Mas Cu 50 Aña di ‘Pasa pa Yuda’

MANERA EMMANUEL PATERAKIS A RELAT’E

Diesnuebe siglo pasá apostel Pablo a ricibí un invitacion singular: “Pasa pa Macedonia i yuda nos.” Pablo di buena gana a aceptá e oportunidad nobo aki pa “declará e bon nobo.” (Echonan 16:9, 10) Aunke e invitacion cu ami a ricibí no ta bai bek asina tantu tempu atras, no obstante tabata mas cu 50 aña pasá cu mi a bai di acuerdo pa “pasa” pa teritorionan nobo den e spiritu di Isaías 6:8: “Atá mi aki! Mandá mi.” Mi cantidad di biahenan a duná mi e nomber di cariño Turista Eterno, pero mi actividadnan tabatin poco di haci cu turismo. Mas cu un biaha, ora mi yega mi kamber di hotel, mi a sak abou riba mi rudianan i a gradicí Jehova pa su proteccion.

MI A nace dia 16 di januari, 1916, na Hierápetra, un pueblito marítimo di Creta, den un famia ortodox masha religioso. Desde cu mi tabata baby, Mama tabata bai misa cu mi i mi tres ruman muhernan riba diadomingo. En cuanto mi tata, el a preferá di keda cas i lesa Bijbel. Mi a stima mi tata mashá—un homber onrado, bon i misericordioso—i su morto, ora mi tabatin nuebe aña di edad, a afectá mi profundamente.

Mi ta corda cu ora mi tabatin cincu aña, mi a lesa un texto na scol cu a bisa: “Tur cos rond di nos ta proclamá e existencia di Dios.” Segun cu mi a crece, mi tabata completamente convencí di esaki. P’esei, na edad di 11 aña, mi a scoge pa skirbi un opstel cu Salmo 104:24 como su tema: “Cuantu ta bo obranan, O Jehova! Bo a traha nan tur den sabiduria. E tera ta yen di bo produccion.” Mi tabata fasiná cu e maraviyanan di naturalesa, asta cu cosnan asina simpel manera simianan ekipá cu alanan chikitu di manera cu bientu lo por a hiba nan for dje sombra dje palu mama. E siman despues cu mi a entregá mi opstel, mi maestro a les’é pa henter klas, i despues pa henter scol. N’e tempu ei, e maestronan tabata bringando contra ideanan comunista i nan a keda contentu di tende mi defensa di Dios su existencia. Di mi parti, mi tabata simplemente contentu di por a expresá mi creencia den e Creador.

Contesta pa Mi Preguntanan

Mi promé encuentro cu Testigonan di Jehova na cuminsamentu di añanan ’30 ainda ta cla-cla den mi memoria. Emmanuel Lionoudakis a bin ta predicá den tur e pueblo i pueblitonan di Creta. Mi a aceptá vários foyeto chikitu cerca dje, pero tabata esun titulá Where Are the Dead? (Unda e Mortonan Ta?) cu realmente a capta mi atencion. Mi tabatin asina tantu miedu di morto cu mi no tabata ni sikiera drenta e kamber caminda mi tata a muri. Segun cu mi a lesa e foyeto chikitu aki bes tras bes i mi a haña sa loke Bijbel ta siña tocante e condicion di hende morto, mi a sinti mi miedu supersticioso disparcé.

Un biaha pa aña durante zomer, e Testigonan tabata bishitá nos pueblo i tabata trece pa mi mas literatura pa lesa. Gradualmente mi comprendimentu dje Scritura a aumentá, pero mi a sigui asistí n’e Iglesia Ortodox. Sin embargo, e buki Deliverance (Liberacion), a marca un punto decisivo. E buki a mustra claramente e diferencia entre e organisacion di Jehova i esun di Satanas. Desde e tempu aki padilanti, mi a cuminsá studia mas regularmente e Bijbel i cualkier literatura dje Sociedad Watch Tower cu mi por a obtené. Ya cu Testigonan di Jehova tabata prohibí na Grecia, mi a studia den secreto anochi. Tog, mi tabata asina entusiasmá tocante loke mi tabata siñando cu mi no por a stop mi mes di papia cu tur hende tocante dje. No a tarda mashá cu polis a cuminsá vigilá mi, bishitando mi regularmente na tur ora di dia i di anochi pa busca literatura.

