Un Interkambio di Enkurashamentu pa Nos Tur
1 Apòstel Pablo a skirbi e kongregashon na Roma: “Mi ta anhelá di mira boso, pa mi por kompartí algun don spiritual ku boso, pa boso por keda establesí—esta, pa mi por wòrdu enkurashá huntu ku boso, miéntras ku mi ta serka boso, kada un di nos dor di fe di e otro, tantu e fe di boso komo e fe di mi.” (Rom. 1:11, 12) Awe tambe bishita di superintendentenan biahero ta habri oportunidat pa por tin un interkambio di enkurashamentu òf animashon.
2 E Kongregashon: Por lo general ta anunsiá e bishita di e superintendente di sirkuito na e kongregashon mas o ménos tres luna di antemano. Esaki ta duna nos tempu pa ahustá nos programa pa asina nos por benefisiá plenamente di e bishita aki. (Efe. 5:15, 16) Si bo ta traha, kisas bo por pidi liber pa bo por partisipá den sirbishi di vèlt durante e siman ei. Algun ruman ta organisá nan asuntunan pa nan por traha pionero ousiliar durante e luna ku nan kongregashon tin e bishita. Si bo a plania pa bai otro kaminda e siman ei, bo por hasi kambio pa ta presente tòg despues ku bo a tende e anunsio?
3 E propósito prinsipal di e bishita di e superintendente di sirkuito ta pa duna animashon i entrenamentu personal den sirbishi di vèlt. Bo por duna bo nòmber pa traha kuné òf ku su esposa si e ta kasá? E superintendente di sirkuito ta gusta traha ku vários publikadó, inkluso esnan ku kisas tin ménos eksperensia òf ku no ta masha ábil den e ministerio. Nos tur por siña di su presentashon den sirbishi i apliká kualke sugerensia ku lo e por duna bondadosamente. (1 Kor. 4:16, 17) Si bo invit’é pa kome huntu ku bo, esei lo habri mas oportunidat pa boso asosiá ku otro i animá otro. (Heb. 13:2) Skucha su diskursonan bon pasobra nan ta adaptá na e nesesidatnan di e kongregashon.
4 E Superintendente di Sirkuito: Apòstel Pablo no tabata diferente for di e rumannan ku el a sirbi. E tambe a hañ’é ku situashonnan difísil i ansiedatnan, i e tabatin mester di animashon. Anto ora el a risibí esaki, el a apresi’é. (2 Kor. 11:26-28) Ora e kongregashon di Roma a haña sa ku Pablo, awor un prezu, finalmente tabata biniendo einan, algun di e rumannan a biaha bai te na Foro di Apio pa nan por a topa kuné. Esei tabata un distansia di 74 kilometer! “Ora Pablo a mira nan, el a gradisí Dios i a haña ánimo.” (Echo. 28:15) Di mes manera abo tambe por animá bo superintendente di sirkuito. Mustr’é “dòbel onor” dor di apoyá su bishita ku entusiasmo. (1 Tim. 5:17) Ekspresá i demostrá bo apresio sinsero pa e esfuerso ku e ta hasi pa bo benefisio. E ku su kasá lo keda kontentu ora nan opservá bo fe, amor i perseveransia.—2 Tes. 1:3, 4.
5 Kua di nos no tin mester di animashon durante e “tempunan trabahoso” aki? (2 Tim. 3:1) Disidí awor pa ta presente i pa partisipá plenamente den e siman spesial di aktividat huntu ku e superintendente di sirkuito. Nos tur—tantu e superintendentenan biahero komo e publikadónan—por partisipá den un gososo interkambio di enkurashamentu òf animashon. Di e manera aki tambe nos lo sigui “enkurashá otro i edifiká otro.”—1 Tes. 5:11.
[Study Questions]
1. Ki oportunidat spesial e bishita di superintendentenan biahero ta duna?
2. Dikon e bishita di e superintendente di sirkuito ta ser anunsiá di antemano?
3. Kiko kada un di nos por hasi personalmente durante e bishita pa nos por wòrdu animá?
4. Kon nos por animá nos superintendente di sirkuito?
5. Dikon nos tur tin mester di animashon awe?