Con Superintendentenan Biahero Ta Sirbi Como Mayordomo Fiel

“Na proporcion cu e don cu cada un a ricibí, us’é pa sirbi otro como mayordomo excelente dje bondad inmerecí di Dios expresá den vários manera.”—1 PEDRO 4:10.

1, 2. (a) Con lo bo definí e palabra “mayordomo”? (b) Ken ta ser incluí entre e mayordomonan cu Dios ta usa?

JEHOVA ta usa tur cristian fiel como mayordomo. Un mayordomo hopi bes ta un criá na encargo di un cas. Tambe lo e por manehá asuntunan comercial di su doño. (Lucas 16:1-3; Galationan 4:1, 2) Jesus a yama su cuerpo di ungínan leal riba tera “e mayordomo fiel.” Na e mayordomo aki el a confia “tur su pertenencianan,” incluyendo actividadnan di predicá e Reino.—Lucas 12:42-44; Mateo 24:14, 45.

² Apostel Pedro a bisa cu tur cristian ta mayordomo di Dios su bondad inmerecí expresá den vários manera. Tur cristian tin un posicion den cua e por cumpli cu e trabou di un mayordomo fiel. (1 Pedro 4:10) Ancianonan cristian nombrá ta mayordomo, i entre nan tin superintendentenan biahero. (Tito 1:7) Con e ancianonan biahero aki mester ser mirá? Ki cualidadnan i metanan nan mester tin? I con nan por ta di mayor beneficio p’e congregacionnan?

Gradicidu pa Nan Sirbishi

3. Pakico superintendentenan biahero por ser yamá ‘mayordomonan excelente’?

³ Skirbiendo un superintendente biahero i su esposa, un pareha cristian casá a bisa: “Nos lo kier expresá nos gratitud pa tur e tempu i amor cu boso a duna nos. Como famia, nos a beneficiá mashá for di tur boso animacion i conseho. Nos sa cu nos tin cu sigui crece spiritualmente, pero cu e yudansa di Jehova i cu rumannan manera boso, e tensionnan cu ta bai compañá cu crecementu ta bira mas fácil.” Expresionnan manera esakinan ta frecuente pasobra superintendentenan biahero ta mustra interes personal den compañeronan creyente, mescos cu un bon mayordomo ta percurá bon p’e necesidadnan di un cas. Algun ta excelente orador. Hopi ta sobresalí den e trabou di predicacion, miéntras cu otronan ta conocí pa nan cordialidad i compasion. Dor di cultivá i usa e donnan ei pa sirbi otronan, superintendentenan biahero por ser yamá corectamente “mayordomo excelente.”

4. Ki pregunta lo ser considerá awor?

⁴ “Loke ta ser buscá den mayordomonan ta pa un homber ser hañá fiel,” apostel Pablo a skirbi. (1 Corintionan 4:2) Sirbiendo compañeronan cristian den un congregacion diferente un siman tras di otro ta un privilegio único i gososo. No obstante, e ta un responsabilidad pisá tambe. Con, anto, superintendentenan biahero por cumpli cu nan trabou como mayordomo fielmente i exitosamente?

Cumpliendo Exitosamente cu Nan Trabou Como Mayordomo

5, 6. Pakico dependencia riba Jehova compañá cu oracion ta asina importante den e bida di un superintendente biahero?

⁵ Dependencia riba Jehova compañá cu oracion ta esencial si superintendentenan biahero kier ta mayordomonan exitoso. Pa motibu di nan programa pisá i hopi responsabilidad, nan por sinti nan tin biaha demasiado cargá. (Compará cu 2 Corintionan 5:4.) Pues nan tin cu actua na armonia cu e cantica cu e salmista David a canta: “Tira bo carga riba Jehova mes, i e mes lo sostené bo. Nunca lo e permití e hustu tambaleá.” (Salmo 55:22) Consolador, tambe, ta e palabranan di David: “Bendicioná sea Jehova, kende diariamente ta hiba e carga pa nos.”—Salmo 68:19.

