Bo Ta Cla p’e Dia di Jehova?
“E gran dia di Jehova ta cerca. E ta cerca, i e ta pura masha tantu.”—SOFONIAS 1:14.
1. Con e Scritura ta describí e dia di Jehova?
E DIA di Jehova, “grandi i inspirador di temor,” lo bini pronto riba e mal sistema di cosnan aki. E Scritura ta describí e dia di Jehova como unu di bataya, scuridad, furia, afliccion, angustia, desolacion i zonido di alarma. Sin embargo, lo tin sobrebibiente, pasobra “tur cu inbocá e nomber di Jehova lo scapa a salbo.” (Joël 2:30-32; Amos 5:18-20) Sí, e ora ei Dios lo destruí su enemigunan i salba su pueblo.
2. Pakico nos mester tin un sentido di urgencia pa cu e dia di Jehova?
2 E profetanan di Dios a duna un sentido di urgencia n’e dia di Jehova. Por ehempel, Sofonías a skirbi: “E gran dia di Jehova ta cerca. E ta cerca, i e ta pura masha tantu.” (Sofonías 1:14) E situacion ta muchu mas urgente awe pasobra Dios su Ehecutor Principal, e Rey Jesucristo, ta cerca di ‘faha su spada riba su heup i core riba cabai den e causa dje berdad i humildad i husticia.’ (Salmo 45:3, 4) Abo ta cla p’e dia ei?
Nan Tabatin Gran Expectativanan
3. Ki expectativanan algun cristian tesalonicense tabatin, i pa cua dos motibu nan tabata ekibocá?
3 Hopi hende tabatin expectativanan relacioná cu e dia di Jehova cu no a ser realisá. Algun cristian di promé na Tesalónica a bisa, “e dia di Jehova ta aki”! (2 Tesalonicensenan 2:2) Pero tabatin dos motibu básico pakico e tempu ei e no tabata cerca. Citando un di esakinan, apostel Pablo a bisa: “Ki ora cu nan ta bisando: ‘Pas i siguridad!’ e ora ei destruccion repentino lo bini riba nan instantáneamente.” (1 Tesalonicensenan 5:1-6) Den e “tempu di fin” aki, nos mes ta spera riba e cumplimentu dje palabranan ei. (Daniel 12:4) Tambe e tesalonicensenan tabata falta un otro prueba cu e gran dia di Jehova a yega, pasobra Pablo a bisa nan: “Lo e no bini aménos cu e apostasia bini promé.” (2 Tesalonicensenan 2:3) Ora Pablo a skirbi e palabranan ei (rond di 51 E.C.), “e apostasia” for di cristianismo berdadero no a desaroyá completamente ainda. Awe, nos ta mir’é ta florecé plenamente den cristiandad. Tog, apesar di nan expectativanan no-realisá, e fiel ungínan ei na Tesalónica, cu a sigui sirbi Dios fielmente te na morto, cu tempu a ricibí un recompensa celestial. (Revelacion 2:10) Nos tambe lo ser recompensá si nos permanecé fiel segun cu nos ta spera riba e dia di Jehova.
4. (a) Cu kico e dia di Jehova ta ser conectá na 2 Tesalonicensenan 2:1, 2? (b) Ki punto di bista e asina yamá Tatanan di Iglesia tabatin respecto e bolbementu di Cristo i asuntunan relacioná cu esei?
4 Bijbel ta conectá “e gran dia di Jehova” cu “e presencia di nos Señor Jesucristo.” (2 Tesalonicensenan 2:1, 2) E asina yamá Tatanan di Iglesia tabatin vários idea tocante e bolbementu di Cristo, su presencia i su Reinado di Mil Aña. (Revelacion 20:4) Den siglo dos E.C., Papias di Hierápolis a carga e expectativa cu durante e Reinado di Mil Aña di Cristo, e tera lo ta fabulosamente fértil. Hustino Martir a papia di Jesus su presencia bes tras bes i a spera cu Jerusalem restorá lo ta e asiento di Su Reino. Ireneo di Lyons a siña otronan cu despues cu e Imperio Romano a ser destruí, Jesus lo a aparecé visiblemente, mara Satanas i reina den Jerusalem terenal.
