Biba Conforme Bo Voto Matrimonial!

E DIA di casamentu ta un dia gososo. Tambe e ta un ocasion masha serio. E bruid i e bruidegom ta haci un promesa solem cu lo afectá e resto di nan bida. Esnan presente n’e casamentu como huésped ta testigo dje promesa solem aki, pero Jehova Dios ta e Testigo principal.

Bijbel no ta rekerí proceduranan specífico of un tipo special di ceremonia di casamentu. Sin embargo, como reconocimentu di su orígen divino, generalmente matrimonio ta ser hací solem mediante votonan matrimonial durante un ceremonia religioso. Pa algun aña Testigonan di Jehova ta usando e siguiente voto matrimonial: “Ami —— ta tumá bo —— como mi (esposa/esposo) casá, pa stima i apreciá (Bruid: i respetá profundamente) na armonia cu e ley divino manera e Scritura Santu ta declará pa (esposanan/esposonan) cristian, pa e tempu cu nos tur dos lo biba huntu riba tera segun e areglo matrimonial di Dios.a

Algu pa Pensa Ariba

Si bo tin idea di casa, lo ta masha balioso pa pensa tocante e profundidad i nificacion dje voto aki promé cu e dia di casamentu. Sálomon a bisa: “No sea lihé respecto bo boca; i en cuanto bo curason, no sea purá pa producí un palabra dilanti e Dios berdadero.” (Eclesiástes 5:2) Kico si bo ta casá caba? E ora ei lo bo saca beneficio for di meditá riba e importancia dje promesa solem cu bo a haci dilanti Jehova. Bo ta bibando conforme cuné? Cristiannan ta tuma nan promesanan mashá na serio. Sálomon a sigu bisa: “Loke bo primintí den voto, pagu’é. Ta mihó pa bo no haci un voto, cu haci un voto i no pagu’é. No permití bo boca pone bo carni peca, ni bisa dilanti e angel cu tabata un ekibocacion.” —Eclesiástes 5:4-6.

Un consideracion di frase-pa-frase dje voto matrimonial sin duda lo enrikesé bo comprendimentu dje promesa solem aki.

“Ami—— ta tumá bo”: Esakinan ta e promé palabranan dje voto. Nan ta resaltá cu bo ta aceptá responsabilidad personal pa bo decision di casa.

Bou dje areglo cristian, no tin obligacion bíblico pa casa. Jesucristo mes no a casa nunca i a recomendá solteria pa esnan cu “por traha lugá p’e.” (Mateo 19:10-12) N’e otro banda, mayoria di Jesus su apostelnan tabata hombernan casá. (Lucas 4:38; 1 Corintionan 9:5) Ta claro cu e decision pa casa ta unu personal. Ningun hende tin e autoridad bíblico pa forsa un otro pa casa.

P’esei, bo ta responsabel pa a scoge pa casa. Probablemente, abo a selectá esun cu ken bo ta casa. Ora bo haci e voto matrimonial, bisando, ‘Ami ta tumá bo——,’ bo ta tuma of aceptá e persona ei cu su birtudnan—pero tambe cu su fayonan.

Cu tempu probablemente lo bo descubrí característicanan cu no tabata bisto den e personalidad di bo partner. Lo tin decepcionnan de bes en cuando. Bijbel ta bisa cu “tur a peca i no ta alcansá e gloria di Dios.” (Romanonan 3:23) P’esei kisas lo bo tin cu haci ahustenan pa por acomodá bo partner. Esaki por ta difícil, i tin biaha kisas bo tin gana di entregá. Pero corda, e voto matrimonial ta ser hací den presencia di Jehova. E por yudá bo haña éxito.

“Como mi (esposa/esposo) casá”: For di n’e promé casamentu, ora Eva a ser duná den matrimonio na Adam, Jehova Dios a bisa cu “nan mester bira un solo carni.” (Génesis 2:24; Mateo 19:4-6) Pues e union matrimonial ta e relacion di mas íntimo cu por existí entre dos hende. Matrimonio ta trecé bo den un relacion nobo di famia. Bo ta aceptá un hende como bo “esposa casá” of “esposo casá.” E ta distinto for di cualkier otro relacion. Accionnan cu ta causa poco daño den otro relacionnan por causa herida profundo den e areglo matrimonial.

