Ken Lo Sobrebibi “e Dia di Jehova”?

“Ki clase di personanan boso mester ta den actonan santu di conducta i echonan di debocion piadoso, sperando i teniendo mashá presente e presencia dje dia di Jehova!”—2 PEDRO 3:11, 12.

1. Ken a traha cu e spiritu i poder di Elías?

JEHOVA DIOS a selectá for di entre humanidad individuonan cu lo bira co-herederonan cu su Yu, Jesucristo, den e Reino celestial. (Romanonan 8:16, 17) Miéntras cu cristiannan ungí ta riba tera ainda, nan a traha cu e spiritu i poder di Elías. (Lucas 1:17) Den e artículo anterior, nos a mencioná cierto paralelonan entre nan actividadnan i esnan di profeta Elías. Pero kico dje trabou di Elías su sucesor, profeta Eliseo?—1 Reynan 19:15, 16.

2. (a) Cua tabata e último milager di Elías i e promé di Eliseo? (b) Ki prueba tin cu Elías no a bai shelu?

² E último milager cu Elías a haci tabata esun di parti e awanan di Riu Jordan dor di dal nan cu su bistí oficial. Esaki a permití Elías i Eliseo crusa riba tera secu. Segun cu nan tabata cana n’e banda oost dje riu, un tempestad di bientu a hiba Elías na un otro sitio riba tera. (Mira e cuadro na página 15 titulá “Na Cua Shelu Elías A Subi?”) E bistí oficial di Elías a keda atras. Ora Eliseo a us’é pa dal Riu Jordan, su awanan a bolbe parti, permitiend’e regresá riba tera secu. E milager aki a mustra claramente cu Eliseo a bira e sucesor di Elías pa promové adoracion puru den Israel.—2 Reynan 2:6-15.

Cualidadnan Piadoso Ta Esencial

3. Kico Pablo i Pedro a bisa tocante e presencia di Jesus i “e dia di Jehova”?

³ Siglonan despues dje dianan di Elías i Eliseo, apostelnan Pablo i Pedro a asociá un binidero “dia di Jehova” cu Jesucristo su presencia i cu p’e tempu ei e futuro “shelu nobo i un tera nobo.” (2 Tesalonicensenan 2:1, 2; 2 Pedro 3:10-13) Pa sobrebibí e dia grandi di Jehova—ora Dios destruí su enemigunan i salba su pueblo—nos tin cu busca Jehova, ser mansu i desplegá husticia. (Sofonías 2:1-3) Pero algun cualidad adicional ta bira bisto ora nos considerá sucesonan cu a enbolbé profeta Eliseo.

4. Ki papel celo ta hunga den e sirbishi di Jehova?

⁴ Celo p’e sirbishi di Dios ta vital si nos kier sobrebibí “e dia di Jehova.” Elías i Eliseo tabata celoso den sirbishi di Jehova. Cu celo similar, e resto di cristiannan ungí awe ta rindi sirbishi sagrado na Jehova i ta hiba delantera den predicá e bon nobo.a Desde añanan ’30, nan a animá tur esnan cu a aceptá e mensahe di Reino i cu ta spera di biba pa semper riba tera pa dedicá nan mes na Jehova i bautisá. (Marco 8:34; 1 Pedro 3:21) Miyones di hende a respondé faborablemente n’e animacion aki. Un tempu nan tabata den scuridad spiritual i morto den picá, pero awor nan a siña e berdad di Dios, a aceptá e speransa di bida eterno den un paradijs terenal, i ta celoso den Jehova su sirbishi. (Salmo 37:29; Revelacion 21:3-5) Dor di nan celo, cooperacion, hospitalidad i otro bon obranan, nan ta trece gran refrescamentu p’e rumannan spiritual di Cristo cu ta riba tera ainda.—Mateo 25:31-46.

5. Pakico ta asina importante pa haci bon pa Jesus su “rumannan,” i ki ehempel nos tin dje tempu di Eliseo?

⁵ Esnan cu ta haci bon pa Jesus su “rumannan” pa motibu cu e ungínan aki ta su siguidónan tin e speransa di sobrebibí “e dia di Jehova.” Un pareha casá den e pueblo di Sunem a ser ricamente bendicioná dor cu nan tabata bondadoso i hospitalario cu Eliseo i su criá. E pareha aki no tabatin yu, i e esposo tabata bieu. Pero Eliseo a primintí e muher sunamita cu lo e duna lus na un yu homber, i esei debidamente a sosodé. Ora e único yu aki a muri algun aña despues, Eliseo a bai Sunem i a resucit’é. (2 Reynan 4:8-17, 32-37) Ki un recompensa ricu pa a mustra hospitalidad na Eliseo!

