Manteniendo Bista i Curason Fiha Riba e Premio

Manera Edith Michael A Relat’e

Na cuminsamentu di añanan ’30, nos tabata bibando cerca di St. Louis, Missouri, Merca, ora un Testigo di Jehova a pasa. Net e ora ei e cabuya di cologá paña a kibra, tirando Mama su pañanan blancu-blancu den lodo. El a aceptá e bukinan cu a ser ofrecé, djis pa e Testigo bai, i a pone nan riba un reki, lubidando riba nan.

E AÑANAN ei tabata e temporada di depresion económico, i Tata tabata sin trabou. Un dia el a puntra si no tabatin nada pa lesa den cas. Mama a bis’é tocante e bukinan. El a cuminsá lesa nan, i despues di un ratu el a sclama: “Mami, esaki ta e berdad!”

“Ai, ta djis un religion cu kier placa mescos cu tur e otronan,” Mama a contestá. Sin embargo, Tata a urgié pa cai sinta i busca e textonan huntu cuné. Ora el a haci esei, Mama tambe a keda convencí. Despues di esei nan a cuminsá busca e Testigonan i a haña sa cu nan tabata reuní den un sala di huur cerca dje centro di St. Louis, un sala cu tabata ser usá tambe pa bailamentu i otro actividadnan.

Tata cu Mama a hibá mi huntu cu nan—mi tabatin rond di tres aña—i a haña e sala, pero tabatin bailamentu n’e momento ei. Tata a haña sa ki ora e reunionnan a ser tené, i nos a bolbe despues ora tabatin reunion. Tambe nos a cuminsá asistí na un studio di Bijbel semanal cerca caminda nos tabata biba. E tabata ser tené na cas dje señora cu a pasa cerca nos pa promé biaha. “Pakico bo no ta bini cu bo yu hombernan tambe?” el a puntra. Mama tabatin bergwensa di bisa cu nan no tabatin sapatu. Ora cu finalmente el a splica esei, e Testigonan a soru pa sapatu, i mi ruman hombernan a cuminsá asistí n’e reunionnan huntu cu nos.

Nan a duna Mama un teritorio pa predicá pegá cu nos cas, i el a cuminsá den e trabou di cas-pa-cas. Mi tabata bai cuné, scondiendo tras di dje. Promé cu el a siña core auto, nos tabata cana mas cu un kilometer pa coge un bus cu a hiba nos n’e reunionnan na St. Louis. Asta ora tabatin mal weer cu ijs i sneu, nos nunca a perde reunion.

Na 1934, Mama cu Tata a bautisá. Mi tambe kier a bautisá, i mi a sigui insistí te ora cu Mama a pidi un Testigo di mas edad pa papia cu mi tocante esei. E ruman homber a hací mi hopi pregunta den un manera cu mi por a comprendé. Anto el a bisa mi mayornan cu nan no mester kitá mi di bautisá; esei lo por perhudicá mi crecementu spiritual. Pues mi a ser bautisá e siguiente zomer, ora cu ainda mi tabatin seis aña di edad.

Mi a stima e foyeto chikitu Home and Happiness [Cas i Felicidad], cu mi a carga huntu cu mi tur ora, asta teniend’e bou di mi cusinchi miéntras mi a drumi. Bes tras bes, mi a roga Mama pa les’é pa mi, te ora mi tabata sabi e for di cabes. Su kaft patras tabatin un plachi di un mucha muher chikitu den Paradijs huntu cu un leon. Mi tabata bisa cu ami tabata e mucha muher chikitu ei. E plachi ei a yudá mi mantené mi bista riba e premio di bida den e mundu nobo di Dios.

Mi tabata masha tímido, pero maske mi por tabata temblando, semper mi a contestá preguntanan durante e Studio di Toren di Vigilancia di congregacion.

Lamentablemente, Tata tabatin miedu cu lo el a perde su trabou pa motibu di ta un Testigo, pues el a stop di asociá cu e Testigonan. Mi ruman hombernan tambe a haci mescos.

Ministerio di Tempu Completo

Mama tabata laga pioneronan, esta ministernan di tempu completo, parkeer nan caravana den nos curá patras, i despues di scol mi tabata djoin nan den e ministerio. Pronto mi kier a traha pionero, pero Tata tabata contra esaki, keriendo cu mi mester tin mas educacion seglar. Finalmente Mama a convenc’é pa lagá mi traha pionero. Pues na juni 1943, ora mi tabatin 14 aña, mi a cuminsá e ministerio di tempu completo. Pa contribuí na gastunan di cas, mi a traha trabou ‘part-time,’ i tin biaha a traha ‘full-time.’ Sin embargo, mi a alcansá e meta mensual di 150 ora den e trabou di predicá.

