Lesa e Palabra di Dios i Sirbie den e Berdad
“Instruí mi, O Jehova, tocante bo caminda. Lo mi cana den bo berdad.”—SALMO 86:11.
1. En esencia, kico e promé edicion dje revista aki a bisa tocante e berdad?
JEHOVA ta manda lus i berdad. (Salmo 43:3) Tambe e ta duna nos e capacidad pa lesa su Palabra, e Bijbel, i siña e berdad. E promé edicion dje revista aki—juli 1879—a bisa: “E berdad, mescos cu un flor chikitu modesto den e mondi di bida, ta rondoná i casi hogá dor dje crecementu abundante dje mal yerba di falsedad. Pa bo hañ’é bo mester ta semper alerto. Pa bo mira su bunitesa bo mester rosa e mal yerba di falsedad i e matanan di sumpiña di intolerancia. Pa bo pose’é bo mester humiyá bo mes pa hañ’é. No keda contentu cu un solo flor dje berdad. Si un solo flor dje berdad tabata suficiente ningun mas lo a ser creá. Sigui recogé, sigui busca.” Lesando i studiando e Palabra di Dios lo permití nos adkerí conocimentu exacto i cana den su berdad.—Salmo 86:11.
2. Kico tabata e resultado ora Esdras i otronan a lesa e Ley di Dios p’e hudiunan den Jerusalem di antigwedad?
2 Despues cu e murayanan di Jerusalem a ser reconstruí na 455 P.E.C., e sacerdote Esdras i otronan a lesa e Ley di Dios p’e hudiunan. Despues di esaki a sigui un gososo Festival di Cabaña, confesion di picá, i ceramentu di “un areglo digno di confiansa.” (Nehemías 8:1–9:38) Nos ta lesa: “Nan a sigui lesa na bos haltu for dje buki, for dje ley dje Dios berdadero, locual a ser splicá, i tabatin un ponementu di nificacion na dje; i nan a sigui duna comprendimentu den e lesamentu.” (Nehemías 8:8) Algun escolástico ta bisa cu por ta e hudiunan no tabata comprendé hebreo bon i cu nan a duna un traduccion parafraseá na idioma arameo. Pero e texto no ta indicá mero clarificacion dje términonan lingwístico. Esdras i e otronan a splica e Ley di manera cu e pueblo por a capta su principionan i aplicá nan. Publicacionnan i reunionnan cristian tambe ta sirbi pa ‘pone nificacion den’ e Palabra di Dios. Ancianonan nombrá tambe ta haci mescos, kendenan ta “cualificá pa siña.”—1 Timoteo 3:1, 2; 2 Timoteo 2:24.
Beneficionan Duradero
3. Cua ta algun beneficio cu nos ta cosechá for di lesamentu di Bijbel?
3 Ora famianan cristian ta lesa Bijbel huntu, cu tur probabilidad nan ta experenciá beneficionan duradero. Nan ta bira familiarisá cu e leynan di Dios i ta siña e berdad tocante doctrina, profecia i otro tópiconan. Despues di a lesa un porcion di Bijbel, e cabes di famia lo por puntra: Con esaki mester afectá nos? Den ki manera esaki ta relacioná cu otro siñansanan di Bijbel? Con nos por usa e puntonan aki den predicacion dje bon nobo? Un famia ta gana mayor perspicacia ora di lesa Bijbel si nan ta haci investigacion usando e Watch Tower Publications Index of otro indexnan. Nan por saca beneficio ora nan ta consultá e dos volúmennan di Perspicacia para comprender las Escrituras.