⁶ Unda Pablo a haña e fortalesa pa percurá pa su responsabilidadnan spiritual? “Pa tur cos mi tin e forsa den birtud di esun cu ta duná mi poder,” el a skirbi. (Filipensenan 4:13) Sí, Jehova Dios tabata e Fuente di Pablo su fortalesa. Di igual manera, Pedro a consehá: “Si un hende ta sirbi, lagu’é sirbi como dependiendo dje forsa cu Dios ta suministrá; di manera cu den tur cos Dios por ser glorificá mediante Jesucristo.” (1 Pedro 4:11) Un ruman cu tabata un superintendente biahero pa hopi aña a enfatisá e necesidad pa dependencia riba Dios, ora el a declará: “Semper acudí na Jehova ora di atendé cu problema, i busca e yudansa di su organisacion.”

7. Con balansa ta hunga un papel importante den e trabou di un superintendente biahero?

⁷ Un superintendente biahero exitoso mester ta balansá. Mescos cu otro cristiannan, e ta haci esfuerso pa “haci sigur dje cosnan mas importante.” (Filipensenan 1:10)a Ora e ancianonan local tin pregunta tocante un cierto asuntu, ta sabí pa nan consultá cu e superintendente di circuito cu ta di bishita. (Proverbionan 11:14; 15:22) Probablemente, su observacionnan balansá i conseho bíblico lo resultá di ta masha útil segun cu e ancianonan ta sigui atendé e asuntu despues cu el a bandoná e congregacion. Algu por estilo, Pablo a bisa Timoteo: “E cosnan cu bo a tende di mi cu e apoyo di hopi testigo, encargá e cosnan aki na hombernan fiel, cu, na nan turno, lo ta adecuadamente capacitá pa siña otronan.”—2 Timoteo 2:2.

8. Pakico studio di Bijbel, investigacion i meditacion ta esencial?

⁸ Studio dje Scritura, investigacion i meditacion ta rekisitonan pa duna conseho sano. (Proverbionan 15:28) Un superintendente di districto a bisa: “Ora di reuní cu e ancianonan, nos no mester tin miedu di admití cu nos no sa e contesta riba un pregunta particular.” Haciendo e esfuerso pa haña “e mente di Cristo” riba un asuntu, ta haci posibel pa duna conseho basá riba Bijbel cu lo yuda otronan cumpli cu e boluntad di Dios. (1 Corintionan 2:16) Tin biaha un superintendente biahero tin cu skirbi e Sociedad Watch Tower pa haña instruccion. Sea cual sea e caso, fe den Jehova i amor pa e berdad ta muchu mas importante cu nos imágen of elocuencia. En bes di bini cu “extravagancia di abla of di sabiduria,” Pablo a cuminsá su ministerio na Corinto “den debilidad i den temor i cu hopi temblamentu.” Esaki a hacié ineficas? Al contrario, el a yuda e corintionan tene fe, “no den sabiduria di hende sino den e poder di Dios.”—1 Corintionan 2:1-5.

Otro Cualidadnan Vital

9. Pakico superintendentenan biahero mester tin empatia?

⁹ Empatia ta yuda superintendentenan biahero logra bon resultado. Pedro a urgi tur cristian pa ‘compartí sintimentu como compañero,’ of pa ser “cu simpatia.” (1 Pedro 3:8, nota) Un superintendente di circuito ta sinti e necesidad pa mustra ‘interes den tur persona den e congregacion i pa ta genuinamente atento.’ Cu un spiritu similar, Pablo a skirbi: “Alegrá cu hende cu ta alegrá; yora cu hende cu ta yora.” (Romanonan 12:15) Un actitud asina ta impulsá superintendentenan biahero pa haci un esfuerso sincero pa comprendé e problemanan i circunstancianan di compañeronan creyente. E ora ei nan por duna conseho bíblico edificante cu por ta di berdadero beneficio si e ser aplicá. Un superintendente di circuito cu ta sobresalí den mustra empatia a ricibí e carta aki for di un congregacion cerca di Turin, Italia: “Si bo kier ta interesante, sea interesá den otro hende; si bo kier agradá otro, sea agradabel; si bo kier ser stimá, sea amabel; si bo kier ser yudá, sea cla pa yuda. Esaki ta loke nos a siña for di bo!”

