Sirbiendo bou dje Man Amoroso di Jehova

MANERA LAMBROS ZOUMBOS A RELAT’E

Mi a enfrentá un decision crucial: aceptá e oferta di mi tio ricu pa bira gerente dje administracion di su propiedadnan extenso di tereno i edificio—resolviendo asina e problemanan financiero di mi famia—of bira un minister di tempu completo di Jehova Dios. Lagá mi splica ki factornan a influenciá e decision cu mi a tuma finalmente.

MI A nace den e pueblo di Volos, Grecia, na 1919. Mi tata tabata bende paña di hende homber, i nos tabata disfrutá di prosperidad material. Pero como resultado dje depresion económico den cabamentu di añanan ’20, Tata a bai bankrut i a perde su pacus. Mi tabata sinti tristu cada biaha cu mi a mira e mirada di desesperacion riba mi tata su cara.

Pa un poco tempu mi famia a biba den pobresa extremo. Tur dia mi tabata sali scol un ora mas trempan pa warda den rij pa racion di cuminda. Tog, apesar di nos pobresa nos a disfrutá di un bida di famia calmu. Mi soño tabata pa bira un dokter, pero ora mi tabatin 16 pa 17 aña mi tabatin cu kita scol i cuminsá traha pa por yuda mi famia sobrebibí.

Mas despues, durante Guera Mundial II, e alemannan i e italianonan a ocupá Grecia, i tabatin un gran scarcedad di cuminda. Hopi biaha mi a mira amigu i pariente muri di hamber riba caya—un bista horibel cu lo mi no lubidá nunca! Un biaha, nos famia a pasa 40 dia sin pan, un alimento básico na Grecia. Pa sobrebibí, ami cu mi ruman homber mas grandi a bai na pueblonan bisiña i a obtené batata for di amigu i conocínan.

Un Enfermedad Ta Bira un Bendicion

Na cuminsamentu di 1944, mi a bira masha malu cu un forma di pleurítis. Durante mi permanencia di tres luna den hospital, un primu a trece dos foyeto pa mi i a bisa: “Lesa esakinan; mi tin sigur cu lo bo gusta nan.” E foyetonan, Who Is God? [Ken Dios Ta?] i Protection [Proteccion], a ser publicá dor di Watch Tower Bible and Tract Society. Despues di a lesa nan mi a compartí e contenido cu e otro pashentnan.

Ora mi a bandoná e hospital, mi a cuminsá asociá cu e Congregacion Volos di Testigonan di Jehova. Sin embargo, pa un luna largu, mi a ser limitá na mi cas como pashent cu mester a ricibí tratamentu na hospital sin ser interná, i seis pa ocho ora pa dia, mi tabata lesa edicionnan mas bieu di E Toren di Vigilancia, i tambe otro publicacionnan publicá dor dje Sociedad Watchtower. Como resultado, mi crecementu spiritual tabata bastante rápido.

Scapá na Wowo di Angua

Riba un dia meimei di aña 1944, mi tabata sintá riba banki di un parke na Volos. Di ripiente un grupo paramilitar cu a apoyá e ehército di ocupacion aleman a rondoná e lugá i a arestá tur hende presente. Rond di 24 di nos a ser hibá dor dje cayanan n’e sede di Gestapo, situá den un depósito di tabaco.

Despues di un par di minuut, mi a tende un hende yama mi nomber i nomber dje persona cu ken mi tabata papiando den e parke. Un oficial di ehército griego a manda yama nos i a bisa nos cu ora un di mi parientenan a mira nos ser escoltá dor dje soldatnan, el a bis’é cu nos ta Testigonan di Jehova. E oficial griego a bisa e ora ei cu nos tabata liber pa bai cas, i el a duna nos su tarheta oficial pa usa den caso cu nos a ser arestá atrobe.

E siguiente dia nos a haña sa cu e alemannan a ehecutá mayoria di esnan arestá como represaya p’e asesinato di dos soldat aleman di parti dje luchadornan di resistencia griego. Ademas di posiblemente a ser librá for di morto, mi a siña n’e ocasion ei e balor di neutralidad cristian.

Na otoño di 1944, mi a simbolisá mi dedicacion na Jehova mediante bautismo bou di awa. Durante e siguiente zomer, e Testigonan a haci areglo pa mi asociá cu e Congregacion Sklithro den e cerunan, unda mi por a recobrá mi salú completamente. E guera civil cu a sigui despues dje ocupacion aleman tabata den e tempu ei den tur su furia na Grecia. A sosodé cu e pueblo caminda ami tabata permaneciendo a sirbi como un sorto di base pa forsanan gueriyero. E pastor local i un otro homber malicioso a acusá mi di tabata spioná pa forsanan gubernamental i nan a laga un corte marcial di gueriya cu nan mes a apuntá interogá mi.

