e mes a resa frecuentemente na su Tata celestial, i el a siña otronan haci mescos. Djis pensa riba e oracion modelo, cua ta ser yamá tin biaha e Oracion di Señor of Nos Tata, cua ta un dje oracionnan mas conocí na mundu. Jesus no a siña nos resa na dje; el a duna nos e modelo aki: “Nos Tata cu ta den cielu, laga bo nomber sea santificá.”​—⁠Mateo 6:​6, 9; 26:​39, 42.

Awor laga nos wak e tópico mas a fondo dor di examiná loke oracion en realidad ta.

Kico Ta un Oracion?

Cada oracion ta un forma di adoracion. The World Book Encyclopedia ta confirmá esaki, bisando: “Oracion ta un forma di adoracion den cua un persona por ofrecé debocion, gradicimentu, confesion of súplica na Dios.”

Na un ocasion Jesus a bisa: “Ta pará skirbí, ‘Ta Jehova bo Dios bo tin cu adorá, i ta na dje so bo tin cu rindi sirbishi sagrado.’ ” Jesus a pega n’e berdad fundamental cu adoracion​—⁠p’esei tambe oracion​—⁠mester ser dirigí solamente na su Tata, Jehova Dios.​—⁠Lucas 4:8; 6:⁠12.

Reconociendo Jesus den Nos Oracionnan

Jesus a muri como un sacrificio di rescate pa humanidad, a ser resucitá dor di Dios, i a ser halsá na un puesto superior. Manera bo por imaginá, tur esaki a producí un cambio relacioná cu oracion aceptabel. Den ki manera?

Apostel Pablo ta describí e gran influencia cu Jesus su puesto ta ehercé riba oracion como lo siguiente: “P’e motibu aki mes tambe Dios a hals’é na un puesto superior i bondadosamente a dun’é e nomber cu ta ariba tur otro nomber, di manera cu den e nomber di Jesus tur rudia mester dobla di esnan den cielu i di esnan riba tera i di esnan bou di tera, i tur lenga mester reconocé abiertamente cu Jesucristo ta Señor p’e gloria di Dios e Tata.”​—⁠Filipense 2:​9-11.

E palabranan “den e nomber di Jesus tur rudia mester dobla” ta nificá cu nos mester resa na dje? No. E frase griego enbolbí aki “ta denotá e nomber a base di cua esnan cu ta buig rudia ta uni, a base di cua tur (πᾶν γόνυ) adoracion a uni. E nomber cu Jesus a ricibí ta conmové tur na adoracion uní.” (A Grammar of the Idiom of the New Testament, di G. B. Winer) En berdad, pa un oracion ser aceptabel, e mester ser presentá “den e nomber di Jesus,” pero, no obstante, e ta ser dirigí na Jehova Dios i ta sirbi pa su glorificacion. P’e motibu aki, Pablo ta bisa: “Den tur cos mediante oracion i súplica huntu cu gradicimentu, duna di conocé boso peticionnan na Dios.”​—⁠Filipense 4:⁠6.

Mescos cu un caminda ta hiba na un destinacion, asina Jesus ta e “caminda” cu ta hiba na Dios e Todopoderoso. “Ami ta e caminda i e berdad i e bida. Ningun hende ta yega n’e Tata sino pa medio di mi,” Jesus a siña e apostelnan. (Juan 14:⁠6) Pues, nos mester presentá nos oracionnan na Dios mediante Jesus i no directamente na Jesus mes.a

‘Pero,’ algun persona por puntra, ‘Bijbel no ta informá cu tantu disipel Esteban como apostel Juan a papia cu Jesus den cielu?’ Esei ta cierto. Sin embargo, e sucesonan aki no a enbolbé oracion, siendo cu Esteban i Juan cada un a mira Jesus den vision i a papia cuné directamente. (Echo 7:​56, 59; Revelacion 1:​17-19; 22:20) Corda cu simplemente papiamentu asta cu Dios riba su mes no ta nificá un oracion. Adam i Eva a papia cu Dios, ofreciendo excusa pa nan picá grandi, ora El a husga nan despues di nan picá den Eden. Nan papiamentu cuné den e manera ei no tabata un oracion. (Génesis 3:​8-19) P’esei, lo ta incorecto pa cita Esteban of Juan su papiamentu cu Jesus como evidencia cu nos realmente mester resa na dje.

Con e Nomber di Jesus ‘Ta Ser Inbocá’?

