Informe di Proclamadonan di Reino

Nan A Hui n’e Organisacion Teocrático di Jehova

HOPI tempu pasá profeta Isaías a ser conmoví pa declará: ‘Nan tin cu glorificá Jehova riba e islanan di laman.’ (Isaías 24:15) Testigonan di Jehova ta mira e islanan di laman como parti di “e tera habitá” na cua Jesus a bisa cu “e bon nobo tin cu ser predicá.”—Mateo 24:14; Marco 13:10.

Islanan Marquésas ta situá rond di 1.400 kilometer nortoost di Tahiti. Nan ta parti di un grupo remoto di islanan den Sur Pacífico yamá Polinesia Frances. Cu un suela volcánico fértil i un clima cayente i húmedo, vegetacion ta abundá riba e islanan aki. Sin embargo, Islanan Marquésas ta produciendo tambe un otro tipo di fruta. Considerá e caso di un famia cu a respondé n’e mensahe di Reino riba e isla di Hiva Oa.

Jean i su esposa, Nadine, tabata infelis cu e asina yamá sociedad civilisá di West Europa den cua nan tabata biba. Pues nan a dicidí di laga e estilo di bida druk ei atras i muda cu nan yu pa Islanan Marquésas. Nan cas nobo, construí di bambu, tabata situá den un vaye remoto. Pa alcansá nan bisiñanan di mas cerca, nan tabatin cu pasa un caminda malu den ceru na pia pa dos ora largu. E pueblo di mas cerca cu tabatin un dokter, scol i tienda tabata tres ora leu cu jeep.

Jean i Nadine no tabata interesá den religion. Sin embargo, nan tabata participá sí den discusionnan tocante e orígen di bida. Hopi biaha, nan tabata elaborá riba teorianan complicá di evolucion. Pero ningun di nan teorianan a duna nan satisfaccion.

Despues cu nan tabata isolá pa seis aña, nan a keda sorprendí pa ricibí un bishita di dos Testigo di Jehova. E Testigonan a haña sa dje paradero di Jean i Nadine for dje habitantenan dje pueblo den cercania. Manera bo por spera, e combersacion a hiba na un consideracion dje teoria di evolucion. Pa deleite dje pareha, e Testigonan tabatin huntu cu nan un ehemplar dje buki La vida... ¿cómo se presentó aquí? ¿Por evolución, o por creación?, publicá dor di Testigonan di Jehova. Jean i Nadine a keda contentu pa haña un buki cu a presentá un examinacion cabal con bida a presentá aki.

Un poco tempu despues, a cuminsá un studio di Bijbel. Durante un periodo di rond di tres aña, Jean i Nadine a haci bon progreso. Nan a keda convencí cu pronto henter e tera lo ser transformá den un paradijs. Despues cu nan famia a aumentá na tres yu, tabata un berdadero desafio pa biaha cuater ora largu pa asistí na reunionnan cristian n’e Salon di Reino. Sin embargo, esei no a stop nan di asistí. Cu tempu Jean i Nadine a simbolisá nan dedicacion na Jehova mediante bautismo bou di awa. Nan a haci esaki na un congreso cu a ser tené den e pueblo principal, unda e asistencia máximo tabata 38 persona!

Afin di yuda e grupo chikitu di publicadónan di Reino, e famia a dicidí di bandoná nan cas isolá. Nan a muda pa un pueblo di rond di mil habitante, unda Jean ta sirbi awor como sirbidó ministerial den e congregacion local di Testigonan di Jehova. Pa e famia aki, cu anteriormente a hui bai n’e islanan pa scapa for di civilisacion, ta un privilegio pa a haña e único berdadero refugio, e organisacion teocrático di Jehova.