5. Kico cierto eruditonan a bisa tocante e “Segundo Binida” di Cristo i su Reinado di Mil Aña?
5 Historiador Philip Schaff a comentá cu “e creencia mas sobresaliente” den e periodo promé cu e Concilio di Nicea na 325 E.C. tabata “e creencia di un reinado visibel di Cristo den gloria riba tera cu e santunan resucitá pa mil aña, promé cu e resureccion i huicio general.” A Dictionary of the Bible, redactá dor di James Hastings, ta declará: “Tertuliano, Ireneo i Hipólito ainda ta spera riba un Binida inminente [di Jesucristo]; pero cu e Tatanan di Alehandria nos ta drenta un curso nobo di pensamentu. . . . Ora Agustin a haci e Mil Aña igual cu e periodo di tempu di militantenan di Iglesia, e Segundo Binida ta ser posponé na un futuro lehano.”
E Dia di Jehova i e Presencia di Jesus
6. Pakico nos no mester concluí cu e dia di Jehova ta hopi leu den futuro?
6 Conceptonan eróneo a hiba na decepcionnan, pero laga nos no pensa cu Jehova su dia ta hopi leu den futuro. Jesus su presencia invisibel, cu cua e dia di Jehova ta ser asociá den Bijbel, a cuminsá caba. E Toren di Vigilancia i publicacionnan relacioná cuné di Testigonan di Jehova hopi biaha a duna prueba bíblico cu Cristo su presencia a cuminsá na aña 1914.a Pues, anto, kico Jesus a bisa tocante su presencia?
7. (a) Cua ta algun rasgo dje señal di Jesus su presencia i di e conclusion dje sistema di cosnan? (b) Con nos por ser salbá?
7 Jesus su presencia a bira un tópico di discusion djis promé cu su morto. Despues di a tend’é predicí e destruccion dje tempel di Jerusalem, su apostelnan Pedro, Santiago, Juan i Andres a puntra: “Na ki tempu e cosnan aki lo ta, i kico lo ta e señal di bo presencia i dje conclusion dje sistema di cosnan?” (Mateo 24:1-3; Marco 13:3, 4) Como contesta, Jesus a profetisá di guera, hamber, temblor i otro rasgonan di “e señal” di su presencia i di e conclusion dje sistema di cosnan. Tambe el a bisa: “Esun cu a wanta te na fin ta esun cu lo ser salbá.” (Mateo 24:13) Nos lo ser salbá si nos wanta fielmente te na fin di nos bida actual of te na fin dje mal sistema aki.
8. Promé cu e fin dje sistema hudiu, kico mester a ser lográ, i kico ta ser hací tocante esaki awe?
8 Promé cu e fin, un rasgo specialmente importante di Jesus su presencia lo ser cumplí. Relacioná cu esei, el a bisa: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) Promé cu e romanonan a destruí Jerusalem i e sistema di cosnan hudiu a terminá na aña 70 E.C., Pablo por a bisa cu e bon nobo “a ser predicá den tur creacion cu ta bou di shelu.” (Colosensenan 1:23) Sin embargo, awe Testigonan di Jehova ta haciendo un trabou di predicacion muchu mas extenso “den tur e tera habitá.” Durante e último par di añanan, Dios a habri e caminda pa un gran testimonio ser duná na Oost Europa. Cu imprentanan i otro facilidadnan rond mundu, Jehova su organisacion ta cla pa ehercé mas actividad, asta den “teritorio no-trahá.” (Romanonan 15:22, 23) Bo curason no ta impulsá bo pa haci bo máximo esfuerso pa duna un testimonio promé cu e fin yega? Si ta asina, Dios por fortalecé bo pa bo tin un participacion recompensador den e trabou nos dilanti.—Filipensenan 4:13; 2 Timoteo 4:17.