4. Con Hosué mester a aplicá e instruccion registrá na Hosué 1:8?
4 Principionan sacá for dje Scritura por guia nos den bida. Ademas, lesando i studiando ‘e scrituranan santu por haci nos sabí pa salbacion.’ (2 Timoteo 3:15) Si nos laga e Palabra di Dios guia nos, nos lo sigui cana den su berdad i nos deseonan hustu lo ser realisá. (Salmo 26:3; 119:130) Sin embargo, nos tin cu busca comprendimentu, mescos cu Moises su sucesor, Hosué, a haci. E “buki dje ley” no mester a apartá for di su boca, i e mester a lesa den dje di dia i anochi. (Hosué 1:8) No lagando e “buki dje ley” apartá for di su boca tabata kier men cu Hosué no mester a stop di papia cu otronan dje cosnan spiritualmente iluminador cu el a contené. Lesamentu den e Ley di dia i anochi a nificá cu Hosué mester a meditá riba dje, mester a studi’é. Di un manera similar apostel Pablo a insta Timoteo pa “refleccioná riba”—meditá riba—su conducta, ministerio i siñansa. Como un anciano cristian, Timoteo tabatin cu ser specialmente cuidadoso pa su bida tabata ehemplar i pa el a siña otronan e berdad bíblico.—1 Timoteo 4:15.
5. Kico ta necesario pa nos haña e berdad di Dios?
5 E berdad di Dios ta un tesoro preciosísimo. Pa bo hañ’é bo tin cu coba, haci investigacion persistente den e Scritura. Solamente como alumnonan semehante na mucha dje Magnífico Instructor nos ta gana sabiduria i ta yega na comprendé e temor reverencial di Jehova. (Proverbionan 1:7; Isaías 30:20, 21) Naturalmente, pa nos mes nos mester proba cosnan bíblicamente. (1 Pedro 2:1, 2) E hudiunan den Berea “tabata di un disposicion mas noble cu esnan den Tesalónica, pasobra nan a ricibí e palabra cu e mayor prontitud di mente, examinando cuidadosamente e Scritura diariamente en cuanto si e cosnan aki [cu Pablo a bisa] tabata asina.” El a encomendá e bereanonan mas bien cu reprendé nan pa nan hacimentu di esaki.—Echonan 17:10, 11.
6. Pakico Jesus por a indicá cu scudriñamentu dje Scritura no a yuda cierto hudiunan cu nada?
6 Jesus a bisa cierto hudiunan: “Boso ta scudriñá e Scritura, pasobra boso ta pensa cu pa medio di nan boso lo tin bida eterno; i esakinan ta net e cosnan cu ta duna testimonio tocante mi. I tog boso no kier bini cerca mi pa boso por tin bida.” (Juan 5:39, 40) Nan a scudriñá e Scritura cu e obhetivo corecto—pa esaki por a guia nan na bida. En berdad, e Scritura a contené profecianan mesiánico cu a señalá na Jesus como e medio di bida. Pero e hudiunan a rechas’é. P’esei, pa nan, no tabatin ningun beneficio den scudriñá e Scritura.
7. Kico ta necesario pa crece den comprendimentu di Bijbel, i pakico?
7 Pa nos crece den nos comprendimentu di Bijbel, nos tin mester dje guia di Dios su spiritu, of forsa activo. “E spiritu ta scudriñá tur cos, asta e cosnan profundo di Dios” pa asina saca nan nificacion na cla. (1 Corintionan 2:10) E cristiannan na Tesalónica mester a “haci sigur di tur cos” den cualkier profecia cu nan a tende. (1 Tesalonicensenan 5:20, 21) Ora Pablo a skirbi e tesalonicensenan (rond di aña 50 E.C.), e único parti dje Scritura Griego cu tabata skirbí caba tabata e Evangelio di Mateo. Pues e tesalonicensenan i e bereanonan por a haci sigur di tur cos, probablemente dor di averiguá e version Setenta griego dje Scritura Hebreo. Nan tabatin cu lesa i studia e Scritura, i nos tambe tin cu haci mescos.
Vital pa Tur Hende
8. Pakico ancianonan nombrá mester sobresalí den conocimentu di Bijbel?
8 Ancianonan nombrá mester sobresalí den conocimentu di Bijbel. Nan mester ta “cualificá pa siña” i mester ‘tene firmemente n’e palabra fiel.’ E superintendente Timoteo mester a ‘manehá e palabra dje berdad corectamente.’ (1 Timoteo 3:2; Tito 1:9; 2 Timoteo 2:15) Su mama, Eunice, i su wela, Loida, a siñ’é e scrituranan santu for di infancia, inculcando ‘e fe sin hipocrisia’ den dje, aunke su tata tabata un incrédulo. (2 Timoteo 1:5; 3:15) Tatanan creyente mester lanta nan yunan “den e disiplina i reglamentu mental di Jehova,” i specialmente ancianonan cu ta tata mester tin ‘yunan creyente cu no ta ingobernabel of bou di acusacion di conducta relahá.’ (Efesionan 6:4; Tito 1:6) Sin importá nos circunstancianan, anto, nos mester tuma e necesidad di lesa, studia i aplicá e Palabra di Dios masha na serio.