Na 1936, mi a asistí na un reunion pa promé bes, 120 kilometer leu na Iráklion. Mi tabata asina contentu pa topa cu e Testigonan. E mayoria di nan tabata hende simpel, mayoria di nan cunukero, pero nan a convencé mi cu esaki ta e berdad. Mi dedicacion na Jehova a ser hací di biaha n’e ocasion ei.

Mi bautismo ta un suceso cu lo mi no lubidá nunca. Un anochi na 1938, den scuridad completo, Ruman Lionoudakis a hiba ami cu dos di mi studiantenan di Bijbel laman. Despues di haci un oracion, el a hinca nos bou di awa.

Bou di Aresto

E promé-promé biaha cu mi a sali pa bai predicá tabatin yen di incidente, sin exagerá. Mi a topa un amigu bieu di scol cu a bira pastor, i nos tabatin un combersacion masha bon mes. Pero despues el a splica cu na armonia cu e ordu di obispu, e tabatin cu laga nan arestá mi. Miéntras cu nos tabata spera den e oficina dje alcalde p’e yegada di polis for dje pueblito bisiña, un multitud a reuní pafó. Pues mi a coge un Testament Nobo na griego cu tabatin den e oficina i a cuminsá duna nan un discurso basá riba Mateo capítulo 24. Na promé instante e hendenan no kier a scucha, pero e pastor a intervení. “Lagu’e papia,” el a bisa. “Ta nos Bijbel.” Mi por a papia pa un ora i mei. Pues, mi promé dia den e ministerio tabata tambe e ocasion di mi promé discurso público. Ya cu polis no a yega ainda ora mi a caba, e alcalde i e pastor a dicidí di laga un grupo di homber core cu mi for dje pueblo. Na e promé bogt den e caminda, mi a cuminsá core mas duru cu mi tabata por pa evitá di haña e piedranan cu nan a tira.

E siguiente dia dos polis, compañá p’e obispu, a arestá mi na trabou. Na e warda di polis, mi por a duna nan testimonio for di Bijbel, pero ya cu mi literatura di Bijbel no tabatin e seyo dje obispu manera ley a rekerí, mi a ser acusá di proselitismo i di distribucion di literatura no-autorisá. Mi a ser librá, pendiente di huicio.

Mi huicio a tuma lugá un luna despues. Den mi defensa mi a señalá cu simplemente mi tabata obedeciendo e mandamentu di Cristo pa predicá. (Mateo 28:19, 20) E hues a contestá sarcásticamente: “Mi yu, Esun cu a duna e mandamentu ei a ser crucificá. Desafortunadamente, mi no tin e autoridad pa duná bo un castigu similar.” Sin embargo, un abogado hóben cu mi no a conocé a lanta na mi defensa, bisando cu, cu asina tantu comunismo i ateismo rond di nos, e corte mester tabata orguyoso cu tabatin hombernan yong cla pa defendé e Palabra di Dios. Despues el a acercá mi i felicitá mi sinceramente relacioná cu mi defensa skirbí, cu tabata den mi archivo. Impresioná cu mi tabata asina yong, e abogado a ofrecé pa defendé mi pornada. En bes dje sentencia mínimo di tres luna, mi a ser condená na solamente dies dia den prizon i un boet di 300 dracma. Oposicion asina solamente a fortalecé mi determinacion pa sirbi Jehova i defendé e berdad.

Na un otro ocasion ora mi a ser arestá, e hues a ripará cu cuantu facilidad mi tabata cita e Bijbel. El a pidi e obispu pa bandoná su oficina, bisando: “Abo a haci bo trabou, obispu. Lo mi terminá e caso di Sr. Paterakis.” Anto el a saca su Bijbel, i nos a papia tocante e Reino di Dios henter atardi. Incidentenan asina a animá mi pa sigui padilanti apesar di dificultadnan.

E Sentencia di Morto

Na 1940, mi a ser yamá pa servicio militar i mi a skirbi un carta splicando pakico mi no por a bai di acuerdo pa ser reclutá. Dos dia despues mi a ser arestá i a ser batí severamente dor di polis. Despues mi a ser mandá na e liña di bataya na Albania, caminda mi a ser hibá dilanti corte marcial pa motibu di a nenga di bringa. E autoridadnan militar a bisá mi cu nan no tabata asina interesá pa sa si mi tabatin razon of no, sino den e impresion cu mi ehempel lo por a duna e soldatnan. Mi a ser condená na morto, pero debí na un eror legal, pa mi gran alivio, e sentencia aki a ser cambiá na dies aña di trabou forsá. Mi a pasa e siguiente par di lunanan di mi bida den un prizon militar na Grecia bou di condicionnan masha difícil, di cua ainda mi ta sufri e efectonan físico.

