Reuniendo Cu Esnan Cu Ta Teme Dios

“HENDE na tur parti ta anhelá pa libertad for di temor​—⁠temor di violencia, temor di desempleo i temor di malesa serio. Nos ta compartí e anhelo ei. . . . Pakico anto, nos ta considerando con pa cultivá temor?” E pregunta fasinante ei a ser hací dor dje orador dje discurso clave na cada un dje Congresonan di Distrito “Temor Piadoso,” cu a cuminsá na juni 1994.

E miyones di hende cu a asistí​—⁠promé na Nort América, anto mas despues na Europa, Central i Sur América, Africa, Asia i e islanan di laman​—⁠tabata ansioso pa siña cultivá tal temor. Pakico? Pasobra pa por ricibí e bendicionnan cu Jehova tin pa su pueblo ta dependé di si nos tin temor piadoso. Tabata pa siña tocante temor piadoso cu esnan cu a asistí n’e congreso a bini huntu, i durante e programa di tres dia, nan a siña hopi tocante e cualidad cristian esencial aki.

‘Teme Dios i Warda Su Mandamentunan’

Esei tabata e tema dje promé dia dje congreso, basá riba Eclesiastes 12:13. Kico ta nificá teme Dios? Den e promé parti mes dje programa, e presidente dje congreso a splica cu temor piadoso ta reflehá respet i un reverencia profundo pa Jehova i tambe un miedu saludabel di desagrad’é. Tal temor piadoso no ta un sintimentu insaludabel; e ta sano i corecto.

Con e temor saludabel aki ta beneficiá nos? E siguiente discurso, “No Bira Cansá i Entregá,” a splica cu temor piadoso lo motivá nos pa warda e mandamentunan di Dios cu goso. Huntu cu amor pa Dios i pa próhimo, tal temor lo inyectá nos cu energia spiritual. Sí, temor piadoso por yuda nos evitá di floha den e careda pa bida eterno.

Siguientemente tabatin entrevistanan riba e programa, presentando evidencia bibu cu temor piadoso por sostené nos. Esnan entrevistá a conta con un temor reverencial di Dios a influenciá nan pa continuá den e ministerio apesar di apatia, indiferencia of persecucion i a yuda nan wanta asta bou di pruebanan personal difícil.

Pero, pakico algun hende tin temor piadoso miéntras cu otronan no? Den e discurso “Cultivando i Beneficiando di Temor Piadoso,” e orador dje discurso clave a splica cu na Jeremías 32:​37-39, Jehova a primintí cu lo E duna un curason temeroso di Dios na Su pueblo. Jehova ta implantá temor piadoso den nos curason. Con? Pa medio di su spiritu santu i su Palabra inspirá, e Bijbel. Sin embargo, ta claro cu nos mester haci esfuerso diligente pa studia e Palabra di Dios i pa probechá plenamente dje provisionnan spiritual abundante cu el a haci. Esakinan ta incluí nos congresonan i reunionnan di congregacion, cuanan ta yuda nos siña tem’é.

E programa di atardi anochi a habri cu e exhortacion pa confia den Jehova i su Palabra. Despues di esaki a sigui un consideracion dje maneranan principal cu e Reino mester afectá nos bida como cristiannan.

Despues a bini e promé di tres simposio presentá n’e congreso aki. “Temor Piadoso Ta Impulsá Nos pa Obedecé Rekisitonan Divino” tabata e tema dje simposio aki, cua a enfocá atencion riba e famia. Lo siguiente ta un muestra dje conseho bíblico​—⁠i práctico​—⁠cu a ser ofrecé.

□ Pa esposonan: Temor piadoso mester impulsá un homber pa stima su casá mescos cu su mes curpa. (Efesio 5:​28, 29) Un homber no ta heridá su mes curpa intencionalmente, tampoco ta humiyá su mes dilanti su amigunan, of ta haci redu tocante su mes faltanan. Pues, anto, e mester trata su casá cu e dignidad i respet cu e ta duna su mes.

□ Pa esposanan: Jesus su temor piadoso a impuls’é pa ‘semper agradá Dios.’ (Juan 8:29) Esaki ta un excelente disposicion pa esposanan imitá den tratamentu cu nan esposonan.