10. Kico superintendentenan di circuito i di districto a bisa tocante ser humilde, i ki ehempel Jesus a pone al respecto?

¹⁰ Ser humilde i acercabel ta yuda superintendentenan biahero logra hopi. Un superintendente di circuito a remarcá: “Ta masha importante pa mantené un actitud humilde.” E tabatin custumber di spierta superintendentenan biahero nobo: “No laga boso mes ser indebidamente influenciá dor dje rumannan mas ricu debí na loke nan por haci pa boso, ni limitá boso amistad solamente na e rumannan aki, sino semper purba trata otronan sin parcialidad.” (2 Crónicanan 19:6, 7) I un superintendente biahero berdaderamente humilde lo no tin un punto di bista exagerá di su mes importancia como representante dje Sociedad. Un superintendente di districto apropiadamente a comentá: “Sea humilde i dispuesto na scucha e rumannan. Semper sea acercabel.” Como e homber di mas importante cu a yega di biba, Jesucristo por a laga hende sinti incómodo, pero e tabata asina humilde i acercabel cu asta muchanan a sinti nan cómodo den su presencia. (Mateo 18:5; Marco 10:13-16) Superintendentenan biahero kier pa mucha, tiener, esnan di edad avansá—sí, tur pero tur persona den e congregacion—sinti nan liber pa acercá nan.

11. Ora esei ta necesario, kico por ta e efecto di un dispensa?

¹¹ Naturalmente, “nos tur ta trompecá hopi bes,” i ningun superintendente biahero no ta inmuno pa cometé eror. (Santiago 3:2) Ora nan ta haci eror, un dispensa sincero ta duna otro ancianonan un ehempel di humildad. Segun Proverbionan 22:4, “e resultado di humildad i e temor [reverencial] di Jehova ta rikesa i gloria i bida.” I no ta tur sirbidor di Dios mester ‘ta humilde den cana cu nan Dios’? (Mikéas 6:8, Edicion di 1960) Ora a puntra un superintendente di circuito ki conseho lo e tin pa un anciano biahero nobo, el a comentá: “Tene respet profundo i aprecio pa tur e rumannan, i considerá nan como mihó cu bo. Lo bo siña hopi for dje rumannan. Keda humilde. Sea bo mes. No bira arogante.”—Filipensenan 2:3.

12. Pakico celo p’e ministerio cristian ta asina importante?

¹² Celo p’e ministerio cristian ta duna peso n’e palabranan di un superintendente biahero. En realidad, ora e i su esposa ta pone ehempel celoso den e trabou di evangelisá, ancianonan, nan esposa, i e resto dje congregacion ta ser animá pa manifestá celo den nan ministerio. “Sea celoso p’e sirbishi,” un superintendente di circuito a urgi. El a agregá: “Mi a ripará cu, generalmente, mas celoso un congregacion ta den e ministerio, ménos problema nan ta experenciá.” Un otro superintendente di circuito a remarcá: “Mi ta kere cu si e ancianonan traha den sirbishi cu e rumannan i yuda nan disfrutá dje ministerio, esaki lo resultá den pas mental i e mayor satisfaccion den sirbi Jehova.” Apostel Pablo ‘a cobra ánimo pa papia e bon nobo di Dios cu e tesalonicensenan cu hopi lucha.’ Nada straño cu nan tabatin grato recuerdonan di su bishita i actividad di predicá i a anhelá pa mir’é atrobe!—1 Tesalonicensenan 2:1, 2; 3:6.

13. Kico un superintendente biahero ta tuma na cuenta ora e ta traha cu compañeronan cristian den sirbishi di veld?

¹³ Ora di traha cu compañeronan cristian den e ministerio di veld, un superintendente biahero ta tuma na cuenta nan circunstancia i limitacionnan. Aunke su sugerencianan por ta útil, e sa cu algun por ta nervioso ora di predicá cu un anciano experenciá. P’esei, den cierto caso, animacion por ta mas útil cu conseho. Ora e ta compañá publicadornan of pioneronan na un studio di Bijbel, kisas nan ta preferá pa e conducí e studio. Esaki probablemente lo familiarisá nan cu algun manera pa mehorá nan métodonan di siña.

