Beneficiando For di Lesamentu Diario di Bijbel

“Felis ta e homber . . . [kende] su deleite ta den e ley di Jehova, i den su ley e ta lesa na bos abou di dia i anochi.”—SALMO 1:1, 2.

1. (a) Ki anuncio prominente ta aparecé na un banda di un edificio di fábrica n’e sede mundial di Watch Tower Society? (b) Con nos lo saca beneficio si nos personalmente ta tuma e conseho ei na pechu?

“LESA E PALABRA DI DIOS, BIJBEL SANTU, DIARIAMENTE.” Na letter grandi, e palabranan ei ta aparecé na un banda di un edificio di fábrica na Brooklyn, New York, unda Bijbel i literatura bíblico ta ser imprimí dor di Watchtower Bible and Tract Society. E conseho ei no ta intencioná solamente pa hende di mundu cu ta mira e anuncio. Testigonan di Jehova ta realisá cu nan tambe mester tuma esei na pechu. Esnan cu ta lesa e Bijbel regularmente i ta haci aplicacion personal di dje ta beneficiá for dje siñansa, e reprendimentu, e coreccion i e disiplina den husticia cu e ta percurá.—2 Timoteo 3:16, 17.

2. Con Ruman Russell a enfatisá e importancia di lesa Bijbel?

² Testigonan di Jehova ta apreciá masha tantu nan publicacionnan di yudansa pa studio di Bijbel, incluyendo E Toren di Vigilancia, i nan ta usa esakinan regularmente. Pero nan sa cu ningun di nan ta tuma e lugá di Bijbel mes. Aya na aña 1909, Charles Taze Russell, e promé presidente di e Watch Tower Bible and Tract Society, a skirbi e lectornan di e revista Toren di Vigilancia: “Nunca lubidá cu Bijbel ta nos Norma i cu maske nos ta mira nos yudansanan como procedente di Dios, nan ta ‘yudansanan’ i no substitutonan pa Bijbel.”

3. (a) Ki efecto “e palabra di Dios” tin riba esnan cu ta den contacto cuné? (b) Cu ki frecuencia e bereanonan tabata lesa i studia e Scritura?

³ E Scritura inspirá tin un profundidad i un forsa cu ningun otro buki tin. “E palabra di Dios ta bibu i ta ehercé poder i ta mas skerpi cu cualkier spada di dos fila i ta penetrá asta te n’e punto di dividí alma i spiritu, i djoint i nan tuti, i ta capas pa dicerní pensamentu i intencionnan dje curason.” (Hebreonan 4:12) E disipel Lucas a encomendá calurosamente e hendenan di Berea yamando nan “di un disposicion mas noble.” Nan no solamente a ricibí e palabra ansiosamente manera apostel Pablo i su socio Sílas a predik’é sino tambe ‘a examiná cuidadosamente e Scritura diariamente’ pa determiná e base bíblico pa loke a ser siñá.—Echonan 17:11.

Lesand’e Diariamente

4. Kico e Scritura ta indicá relacioná cu e frecuencia cu nos mester lesa Bijbel?

⁴ Bijbel no ta bisa specíficamente cu ki frecuencia nos mester les’é. Sin embargo, e ta mencioná sí Jehova su conseho na Hosué pa ‘lesa den e buki dje ley na bos abou di dia i anochi’ di manera cu e por a actua sabiamente i tin éxito cumpliendo cu su asignacion cu Dios a dun’é. (Hosué 1:8) E ta bisa nos cu ken cu a goberná como rey riba Israel di antigua mester a lesa e Scritura “tur e dianan di su bida.” (Deuteronomio 17:19) E ta sigui bisa: “Felis ta e homber cu no a cana den e conseho dje malbadonan . . . Pero su deleite ta den e ley di Jehova, i den su ley e ta lesa na bos abou di dia i anochi.” (Salmo 1:1, 2) Tambe, e Evangelio cu Mateo a registrá ta bisa nos cu ora Jesucristo a rechasá e esfuersonan di Satanas pa tent’é, El a cita for dje Scritura Hebreo inspirá, bisando: “Ta pará skirbí, ‘Hende mester biba, no di pan so, sino di tur expresion cu ta bini for dje boca di Jehova.’ ” (Mateo 4:4) Cu ki frecuencia nos mester di alimento físico? Tur dia! Tumando alimento spiritual diariamente ta asta mas importante pasobra e ta afectá nos prospectonan pa bida eterno.—Deuteronomio 8:3; Juan 17:3.