□ Pa mayornan: Mayornan cristian por mustra temor piadoso dor di tuma nan responsabilidadnan di mayor na serio, mirando nan yunan como un herencia for di Jehova. (Salmo 127:⁠3) E meta primario di mayornan mester ta pa cria nan yunan pa bira cristiannan berdadero.

□ Pa yunan: Jehova ta instruí yunan pa obedecé nan “mayornan den union cu Señor.” (Efesio 6:⁠1) P’esei, obedecé nan mayornan ta nificá obedecé Dios.

E discurso di conclusion dje dia a toca nos emocionnan, pasobra el a considerá e sintimentunan profundo cu nos tur ta experenciá ora nos perde un ser stimá den morto. Sin embargo, mas o ménos na mitar dje discurso, tabatin un sorpresa. E orador a deleitá e auditorio anunciando e publicacion dje foyeto nobo Ora Un Persona Stimá Muri. E publicacion aki di 32 página i na tur color, ta duna hopi informacion cu por yuda esnan cu ta penando pa comprendé i trata cu e sintimentu i emocionnan cu ta bini ariba despues dje morto di un ser kerí. Bo a yega di hañá bo sin sa kico pa bisa un persona cu a perde un ser kerí? Un seccion dje foyeto aki ta considerá con nos por yuda esnan cu ta pena. Segun cu nan tabata scuchando e orador, hopi persona den auditorio tabata pensando riba un hende cu lo por beneficiá dje foyeto nobo aki.

‘Rindi Sirbishi Sagrado Cu Temor Piadoso i Reverencia’

Esei tabata e tema dje segundo dia, basá riba Hebreo 12:28. Durante e programa di mainta a presentá e segundo simposio, “Congregacionnan Cu Ta Cana den Temor di Jehova.” E promé parti a trata cu asistencia na reunionnan. Nos presencia na reunionnan ta demostrá nos respet pa Dios i pa su provisionnan spiritual. Dor di asistí, nos ta mustra cu nos ta teme su nomber i ta ansioso pa cumpli cu su boluntad. (Hebreo 10:​24, 25) E segundo orador a splica cu p’e congregacion den su totalidad cana den e temor di Jehova, cada individuo mester haci su parti den mantené conducta excelente. E orador final a papia tocante un privilegio i deber cu tur cristian tin​—⁠esei ta di declará e bon nobo sin stop. Pa cuantu tempu mas nos lo sigui predicá? Te ora Jehova bisa ta basta.​—⁠Isaías 6:⁠11.

“E Goso di Jehova Ta Bo Fortalesa” tabata e tema dje siguiente discurso, manera e ta ser tratá awor den e artículonan di studio den e revista aki. (Nehemías 8:10) Pakico Jehova su pueblo ta gososo? E orador a describí un cantidad di motibu. Un motibu masha importante ta cu un relacion íntimo cu Dios ta haci nos e pueblo di mas gososo riba tera. Djis pensa, e orador a corda esnan cu a asistí n’e congreso, cu nos tin e privilegio di ta entre e pueblo cu Jehova a atraé na Jesucristo. (Juan 6:44) Ki un motibu poderoso pa goso!

Un rasgo special di tur congreso ta e bautismo, i e Congresonan “Temor Piadoso” no tabata un excepcion. Den e discurso “Dedicacion i Bautismo den Temor di Jehova,” e orador a splica cu e obligacionnan personal di tur persona bautisá ta encerá cuater punto: (1) Nos mester studia e Palabra di Dios cu e yudansa di publicacionnan cu ta yuda nos comprend’é i aplik’é; (2) nos mester haci oracion; (3) nos mester asociá cu compañénan creyente na reunionnan di congregacion; i (4) nos mester duna testimonio dje nomber i Reino di Jehova.

E programa di diasabra atardi anochi a cuminsá cu e tema trankilisador “Un Pueblo Cu Jehova No A Bandoná.” Trint’i cincu siglo pasá, ora e nacion di Israel a enfrentá tempunan difícil, Jehova a duna un garantia mediante Moises, bisando: “Jehova bo Dios . . . lo no desampará bo ni lagá bo henteramente bandoná.” (Deuteronomio 31:⁠6) Jehova a cumpli cu e garantia ei dor di protegá e israelitanan ora nan a drenta e Tera Primintí i a tuma posesion di dje. Awe, ora nos ta enfrentá pruebanan difícil, nos tambe por tene pleno confiansa cu Jehova lo no bandoná nos, basta nos pega na dje i obedecé e conseho di su Palabra.