Cu tempu mi a haña un compañera pa traha pionero cuné, Dorothy Craden, kende a cuminsá traha pionero na januari 1943, ora e tabatin 17 aña. Dorothy tabata promé un católico deboto, pero despues di seis luna di studio bíblico, el a ser bautisá. Pa hopi aña e tabata un fuente di estímulo i fortalesa pa mi, i ami tabata un fuente di estímulo p’e. Nos a bira mas cerá cu ruman carnal.

Cuminsando na 1945, nos a traha pionero huntu den pueblonan chikitu na Missouri caminda no tabatin congregacionnan. Den e pueblo di Bowling Green nos a drecha un sala di reunion; Mama a bin i a yuda nos. Despues nos tabata bishitá tur e casnan den e pueblo tur siman i invitá e hendenan pa un discurso público cu nos a areglá pa rumannan homber di St. Louis bin duna. Nos tabatin un asistencia semanal di entre 40 i 50 persona. Despues nos a haci mescos na Louisiana, caminda nos a huur un tempel di mazon. Pa cubri e gastu pa huur salanan, nos a pone cahanan di contribucion, i tur siman tur e gastunan a ser cubrí.

Siguientemente nos a bai n’e stad México, Missouri, caminda nos a huur un tienda. Nos a drech’é pa e congregacion chikitu einan usa. E edificio tabatin cuartonan huntu cuné den cua nos a biba. Tambe nos a yuda haci areglo pa discursonan público na México. Despues nos a bai n’e capital dje estado, Jefferson City, Missouri, caminda tur mainta den siman nos a tuma contacto cu funcionarionan público den nan oficinanan. Nos tabata biba den un cuarto riba e Salon di Reino huntu cu Stella Willie, kende tabata manera un mama pa nos.

Di Jefferson City nos tres a bai n’e pueblonan di Festus i Crystal City, cuanan tabata cerca di otro. Nos a biba den un couchi di galiña cu a ser combertí den cuarto patras dje cas di un famia interesá. Ya cu no tabatin ningun hende homber bautisá, nos tabata conducí tur e reunionnan. Como trabou ‘part-time,’ nos tabata bende cosmética. Materialmente nos tabatin poco. De facto, nos no tabatin cen pa drecha e buracunan den nos sapatu, di manera cu tur mainta nos tabata pone pida carton den nan, i anochi nos cada un tabata laba esun shimis cu nos tabatin.

Trempan na 1948, ora mi tabatin 19 aña, ami cu Dorothy a ricibí invitacionnan pa e di 12 klas dje Scol Bíblico di Galad di Watchtower pa misioneronan. Despues dje curso di cincu luna, e shen studiantenan a gradua dia 6 di februari, 1949. Esei tabata un ocasion masha felis mes. Mi mayornan a muda pa California, i Mama a bini te for di einan pa ta presente.

Na Caminda pa Nos Asignacion

Bintiocho graduado a ser asigná na Italia—seis, incluyendo ami cu Dorothy, n’e stad di Milan. Dia 4 di mart, 1949, nos a bandoná New York riba e barcu italiano Vulcania. E biahe a dura 11 dia, i e laman brutu a marea mayoria di nos. Ruman Benanti a bini n’e haf di Genoa pa topa nos i hiba nos Milan cu trein.

Ora nos a yega n’e cas di misionero na Milan, nos a haña flor cu un hobencita italiano a pone den cada un di nos kambernan. Añanan despues e hobencita aki, Maria Merafina, a bai Galad, a bolbe Italia, i ami cuné a sirbi den un cas di misionero huntu!

E mainta despues cu nos a yega Milan, nos a wak dor di e bentana di baño. Den e caya tras di nos cas tabatin un edificio di apartamento grandi cu a ser destruí dor di bom. Un avion di guera mericano accidentalmente a laga un bom cai cu a mata tur e 80 famianan cu tabata biba den e edificio. Na un otro ocasion, un bom cu nan a mik riba un fábrica a cai riba un scol i a mata 500 mucha. Pues e hendenan no tabata masha contentu cu mericanonan.

Hende tabata cansá di guera. Hopi hende a bisa cu si un otro guera a cuminsá, nan lo no a bai n’e refugionan contra bom sino lo a keda cas i cende gas i mata nan mes asina. Nos a sigurá nan cu nos tabata ei pa representá, ni Merca ni ningun otro gobiernu di hende, sino e Reino di Dios, cu lo bin caba cu tur guera i e sufrimentu cu eseinan ta trece.

Den e stad grandi di Milan, e único congregacion di rond di 20’i picu publicador a reuní den e cas di misionero. Den e stad ei nan no a traha teritorionan di predicá ainda, pues nos a cuminsá predicá den un edificio grandi di apartamento. Na e promé porta, nos a topa señor Giandinotti, kende tabata kier pa su casá bandoná e iglesia, pues el a aceptá un di nos publicacionnan. Señora Giandinotti tabata un muher sincero, yen di pregunta. “Lo mi ta contentu ora boso siña italiano,” el a bisa, “ya boso por siñá mi e Bijbel.”

