Ki Bon Por Resultá for di Papia Tocante Religion?

MAYORNAN ansiosamente ta warda riba e promé palabranan cu nan baby ta expresá. Ora nan tende un sílaba ripití vários bes meimei dje zonidonan cu e baby ta haci, kisas “Mama” of “Dada,” nan curason ta pasa over di felicidad. Mesora nan ta compartí e noticia di esaki cu tantu amigu como bisiña. E promé comunicacion di un baby berdaderamente ta bon noticia cu ta trece deleite.

E zonidonan, bistanan i holornan cu e sentidonan dje mucha chikitu ta capta ta pon’é reaccioná. Naturalmente, reaccionnan ta varia. Pero si, despues di un periodo di tempu, un mucha ainda no ta reaccioná n’e stimulacionnan aki, cu bon razon e mayornan lo preocupá cu tal bes nan yu no ta desaroyando bon.

Babynan ta reaccioná mihó na personanan cu nan conocé. Ora un mama ta cariciá un baby, generalmente esei ta resultá den un sonrisa grandi. Sin embargo, si un pariente cu ta di bishita mishi cuné, esei por pon’é yora, asta resistí caprichosamente p’e persona ei cargu’é. Mayoria pariente cu ta experenciá esaki no ta entregá. Segun cu e baby ta siña conocé nan mihó, nan ta deleitá ora e barera di infamiliaridad ta kita i poco poco e sonrisa dje baby ta aparecé.

Di igual manera, hopi adulto ta vacilá pa papia abiertamente tocante nan creencianan religioso cu un persona cu no ta un conocí di hopi tempu. Tal bes nan no ta comprendé pakico un persona desconocí lo kier combersá en cuanto un asuntu personal—religion. E consecuencia ta cu nan ta permití un barera bin meimei di nan i esnan cu ta papia tocante e Creador. Nan asta ta nenga di papia tocante algu cu ta, al fin i al cabo, un característica natural di humanidad, e deseo pa adorá.

En realidad, nos mester ta interesá pa siña tocante nos Creador i combersando cu otronan por pone nos den e posicion pa siña. Esei ta asina pasobra for di hopi tempu Dios a ser conectá cu comunicacion abierto. Laga nos wak con.

‘Scucha i Siña’

Dios su promé comunicacion cu un humano tabata cu Adam den e hofi di Eden. Sin embargo, despues cu Adam i Eva a peca, nan a preferá di sconde ora Dios a yama nan, ora e tabata kier a sigui comunicá cu nan. (Génesis 3:8-13) Sin embargo, Bijbel ta registrá detayenan di homber i muhernan cu gustosamente a ricibí comunicacion for di Dios.

Dios a comunicá cu Noe tocante e destruccion inminente dje mundu malbado di su dia; cu esei Noe a bira “un predicador di husticia.” (2 Pedro 2:5) Como bocero di Dios pa su generacion, Noe no solamente a desplegá fe den Dios su trato cu hende, sino tambe a declará públicamente cu e ta na Jehova su banda. Ki reaccion Noe a haña? Lamentablemente, mayoria di su contemporáneonan “no a haci caso te cu e diluvio a bin i a hiba nan tur.” (Mateo 24:37-39) Pero, felismente pa nos, siete miembro di Noe su famia a scucha, a obedecé Dios su instruccionnan i a sobrebibí e Diluvio global. Tur humano na bida awe ta nan desendientenan.

Mas despues, Dios a comunicá cu henter un nacion di hende, Israel di antigua. Mediante Moises, Dios a duna nan e Dies Mandamentu i rond di 600 otro leynan mes obligatorio. Jehova a spera di e israelitanan pa obedecé nan tur. Moises a duna instruccion cu cada siete aña, durante e Festival anual di Cabaña, mester a lesa e Ley di Dios na bos haltu. “Congregá e pueblo,” el a instruí, “e homber i muhernan i e chikitunan i bo residente stranhero cu ta den bo portanan.” Cu ki propósito? “Afin cu nan por scucha i afin cu nan por siña, ya cu nan mester teme Jehova boso Dios i percurá pa cumpli cu tur e palabranan dje ley aki.” Tur mester a scucha i siña. Imaginá con nan lo mester a disfrutá di papia cu otro tocante loke nan a tende!—Deuteronomio 31:10-12.