9. Pakico studia Bijbel den asociacion cu compañeronan cristian?
9 Tambe nos mester studia Bijbel den asociacion cu compañeronan creyente. Pablo tabata kier p’e cristiannan tesalonicense considerá su conseho un cu otro. (1 Tesalonicensenan 4:18) Pa haci nos comprendimentu dje berdad mas skerpi, no tin nada mas mihó cu uni cu otro studiantenan deboto ora di examiná e Scritura. Tin un berdad den e proverbio: “Cu heru, heru mes ta ser hací skerpi. Asina un homber ta haci e cara di un otro skerpi.” (Proverbionan 27:17) Un herment di heru por frusa si e no ta ser usá i hací skerpi. Di igual manera, nos tin cu reuní regularmente i haci un e otro skerpi dor di compartí e conocimentu cu nos a gana for di lesa, studia i meditá riba Dios su Palabra dje berdad. (Hebreonan 10:24, 25) Ademas, esaki ta un manera pa haci sigur cu nos ta saca beneficio for di rayonan di lus spiritual.—Salmo 97:11; Proverbionan 4:18.
10. Kico kier men cana den e berdad?
10 Den nos studio dje Scritura, ta na su lugá pa haci oracion na Dios mescos cu e salmista a haci: “Manda bo lus i bo berdad. Laga esakinan mes guiá mi.” (Salmo 43:3) Si nos ta deseá di haña e aprobacion di Dios, nos mester cana den su berdad. (3 Juan 3, 4) Esaki ta incluí biba segun su rekisitonan i sirbié den fieldad i sinceridad. (Salmo 25:4, 5; Juan 4:23, 24) Nos mester sirbi Jehova den e berdad, manera esei ta revelá den su Palabra i hací cla den e publicacionnan di “e esclabo fiel i discreto.” (Mateo 24:45-47) Esaki ta rekerí conocimentu exacto dje Scritura. Con, anto, nos mester lesa i studia e Palabra di Dios? Nos mester cuminsá les’é for di Génesis capítulo 1, versículo 1 i pasa dor di tur e 66 bukinan? Sí, tur cristian cu tin e Bijbel completo den su idioma mester les’é for di Génesis te Revelacion. I nos meta den lesamentu di Bijbel i publicacionnan cristian mester ta pa aumentá nos comprendimentu dje gran coleccion di berdad bíblico cu Dios a haci disponibel mediante e ‘esclabo fiel.’
Lesa e Palabra di Dios na Bos Haltu
11, 12. Pakico ta probechoso pa lesa Bijbel na bos haltu na reunionnan?
11 Nos por lesa den silencio ora nos ta so. Sin embargo, den tempu antiguo, den privá hende tabata lesa na bos haltu. P’esei segun cu e eunuco etiopio tabata core den su garoshi, e evangelisador Felipe a tend’é lesa for dje profecia di Isaías. (Echonan 8:27-30) E palabra hebreo traducí como “lesa” primeramente ta nificá “yama.” Pues esnan cu na cuminsamentu no ta capas pa lesa den silencio i capta e sentido dje lesamentu no mester ser desanimá pa pronunciá cada palabra na bos haltu. E cos principal ta pa siña e berdad dor di lesa e Palabra skirbí di Dios.