5. Con lesamentu di Bijbel diariamente por yuda nos “cana di un manera digno di Jehova” ora pruebanan di fe ta ser lansá riba nos?

⁵ Cada un di nos mester ser fortalecí diariamente dor dje Palabra di Dios. Tur dia—na cas, na trabou, na scol, riba caya, di cómpras, den nos ministerio—desafionan ta ser lansá riba nos fe. Con nos lo trata cu esakinan? Mandamentu i principionan bíblico lo bini mesora na nos mente? En bes di animá un sintimentu di confiansa propio, Bijbel ta spierta nos: “Laga esun cu ta kere cu e ta pará tene cuidou p’e no cai.” (1 Corintionan 10:12) Lesamentu diario di Bijbel lo yuda nos “cana di un manera digno di Jehova afin di agrad’é plenamente” en bes di permití e mundu primi nos den su malchi.—Colosensenan 1:9, 10; Romanonan 12:2.

E Necesidad pa Lesa Bijbel Bes Tras Bes

6. Pakico ta probechoso pa lesa Bijbel bes tras bes?

⁶ Lesamentu di Bijbel ta hopi diferente for di lesamentu di un buki di ficcion. Mayoria buki di ficcion popular ta diseñá pa lesa un solo biaha; una bes un persona sa e historia i con e ta caba, esei ta tur cos. Na contraste, sin importá cuantu biaha nos a lesa e Bijbel, nos ta saca hopi beneficio dor di les’é atrobe. (Proverbionan 9:9) Pa un persona cu dicernimentu, e Scritura constantemente ta haña un nificacion nobo. Profecianan relacioná cu e último dianan ta bira asta mas impresionante p’e den lus di loke el a mira, tende i experenciá personalmente den lunanan recien. (Daniel 12:4) Segun cu e ta amplia su propio experencia den bida i ta topa cu problemanan, e lesador di Bijbel cu tin dicernimentu ta comprendé mas plenamente e conseho cu el a yega di lesa anteriormente solamente informalmente. (Proverbionan 4:18) Si e bira seriamente enfermo, e promesanan di Bijbel relacioná cu kitamentu di dolor i restoracion di salú ta haña un nificacion mas profundo p’e cu nunca promé. Ora amigunan íntimo i miembronan di famia muri, e promesa di un resureccion ta bira asta mas precioso.

7. Kico lo yuda nos ora nos asumí un responsabilidad nobo den bida, i pakico?

⁷ Kisas abo personalmente a lesa Bijbel i a aplicá su conseho durante un periodo di añanan. Pero tal bes bo ta asumiendo awor responsabilidadnan nobo den bida. Bo ta planeando pa casa? Bo ta bai bira un mayor? Bo a ser confiá cu responsabilidad den e congregacion como anciano of sirbidor ministerial? Bo a bira un evangelisador di tempu completo, cu oportunidadnan adicional pa predicá i siña? Ki probechoso lo ta pa lesa henter e Bijbel atrobe cu e responsabilidadnan nobo ei na mente!—Efesionan 5:24, 25; 6:4; 2 Timoteo 4:1, 2.

8. Con circunstancianan nobo por mustra e necesidad pa siña mas tocante cosnan cu nos a pensa cu nos tabata sa caba?

⁸ Den pasado por ta cu bo tabata bon den manifestá e frutanan di spiritu. (Galationan 5:22, 23) Sin embargo, circunstancianan nobo por confrontá bo cu e necesidad pa siña hopi mas tocante e cualidadnan piadoso ei. (Compará cu Hebreonan 5:8.) Un ex-superintendente biahero kende a haña ta necesario pa bandoná su sirbishi special p’e por percurá pa su mayornan di edad a bisa: “Semper mi a pensa cu mi tabata razonablemente bon den manifestá e frutanan di spiritu. Awor mi ta sinti como si mi ta cuminsando completamente di nobo atrobe.” Di igual manera, esposo i esposanan kende nan partner matrimonial ta sufri di malesa físico of emocional severo por haña cu den dunamentu di cuido personal, tension tin biaha ta causa reaccionnan cu ta desanimá nan. Lesamentu regular di Bijbel ta un fuente di gran consuelo i yudansa.