Bo tin duda persistente, hañando ainda cu ta apropiado pa resa na Jesus? Un señora a skirbi na un oficina di sucursal di Watch Tower Society: “Desafortunadamente, ainda mi no ta convencí cu e promé cristiannan no a resa na Jesus.” E tabatin na mente e palabranan di Pablo na 1 Corintio 1:​2, unda el a mencioná “tur esnan cu tur caminda ta inbocando e nomber di nos Señor, Jesucristo.” Sin embargo, mester nota cu den e idioma original, e expresion “inbocá” por nificá cosnan cu no ta oracion.

Con e nomber di Cristo a ser ‘inbocá’ tur caminda? Un manera tabata e echo cu e siguidornan di Jesus di Nazaret a reconoc’é abiertamente como e Mesías i “Salbador dje mundu,” efectuando hopi obra milagroso den su nomber. (1 Juan 4:14; Echo 3:6; 19:⁠5) P’esei, The Interpreter’s Bible ta declará cu e frase “inbocá e nomber di nos Señor . . . ta nificá confesá su autoridad como señor mas bien cu resa na dje.”

Aceptando Cristo i eherciendo fe den su sanger dramá, cua ta haci pordon di picá posibel, tambe ta nificá ‘inbocá e nomber di nos Señor, Jesucristo.’ (Compará Echo 10:43 cu 22:16.) I literalmente nos ta mencioná Jesus su nomber ki ora cu nos resa na Dios mediante dje. Pues, aunke Bijbel ta mustra cu nos por inbocá e nomber di Jesus, e no ta indicá cu nos mester resa na dje.​—⁠Efesio 5:20; Colosense 3:⁠17.

Loke Jesus Por Haci pa Nos

Jesus claramente a primintí su disipelnan: “Si boso pidi cualkier cos den mi nomber, lo mi haci’é.” Esaki ta rekerí pa haci oracion na dje? No. E pidimentu ta ser dirigí na Jehova Dios​—⁠pero den e nomber di Jesus. (Juan 14:​13, 14; 15:16) Nos ta peticioná Dios pa Su Yu, Jesus, aplicá su gran poder i autoridad na nos fabor.

Con Jesus ta comunicá cu su berdadero siguidornan awe? Pablo su descripcion dje congregacion di cristiannan ungí por sirbi como un ilustracion. El a compar’é cu un curpa i Jesucristo como e cabes. E “cabes” ta suministrá e miembronan dje curpa spiritual cu nan necesidadnan mediante “djoint i ligamentu,” of e medio i areglonan pa suministrá su congregacion cu alimentacion i direccion spiritual. (Colosense 2:19) Den un manera similar, awe Jesus ta usa “donnan den hombernan,” of hombernan spiritualmente cualificá, pa hiba delantera den e congregacion, asta administrando coreccion si esei bira necesario. No tin provision pa miembronan dje congregacion comunicá directamente cu Jesus of pa resa na dje, pero nan siguramente ta​—⁠sí, mester​—⁠resa n’e Tata di Jesus, Jehova Dios.​—⁠Efesio 4:​8-12.

Con Bo Ta Onra Jesus?

En cuanto e salbacion di hende, ki un papel clave Jesus ta ocupá! Apostel Pedro a sclama: “No tin salbacion den ningun otro, pasobra no tin otro nomber bou di cielu cu a ser duná entre hende mediante cua nos mester ta salbá.” (Echo 4:12) Bo ta conciente dje importancia di Jesus su nomber?

Dor di no dirigí oracion na Jesus personalmente, nos no ta degradando su posicion. Mas bien, Jesus ta ser onrá ora nos resa den su nomber. I mescos cu yu ta onra nan mayornan dor di ser obediente, nos ta onra Jesucristo dor di obedecé su mandamentunan, specialmente e mandamentu nobo pa stima un e otro.​—⁠Juan 5:23; 13:⁠34.

Oracionnan Aceptabel

Bo ta deseá na ofrecé oracionnan aceptabel? Anto dirigí nan na Jehova Dios, i haci esei den e nomber di su Yu, Jesus. Conocé e boluntad di Dios, i laga bo oracionnan reflehá tal comprendimentu. (1 Juan 3:​21, 22; 5:14) Saca fortalesa for dje palabranan di Salmo 66:20: “Bendicioná sea Dios, kende no a apartá mi oracion, ni su bondad amoroso for di mi.”

Manera nos a mira, oracion ta un forma di adoracion cu ta pertenecé exclusivamente na Dios Todopoderoso. Dor di dirigí tur nos oracionnan na Jehova Dios, nos ta indicá cu nos a tuma na pechu Jesus su instruccion pa resa: “Nos Tata cu ta den cielu.”​—⁠Mateo 6:⁠9.

[Footnotes]