Mas cu cincu siglo despues, e rey di Huda Jehósafat a organisá prins i levitanan den un campaña pa rebibá e adoracion puru di Jehova. E hombernan aki a biaha atrabes dje stadnan di Huda siñando Jehova su leynan n’e habitantenan. Dor di percurá pa e leynan aki ser considerá públicamente, e rey a demostrá su curashi pa cu adoracion berdadero. Pa loke ta su súbditonan, nan mester a scucha i siña.—2 Crónicanan 17:1-6, 9.

Dunando Testimonio Mediante un Consideracion

Dios a despachá su mes Yu, Jesus, na tera pa sirbi como Su Portabos. (Juan 1:14) Miéntras tres disipel tabata mirando Jesus ser transfigurá nan dilanti, nan a tende e bos di Dios mes declará: “Esaki ta mi Yu, esun stimá, kende mi a aprobá; scuch’é.” (Mateo 17:5) Nan a obedecé di bon gana.

Di igual manera, Jesus a instruí su apostelnan pa declará Dios su propósitonan na otronan. Pero ora a ked’é rond di seis luna mas di ministerio riba tera, Jesus a duna di conocé cu e trabou di predicá e Reino di cielu tabata asina inmenso cu lo bai tin mester di mas disipel. El a siña 70 di nan con pa papia tocante e Reino di Dios cu personanan desconocí i despues a manda nan bai plama e mensahe públicamente. (Lucas 10:1, 2, 9) Poco tempu promé cu el a bolbe bek cerca su Tata den cielu, Jesus a urgi su siguidornan pa tuma e iniciativa pa papia cu otronan tocante e mensahe aki, asta dunando nan e mandamentu: “Bai, anto, i haci disipel di hende di tur nacion, . . . siñando nan pa warda tur e cosnan cu mi a manda boso.” (Mateo 28:19, 20) Rond mundu, cristiannan berdadero awe ta cumpli cu e comision ei dor di papia tocante e bon nobo di Dios su Reino cu nan próhimo. E consideracionnan aki ta permití nan duna testimonio dje berdad tocante e Creador, Jehova.—Mateo 24:14.

Consideracionnan Pacífico i Edificante

Di ki manera Jesus su disipelnan mester a papia tocante nan creencianan cu otronan? Nan no mester a iritá nan opositornan, ni nan no mester a discutí cu nan opositornan. Mas bien, nan mester a busca te haña esnan cu a ricibí e bon nobo gustosamente i e ora ei presentá e evidencia for dje Scritura pa apoy’é. Naturalmente, Dios a observá e reaccion di esnan cu a bin den contacto cu e disipelnan di su Yu, net manera Jesus a declará: “Esun cu ricibí boso ta ricibí mi tambe, i esun cu ricibí mi ta ricibí tambe esun cu a mandá mi.” (Mateo 10:40) Ki un rechaso serio ora cu mayoria di Jesus su contemporáneonan a rechasá su mensahe!

“Un esclabo di Señor no tin mester di bringa,” apostel cristian Pablo a consehá. Mas bien, e “mester ta amabel pa cu tur, capacitá pa siña, manteniendo su mes frená bou di maldad, instruyendo cu suavedad esnan cu no ta faborablemente dispuesto; ya cu kisas Dios lo duna nan repentimentu cu ta hiba na un conocimentu exacto dje berdad.” (2 Timoteo 2:24, 25) E manera cu Pablo a proclamá e bon nobo n’e hendenan di Aténas, Grecia, ta suministrá un ehempel excelente. El a razoná cu e hudiunan den nan sinagoga. Diariamente den e plasa di mercado el a papia cu “esnan cu pa casualidad tabata ei banda.” Aunke algun, sin duda, simplemente tabata gusta scucha na ideanan nobo, Pablo a papia di manera directo i bondadoso. El a considerá cu su oyentenan Dios su mensahe, cual a haci un apelacion riba nan pa repentí. Nan reaccion tabata hopi parecido na esun di hende awe. “Algun a cuminsá haci mofa, miéntras cu otronan a bisa: ‘Nos lo tendé bo tocante esaki asta na un otro ocasion.’ ” Pablo no a insistí pa prolongá e consideracion. Despues di a predicá su mensahe, el “a sali for di meimei di nan.”—Echonan 17:16-34.

Mas despues, Pablo a bisa miembronan dje congregacion cristian na Efeso cu e ‘no a nenga di bisa ningun dje cosnan cu tabata probechoso ni di siña públicamente i di cas pa cas.’ Ademas, el a ‘papia cabalmente tocante repentimentu pa cu Dios i fe den Jesucristo tantu cu hudiunan como cu griegonan.’—Echonan 20:20, 21.