6, 7. Ki ehempel Naman a pone, i kico esaki tin di haber cu sobrebibí “e dia di Jehova”?

⁶ Humildad ta necesario pa aceptá instruccion basá riba Bijbel for di Cristo su “rumannan” cu e speransa di sobrebibí e dia di Jehova. E hefe di ehército sirio, Naman, kende tabatin lepra, tabatin cu mustra humildad pa sigui e sugerencia di un hobencita israelita cautivo i busca un cura dor di bai Israel pa haña Eliseo. En bes di sali for di su cas pa topa cu Naman, Eliseo a manda e mensahe aki p’e: “Bo tin cu baña shete biaha den Jordan pa bo carni bolbe na bo; i sea limpi.” (2 Reynan 5:10) Esei a ofendé Naman su orguyo i el a bira indigná, pero despues cu el a bai humildemente i a baha shete biaha den Jordan, “su carni a bolbe mescos cu e carni di un mucha homber chikitu i el a bira limpi.” (2 Reynan 5:14) Promé cu el a regresá cas, Naman a biaha henter e caminda bek pa Samaria pa gradicí e profeta di Jehova. Determiná pa no probechá materialmente for dje podernan cu Dios a dun’é, Eliseo a sali pa topa cu Naman pero no a aceptá ningun regalo. Naman a bisa Eliseo humildemente: “Bo sirbidó lo no ofrecé ofrenda kimá ni sacrificio mas na otro diosnan sino na Jehova.”—2 Reynan 5:17.

⁷ Dor di sigui humildemente e conseho bíblico di esnan ungí, awe miyones di hende ta ser ricamente bendicioná. Ademas, dor di ehercé fe den Jesus su sacrificio di rescate, e personanan aki di curason onrado a ser limpiá spiritualmente. Awor nan tin e privilegio di ta amigu di Jehova Dios i di Jesucristo. (Salmo 15:1, 2; Lucas 16:9) I Dios lo recompensá nan debocion na dje i na su sirbishi dor di spar nan for dje destruccion eterno cu lo bini pronto riba pecadónan orguyoso norepentí den e “dia di Jehova” cu ta acercando rápidamente.—Lucas 13:24; 1 Juan 1:7.

“Ken Ta cu Mi? Ken?”

8. (a) Ki actitud pa cu hacimentu dje boluntad divino esnan cu lo sobrebibí “e dia di Jehova” tin? (b) Ki comision Jehú a ricibí? (c) Kico mester a sosodé cu Jezabel?

⁸ Esnan cu ta spera di sobrebibí “e dia di Jehova” tambe mester ta dicididu ora di haci e boluntad divino. Cu curashi Elías a profetisá dje destruccion di Rey Acab su famia asesino, adoradó di Baal. (1 Reynan 21:17-26) Sin embargo, promé cu e ehecucion aki a ser efectuá, Elías su sucesor, Eliseo, tabatin cu completá algun trabou cu no a terminá ainda. (1 Reynan 19:15-17) Ora Jehova su debido tempu a yega, Eliseo a instruí un criá pa bai i ungi e hefe di ehército, Jehú, como rey nobo di Israel. Despues cu el a basha zeta riba cabes di Jehú, e mensahero a bis’é: “Esaki ta loke Jehova e Dios di Israel a bisa: ‘Di berdad mi ta ungí bo como rey riba Jehova su pueblo, esta, riba Israel. I bo tin cu basha e cas di Acab bo señor abou, i ami mester venga e sanger di mi sirbidónan e profetanan i e sanger di tur e sirbidónan di Jehova na man di Jezabel. I henter e cas di Acab tin cu perecé.’” Reina Jezabel malbado lo a ser tirá pa cachó i lo no a haña un entiero decente.—2 Reynan 9:1-10.

9, 10. Con e palabra di Elías a ser cumplí den e caso di Jezabel?

⁹ E hombernan di Jehú a reconocé e valides di su ungimentu i a proclam’é como e rey nobo di Israel. Cu accion dicididu, Jehú a bai purá den direccion di Jezreel pa cuminsá cu su trabou di ehecutá e cabesantenan apóstata di adoracion di Baal. E promé cu a sinti Jehú su flecha di ehecucion tabata Acab su yu, Rey Jehoram. Den su garoshi el a core sali pafó dje stad pa puntra si Jehú a bini riba un mision di pas. “Ki pas por tin tanten cu tin e fornicacionnan di Jezabel bo mama i su hopi bruheria?” Jehú a contestá. Cu esei, Jehú su flecha a bora e curason di Jehoram.—2 Reynan 9:22-24.