E Oranan cu Bo Por Lesa Bijbel

9. (a) Kico por yuda un persona hopi ocupá haña tempu pa lesa Bijbel diariamente? (b) Pakico lesamentu dje Palabra di Dios ta specialmente importante pa ancianonan?

⁹ Naturalmente, pa hende cu ya caba ta hopi ocupá, pa haña tempu pa haci algu adicional riba un base regular ta un desafio. Sin embargo, nos por saca beneficio for di Jehova su ehempel. Bijbel ta revelá cu e ta haci cosnan na ‘tempu señalá.’ (Génesis 21:2; Exodo 9:5; Lucas 21:24; Galationan 4:4) Aprecio p’e importancia di lesa e Palabra di Dios regularmente por yuda nos fiha un tempu p’e den nos programa diario. (Efesionan 5:15-17) Ancianonan en particular mester apartá tempu pa lesamentu regular di Bijbel di manera cu e conseho cu nan ta duna lo ta inekibocablemente basá riba principionan di Bijbel i di manera cu e spiritu cu nan ta demostrá lo reflehá “e sabiduria di ariba.”—Santiago 3:17; Tito 1:9.

10. Ki ora esnan cu ta lesa Bijbel diariamente ta haña tempu pa lesa?

¹⁰ Hopi persona cu ta logra tene un programa di lesamentu personal di Bijbel ta haci nan lesamentu mainta trempan promé cu nan cuminsá cu e actividadnan dje dia. Otronan ta haña cu nan por haci’é mihó consistentemente na un otro ora. Audiocaset di Bijbel (caminda eseinan ta disponibel) ta yuda esnan cu tin cu biaha pa trabou i despues pa cas, haci bon uso dje tempu di biahe, i algun Testigo ta scucha nan miéntras cu nan ta haci nan trabounan rutinario di cas. Programanan cu a resultá práctico pa un variedad di Testigo na Europa, Africa, Nort América, Sur América, i parti di Oriente ta ser mustrá na página 20 i 21, bou dje título “Ki Ora Nan Ta Les’é i Con Nan Ta Saca Beneficio.”

11. Con lesamentu di Bijbel diariamente por ser lográ asta ora e tempu disponibel ta bastante limitá?

¹¹ E cos di mas importante no ta e cantidad di tempu cu bo ta dedicá na lesamentu di Bijbel na un solo ocasion sino e regularidad cu cua bo ta haci’é. Kisas bo ta haña ta recompensador pa lesa pa un ora of mas tras di otro, haciendo investigacion adicional i birando cabalmente absorbá den e material. Pero bo programa ta permití esei riba un base regular? En bes di laga dianan pasa sin ningun lesamentu di Bijbel, lo no ta mihó pa tur dia bo lesa pa 15 minuut of asta pa 5 minuut? Haci’é bo determinacion pa lesa Bijbel diariamente. Anto añadí investigacion mas profundo n’e lesamentu ei ora ta posibel.

Diferente Método pa Lesa Bijbel

12. Ki programa di lesamentu di Bijbel miembronan nobo dje famia di Betel i studiantenan di Galad tin?

¹² Tin hopi manera pa lesa Bijbel. Ta probechoso pa les’é for di Génesis te Revelacion. Ta ser rekerí di tur miembro dje famia mundial di Betel cu ta sirbi n’e sede mundial of na un dje sucursalnan dje Sociedad pa lesa henter e Bijbel durante e promé aña di nan sirbishi di Betel. (Esei generalmente ta encerá lesamentu di tres pa cincu capítulo, dependiendo di nan largura, of cuater pa cincu página, pa dia.) Studiantenan n’e Scol Bíblico di Galad di Watchtower tambe mester lesa e Bijbel di kaft pa kaft promé cu nan gradua. Ta ser sperá cu esaki lo yuda nan haci lesamentu diario di Bijbel un parti di nan bida.