Tuma, por ehempel, e conseho bíblico cu nos por haña na Efesionan 4:26. Ei Bijbel ta bisa: “Rabia, i tog no peca; no laga solo baha cu boso den un estado provocá.” Tal bes no semper bo a resolvé bo problemanan cu parientenan i amigunan mes lihé cu bo mester a hacié. Pero bo partner ta mas cerca cu cualkier otro pariente of amigu. Keda sin resolvé asuntunan lihé cu bo casá lo por pone e relacion special di famia entre boso dos na peliger.

Bo ta permití un desacuerdo entre abo i bo partner desaroyá den un fuente continuo di iritacion i disgustu? Desacuerdonan i situacionnan di agitacion ta persistí pa vários dia? Pa por biba conforme bo voto, ora dificultadnan presentá no laga un dia pasa sin haci pas cu bo partner. Esaki ta nificá pordoná i lubidá i tambe reconocé bo mes faltanan i erornan.—Salmo 51:5; Lucas 17:3, 4.

“Pa stima”: E futuro esposo ta primintí den voto “pa stima i apreciá” su bruid. E stimacion aki ta incluí e amor romántico cu probablemente a trece nan huntu. Pero amor romántico no ta suficiente. E amor cu un cristian ta primintí den voto na su partner ta mas profundo i mas completo.

Efesionan 5:25 ta bisa: “Esposonan, sigui stima boso esposanan mescos cu Cristo tambe a stima e congregacion.” Jesus su amor p’e congregacion siguramente no ta dje mésun categoria cu e amor romántico entre homber i muher. E palabranan “stima” i “a stima” cu ta ser usá den e texto aki ta bini dje palabra a·ga’pe, cu ta referí na amor guiá pa principio. Aki Bijbel ta manda esposonan manifestá amor constante, inkebrantabel i duradero pa nan esposanan.

E no ta simplemente un tipo di emocion di “mi stimá bo pasobra bo stimá mi.” Un esposo ta busca e bienestar di su esposa asta riba esun di su mes, i e esposa ta stima su esposo den e mésun manera. (Filipensenan 2:4) Cultivando un amor profundo pa bo partner lo yudá bo biba conforme bo voto matrimonial.

“Apreciá”: Segun un diccionario, “apreciá” ta nificá ‘stima tiernamente, sinti of mustra cariño pa.’ Bo mester expresá bo amor tantu cu palabra como cu accion! Un esposa specialmente tin e necesidad di ricibí demostracion constante dje amor di su esposo. Kisas su esposo ta percurá bon pa su necesidadnan físico, pero esaki no ta suficiente. Tin esposanan cu tin suficiente cuminda i un cas comfortabel pero cu ta desesperadamente infelis debí cu nan partnernan matrimonial ta neglishá nan of ignorá nan.

N’e otro banda, un esposa cu sa cu e ta ser stimá i apreciá tin tur motibu pa ta felis. Naturalmente, mescos ta conta tambe p’e esposo. Amor berdadero ta ser aumentá mashá dor di expresionnan di cariño. Den e Cantica di Sálomon, e wardador amante ta sclama: “Ki bunita bo expresionnan di cariño ta, O mi ruman muher, mi bruid! Bo expresionnan di cariño ta cuantu mas mihó cu biña i e fragancia di bo zetanan cu tur sorto di perfume!”—Cantica di Sálomon 4:10.

“I respetá profundamente”: Atrabes dje siglonan, hende homber a bin ta maltratá i degradá hende muher. Asta awe, segun e revista World Health, “violencia contra hende muher ta tuma lugá den tur pais i den tur clase social i económico. Den hopi cultura, maltrato di esposa ta ser considerá como un derecho di homber.” Mayoria hende homber kisas no ta culpabel di tal conducta. Tog, ta parce cu hopi hende homber no ta mustra berdadero interes den e cosnan cu ta concerní hende muher. Como resultado, hopi hende muher a desaroyá un actitud negativo pa cu hende homber. Algun esposa a yega di bisa, “Mi stima mi esposo, pero mi simplemente no por respet’é!”

Sin embargo, Jehova Dios ta duna balor n’e hende muher cu ta haci su posibel pa respetá su esposo—asta si e keda sin cumpli cu e esposa su expectativanan de bes en cuando. E esposa ta reconocé cu e homber tin un asignacion of posicion cu Dios a dun’é. (1 Corintionan 11:3; Efesionan 5:23) Respet profundo pa su esposo pues ta parti di su adoracion i obedencia na Jehova. Dios no ta pasa por haltu dje obedencia di muhernan piadoso.—Efesionan 5:33; 1 Pedro 3:1-6; compará cu Hebreonan 6:10.