12 Ta probechoso pa lesa Bijbel na bos haltu na reunionnan cristian. Apostel Pablo a insta su co-trahador Timoteo: “Sigui aplicá bo mes na lesamentu público, na exhortacion, na siñamentu.” (1 Timoteo 4:13) Pablo a bisa e colosensenan: “Ora e carta aki a ser lesá den boso, haci areglo pa e ser lesá tambe den e congregacion dje laodicensenan i pa boso lesa tambe esun di Laodicea.” (Colosensenan 4:16) I Revelacion 1:3 ta bisa: “Felis ta esun cu ta lesa na bos haltu i esnan cu ta tende e palabranan dje profecia aki, i cu ta warda e cosnan skirbí den dje; pasobra e tempu señalá ta cerca.” P’esei, un orador público mester lesa texto for di Bijbel pa apoyá loke e ta bisa na un congregacion.
Método di Studio Basá Riba Tópico
13. Cua ta e método di mas progresivo pa siña e berdadnan di Bijbel, i kico por yuda nos localisá textonan?
13 Studio basá riba tópico ta e método di studio mas progresivo pa siña berdadnan bíblico. Concordancianan, cu ta duna un lista di palabranan bíblico den órden alfabético den nan contexto segun buki, capítulo i versículo, ta facilitá buscamentu di textonan relacioná cu un cierto tema. I textonan asina por ser armonisá cu otro pasobra e Autor di Bijbel no ta contradicí su mes. Pa medio di spiritu santu, el a inspirá rond di 40 homber pa skirbi Bijbel durante un periodo di 16 siglo, i studiand’e tópico pa tópico ta un forma di siña e berdad cu atrabes di tempu a duna e mihó resultado.
14. Pakico studia e Scritura Hebreo i Griego Cristian huntu?
14 Nos aprecio p’e berdad di Bijbel mester motivá nos pa lesa i studia e Scritura Griego Cristian huntu cu e Scritura Hebreo. Esaki lo mustra con e Scritura Griego ta relacioná cu e propósito di Dios i lo tira lus riba profecianan dje Scritura Hebreo. (Romanonan 16:25-27; Efesionan 3:4-6; Colosensenan 1:26) En coneccion cu esaki e Traducción del Nuevo Mundo de las Santas Escrituras ta masha útil. El a ser prepará dor di sirbidornan dedicá di Dios kendenan a saca probecho dje mayor conocimentu cu ta disponibel relacioná cu e texto original di Bijbel i tambe su antecedente i expresionnan idiomático. E publicacionnan pa studio di Bijbel cu Jehova a percurá mediante “e esclabo fiel i discreto” tambe ta vital.
15. Con lo bo proba cu ta apropiado pa cita for di aki i aya den Bijbel?
15 Algun hende por bisa, ‘Boso publicacionnan ta haci mil i un cita for di Bijbel, pero pakico boso ta saca esakinan for di aki i aya di Bijbel?’ Dor di cita for di aki i aya den e 66 bukinan di Bijbel, e publicacionnan ta referí na vários testimonio inspirá pa proba e berdad di un siñansa. Jesus mes a usa e método di instruccion aki. Ora el a duna su Sermon Riba Ceru, el a cita 21 biaha for dje Scritura Hebreo. E discurso ei ta contené tres cita for di Exodo, dos for di Levítico, un for di Númeronan, seis for di Deuteronomio, un for di Segundo Reynan, cuater for di Salmonan, tres for di Isaías i un for di Jeremías. Haciendo esaki, Jesus tabata ‘djis tratando di proba algu’? No, pasobra ‘el a siña como un persona cu tin autoridad, i no manera e escribanan.’ Esei tabata asina pasobra Jesus a apoyá su siñansa cu e autoridad dje Palabra skirbí di Dios. (Mateo 7:29) Apostel Pablo tambe a haci esei.