Presente n’e huicio di corte ficticio tabata e lider dje forsanan gueriyero dje área. Ora mi a caba di splica e motibu pakico mi tabata permaneciendo den e pueblo i mustrando cu como cristian, mi tabata completamente neutral den e guera civil, e lider a bisa e otronan: “Si cualkier hende mishi cu e cabayero aki, lo e tin di ber cu mi!”

Mas despues mi a regresá mi pueblo natal di Volos asta mas fuerte den mi fe cu den mi salú físico.

Progreso Spiritual

Pronto despues mi a ser nombrá como sirbidor di cuenta den e congregacion local. Apesar dje dificultadnan cu e guera civil a crea—incluyendo e numeroso arestonan debí na acusacionnan di proselitismo inspirá p’e clero—participacion den e ministerio cristian a trece gran goso pa mi i p’e resto di nos congregacion.

Anto, na cuminsamentu di 1947, nos a ricibí un bishita for di un superintendente biahero di Testigonan di Jehova. Esaki tabata e promé di un bishita asina despues di Guera Mundial II. N’e tempu ei nos congregacion floreciente na Volos a ser dividí na dos, i mi a ser nombrá como superintendente presidente di un dje congregacionnan. Organisacionnan paramilitar i nacionalista tabata plama temor den pueblo e tempu ei. E clero a probechá dje situacion. Nan a dirigí e autoridadnan contra Testigonan di Jehova dor di plama e rumor falsu cu nos tabata comunista of apoyadornan dje gruponan iskierdista.

Aresto i Encarcelacionnan

Durante 1947, mi a ser arestá rond di dies biaha i a haña tres huicio di corte. Cada biaha mi a ser absolvé. Den e primavera di 1948, mi a ser sentenciá na cuater luna di encarcelacion pa proselitismo. Mi a sinta e sentencia den e prizon di Volos. Miéntras tantu e cantidad di proclamadornan di Reino den nos congregacion a bira dos biaha mas tantu, i goso i felicidad a yena curason dje rumannan.

Na october 1948, miéntras mi tabata teniendo un reunion cu seis otro ruman cu tabata hiba delantera den nos congregacion, cincu agente policial a basha drenta e cas i a arestá nos ‘na punta di pistol.’ Nan a hiba nos n’e warda di polis sin splica e motibu p’e aresto, i ei nos a ser maltratá. Un polis kende tabata un boxdó a batí mi den mi cara. Despues nan a tira nos den un cel.

Despues di esei e oficial na warda a yamá mi den su oficina. Ora mi a habri e porta, el a tira un boter di ink riba mi cu a herá mi i dal kibra den muraya. El a haci esaki pa purba intimidá mi. E ora ei el a duná mi un pida papel i pen i a ordená: “Skirbi nomber di tur Testigo di Jehova den Volos, i trece e lista mainta pa mi. Si bo no hacié, bo sa kico ta wardá bo!”

Mi no a contestá, pero ora mi a regresá n’e cel, ami cu e resto dje rumannan a haci oracion na Jehova. Mi a skirbi solamente mi nomber riba e papel i warda e oficial yamá mi. Pero mi no a tende nada mas dje oficial. Durante e anochi, forsanan militar opositor a bini, i e oficial a dirigí su hombernan contra nan. Den e confrontacion cu a sigui, el a ser heridá seriamente, i un di su pianan mester a ser amputá. Cu tempu, nos caso a ser tratá den corte, i nos a ser acusá di a tene un reunion ilegal. Nos tur shete a ser sentenciá na cincu aña di prizon.

Ya cu mi a nenga di asistí n’e misa di diadomingo den prizon, nan a cerá mi den cel mi so. Riba e di tres dia, mi a pidi pa papia cu e director di prizon. “Cu tur respet,” mi a bis’é, “na mi parecer no tin sentido pa castigá un hende cu ta dispuesto pa pasa cincu aña den prizon pa su fe.” El a pensa seriamente riba esei, i finalmente el a bisa: “Cuminsando mañan, lo bo traha aki banda di mi den mi oficina.”

Cu tempu, mi a haña trabou como asistent di dokter den prizon. Como resultado, mi a siña bastante tocante cuido di salú, algu cu a resultá masha beneficioso den añanan mas despues. Miéntras cu mi tabata den prizon, mi tabatin hopi oportunidad di predicá, i tres persona a respondé i a bira Testigo di Jehova.