Sin embargo, prizon no a stop mi di predicá. Al contrario! Tabata fácil pa cuminsá combersacionnan, ya cu hopi prezu tabata curioso pa sa ki mishi un civil den un prizon militar. Un dje consideracionnan aki cu un yoncuman sincero a hiba na un studio di Bijbel den patio dje prizon. Trint’i ocho aña despues mi a topa e homber aki atrobe na un asamblea. El a aceptá e berdad i tabata sirbiendo como un superintendente di congregacion riba e isla di Lefkás.

Ora Hitler su ehércitonan a invadí Yugoslavia na 1941, nos a ser transferí mas pa zuid na un prizon na Preveza. Durante e biahe, nos convoi a ser atacá dor di avionnan bombardero aleman, i nan no a duna nos como prizonero cuminda. Ora e tiki pan cu mi tabatin a caba, mi a haci oracion na Dios: “Si ta bo boluntad pa mi muri di hamber despues cu bo a scapá mi for di sentencia di morto, anto laga bo boluntad ser hací.”

E siguiente dia un oficial a yamá mi un banda durante cu nan tabata yama nomber di tur prezu pa chek si nan tur t’ei i, despues di a haña sa di unda mi tabata, ken mi mayornan tabata, i pakico mi tabata den prizon, el a bisá mi pa siguié. El a bai cu mi den e pueblo n’e sala di come pa oficialnan, a hibá mi na un mesa cu pan, keshi, i lamchi hasá, i a bisá mi come. Pero mi a splik’é cu ya cu e 60 otro prezunan no tabatin nada di come, mi concenshi lo no a lagá mi come. E oficial a contestá: “Mi no por duna tur hende cuminda! Bo tata tabata masha generoso cu mi tata. Mi tin un obligacion moral cu bo pero no cu e otronan.” “Si ta asina lo mi djis bai bek,” mi a contestá. El a pensa un ratu anto a duná mi un sacu grandi pa pone cuantu cuminda cu mi tabata por den dje.

Ora m’a yega prizon bek, mi a pone e sacu abou i a bisa: “Cabayeronan, esaki ta pa boso.” Pa coincidencia, e anochi promé, mi a ser acusá di ta responsabel p’e condicion difícil dje otro prezunan pasobra mi no tabata uni den nan oracionnan na Bírgen Maria. Sin embargo, un comunista a bin na mi defensa. Awor mirando e cuminda, el a bisa e otronan: “Unda boso ‘Bírgen Maria’ ta? Boso a bisa cu nos lo muri pa motibu dje homber aki, sin embargo ta e ta esun cu ta trece cuminda pa nos.” Anto el a dirigí su mes na mi i a bisa: “Emmanuel! Bin i haci un oracion di gradicimentu.”

Djis despues di esei, e avance dje ehército aleman a pone e guardianan di prizon hui bai, liberando e prezunan. Mi a bai Pátras afin di topa otro Testigonan promé cu mi a coge rumbo pa Aténas na fin di mei 1941. Na Pátras mi a logra haña algun paña i sapatu i dal mi promé baño den mas cu un aña. Te na fin dje ocupacion, e alemannan a pará mi regularmente ora cu mi tabata predicá, pero nunca nan a arestá mi. Un di nan a bisa: “Na Alemania nos ta tira Testigonan di Jehova mata. Pero aki na Grecia nos ta deseá cu tur nos enemigunan tabata Testigo!”

Actividadnan Despues di Guera

Como si fuera Grecia no a haña suficiente bringamentu, el a ser desgará mas ainda dor di guera civil di 1946 pa 1949, causando miles di morto. E rumannan tabatin mester di hopi animacion pa keda firme den un tempu ora cu djis asistí na reunion lo por a hiba na aresto. Vários ruman homber a ser condená na morto pa nan posicion neutral. Pero apesar di esaki, hopi hende tabata respondé n’e mensahe di Reino, i nos tabatin un of dos bautismo tur siman. Desde 1947, mi a cuminsá traha n’e oficinanan di Sociedad na Aténas durante dia i bishitá e congregacionnan como un superintendente biahero durante anochi.