E ehempelnan bíblico aki ta revelá con Dios su sirbidornan fiel den tempu bíblico a papia tocante religion. Pues awe, Testigonan di Jehova obedientemente ta papia tocante religion cu nan próhimo.

Consideracionnan cu Ta Logra Hopi

‘Tende e Palabra di Dios.’ ‘Scucha su mandamentunan.’ Ki frecuentemente expresionnan asina ta aparecé den Bijbel! Bo por respondé na e instruccionnan bíblico aki e próximo biaha cu Testigonan di Jehova papia cu bo. Scucha n’e mensahe cu nan ta trece pa bo for dje Bijbel. E mensahe aki no ta político sino ta boga pa un gobiernu celestial dor di Dios, esta, su Reino. Esaki ta e medio di Dios pa kita e causanan di conflictonan actual. (Daniel 2:44) Despues di esei e gobernacion aki dor di Dios for di cielu lo percurá pa henter e tera ser transformá den un paradijs manera e hofi di Eden.

Un ex-detective policial frecuentemente a nenga di scucha ora Testigonan di Jehova tabata papia cuné tocante Bijbel. Pero cu e aumento di crímen cu e mester a enfrentá, el a bira decepcioná tocante bida. Pues el a bisa e próximo Testigo cu a bishit’é cu lo e investigá e evidencia dje mensahe bíblico. A surgi consideracionnan frecuente. Aunke e oficial di polis a muda vários biaha, gustosamente e Testigonan a busk’é te cu nan hañ’é den cada lugá nobo pa continuá cu e consideracionnan. Finalmente e oficial a reconocé: “E evidencia cu mi tabata buscando, tur e tempu tabata ei mes den e Scritura Santu. Si e Testigonan ei no a perseverá pa papia cu mi, ainda lo mi ta eifó puntrando mi mes cua t’e nificacion di bida. Echo ta, cu mi a bin conocé e berdad i mi ta bai dedicá e resto di mi bida en busca di otronan cu ta buscando Dios mescos cu ami tabata busk’é.”

Oyentenan interesá berdaderamente kier sa mas. Cu tur razon nan ta spera di haña motibunan p’e creencianan cu ta ser presentá. (1 Pedro 3:15) Mescos cu un mucha chikitu constantemente ta haci su mayornan yen di pregunta i ta spera pa nan contestá nan, abo cu tur razon ta spera di e Testigonan pa duná bo contestanan sólido. Bo por ta sigur cu nan gustosamente lo bolbe bek i considerá e mensahe bíblico mas aleu cu bo.

Tal bes bo sa caba algu dje Bijbel. Kisas bo ta realisá cu loke Dios ta spera di bo lo encerá algun cambio den e manera cu bo ta hiba bo bida. No vacilá pa tuma accion pa motibu di miedu cu Dios su rekisitonan lo encerá demasiado sacrificio. Nan lo solamente trece berdadero felicidad. Lo bo comprendé esaki segun cu bo ta progresá paso pa paso.

Promé cu tur cos, considerá ken Jehova ta, kico e ta spera di bo i loke e ta ofrecé. Pidi e Testigonan pa mustrá bo loke Bijbel ta bisa tocante esaki. Verificá loke nan ta bisa den bo mes Bijbel. Mirando cu e Testigonan ta razonabel den loke nan ta presentá como e berdad tocante religion, sin duda lo bo kier profundisá den hopi mas cos excelente cu nan por compartí cu bo for dje Scritura.—Proverbionan 27:17.

Bo ta bon biní pa observá e Testigonan na nan lugá local di reunion, e Salon di Reino. Ei lo bo tende consideracionnan probechoso di Dios su Palabra. Lo bo wak con esnan cu ta presente ta disfrutá di papia un cu otro tocante Dios su propósito. Permití e Testigonan aki yudá bo siña e berdad tocante Dios su boluntad pa nos awe. Respondé na Dios su invitacion pa papia tocante adoracion berdadero i ricibí su sonrisa di aprobacion, asta bida eterno den Paradijs.—Malakías 3:16; Juan 17:3.

[Plachi na página 5]

Noe a papia abiertamente tocante Dios su propósito

[Plachinan na página 7]

Mescos cu Pablo a haci den Aténas di antigua, Testigonan di Jehova ta siña berdadnan bíblico na otronan