E plafonnan di nan apartamento tabata haltu i e lus tabata dòf, pues anochi e tabata pone su stul riba e mesa pa ta mas cerca dje lus pa lesa e Bijbel. “Si mi studia Bijbel cu boso,” el a puntra, “mi por sigui bai misa?” Nos a bis’é cu e mes mester a dicidí esei. E tabata bai misa diadomingo mainta i a bini na nos reunionnan atardi. Anto un dia e di, “Mi no ta bai misa mas.”

“Di con?” nos a puntra.

“Pasobra nan no ta siña e Bijbel, i mi a haña e berdad studiando Bijbel cu boso.” El a bautisá i a studia cu hopi hende muher católico cu tabata bai misa tur dia. Mas despues el a bisa nos cu si nos a bis’é pa no bai misa, lo el a stop di studia i probablemente nunca lo a siña e berdad.

Asignacionnan Nobo

Cu tempu ami cu Dorothy, huntu cu cuater otro misionero, a ser asigná n’e stad italiano di Trieste, cu n’e tempu ei tabata ocupá pa trupanan británico i mericano. Tabatin solamente rond di dies Testigo, pero e cantidad aki a aumentá. Nos a predicá na Trieste pa tres aña, i ora nos a bai, tabatin 40 publicador di Reino, di cua 10 tabata pionero.

Nos siguiente asignacion tabata e stad di Verona, caminda no tabatin ningun congregacion. Pero ora e iglesia a pone presion riba e autoridadnan seglar, nos a ser obligá pa bandoná e stad. Ami cu Dorothy a ser asigná na Roma. Ei nos a huur un kamber mueblá i a traha teritorio cerca di Vaticano. Tabata tempu nos tabata einan cu Dorothy a bai Líbanon pa casa cu John Chimiklis. Nos tabata huntu pa casi 12 aña i realmente mi a sinti su falta.

Na 1955 a habri un cas di misionero nobo den un otro parti di Roma den un caya cu yama Caminda Nobo di Apio. Un dje cuater misioneranan den e cas tabata Maria Merafina, e mucha muher cu a pone flor den nos kambernan e anochi cu nos a yega Milan. Un congregacion nobo a ser formá den e área aki dje stad. Despues dje congreso internacional na Roma e zomer ei, mi tabatin e privilegio di asistí n’e congreso na Nuremberg, Alemania. Ki un emocion tabata pa topa esnan cu a soportá asina tantu persecucion bou dje régimen di Hitler!

Bek pa Merca

Na 1956, debí na problemanan di salú, mi a bolbe Merca cu doktersverlof. Pero nunca mi a kita mi bista for dje premio di sirbi Jehova awor i eternamente den su mundu nobo. Mi a planea pa bolbe Italia. Sin embargo, mi a topa Orville Michael, kende tabata sirbi n’e sede mundial di Testigonan di Jehova na Brooklyn, New York. Nos a casa despues dje congreso internacional di 1958 na New York City.

Djis despues nos a muda pa Front Royal, Virginia, caminda nos a disfrutá di sirbi cu un congregacion chikitu. Nos a biba den un apartamento hopi chikitu patras dje Salon di Reino. Finalmente, na mart 1960 a bira necesario pa bolbe Brooklyn pa haña trabou seglar pa paga nos cuentanan. Nos tabata traha anochi limpiando diferente banco di manera cu nos por a keda den e sirbishi di tempu completo.

Miéntras nos tabata na Brooklyn, mi tata a muri i mi casá su mama a haña un atake leve. Pues nos a dicidí di muda pa Oregon pa ta cerca di nos mamanan. Nos tur dos a haña trabou seglar ‘part-time’ i a sigui den e ministerio di pionero ei. Den otoño di 1964, nos i nos mamanan a core di punta west di Merca te na punta oost pa asistí n’e reunion anual di Watch Tower Bible and Tract Society na Pittsburgh, Pennsylvania.

Durante nos bishita na Rhode Island, nos a ser animá dor di un superintendente di circuito, Arlen Meier, cu su casá pa muda n’e capital dje estado ei, Providence, caminda tabatin mas necesidad di publicadornan di Reino. Nos mamanan a urgi nos pa aceptá e asignacion nobo aki, pues ora nos a bolbe na Oregon, nos a bende mayor parti di nos artículonan di cas i a muda.

Bayendo Scol di Galad Atrobe

Durante e zomer di 1965, nos a asistí na un congreso den Yankee Stadium. Ei nos a aplicá pa Scol di Galad como un pareha casá. Rond di un luna despues, nos a keda sorprendí di ricibí formularionan di aplicacion pa Galad, cu mester a ser mandá bek den 30 dia. Mi tabata preocupá pa bai un pais leu ya cu Mama su salú no tabata bon. Pero el a animá mi: “Yena e aplicacionnan ei. Bo sa cu semper bo mester aceptá cualkier privilegio di sirbishi cu Jehova ta ofrecé!”