¹⁰ Muhernan piadoso ta evitá di ser manera Jezabel of cualkier hende manera e. (Revelacion 2:18-23) Pa ora Jehú a alcansá Jezreel, Jezabel a trata na haci su mes atractivo. Mirando abou for di un bentana, el a cumindá Jehú sarcásticamente. Jehú a puntra su criánan: “Ken ta cu mi? Ken?” Inmediatamente, dos of tres oficial di corte a wak abou. Nan tabata n’e banda di Jehú? “Lagu’é cai!” el a urgi nan. Cu esei, cu accion dicididu, nan a tira Jezabel malbado for di bentana. El a ser trapá, probablemente bou dje patanan di cabai. Ora hende a bini pa der’é, ‘nan no a haña nada mas cu su cráneo i pianan i su plant’i mannan.’ Ki un cumplimentu dramático dje palabranan di Elías: “Cachó lo come e carni di Jezabel”!—2 Reynan 9:30-37.

Apoyo di Curason na Adoracion Berdadero

11. Ken Jehónadab tabata, i con el a mustra su apoyo pa adoracion berdadero?

¹¹ Esnan cu ta spera di sobrebibí “e dia di Jehova” i biba pa semper riba tera tin cu sostené adoracion berdadero di henter curason. Nan mester ta manera Jehónadab, of Jonadab, un adoradó di Jehova no-israelita. Segun Jehú a sigui cumpli cu su comision cu celo, Jehónadab kier a mustra su aprobacion i apoyo. Di manera cu el a sali pa topa cu e rey nobo di Israel, kende tabata bayendo Samaria pa ehecutá esnan cu a sobra dje cas di Acab. Ora el a mira Jehónadab, Jehú a puntra: “Bo curason ta recto pa cu mi, mescos cu mi mes curason ta cu bo curason?” Jehónadab su contesta afirmativo a conmové Jehú pa saca su man i invitá Jehónadab pa subi den su garoshi di guera, bisando: “Bini cu mi, sí, i mira con mi no ta tolerá rivalidad pa cu Jehova.” Sin tarda, Jehónadab a aceptá e privilegio di mustra su apoyo pa Jehova su ehecutor ungí.—2 Reynan 10:15-17.

12. Pakico Jehova tin derecho di exigí debocion exclusivo?

¹² Apoyo di curason na adoracion berdadero siguramente ta apropiado, pasobra Jehova ta e Creador i Soberano Universal, kende tin derecho di exigí i merecé nos debocion exclusivo. El a manda e israelitanan: “Bo no mag traha pa bo mes un imágen grabá of un forma parecido na cualkier cos cu ta den shelu ariba of cu ta riba tera abou of cu ta den awa bou di tera. Bo no mag buig pa nan ni ser tentá pa sirbi nan, pasobra ami, Jehova bo Dios, ta un Dios cu ta exigí debocion exclusivo.” (Exodo 20:4, 5) Esnan cu ta spera di sobrebibí “e dia di Jehova” mester ador’é exclusivamente, haciendo esei “cu spiritu i cu berdad.” (Juan 4:23, 24) Mescos cu Elías, Eliseo i Jehónadab, nan mester ta firme na fabor di adoracion berdadero.

13. Mescos cu Jehónadab su curason tabata cu Jehú, ken ta esnan cu ta reconocé e Rey Mesiánico, i con nan ta mustra esaki?

¹³ Despues dje ehecucion dje cas di Acab, Rey Jehú a dal otro pasonan pa identificá adoradónan di Baal i eliminá e religion falsu aki for di Israel. (2 Reynan 10:18-28) Awe, e Rey celestial Jesucristo a ser nombrá pa ehecutá Jehova su enemigunan i vindicá Su soberania. Mescos cu Jehónadab su curason tabata cu Jehú, e “multitud grandi” di Jesus su “otro carnénan” awe di henter curason ta reconocé Cristo como e Rey Mesiánico i ta cooperá cu su rumannan spiritual riba tera. (Revelacion 7:9, 10; Juan 10:16) Nan ta duna evidencia di esaki dor di practicá religion berdadero i dor di tin un participacion celoso den e ministerio cristian, spiertando e enemigunan di Dios dje “dia di Jehova” cu ta acercando rápidamente.—Mateo 10:32, 33; Romanonan 10:9, 10.