16. Ki citanan bíblico Pablo a haci na Romanonan 15:7-13?
16 Den e pasashi bíblico cu nos ta haña na Romanonan 15:7-13, Pablo a cita for di tres seccion dje Scritura Hebreo—e Ley, e Profetanan i Salmonan. El a mustra cu hudiu i gentil lo glorificá Dios, i p’esei cristiannan lo mester ricibí cu gustu hende di tur nacion. Pablo a bisa: “Ricibí cu gustu un e otro, mescos cu Cristo tambe a ricibí nos cu gustu, cu gloria pa Dios na bista. Pasobra mi ta bisa cu Cristo en realidad a bira un minister di esnan cu ta circuncidá na fabor dje veracidad di Dios, p’e por confirmá e promesanan cu El a haci na nan antepasadonan, i p’e nacionnan por glorificá Dios pa su misericordia. Net manera ta pará skirbí [na Salmo 18:49]: ‘P’e motibu ei lo mi reconocé bo abiertamente entre e nacionnan, i na bo nomber lo mi haci melodia.’ I un biaha mas e ta bisa [na Deuteronomio 32:43]: ‘Boso alegrá, O nacionnan, cu su pueblo.’ I un biaha mas [na Salmo 117:1]: ‘Alabá Jehova, nacionnan tur, i laga tur pueblo alab’é.’ I un biaha mas Isaías [11:1, 10] ta bisa: ‘Lo tin e rais di Jese, i lo tin unu cu ta lanta pa goberná nacionnan; den dje nacionnan lo cifra nan speransa.’ Laga e Dios cu ta duna speransa yena boso cu tur goso i pas dor di boso kerementu, pa boso por abundá den speransa cu poder di spiritu santu.” Dor dje método basá riba tópico aki, Pablo a demostrá con pa cita textonan cu ta establecé berdadnan bíblico.
17. Na armonia cu ki precedente cristiannan ta cita for di aki i aya den henter e Bijbel?
17 E promé carta inspirá di apostel Pedro ta contené 34 cita for di dies buki den e Ley, e Profetanan i Salmonan. Den su di dos carta, Pedro ta cita seis biaha for di tres buki. E Evangelio di Mateo tin 122 cita for di Génesis te Malakías. Den e 27 bukinan dje Scritura Griego, tin 320 cita directo for di Génesis te Malakías i tambe cientos di otro referencianan n’e Scritura Hebreo. Na armonia cu e precedente cu Jesus a estabelecé i cu su apostelnan a sigui, ora cristiannan di tempu moderno ta haci un studio di tópico riba un tema bíblico, nan ta cita for di aki i aya den henter e Bijbel. Esaki ta specialmente apropiado den e “último dianan” aki, ora mayoria dje Scritura Hebreo i Griego ta haña su cumplimentu. (2 Timoteo 3:1) E ‘esclabo fiel’ ta haci uso di Bijbel dje forma ei den su publicacionnan, pero nunca e ta agregá n’e Palabra di Dios of ta kita for di dje.—Proverbionan 30:5, 6; Revelacion 22:18, 19.
Cana Semper den e Berdad
18. Pakico nos mester ‘cana den e berdad’?
18 Nos no mester kita nada for di Bijbel, pasobra henter e coleccion di siñansanan cristian den e Palabra di Dios ta “e berdad” of “e berdad dje bon nobo.” Pegamentu n’e berdad aki—“canando” den dje—ta vital pa salbacion. (Galationan 2:5; 2 Juan 4; 1 Timoteo 2:3, 4) Siendo cu cristianismo ta “e caminda dje berdad,” dor di yuda otronan promové su interesnan, nos ta bira “co-trahadornan den e berdad.”—2 Pedro 2:2; 3 Juan 8.
19. Con nos por “sigui cana den e berdad”?
19 Si nos kier “sigui cana den e berdad,” nos mester lesa Bijbel i probechá dje yudansa spiritual cu Dios ta percurá mediante e ‘esclabo fiel.’ (3 Juan 4) Laga nos haci esaki pa nos propio bienestar i pa asina nos por ta den un posicion pa siña otronan tocante Jehova Dios, Jesucristo i e propósito divino. I laga nos keda gradicidu cu Jehova su spiritu ta yuda nos comprendé su Palabra i haña éxito den sirbié den e berdad.
Con Bo Ta Contestá?
◻ Kico ta algun beneficio duradero di lesamentu di Bijbel?
◻ Pakico studia Bijbel den asociacion cu compañeronan creyente?
◻ Pakico ta apropiado pa cita for di vários lugá dor di henter Bijbel?
◻ Kico kier men ‘cana den e berdad,’ i con nos por haci esei?
[Plachi na página 17]
Mayornan, siña boso yunan e Scritura
[Plachi na página 18]
Den su Sermon Riba Ceru, Jesus a cita for di vários parti dje Scritura Hebreo