13. Ki meta ta ser recomendá pa Testigonan recien bautisá?

¹³ Ta probechoso pa Testigonan recien bautisá fiha pa nan mes e meta pa lesa henter e Bijbel. Na 1975, n’e tempu ora un homber hóben na Francia tabata preparando pa bautismo, un anciano a puntr’é si e tabatin un programa fiho pa lesa Bijbel. For di e tempu ei padilanti el a bin ta lesa henter e Bijbel cada aña, generalmente haciendo su lesamentu parti mainta promé cu e bai traha. En cuanto e resultadonan, e ta bisa: “Mi a bin conocé Jehova muchu mas mihó. Mi por mira con tur loke e ta haci ta relacioná cu su propósito i con e ta respondé ora obstáculonan ta presentá. Mi ta mira cu Jehova, na mésun tempu, ta hustu i bon den tur su accionnan.”

14. (a) Afin di cuminsá cu un programa di lesamentu personal di Bijbel cu lo continuá, kico ta necesario? (b) Kico lo por yuda nos fiha den nos mente e splicacion general di cada buki di Bijbel segun cu nos ta les’é?

¹⁴ Abo a lesa henter e Bijbel? Si no, awor ta un bon tempu pa cuminsá. Traha un programa fiho, i despues pega na dje. Determiná cuantu página of cuantu capítulo lo bo lesa cada dia, of simplemente determiná cuantu tempu lo bo dedicá i ki ora. No ta tur hende lo completá e Bijbel den un aña, pero e cos importante ta pa lesa e Palabra di Dios regularmente, haciendo esei diariamente cuantu cu ta posibel. Segun cu bo ta pasa dor dje Bijbel, bo por haña cu ta probechoso pa usa cierto buki di referencia pa graba den bo mente e splicacion general dje material. Si Perspicacia para comprender las Escrituras ta disponibel den bo idioma, e ora ei promé cu bo cuminsá lesa un cierto buki di Bijbel, repasá e splicacion breve di su puntonan sobresaliente manera Perspicaciaa ta dun’é. Nota particularmente e subtítulonan cu letter diki den e splicacion. Of haci uso similar dje resúmen mas extenso cu e buki “Toda Escritura es inspirada de Dios y provechosa” ta duna.b

15. (a) Ki sugerencianan ofrecí na página 16 i 17 lo por yuda mehorá bo lesamentu di Bijbel? (b) En bes di haci lesamentu di un cierto cantidad di página algu ritual, na ki asuntu vital nos mester duna mayor atencion?

¹⁵ Lesamentu consecutivo di Bijbel ta beneficioso, pero no bira simplemente un lesador ritual. No lesa un cierto cantidad di página cada dia djis pa bo por bisa cu bo ta lesa e Bijbel completo tur aña. Manera e cuadro “Sugerencianan pa Mehorá Bo Lesamentu di Bijbel” (página 16 i 17) ta mustra, tin hopi manera cu bo por lesa i disfrutá di Bijbel. Sin importá e método cu bo ta usa, haci sigur cu bo ta alimentando tantu bo mente como bo curason.

Capta e Sentido di Loke Bo Ta Lesa

16. Pakico ta importante pa tuma tempu pa meditá riba loke nos ta lesa?

¹⁶ Ora Jesus tabata siña su disipelnan, e tabata enfatisá e importancia pa nan comprendé loke e tabata bisa. Tabata vital no pa nan haña simplemente un comprendimentu intelectual, sino pa nan capta “e sentido di dje cu nan curason” di manera cu nan por a aplik’é den nan bida. (Mateo 13:14, 15, 19, 23) Loke ta conta pa Dios ta loke un persona realmente ta di paden, i esaki ta loke e curason ta representá. (1 Samuel 16:7; Proverbionan 4:23) Pues, ademas di haci sigur cu nos ta comprendé loke pasashinan di Bijbel ta bisa, nos tin cu meditá riba nan, considerando nan implicacionnan den nos propio bida.—Salmo 48:9; 1 Timoteo 4:15.