14. Pakico nos por bisa cu superintendentenan biahero celoso ta stimulá celo den otronan?

¹⁴ Superintendentenan biahero celoso ta stimulá celo den otronan. Un superintendente di circuito na Uganda a cana dor di un selva cerá un ora largu pa por a compañá un ruman homber na un studio di Bijbel cu tabata haci poco progreso. Durante nan caminata awaceru a cai asina pisá cu nan a yega papa muhá. Ora e famia di seis persona a haña sa cu nan bishitante tabata un superintendente biahero, nan a keda masha impresioná. Nan tabata sa cu ministernan di nan iglesia nunca lo a mustra un interes asina den e tou. E siguiente diadomingo, nan a asistí na nan promé reunion i a expresá deseo pa bira Testigo di Jehova.

15. Ki experencia excelente un superintendente di circuito celoso a disfrutá di dje na México?

¹⁵ Den e estado mexicano di Oaxaca, un superintendente di circuito a haci un esfuerso cu realmente no a ser exigí di dje. El a haci areglo pa keda den un cel di prizon pa cuater anochi afin di bishitá un grupo di shete prezu cu a bira publicadornan di Reino. Pa vários dia el a compañá e prezunan aki segun cu nan tabata duna testimonio di cel pa cel i a conducí studionan di Bijbel. Debí na e interes cu a ser mustrá, algun dje studionan aki tabata sigui te anochi lat. “Na fin dje bishita, ami i e prezunan a sinti nos yen di goso como resultado dje animacion mutuo,” e superintendente di circuito celoso aki ta skirbi.

16. Pakico ta asina beneficioso ora superintendentenan biahero i nan esposa ta percurá animacion?

¹⁶ Superintendentenan biahero ta purba ser un fuente di animacion. Ora Pablo a bishitá e congregacionnan na Macedonia, el a ‘animá nan cu hopi palabra.’ (Echonan 20:1, 2) Palabranan di animacion por ta masha útil den dirigí tantu hóben como bieu na metanan spiritual. Na un oficina di sucursal grandi dje Sociedad Watch Tower, un encuesta informal a revelá cu superintendentenan di circuito a animá casi 20 porciento dje boluntarionan pa tuma e sirbishi di tempu completo. Dor di e ehempel excelente dje esposa dje superintendente biahero como un proclamador di Reino di tempu completo, e tambe ta resultá di ta un gran fuente di animacion.

17. Con un superintendente di circuito di edad avansá ta sinti tocante su privilegio di duna yudansa na otronan?

¹⁷ Esnan di mas edad i e almanan deprimí ta particularmente den necesidad di animacion. Un superintendente di circuito di edad avansá ta skirbi: “E faceta di mi trabou cu ta generá un goso interno inexpresabel ta e privilegio di duna yudansa na esnan inactivo i esnan di mas edad físicamente débil entre e tou di Dios. E palabranan di Romanonan 1:11, 12 tin nificacion special pa mi, ya cu mi ta saca masha hopi animacion i fortalesa segun cu mi ta ‘compartí algun don spiritual na personanan asina pa nan por ser hací firme.’”