Despues di a sirbi pa casi cuater aña den prizon, finalmente mi a ser lagá liber condicionalmente na 1952. Despues, mi mester a aparecé den corte na Corinto riba e cuestion di neutralidad. (Isaías 2:4) Ei mi a ser tené pa un tempu corticu den un prizon militar, i un otro tanda di maltrato a cuminsá. Cierto oficialnan tabata basta inovativo cu nan menasanan, bisando: “Lo mi saca bo curason na pida pida cu un puñá,” of “No conta riba un morto lihé cu solamente seis bala di scopet.”

Un Otro Sorto di Prueba

Sin embargo, pronto, mi tabata bek na cas, sirbiendo atrobe cu e Congregacion Volos i trahando ‘part-time’ seglarmente. Riba un dia, mi a ricibí un carta for dje sucursal dje Sociedad Watch Tower na Aténas, invitando mi pa ricibí entrenamentu pa dos siman i despues cuminsá bishitá congregacionnan di Testigonan di Jehova como superintendente di circuito. N’e mésun tempu, un tio paternal, kende no tabatin yu i kende tabatin propiedadnan extenso di tereno i edificio, a pidí mi pa manehá su biennan. Ainda mi famia tabata biba den pobresa, i e trabou aki lo a resolvé nan problemanan económico.

Mi a bishitá mi tio pa expresá mi gratitud pa su oferta, pero mi a inform’é cu mi a dicidí na aceptá un asignacion special den e ministerio cristian. Cu esei el a lanta para, wak mi cu un cara serio, i a sali abruptamente for dje sala. El a regresá cu un regalo di placa generoso cu por a sostené mi famia pa algun luna. El a bisa: “Tuma esaki, i haci loke bo kier cuné.” Te awe, mi no por describí e sintimentunan cu mi a haña n’e momento ei. Tabata como si fuera mi a tende e bos di Jehova bisá mi, ‘Bo a tuma e decision corecto. Mi ta cu bo.’

Cu e bendicion di mi famia, mi a sali pa Aténas na december 1953. Aunke ta mi mama so a bira Testigo, e otro miembronan di mi famia no a oponé mi actividad cristian. Ora mi a bai n’e sucursal na Aténas, un otro sorpresa a sperá mi. Ei tabatin un telegram for di mi ruman muher, participando cu Tata su lucha di dos aña largu pa haña un penshon social riba e dia ei a alcansá un resultado exitoso. Kico mas mi por a pidi? Mi a sinti como si fuera mi tabatin hala, cla pa bula haltu den Jehova su sirbishi!

Eherciendo Cautela

Den mi promé añanan den e trabou di circuito, mi mester tabata masha cuidadoso pasobra Testigonan di Jehova tabata ser persiguí severamente dor di autoridadnan religioso i político. Pa bishitá nos rumannan cristian, particularmente esnan cu tabata biba den pueblonan chikitu, mi tabata cana hopi ora bou dje capa di scuridad. E rumannan, cu tabata risca pa ser arestá, tabata bini huntu i tabata warda cu pacenshi na un cas riba mi yegada. Ki un intercambio excelente di animacion e bishitanan ei a percurá pa nos tur!—Romanonan 1:11, 12.

Pa evitá di ser detectá, algun biaha mi tabata usa disfras. Un biaha, mi a bisti manera un wardador di carné pa mi por a pasa un baricada pa alcansá un reunion di rumannan cu tabata den necesidad urgente di pastoreo spiritual. Na un otro ocasion, na 1955, ami cu un compañero Testigo a pretendé di ta bendedor di konofló pa evitá di lanta e sospecho di polis. Nos asignacion tabata pa drenta den contacto cu algun ruman cristian cu a bira inactivo den e pueblo chikitu di Árgos Orestikón.

Nos a exhibí nos mercancia den e plasa público dje pueblo. Sin embargo, un agente policial hóben cu tabata patruyando den e área a bira sospechoso, i cada biaha cu el a pasa, e tabata mira nos den un forma curioso. Finalmente, el a bisá mi: “Bo no ta parce un bendedor di konofló.” N’e momento ei, tres muher hóben a yega cerca i a mustra interes pa cumpra algun konofló. Señalando na mi productonan, mi a sclama: “E polis hóben aki ta come e konoflónan aki, i mira con fuerte i atractivo e ta!” E muhernan a wak e polis i a hari. E polis tambe a sonreí i despues a disparcé.