Na 1948, mi tabatin e goso di ser invitá pa asistí n’e Scol Bíblico di Galad di Watchtower, na Merca. Pero tabatin un problema. Debí na mi sentencianan anterior, mi no por a obtené un pasport. Sin embargo, un di mi studiantenan di Bijbel tabata amigu cu un general. Danki n’e studiante aki, den solamente un par di siman, mi tabatin mi pasport. Pero mi a bira preocupá ora, djis promé cu mi mester a bandoná Grecia, mi a ser arestá pa distribuí E Toren di Vigilancia. Un polis a hibá mi n’e hefe di Polis di Siguridad di Estado na Aténas. Pa mi gran sorpresa, e tabata un di mi bisiñanan! E polis a splica pakico mi a ser arestá i a dun’é e paki di revistanan. Mi bisiña a saca un stapel di Toren di Vigilancia for di su escritorio i a bisá mi: “Mi no tin e edicion di mas recien. Mi por coge un copia?” Ki aliviá mi tabata pa mira e man di Jehova den asuntunan asina!

E di 16 klas di Galad, na 1950, tabata un experencia enrikesedor. Na fin di dje, mi a ser asigná na Chipre, caminda pronto mi a descubrí cu e oposicion di clero tabata mes feros cu na Grecia. Hopi bes nos mester a enfrentá multitudnan di fanático religioso incitá na locura dor di pastornan ortodox. Na 1953 mi visa pa Chipre no a ser renobá, i mi a ser reasigná pa Istanbul, Turkia. Aki atrobe, mi estadia tabata corticu. Tensionnan político entre Turkia i Grecia a nificá cu, apesar dje bon resultadonan den e trabou di predicá, mi tabatin cu bai pa un otro asignacion—Egipto.

Tempu mi tabata den prizon na Grecia, mi tabata corda riba Salmo 55:6, 7. Ei David a expresá un anhelo di hui pa desierto. Nunca mi a imaginá mi cu un dia lo mi ta exactamente ei. Na 1954, despues di un biahe agotante di vários dia cu trein i boto riba Riu Nilo, finalmente mi a yega mi destinacion—Khartoum, na Sudan. Tur loke mi kier a haci tabata dal un baño i bai drumi. Pero mi a lubidá cu tabata merdia. E awa, wardá den un tanki riba e dak, a kimá mi, obligando mi pa bisti un helm special pa tapa solo pa vários luna te ora cu mi cueru di cabes a cura.

Mi a sintí mi hopi bes isolá ei, mi so meimei di Sahara, casi dos mil kilometer leu for dje congregacion di mas cerca, pero Jehova a sostené mi i a duná mi e fortalesa pa sigui. Animacion tin biaha a bini for dje fuentenan di mas inesperá. Un dia mi a topa e director dje Museo di Khartoum. E tabata un homber cu mente habrí, i nos tabatin un consideracion interesante. Ora el a haña sa cu mi ta di orígen griego, el a puntrá mi si mi por a complac’é i bai n’e museo pa traducí algun inscripcion riba artefactonan hañá den un misa di siglo seis E.C. na Sudan. Despues di cincu ora den un bodega sofocante, mi a haña un skotter cu e nomber di Jehova, e Tetragramaton, inscribí riba dje. Imaginá bo mi goso! Na Europa no ta straño pa mira e nomber divino den misanan, pero ta sumamente extraordinario pa descubrí e nomber ei meimei di Sahara!

Despues di e asamblea internacional na 1958, mi a ser asigná como sirbidor di zona pa bishitá e rumannan den 26 pais i teritorio den Cercano i Medio Oriente i rond di Mediteráneo. Hopi bes mi no tabata sa con lo mi a sali for di situacionnan difícil, pero Jehova semper a percurá un salida.

Semper mi tabata keda impresioná pa e interes cu Jehova su organisacion ta mustra pa Testigonan cu ta isolá den cierto paisnan. Na un ocasion, mi a topa un ruman homber di India cu tabata traha den un campo di petroli. Aparentemente e tabata e único Testigo den e pais africano ei. Den su kashi na trabou e tabatin publicacionnan den 18 diferente idioma, cu e tabata duna na su coleganan. Asta den e pais ei caminda tur religion stranhero tabata estrictamente prohibí, nos ruman homber no a lubidá su responsabilidad di predicá e bon nobo. Su coleganan a keda impresioná pa mira cu un representante di su religion a ser mandá pa bishit’é.

Na aña 1959 mi a bishitá Spaña i Portugal. Tur dos tabata bou di dictaduranan militar n’e tempu ei, i e trabou di Testigonan di Jehova tabata bou di prohibicion estricto. Den un luna mi a haña chens di conducí mas cu shen reunion, animando e rumannan pa no entregá apesar dje dificultadnan.