9. Kico Jesus a duna di comprendé, manera ta registrá na Mateo 24:36?
9 E trabou profetisá di predicacion di Reino i otro rasgonan dje señal di Jesus su presencia ta ser cumplí awor aki mes. P’esei, e fin ta cerca pa e mal sistema di cosnan aki. Ta cierto cu Jesus a bisa: “En cuanto e dia i ora ei ningun hende no sa, ni e angelnan di shelu ni e Yu, sino solamente e Tata.” (Mateo 24:4-14, 36) Pero Jesus su profecia por yuda nos pa ta cla pa “e dia i ora ei.”
Nan Tabata Cla
10. Con nos sa cu ta posibel pa keda lantá spiritualmente?
10 Pa sobrebibí e gran dia di Jehova, nos tin cu keda spiritualmente lantá i para firme pa adoracion berdadero. (1 Corintionan 16:13) Nos sa cu awante asina ta posibel, pasobra un famia deboto a haci esei i a sobrebibí e Diluvio cu a destruí hende malbado na 2370 P.E.C. Comparando e era ei cu su presencia, Jesus a bisa: “Mescos cu e dianan di Noe tabata, asina e presencia dje Yu di hende lo ta. Pasobra manera nan tabata den e dianan ei promé cu e diluvio, comiendo i bebiendo, hombernan casando i muhernan siendo duná den matrimonio, te n’e dia cu Noe a drenta den e arca; i nan no a haci caso te cu e diluvio a bini i a bari nan tur, asina e presencia dje Yu di hende lo ta.”—Mateo 24:37-39.
11. Ki curso Noe a sigui apesar dje violencia cu a existí den su tempu?
11 Mescos cu nos, Noe i su famia a biba den un mundu violento. “Yunan [angelical desobediente] dje Dios berdadero” a materialisá i a tuma esposanan cu ken nan a haña e notorio yunan Nefilim—hendenan abusador cu indudablemente a pone cu condicionnan a bira mas violento. (Génesis 6:1, 2, 4; 1 Pedro 3:19, 20) Sin embargo, “Noe a cana cu e Dios berdadero” den fe. El a “resultá sin falta entre su contemporáneonan”—e generacion malbado di su tempu. (Génesis 6:9-11) Dependiendo riba Dios, compañá cu oracion, nos por haci mescos den e mundu violento i malbado aki segun cu nos ta spera riba e dia di Jehova.
12. (a) Ademas di construí un arca, ki trabou Noe a haci? (b) Con hende a reaccioná na e predicacion di Noe, i kico tabata e consecuencianan pa nan?
12 Noe ta bon conocí como e constructor di un arca p’e preservacion di bida atrabes dje Diluvio. Tambe e tabata “un predicador di husticia,” pero su contemporáneonan “no a haci caso” di su mensahe di orígen divino. Nan a come i bebe, casa, lanta famia i a sigui cu e cosnan normal di bida te cu e Diluvio a bari nan tur. (2 Pedro 2:5; Génesis 6:14) Nan no kier a tende tocante abla i conducta recto, mescos cu e generacion malbado djawe ta cera su oreanan pa loke Testigonan di Jehova ta bisa tocante “repentimentu pa cu Dios,” fe den Cristo, husticia, i “e huicio binidero.” (Echonan 20:20, 21; 24:24, 25) No tin ningun registro disponibel di cuantu hende a biba riba tera tempu cu Noe tabata declarando e mensahe di Dios. Pero un cos ta sigur, e poblacion dje tera a ser reducí drásticamente na 2370 P.E.C.! E Diluvio a eliminá e malbadonan, i solamente esnan cu tabata cla p’e acto ei di Dios a keda di spar—Noe i e shete otro personanan den su famia.—Génesis 7:19-23; 2 Pedro 3:5, 6.
