Ora Desasternan Natural Tuma Luga

Accra, Ghana, 4 di juli, 1995: E yobidanan di mas pisá den casi 60 aña a causa inundacionnan severo. Rond di 200.000 persona a perde tur cos, 500.000 a perde acceso na nan cas, i 22 a perde nan bida.

San Angelo, Texas, Merca, 28 di mei, 1995: Tornado i hagel a ruiná e stad aki di 90.000 habitante, causando segun cálculo US$120 miyon na daño.

Kobe, Hapon, 17 di januari, 1995: Un temblor cu a dura apénas 20 seconde a laga miles di morto, dies di miles di herido i cientos di miles di hende sin cas.

NOS ta bibando den loke por ser yamá un era di desaster. Un informe di Nacionnan Uní ta revelá cu den e periodo di 30 aña for di 1963 pa 1992, e cantidad di hende matá, heridá of desplasá dor di desaster a aumentá cu un promedio di 6 porciento cada aña. E situacion desalentador tabata motibu pa Nacionnan Uní apuntá añanan ’90 como “e Década Internacional pa Reduccion di Desaster Natural.”

Naturalmente, un forsa di naturalesa—manera un tempestad, un erupcion volcánico of un temblor—no semper ta ocasioná desaster. Cientos ta sosodé tur aña sin causa daño na hende. Pero ora e ta enbolbé hopi pérdida di bida i propiedad, e ta ser yamá corectamente un desaster.

Un aumento di desasternan natural ta parce di ta inevitabel. E buki Natural Disasters—Acts of God or Acts of Man? (Desasternan Natural—Obra di Dios of Obra di Hende?) ta mencioná: “Hende ta cambiando nan ambiente den un manera cu ta duna forsanan natural mas chens di causa algun desaster, i nan ta actuando den un manera cu ta haci nan mes mas vulnerabel pa esakinan.” E buki ta presentá un ehempel hipotético: “Un temblor suave den un bario di krot consistiendo di hopi cas di lodo cantu di un ravijn steil por wel resultá den un desaster den término di morto i sufrimentu humano. Pero e desaster ta mas e resultado dje sagudimentu di tera of dje echo cu hende ta biba den casnan asina peligroso riba terenonan asina peligroso?”

Pa studiantenan di Bijbel, tin un otro motibu mas pakico e aumento di desasternan natural no ta sorprendente. Casi 2.000 aña pasá, Jesucristo a predicí cu “e conclusion dje sistema di cosnan” lo ta marcá pa, entre otro cosnan, “scarcedad di cuminda i temblor den un lugá tras di otro.” (Mateo 24:3, 6-8) Tambe Bijbel a predicí cu durante “e último dianan,” hende lo ta stimador di nan mes, stimador di placa, sin cariño natural, i sin amor pa bondad.a (2 Timoteo 3:1-5) E característicanan aki hopi biaha ta causa cu hende ta traha contra su medio ambiente, haciendo su mes mas vulnerabel pa forsanan natural. Desasternan ocasioná dor di hende tambe ta un producto dje sociedad sin amor den cua mayoria hende tin cu biba.

Segun cu nos planeta ta bira mas densamente poblá, segun cu conducta humano ta exponé hende na mas rísico i segun cu e recursonan dje tera ta ser mas mal manehá, desasternan lo sigui tormentá hende. Ta un desafio pa percurá auxilio, manera e siguiente artículo lo mustra.

[Nota]

[Rekonosementu pa Potrèt na página 3]

Ariba: Information Services Department, Ghana; banda drechi: San Angelo Standard-Times

[Rekonosementu pa Potrèt na página 2]

PORTADA: Maxie Roberts/Courtesy of THE STATE