Respet den matrimonio mester ta mutuo, i e mester ser ganá en bes di meramente ser sperá of exigí. Por ehempel, den e areglo matrimonial no tin lugá pa abla sarcástico of ofensivo. Lo no ta amoroso ni respetuoso pa haci remarkenan di menosprecio tocante bo esposo of esposa. Nunca ta bon pa revelá e debilidadnan di bo partner na otronan of papia tocante nan den público. Asta den chansa un hende por mustra falta grave di respet den e área aki. E palabranan di Efesionan 4:29, 32 ta aplicá tantu na esposo como esposa. Ei Bijbel ta bisa: “No laga ningun palabra putrí sali for di boso boca, sino cualkier palabra cu ta bon pa edificacion segun tin necesidad p’esei . . . Bira bondadoso cu otro, tiernamente compasivo.”

“Na armonia cu e ley divino manera e Scritura Santu ta declara”: Dios kier pa nos disfrutá di libertad di scoge i di accion. E no ta carga nos cu un lista largu di reglanan cu ta regulá bida casá. Sin embargo, pa nos mes bon el a declará algun principio.

Awe, tin un variedad abundante di material imprimí tocante matrimonio, i hopi hende tin nan propio filosofianan. Pero tene cuidou! Riba e tópico di matrimonio, hopi dje informacion cu ta circulá ta na conflicto cu Bijbel.

Reconocé tambe cu circunstancianan ta varia di un pareha pa otro. Den un sentido, parehanan casá ta manera vlok di sneu; nan por parce idéntico for di un distancia, pero en realidad cada un ta único, distinto for di tur otro. E combinacion di bo personalidad cu esun di bo partner no ta ser duplicá dor di ningun otro pareha casá den e mundu. Pues no sea lihé pa aceptá e puntonan di bista personal di otronan. No tin ningun formula humano cu ta aplicá na tur matrimonio!

Na contraste, tur e mandamentunan bíblico ta berdadero i aplicabel. Apostel Pablo a skirbi: “Tur Scritura ta inspirá di Dios i ta probechoso pa siña, pa reprendé, pa rectificá cosnan.” (2 Timoteo 3:16; Salmo 119:151) Si bo lesa Bijbel i aceptá su siñansanan como un guia den bo bida diario, lo bo por ta capas pa biba conforme bo voto matrimonial.—Salmo 119:105.

“Pa e tempu cu nos tur dos lo biba huntu riba tera”: Esaki ta indicá compañerismo di largo plaso. Dios ta manda pa ‘un homber bandoná su tata i su mama i pega na su esposa.’ (Génesis 2:24) Jehova kier pa boso ta huntu. Sirbi Dios huntu. Studia su Palabra huntu. Tuma tempu pa cana huntu, sinta huntu, come huntu. Disfruta di bida huntu!

Algun pareha ta haci un esfuerso pa apartá tempu tur dia djis pa papia cu otro. Asta despues di hopi aña di matrimonio, e compañerismo aki ta vital pa felicidad matrimonial.

“Segun e areglo matrimonial di Dios”: Matrimonio ta un don di Jehova Dios, kende a establecé e areglo matrimonial. (Proverbionan 19:14) Keda sin sigui su areglo lo menasá no solamente bo felicidad matrimonial sino tambe bo relacion cu e Creador. Di otro banda, ora esposo i esposa ta cultivá un bon relacion cu Jehova, manifestá dor di obedencia na su areglonan, nan lo tin relacionnan pacífico cu otro hende, incluyendo entre nan mes.—Proverbionan 16:7.

Nunca lubidá cu Jehova ta e Testigo principal di bo voto matrimonial. Sigui biba conforme e promesa solem aki, i bo matrimonio lo ta un fuente di alabansa i gloria pa Jehova Dios!

[Nota]

[Komentario na página 22]

Den un sentido, parehanan casá ta manera vlok di sneu. Nan tur por parce idéntico for di un distancia, pero en realidad cada pareha ta distinto na un manera único

[Rekonosementu]

Snow Crystals/Dover