Recompensanan di Nan Trabou Gososo

18. Ki metanan bíblico superintendentenan biahero tin?

¹⁸ Superintendentenan biahero ta sinceramente interesá den yuda nan compañeronan creyente. Nan ta deseá na fortalecé e congregacionnan i edificá nan spiritualmente. (Echonan 15:41) Un superintendente biahero ta traha duru “pa duna animacion, percurá refrescamentu, i promové un deseo pa cumpli cu e ministerio i sigui biba e berdad.” (3 Juan 3) Un otro ta busca pa stabilisá compañeronan creyente den e fe. (Colosensenan 2:6, 7) Corda cu e superintendente biahero ta un “berdadero compañero di yugo,” no un doño riba e fe di otronan. (Filipensenan 4:3; 2 Corintionan 1:24) Su bishita ta un ocasion pa animacion i actividad adicional, i tambe un oportunidad p’e cuerpo di anciano repasá e progreso cu a ser hací i considerá metanan pa futuro. Mediante su palabra i ehempel, publicadornan di congregacion, pioneronan, sirbidornan ministerial i ancianonan por spera di ser edificá i stimulá p’e trabou nan dilanti. (Compará cu 1 Tesalonicensenan 5:11.) Pues, anto, apoyá di henter curason e bishitanan di superintendente di circuito i saca pleno probecho dje sirbishi cu e superintendente di districto ta rindi.

19, 20. Con superintendentenan biahero i nan esposa a yega di ser recompensá pa nan sirbishi fiel?

¹⁹ Superintendentenan biahero i nan esposa ta ser ricamente recompensá pa nan sirbishi fiel, i nan por tin confiansa cu Jehova lo bendicioná nan p’e bon cu nan ta haci. (Proverbionan 19:17; Efesionan 6:8) Georg i Magdalena ta un pareha di edad avansá cu a sirbi pa hopi aña den e trabou biahero. Na un congreso na Luxemburgo, Magdalena a ser acercá dor di un persona cu el a duna testimonio mas cu 20 aña promé. E señora hudiu aki su interes den e berdad a ser lantá dor dje literatura bíblico cu Magdalena a laga cuné, i cu tempu el a bautisá. Georg a ser acercá dor di un ruman muher spiritual, cu a corda Georg su bishita na su cas casi 40 aña pasá. Georg su presentacion entusiástico dje bon nobo finalmente a pone cu tantu e como su esposo a aceptá e berdad. Naturalmente, tantu Georg como Magdalena a keda sumamente contentu.

²⁰ Pablo su ministerio fructífero na Efeso a yen’é cu goso i tal bes a conmov’é pa cita e palabranan di Jesus: “Tin mas felicidad den duna cu tin den ricibí.” (Echonan 20:35) Siendo cu trabou biahero ta enbolbé dunamentu constante, esnan cu ta participá den dje ta experenciá felicidad, specialmente ora nan bira conciente dje bon resultadonan di nan labor. Un superintendente di circuito cu a yuda un anciano desanimá a ricibí un carta cu a bisa: “Bo tabata un gran ‘yudansa fortalecedor’ den mi bida spiritual—mas cu bo ta kere. . . . Hamas lo bo yega di sa completamente cuantu yudansa bo a duna un Asaf dje tempu actual, kende su ‘pianan casi a desviá.’”—Colosensenan 4:11; Salmo 73:2.

21. Pakico lo bo bisa cu 1 Corintionan 15:58 ta aplicá n’e actividadnan di superintendentenan biahero?

²¹ Un cristian di edad avansá cu tabata den e trabou di circuito pa añanan ta gusta pensa riba 1 Corintionan 15:58, unda Pablo a urgi: “Bira firme, inmovibel, semper teniendo hopi di haci den e trabou di Señor, sabiendo cu boso labor no ta en bano en relacion cu Señor.” Superintendentenan biahero siguramente tin hopi di haci den e trabou di Señor. I ki gradicidu nos ta cu nan ta sirbi asina gososamente como mayordomo fiel di Jehova su bondad inmerecí!

[Nota]

Con Lo Bo Respondé?

◻ Pakico superintendentenan biahero por ser considerá como “mayordomo excelente”?

◻ Cua ta algun factor cu ta yuda superintendentenan di circuito i di districto ser di mayor probecho p’e congregacion?

◻ Pakico humildad i celo ta asina importante pa esnan cu ta participá den e trabou biahero?

◻ Ki metanan excelente superintendentenan biahero tin?

[Plachi na página 16]

Superintendentenan biahero ta busca pa animá compañeronan creyente

[Plachinan na página 17]

Tantu hóben como bieu por saca beneficio for di asociacion cu superintendentenan biahero i nan esposa

[Plachi na página 18]

E ministerio celoso dje superintendente biahero ta promové celo den otronan