Esei a pone nos dicidí. Nos a yena e aplicacionnan i a manda nan aden. Ki un sorpresa tabata pa ricibí invitacion pa e di 42 klas, cu a cuminsá dia 25 di april, 1966! Scol di Galad n’e tempu ei tabata situá na Brooklyn, New York. Ménos cu cincu luna despues, 106 di nos a gradua dia 11 di september, 1966.

Asigná na Argentina

Dos dia despues di graduacion, nos tabata riba caminda pa Argentina cu Peruvian Airlines. Ora nos a yega Buenos Aires, e superintendente di sucursal, Charles Eisenhower, a topa nos na aeropuerto. El a yuda nos pasa dor di duana i despues a hiba nos n’e sucursal. Nos a haña un dia pa desempaketá i haci nos mes na cas; anto nos lesnan di spañó a cuminsá. Nos a studia spañó 11 ora pa dia e promé luna. E di dos luna, nos a studia e idioma cuater ora pa dia i a cuminsá participá den e ministerio di veld.

Nos tabata na Buenos Aires pa cincu luna i despues nos a ser asigná na Rosario, un stad grandi rond di cuater ora cu trein den direccion nort. Despues di a sirbi ei pa 15 luna, nos a ser mandá mas nort na Santiago del Estero, un stad den un provincia desértico cayente. Miéntras nos tabata ei, na januari 1973, mi mama a muri. Mi tabatin cuater aña sin a mir’é. Loke a yuda sostené mi den mi tristesa tabata e speransa sigur di resureccion i tambe e satisfaccion di sa cu Mama lo tabata kier pa mi ta den mi asignacion.—Juan 5:28, 29; Echonan 24:15.

E hendenan di Santiago del Estero tabata amigabel, i tabata fácil pa cuminsá studionan di Bijbel. Ora nos a yega na 1968, tabatin rond di 20 pa 30 hende asistiendo na reunion, pero ocho aña despues tabatin mas cu shen persona den nos congregacion. Ademas, tabatin dos congregacion nobo di entre 25 pa 50 publicador den pueblonan cercano.

Regresando Merca Atrobe

Debí na problemanan di salú, na 1976 nos a ser asigná bek na Merca como pioneronan special—na Fayetteville, Nort Carolina. Tabatin hopi hende di abla spañó ei cu tabata di Centro i Sur América, di República Dominicano, Puerto Rico i asta di Spaña. Nos tabatin hopi studio di Bijbel, i cu tempu a cuminsá un congregacion spañó. Nos a pasa casi ocho aña den e asignacion ei.

Sin embargo, tabata necesario pa nos ta mas cerca di mi suegra, kende tabata di edad basta avansá i incapacitá. E tabata biba na Portland, Oregon, pues nos a ricibí un asignacion nobo pa e congregacion spañó na Vancouver, Washington, cu no tabata leu for di Portland. E congregacion tabata chikitu ora nos a yega na december 1983, pero nos ta mirando hopi hende recien interesá biniendo reunion.

Na juni 1996, mi a completá 53 aña di sirbishi di tempu completo, i mi esposo a completá 55 aña dia 1 di januari, 1996. Durante e hopi añanan aki, mi tabatin e privilegio di yuda cientos di hende na yega na un conocimentu dje berdad dje Palabra di Dios i dedicá nan bida na Jehova. Hopi di esakinan awor ta sirbi como anciano i ministernan di tempu completo.

Tin biaha hende ta puntrá mi si mi no ta sinti falta di no a haña yu. Echo ta cu Jehova a bendicioná mi cu hopi yu i nietu spiritual. Sí, mi bida tabata ricu i recompensador den e sirbishi di Jehova. Mi por simpatisá cu e yu muher di Jefté, kende a pasa su bida den sirbishi di tempel i nunca a haña yu debí na su gran privilegio di sirbishi.—Huesnan 11:38-40.

Ainda mi ta corda con mi a haci mi dedicacion na Jehova ora mi tabata djis un mucha chikitu. E plachi di Paradijs ta mes bibu den mi mente awor cu e tabata e tempu ei. Mi bista i curason ainda ta fihá riba e premio di bida sin fin den e mundu nobo di Dios. Sí, mi deseo ta pa sirbi Jehova, no djis pa un 50 aña, sino pa semper—bou di su gobernacion di Reino.

[Plachi na página 23]

Dorothy Craden, cu man riba mi scouder, i compañeronan pionero na 1943

[Plachi na página 23]

Na Roma, Italia, huntu cu compañeranan misionero na 1953

[Plachi na página 25]

Cu mi casá