13. Den ki decreto hudicial Noe a pone confiansa total, i con el a actua na armonia cu esaki?
13 Dios no a notificá Noe añanan adelantá tocante e dia i ora exacto p’e Diluvio. Sin embargo, ora Noe tabatin 480 aña di edad, Jehova a decretá: “Mi spiritu lo no obra pa cu hende pa tempu indefiní, ya cu e tambe ta carni. Consecuentemente su dianan lo yega di ta shentibinti aña.” (Génesis 6:3) Noe a pone confiansa total den e decreto divino aki. Despues di a alcansá 500 aña di edad, el a “bira tata di Sem, Cam i Jafet,” i segun custumber dje tempu ei, e yunan lo tabatin 50 pa 60 aña di edad promé cu nan a casa. Ora Dios a bisa Noe pa construí e arca pa preservacion di bida atrabes dje Diluvio, e yunan ei i nan esposa evidentemente a yud’é cu e trabou duru ei. E construccion dje arca probablemente a tuma lugá den e mésun tempu cu Noe a sirbi como “un predicador di husticia,” manteniend’e ocupá e último 40 pa 50 añanan promé cu e Diluvio. (Génesis 5:32; 6:13-22) Pa tur e añanan ei, e i su famia a actua cu fe. Laga nos tambe desplegá fe segun cu nos ta predicá e bon nobo i ta spera riba e dia di Jehova.—Hebreonan 11:7.
14. Cu tempu, kico Jehova a bisa Noe, i pakico?
14 Ora e arca tabata casi cla, Noe por a pensa cu e Diluvio tabata inminente, aunke e no tabata sa exactamente na ki tempu esaki lo a tuma lugá. Cu tempu Jehova en berdad a bis’é: “Den solamente shete dia mas mi ta bai haci awa yobe riba e tera cuarenta dia i cuarenta anochi.” (Génesis 7:4) Esei a duna Noe i su famia net suficiente tempu pa hinca tur e sortonan di animal den e arca i drenta den dje nan mes promé cu e Diluvio a cuminsá. Nos no tin nodi sa e dia i ora p’e destruccion dje sistema aki cuminsá; nos no a ser encargá cu sobrebibencia di animal i prospecto sobrebibientenan humano ta drentando e arca simbólico caba, e paradijs spiritual dje pueblo di Dios.
“Sigui Vigilá”
15. (a) Den bo mes palabranan, con lo bo splica Jesus su palabranan hañá na Mateo 24:40-44? (b) E echo cu nos no sa e tempu exacto di Jesus su binimentu pa ehecutá e vengansa di Dios tin ki efecto?
15 Relacioná cu su presencia, Jesus a splica: “E ora ei dos homber lo ta [trahando] den cunucu: un lo ser hibá i e otro lo ser bandoná; dos muher lo ta mulando [grano na hariña] na mulina di man: un lo ser hibá i e otro lo ser bandoná. P’esei, sigui vigilá, pasobra boso no sa riba ki dia boso Señor ta bini. Pero sabi un cos, cu si e doño di cas tabata sa den ki warda e ladron tabata pa bini, lo el a keda lantá i lo no a permitié kibra i drenta su cas. P’e motibu aki, boso tambe demostrá cu boso ta cla, pasobra na un ora cu boso no ta pensa cu e ta, e Yu di hende ta bini.” (Mateo 24:40-44; Lucas 17:34, 35) E echo cu nos no sa e tempu exacto cu Jesus ta bini pa ehecutá e vengansa di Dios ta pone cu nos ta keda alerto i ta duna nos tur dia e oportunidad pa proba cu nos ta sirbi Jehova cu motibunan inegoista.
16. Kico lo sosodé cu individuonan “bandoná” i cu esnan “hibá”?
16 Individuonan “bandoná” pa ser destruí huntu cu e malbadonan lo incluí esnan cu un tempu tabata iluminá pero cu ta bira absorbá den un estilo di bida egoista. Laga nos ta entre esnan cu ta ser “hibá,” esnan completamente dedicá na Jehova i berdaderamente gradicidu pa su percuracionnan spiritual mediante “e esclabo fiel i discreto.” (Mateo 24:45-47) Te na e fin, laga nos sirbi Dios cu “amor for di un curason limpi i di un bon concenshi i di fe sin hipocresia.”—1 Timoteo 1:5.
Actonan Santu Ta Esencial
17. (a) Kico a ser predicí na 2 Pedro 3:10? (b) Cua ta algun dje actonan i obranan cu 2 Pedro 3:11 ta animá nos pa haci?