Con bo por haña deleite den lesamentu di Bijbel? Den e discurso “Lesa Dios Su Palabra, e Bijbel Santu, Diariamente,” e orador a sugerí pa lesa cu un mente investigador i haci pregunta tal como esakinan: Kico e relato aki ta siñá mi tocante Jehova su cualidadnan i camindanan? Con mi por ta mas manera Jehova den e aspectonan aki? Lesando Bijbel den e manera aki ta un experencia deleitabel i recompensador.

Siguientemente atencion a ser dirigí n’e di tres simposio dje programa, “Percuracionnan pa Yuda Esnan Cu Ta Teme Jehova.” Aunke Jehova kisas no ta efectuá milager na fabor di su sirbidornan awe, e siguramente ta extendé yudansa na esnan cu ta tem’é. (2 Pedro 2:⁠9) E simposio aki a considerá cuater percuracion for di Jehova pa yuda nos den e tempu crítico aki: (1) Pa medio di su spiritu, Jehova ta duna nos poder pa efectuá obranan muchu mas ayá cu nos propio forsa. (2) Pa medio di su Palabra, e ta percurá conseho i guia pa nos. (3) Pa medio dje rescate, e ta otorgá nos un concenshi limpi. (4) Pa medio di su organisacion, incluyendo e ancianonan, e ta proveé nos cu instruccion i proteccion. (Lucas 11:13; Efesio 1:7; 2 Timoteo 3:16; Hebreo 13:17) Dor di probechá plenamente dje percuracionnan aki, nos lo ta capas pa perseverá i asina gana Jehova su aprobacion.

E último discurso pa diasabra anochi tabata titulá “Jehova Su Dia Inspirador di Temor Ta Cerca,” basá riba e profecia di Malaquías. Tabatin dianan inspirador di temor den e historia di pasado, manera ora huicio a ser ehecutá riba Jerusalem na 70 E.C. Pero e dia mas inspirador di temor di tur experencia humano lo ta Jehova su binidero dia ora ‘vengansa ser trecé riba esnan cu no conocé Dios i esnan cu no ta obedecé e bon nobo tocante nos Señor Jesus.’ (2 Tesalonicense 1:​6-8) Ki pronto esei lo ta? E orador a declará: “E fin ta cerca! Jehova sa dje dia i dje ora ei. Lo e no cambia su orario. Nos ta ser exhortá pa perseverá cu pacenshi.”

Tabata difícil pa kere cu dos dia ya a pasa caba. Kico e dia final lo trece?

“Teme Dios i Dun’é Gloria”

E tema dje di tres dia tabata basá riba Revelacion 14:⁠7. Durante e programa di mainta, un seri di discurso a resaltá algun dje siñansanan di doctrina cu ta distinguí Testigonan di Jehova for di tur otro organisacion religioso.

Den e discurso “Lo Tin un Resureccion dje Hustunan,” e orador a lanta un pregunta interesante: “Durante e Dia di Huicio di mil aña ei, na ki tempu esnan cu a muri fiel den e añanan final aki di Satanas su sistema di cosnan lo ser resucitá?” E contesta? “Bijbel no ta bisa esei,” e orador a splica. “Sin embargo, no ta lógico cu esnan cu a muri den nos dia lo ser resucitá mas trempan afin di participá cu e multitud grandi dje sobrebibientenan di Armagedon den e inmenso trabou educacional cu mester tuma lugá durante henter e Dia di Huicio? Sigur cu sí!” Lo tin sobrebibiente? Siguramente lo tin. Siñansanan i ehempelnan di Bijbel cu ta sigurá nos di esaki a ser splicá claramente den e siguiente discurso, “Conserbá Bibu Atrabes dje Tribulacion Grandi.”