17. Cua ta algun ángulo for di cua nos lo por meditá riba loke nos ta lesa den e Scritura?

¹⁷ Trata di identificá principionan fundamental den relatonan di Bijbel di manera cu bo por aplicá esakinan na situacionnan cu bo ta topa. (Compará cu Mateo 9:13; 19:3-6.) Segun cu bo ta lesa tocante Jehova su cualidadnan maraviyoso i ta meditá riba nan, usa e oportunidad ei pa fortalecé bo relacion personal cuné, pa desaroyá den bo mes un sentido fuerte di debocion piadoso. Ora bo ta lesa declaracionnan di Jehova su propósito, considerá loke bo por haci pa obra na armonia cu esakinan. Ora bo ta lesa conseho directo, en bes di simplemente bisa den bo mes, ‘Mi sa esei,’ puntra, ‘Mi ta haciendo loke e ta bisa?’ Si ta asina, puntra bo mes, ‘Den ki maneranan lo mi por haci’é “mas plenamente”?’ (1 Tesalonicensenan 4:1) Segun cu bo ta siña e rekisitonan di Dios, ripará tambe e ehempelnan di bida real den Bijbel di esnan cu a biba na armonia cu e rekisitonan aki i esnan cu no a haci’é. Considerá pakico nan a sigui e curso cu nan a sigui i kico tabata e resultado. (Romanonan 15:4; 1 Corintionan 10:11) Ora bo ta lesa tocante e bida di Jesucristo, corda cu Jesus ta esun kende Jehova a confia cu gobernacion riba henter e tera; usa e oportunidad pa fortalecé den bo mes un anhelo pa Dios su mundu nobo. Tambe, analisá maneranan den cua bo por imitá e Yu di Dios mas plenamente.—1 Pedro 2:21.

18. Con nos por balansá lesamentu di Bijbel cu nos uso di material di studio cu “e esclabo fiel i discreto” ta percurá?

¹⁸ Naturalmente, lesamentu di Bijbel no mester reemplasá bo uso dje excelente material di studio cu “e esclabo fiel i discreto” a haci disponibel. Esei tambe ta un parti dje provision di Jehova—unu masha precioso. (Mateo 24:45-47) Haci sigur cu lesamentu regular dje Palabra di Dios mes tin un lugá prominente den bo bida. Cuantu cu ta posibel, “LESA E PALABRA DI DIOS, BIJBEL SANTU, DIARIAMENTE.”

[Notanan]

Con Lo Bo Contestá?

◻ Pakico ta probechoso pa haci algun lesamentu di Bijbel tur dia?

◻ Pakico nos tin cu lesa e Bijbel bes tras bes?

◻ Den bo propio programa, ki ora ta un bon tempu pa lesamentu di Bijbel diariamente?

◻ Segun cu bo ta lesa Bijbel bes tras bes, kico por agregá variedad na bo programa di lesamentu?

◻ Pakico ta hopi importante pa meditá riba loke nos ta lesa?

[Kuadro na página 16, 17]

Sugerencianan pa mehorá bo lesamentu di Bijbel

(1) Hopi hende ta lesa e bukinan di Bijbel den e órden den cua nan habitualmente a ser imprimí, di Génesis te Revelacion. Tambe bo por lesa nan den e órden den cua nan a ser skirbí originalmente. Tene na mente cu Bijbel ta un coleccion di 66 buki inspirá, un biblioteca divino. Pa variedad, kisas lo bo kier lesa algun dje bukinan cu ta contené historia, despues algun cu ta principalmente profético, siguí pa algun cu ta cartanan di conseho, en bes di simplemente sigui e órden di página. Tene un registro di loke bo a lesa, i haci sigur di lesa henter e Bijbel.

(2) Despues cu bo lesa un porcion dje Scritura, puntra bo mes kico e ta revelá tocante Jehova, su propósito, su manera di haci cosnan; con e mester afectá bo propio bida; con bo por us’é pa yuda un otro hende.

(3) Usando como guia e cuadro “Sucesonan Principal di Jesus Su Bida Terenal” publicá bou dje tema “Jesucristo” den Perspicacia para comprender las Escrituras (tambe den “Toda Escritura es inspirada de Dios y provechosa”), lesa e relatonan paralelo di cada porcion dje Evangelionan, un tras di otro. Complementá esaki dor di consultá cu e seccionnan corespondiente den e buki E homber mas importante cu hamás a biba.