17 Apostel Pedro a skirbi: “E dia di Jehova lo bini manera un ladron, den cua shelu lo pasa bai cu un ruido di bientu, pero e elementonan siendo intensamente cayente lo ser disolvé, i tera i e obranan den dje lo ser destapá.” (2 Pedro 3:10) E shelu i tera simbólico lo no sobrebibí e calor dje rabia ardiente di Dios. P’esei Pedro ta agregá: “Siendo cu tur e cosnan aki lo ser disolvé asina, ki clase di personanan boso mester ta den actonan santu di conducta i echonan di debocion piadoso!” (2 Pedro 3:11) E actonan i obranan aki ta incluí asistencia regular na reunionnan cristian, haci bon na otronan i participá den un manera significativo den predicacion dje bon nobo.—Mateo 24:14; Hebreonan 10:24, 25; 13:16.
18. Si nos ta desaroyando un afecto p’e mundu, kico nos mester haci?
18 “Actonan santu di conducta i echonan di debocion piadoso” ta rekerí pa nos ‘mantené nos mes sin mancha for di mundu.’ (Santiago 1:27) Pero kico nos mester haci si nos ta desaroyando un afecto p’e mundu aki? Tal bes nos ta ser tentá pa hinca nos mes den un posicion peligroso dilanti Dios dor di busca entretenimentu impuru of dor di scucha música i canticanan cu ta promové e spiritu malbado dje mundu aki. (2 Corintionan 6:14-18) Si esei ta e caso, laga nos busca e yudansa di Dios den oracion pa nos no pasa bai cu e mundu, sino para aprobá dilanti e Yu di hende. (Lucas 21:34-36; 1 Juan 2:15-17) Si nos a haci un dedicacion na Dios, siguramente nos lo kier haci nos best pa desaroyá i mantené un relacion caluroso cuné i asina ta cla p’e dia grandi i inspirador di temor di Jehova.
19. Pakico multitud di proclamadornan di Reino por spera di pasa bibu dor dje conclusion dje mal sistema di cosnan aki?
19 Noe piadoso i su famia a pasa bibu dor dje Diluvio cu a destruí e mundu antiguo. Individuonan recto a sobrebibí e fin dje sistema di cosnan hudiu na 70 E.C. Por ehempel, apostel Juan tabata activo ainda den sirbishi di Dios pa rond di aña 96 pa 98 E.C., ora el a skirbi e buki di Revelacion, su relato di Evangelio i tres carta inspirá. Dje miles di personanan cu a aceptá e fe berdadero na Pentecoste di 33 E.C., probablemente hopi a pasa bibu dor dje fin dje sistema hudiu. (Echonan 1:15; 2:41, 47; 4:4) Awe multitud di proclamadornan di Reino por spera di pasa bibu dor dje conclusion dje mal sistema di cosnan actual.
20. Pakico nos mester ta ‘predicadornan celoso di husticia’?
20 Cu e prospecto pa pasa bibu p’e mundu nobo nos dilanti, laga nos ta ‘predicadornan celoso di husticia.’ Ki un privilegio pa sirbi Dios den e último dianan aki! I ta ki un goso pa dirigí hende n’e “arca” dje tempu actual, e paradijs spiritual cu e pueblo di Dios ta disfrutá di dje! Ohalá e miyones di hendenan den dje awor permanecé fiel, spiritualmente lantá, i cla prepará p’e gran dia di Jehova. Pero kico lo yuda nos tur keda lantá?
[Nota]
a Mira capítulo 10 i 11 dje buki Conocimentu cu Ta Hiba na Bida Eterno, publicá dor di Watchtower Bible and Tract Society of New York, Inc.
Con Lo Bo Contestá?
◻ Ki expectativanan algun persona tabatin relacioná cu e dia di Jehova i Cristo su presencia?
◻ Pakico nos por bisa cu Noe i su famia tabata cla p’e Diluvio?
◻ Kico lo sosodé cu esnan cu “sigui vigilá” i cu esnan cu no haci esei?
◻ Pakico actonan santu ta esencial, specialmente segun cu nos ta yega mas cerca dje dia grandi di Jehova?