Testigonan di Jehova pa hopi tempu a comprendé cu Bijbel ta presentá dos speransadestino​—⁠bida eterno den un paradijs terenal pa miyones incontabel di hende i bida celestial inmortal pa un cantidad limitá cu lo reina cu Cristo den su Reino. E speransa celestial a ser considerá den e discurso “No Tene Miedu Trupa Chikitu.” (Lucas 12:32) En bista dje situacion mundial actual, e trupa chikitu mester ta sin miedu; cada un di nan mester wanta te n’e fin mes. (Lucas 21:19) “Nan actitud sin miedu,” e orador a bisa, “ta sirbi pa animá esnan dje multitud grandi. Nan tambe mester cultivá un actitud sin miedu segun cu nan ta anticipá liberacion durante e mayor tempu di dificultad cu a tera a yega di conocé.”

Na conclusion dje programa di mainta, e auditorio a mira cu deleite e drama basá riba Bijbel E Decisionnan Cu Abo Ta Enfrentá. Den e tempu di Hosué, i tambe dje profeta Elías, e israelitanan tabata na un crusada. Nan mester a tuma un decision. Elías a bisa: “Pa cuantu tempu mas boso lo cocochá riba dos diferente opinion? Si Jehova ta e Dios berdadero, bai sigui’é; pero si ta Baal, bai sigui’é.” (1 Rey 18:21) Awe, tambe, humanidad ta na un crusada. Esaki no ta tempu pa ta cocochando riba dos opinion diferente. Cua ta e decision corecto? E mésun cu e antiguo Hosué a tuma. El a bisa: “En cuanto ami i mi cas, nos lo sirbi Jehova.”​—⁠Hosué 24:⁠15.

A parce cu di ripiente tabata diadomingo atardi i ora p’e discurso público titulá “Pakico Teme e Dios Berdadero Awor.” Na Revelacion 14:​6, 7, henter humanidad ta ser instá: “Teme Dios i dun’é gloria.” Pakico ta urgente pa teme Dios awor? Pasobra, manera e texto ta sigui bisa, “e ora di huicio dor di dje a yega.” Pa medio di su Yu, awor entronisá como Rey dje Reino celestial di Dios, Jehova lo trece un conclusion n’e sistema actual di cosnan impuru i rebelde. E orador a splica cu esaki ta e único manera pa trece alivio pa esnan cu ta teme Dios i tambe pa rescatá i preservá nos cas terenal. Ya cu esakinan ta e dianan final dje sistema di cosnan aki, ta urgente pa nos teme e Dios berdadero awor!

Despues di un resúmen dje les di e Toren di Vigilancia p’e siman ei, e último orador a subi plataforma. El a splica cu como resultado dje programa di congreso, temor piadoso a haña mayor nificacion pa esnan cu a asistí n’e congreso. El a enfatisá e hopi beneficionan cu ta bini pa esnan cu ta teme Dios. E orador a anunciá e publicacion di un video nobo​—⁠United by Divine Teaching. E ta resaltá e aspectonan único dje Congresonan Internacional “Siñansa Divino” tené na 1993-1994. Segun cu e discurso tabata yegando na su conclusion, hopi a puntra nan mes, ‘Kico nos por anticipá p’e siguiente aña?’ Congresonan di distrito di tres dia na hopi lugá.

Na conclusion, e orador a referí na Malaquías 3:​16, cu ta bisa: “N’e tempu ei esnan den temor di Jehova a papia un cu otro, cada un cu su compañé, i Jehova a sigui presta atencion i scucha. I un buki di recuerdo a cuminsá ser skirbí dilanti dje pa esnan den temor di Jehova i pa esnan pensando riba su nomber.” Esnan cu a asistí n’e congreso a sali djei cu un determinacion claro pa pensa riba Jehova su nomber i sirbi’é cu temor piadoso.

[Plachi na página 24]

Candidatonan pa bautismo mester sigui manifestá temor piadoso

[Plachi na página 25]

E drama “E Decisionnan Cu Abo Ta Enfrentá” a convencé e scuchadornan dje necesidad pa ta decisivo en cuanto sirbi Jehova

[Plachi na página 26]

Esnan cu a asistí n’e congreso tabata contentu pa ricibí e foyeto nobo “Ora Un Persona Stimá Muri”