(4) Ora bo lesa for di Echonan di Apostel e relato dje bida i ministerio di Pablo, lesa tambe e cartanan inspirá cu tin relacion cu nan. Pues, ora mencion ta ser hací di vários stad of áreanan caminda Pablo a predicá, stop i lesa e cartanan cu el a skirbi despues na compañeronan cristian n’e lugánan ei. Ta probechoso tambe pa sigui su biahenan riba un mapa, manera esun riba e kaft patras dje Traducción del Nuevo Mundo.

(5) Huntu cu bo lesamentu di Exodo te Deuteronomio, lesa e carta n’e Hebreonan pa haña un splicacion di hopi dje patronchinan profético. Bou di “Ley” den Perspicacia para comprender las Escrituras, consultá cu e cuadro “Algun Rasgo dje Pacto di Ley.”

(6) Ora di lesa e bukinan profético, tuma tempu pa examiná e antecedencia histórico den Bijbel relacioná cu eseinan. Por ehempel, ora di lesa e buki di Isaías, examiná loke ta ser bisá otro caminda tocante e reynan Uzías, Jotan, Acas i Ezekías, kendenan ta ser mencioná na Isaías 1:⁠1. (2 Reynan, capítulo 15-20; 2 Crónicanan, capítulo 26-32) Of ora di lesa Ageo i Zacarías, tuma tempu pa examiná loke ta ser hañá den e buki di Esdras.

(7) Selectá un buki di Bijbel, lesa un porcion di dje (tal bes un capítulo), despues haci investigacion, usando e Watch Tower Publications ­Index of e Watchtower Library riba computer si e ta disponibel den bo idioma. Haci aplicacion dje material den bo mes bida. Us’é den discursonan i den e ministerio di veld. Despues sigui pa un otro seccion.

(8) Si tin un publicacion di Watch Tower cu ta duna un comentario riba un buki di Bijbel of un porcion di dje, consult’é frecuentemente miéntras cu bo ta lesando e parti ei di Bijbel. (Por ehempel: riba E Cantica di Sálomon, E Toren di Vigilancia [na ingles], 1 di december, 1957, página ­720-34; riba Ezekiel, “Las naciones sabrán que yo soy Jehová”... ¿cómo?; riba Daniel, “Hágase tu voluntad en la Tierra” of Nuestro gobierno mundial entrante... el reino de Dios; riba Ageo i Zacarías, El Paraíso restaurado a la humanidad... ¡por la Teocracia!; riba Revelacion, Revelacion​—⁠su gran culminacion ta cerca!)

(9) Segun cu bo ta lesa, busca algun dje referencianan di un texto pa otro. Nota e 320 pasashinan for dje Scritura Hebreo cu ta directamente citá den e Scritura Griego Cristian i e cientos di otro pasashinan na cua referencia ta ser hací, i di cua tambe e aplicacion ta ser duná. Referencianan di un texto pa otro ta señalá na cumplimentu di profecia cu a ser registrá den Bijbel, na detayenan biográfico i geográfico, i na pensamentunan paralelo cu por clarificá expresionnan cu abo tal bes ta haña ta difícil pa comprendé.

(10) Usando e Edicion di Referencia dje Traducción del Nuevo Mundo, si e ta disponibel den bo idioma, wak e notanan abou i e artículonan di apéndix cu ta relacioná cu loke bo ta lesando. Esakinan ta mustra e base pa traduccionnan cu ta ser usá i otro maneranan den cua expresionnan importante por ser traducí. Tal bes tambe lo bo kier compará e traduccion di cierto versículonan cu otro traduccionnan di Bijbel.

(11) Despues cu bo lesa cada capítulo, skirbi un resúmen masha breve dje idea principal den e capítulo ei. Us’é como base pa examinacion i meditacion mas despues.

(12) Segun cu bo ta lesa Bijbel, marca textonan selectá cu abo specialmente kier corda, of copia nan riba karchinan i pone esakinan caminda lo bo mira nan tur dia. Memorisá nan; meditá riba nan; haci uso di nan. No purba memorisá demasiado den un solo biaha, tal bes solamente un of dos cada siman; anto selectá mas e siguiente biaha cu bo ta haci lesamentu di Bijbel.

[Plachinan na página 15]

Bo ta lesando e Bijbel of ta scuchando grabacionnan di dje tur dia?