Ora el a bai mi a probechá dje oportunidad pa bai n’e pacus unda nos rumannan spiritual tabata traha como sastre. Mi a pidi un di nan pa cose un boton cu mi a kita for di mi jas. Segun cu e tabata haci esaki, mi a lèn dilanti i fluister: “Mi a bini for dje oficina di sucursal pa topa cu boso.” Na promé instante e rumannan tabatin miedu, ya cu pa hopi aña nan no tabatin contacto cu otro Testigonan. Mi a animá nan lo mihó cu mi tabata por i a haci areglo pa topa nan mas despues den e santana pa papia mas aleu. Felismente, e bishita tabata animador, i atrobe nan a bira celoso den e ministerio cristian.

Hañando un Partner Fiel

Na 1956, tres aña despues cu mi a cuminsá den e trabou biahero, mi a topa Niki, un ruman muher cristian hóben kende tabatin un gran amor p’e trabou di predicacion i kende a deseá pa dedicá su bida den e ministerio di tempu completo. Nos a namorá di otro i a casa na juni 1957. Mi tabata puntra mi mes si Niki lo por a cumpli cu e exigencianan dje trabou biahero bou dje condicionnan hostil cu a prevalecé e tempu ei pa Testigonan di Jehova na Grecia. Cu e yudansa di Jehova el a logra, birando asina e promé muher cu a compañá su esposo den e trabou di circuito na Grecia.

Nos a sigui huntu den e trabou biahero pa dies aña, sirbiendo mayoria dje congregacionnan na Grecia. Hopi biaha nos tabata disfrasá nos mes i, cu maleta na man, nos tabata cana bou dje capa di scuridad hopi ora pa alcansá un congregacion. Apesar dje gran oposicion cu nos a enfrentá hopi biaha, nos tabata emocioná pa mira personalmente e crecementu espectacular den e cantidad di Testigonan.

Sirbishi di Betel

Na januari 1967, ami cu Niki a ser invitá pa sirbi na Betel, manera e oficina di sucursal di Testigonan di Jehova ta ser yamá. E invitacion a coge nos tur dos di sorpresa, pero nos a acept’é, cu e confiansa cu Jehova tabata dirigiendo asuntunan. Segun cu tempu tabata pasa, nos a bin comprendé cu ta ki un privilegio grandi pa sirbi n’e centro aki di actividad teocrático.

Tres luna despues cu nos a drenta sirbishi di Betel, un hunta militar a coge poder, i Testigonan di Jehova mester a continuá nan trabou den un manera ménos visibel. Nos a cuminsá reuní den gruponan chikitu, tene nos asambleanan den cunucu, predicá discretamente i imprimí i distribuí literatura bíblico secretamente. No tabata difícil pa adaptá n’e circunstancianan aki, ya cu nos simplemente a rebibá e métodonan di hiba a cabo nos actividadnan cu nos a usa den e añanan mas atras. Apesar dje restriccionnan, e cantidad di Testigonan a aumentá for di ménos cu 11.000 na 1967 na mas cu 17.000 na 1974.

Despues di casi 30 aña den sirbishi di Betel, ami cu Niki ta sigui disfrutá di nos bendicionnan spiritual, apesar di limitacionnan di salú i edad. Pa mas cu dies aña, nos a biba den e edificionan dje sucursal situá na Caya Kartali den Aténas. Na 1979 un sucursal nobo a ser dedicá na Marousi, un suburbio di Aténas. Pero desde 1991 nos a disfrutá dje facilidadnan spacioso dje sucursal nobo na Eleona, 60 kilometer nort di Aténas. Aki mi ta sirbi den nos enfermeria di Betel, unda e entrenamentu cu mi a ricibí como asistent p’e dokter di prizon a resultá di ta masha útil.

Durante mi mas cu cuater década den e ministerio di tempu completo, ami, mescos cu Jeremías, a bin realisá e berdad di Jehova su promesa: “Nan siguramente lo bringa contra bo, pero nan lo no prevalecé contra bo, pasobra ‘Mi ta cu bo,’ ta e expresion di Jehova, ‘pa librá bo.’ ” (Jeremías 1:19) Sí, ami cu Niki a disfrutá di un copa cu ta basha over cu bendicionnan for di Jehova. Constantemente nos ta alegrá den su interes amoroso i bondad inmerecí na abundancia.

Mi animacion na hóbennan den e organisacion di Jehova ta pa sigui tras dje meta di ministerio di tempu completo. Den e manera aki nan por aceptá e invitacion di Jehova pa proba si lo e cumpli cu su promesa ‘di habri e portanan di shelu i realmente drama un bendicion te ora no tin mas necesidad.’ (Malakías 3:10) For di mi propio experencia, mi por garantisá boso, hóbennan, cu Jehova en berdad lo bendicioná boso tur cu dje manera ei ta confia completamente den dje.

[Plachi na página 26]

Caption Lambros Zoumbos i su esposa, Niki