No Mi So Mas

Pa mas cu 20 aña, mi a sirbi Jehova den sirbishi di tempu completo como un homber soltero, pero di ripiente mi a cansa di ta biahando constantemente sin un hogar fiho. Tabata durante e tempu aki cu mi a topa Annie Bianucci, un pionero special na Tunisia. Nos a casa na 1963. Su amor pa Jehova i p’e berdad, su debocion n’e ministerio combiná cu su arte di siña, i su conocimentu di idioma a resultá di ta un berdadero bendicion den nos trabou di misionero i di circuito den partinan nort i west di Africa i na Italia.

Na augustus 1965 ami cu mi casá a ser asigná na Dakar, Senegal, caminda mi tabatin e privilegio di organisá e oficina local di sucursal. Senegal tabata un pais remarcabel pa su tolerancia religioso, sin duda debí na su presidente, Léopold Senghor, un dje poco cabesnan di Estado africano cu a skirbi Presidente Banda di Malawi, na fabor di Testigonan di Jehova durante e persecucion teribel cu a tuma lugá na Malawi den añanan ’70.

Jehova Su Bendicion Ricu

Na 1951, ora mi a sali for di Galad pa bai Chipre, mi a biaha cu shete maleta. Bayendo pa Turkia, mi a baha te na cincu maleta. Pero biahando asina hopi, mi tabatin cu custumbrá cu e límite di 20 kilo cu liñanan aéreo ta permití, locual a incluí mi archivonan i mi “baby typewriter.” Un dia mi a bisa Ruman Knorr, e tempu ei presidente dje Sociedad Watch Tower: “Bo ta protehá mi di materialismo. Bo ta poné mi biba cu 20 kilo di pertenencia, i mi ta bayendo hopi bon.” Nunca mi no a sintí mi privá di algu pa motibu cu mi no tabatin hopi cos.

Mi problema principal durante mi biahenan tabata pa drenta i sali for dje paisnan. Un dia, den un pais caminda e trabou di Reino tabata prohibí, un duanero a cuminsá coba den mi archivonan. Esaki tabata un rísico pa e Testigonan den e pais, pues mi a saca for di mi bachi un carta di mi casá i a bisa e duanero: “Mi ta mira cu bo ta gusta lesa carta. Lo bo kier lesa tambe e carta aki di mi casá, cu no ta den e archivonan?” Brongosá, el a pidi dispensa i a lagá mi pasa.

Desde 1982 ami cu mi casá ta sirbiendo como misioneronan na Nice, den zuid di Francia. Debí na kebranto di salú, mi no por haci mes tantu mas manera mi tabatin custumber di haci. Pero esei no kier men cu nos goso a mengua. Nos ta mira cu ‘nos labor no ta en bano.’ (1 Corintionan 15:58) Mi tin e goso di mira cantidad di hende cu ken mi tabatin e privilegio di studia atrabes dje añanan i tambe mas cu 40 miembro di mi famia, sirbiendo Jehova fielmente.

Di ningun manera no ta duel mi e sacrificionan cu mi bida di ‘pasa pa yuda’ a enbolbé. Al fin i al cabo, ningun dje sacrificionan cu nos haci por compará cu loke Jehova i su Yu, Jesucristo, a haci pa nos. Ora mi pensa bek riba e último 60 añanan cu mi a conocé e berdad, mi por bisa cu Jehova a bendicioná mi abundantemente. Manera Proverbionan 10:22 ta bisa, “e bendicion di Jehova—esei ta loke ta haci ricu.”

Indudablemente, Jehova su “bondad amoroso ta mihó cu bida.” (Salmo 63:3) Segun cu e incumbinencianan di behes ta sigui multiplicá, e palabranan dje salmista inspirá hopi bes ta bin dilanti den mi oracionnan: “Den bo, O Jehova, mi a tuma refugio. O no lagá mi ser brongosá nunca. Pasobra abo ta mi speransa, O Señor Soberano Jehova, mi confiansa desde mi hubentud. O Dios, bo a siñá mi desde mi hubentud padilanti, i te cu awor mi ta sigui declará bo obranan maraviyoso. I asta te cu behes i cabei blancu, O Dios, no bandoná mi.”—Salmo 71:1, 5, 17, 18.

[Plachi na página 25]

Cu mi esposa, Annie, awe