Sucesonan Dramático den Futuro Cercano!

14. Kico ta warda religion falsu?

¹⁴ Jehú a tuma accion pa caba cu adoracion di Baal den Israel. Den nos tempu, mediante e Jehú Mayor, Jesucristo, Dios lo trece e destruccion di Babilonia e Grandi, e imperio mundial di religion falsu. Pronto nos lo mira e cumplimentu di loke e angel a bisa apostel Juan: “E dies cachunan cu bo a mira, i e bestia salbahe, esakinan lo odia e muher di mala bida [Babilonia e Grandi] i lo hacié desolá i sunú, i lo come su carni i lo kim’é completamente cu candela. Pasobra Dios a pone den nan curason pa cumpli cu su pensamentu, asta cumpli cu nan solo pensamentu di duna nan reino n’e bestia salbahe, te ora e palabranan di Dios lo a ser cumplí.” (Revelacion 17:16, 17; 18:2-5) “E dies cachunan” ta representá e podernan político militarisá cu ta goberná riba tera. Aunke awor nan tin un relacion spiritualmente adúltero cu Babilonia e Grandi, su tempu ta corticu. E elemento político di mundu aki lo destruí religion falsu, i “e bestia salbahe”—Nacionnan Uní—lo tin un papel principal huntu cu “e dies cachunan” den su destruccion.b Ki un ocasion pa alabá Jehova!—Revelacion 19:1-6.

15. Kico lo tuma lugá ora un intento ser hací pa destruí e organisacion terenal di Dios?

¹⁵ Despues di Rey Jehú su atake violento contra adoracion di Baal, su cas real a dirigí atencion n’e enemigunan político di Israel. E Rey Jesucristo lo tuma accion similar. Despues dje destruccion di religion falsu parecido na Baal podernan político lo permanecé. Bou dje influencia di Satanas e Diabel, e enemigunan aki di Jehova su soberania lo haci un atake final den un intento pa destruí e organisacion terenal di Dios. (Ezekiel 38:14-16) Pero Jehova lo laga e Rey Jesucristo derotá nan dor di destruí nan na Har–Magedon, “e guera dje gran dia di Dios e Todopoderoso,” completando e vindicacion di Jehova su soberania.—Revelacion 16:14, 16; 19:11-21; Ezekiel 38:18-23.

Sirbiendo cu un Celo Mescos cu di Eliseo

16, 17. (a) Con nos por sa cu Eliseo tabata celoso te na fin di su bida? (b) Kico nos mester haci cu e flechanan dje berdad?

¹⁶ Te ora “e dia di Jehova” trece un fin na henter e sistema di cosnan malbado di Satanas, Dios su sirbidónan lo tin mes tantu curashi i celo cu Eliseo. Banda di su trabou como yudante di Elías, Eliseo a sirbi su so como profeta di Jehova pa mas cu 50 aña! I te n’e fin mes di su bida largu, Eliseo tabata celoso. Djis promé cu su morto, Rey Jehoas, nietu di Jehú, a bishit’é. Eliseo a bis’é pa tira un flecha for di bentana. E flecha a bai velosmente den direccion di su blanco, i Eliseo a sclama: “Jehova su flecha di salbacion, asta e flecha di salbacion contra Siria! I siguramente lo bo golpia Siria na Afek te n’e punto di caba cuné.” Riba peticion di Eliseo, Jehoas siguientemente a golpia e tera cu su flechanan. Pero el a haci esaki cu un falta di celo, golpiand’e solamente tres bes. E ora ei Eliseo a bisa cu, como resultado di esei, Jehoas lo haña solamente tres victoria riba Siria, i esei ta loke a sosodé. (2 Reynan 13:14-19, 25) Rey Jehoas no a derotá e sirionan completamente, ‘te n’e punto di caba cu nan.’

¹⁷ Sin embargo, cu celo manera di Elías, e resto ungí ta sigui e bataya contra adoracion falsu. Nan compañeronan cu speransa terenal ta haciendo mescos. Ademas, tur esnan cu ta spera di sobrebibí “e dia di Jehova” ta haci bon di tene Eliseo celoso su palabranan na mente tocante golpia e tera. Laga nos tuma e flechanan dje berdad i dal cu nan celosamente—bes tras bes—sí, te ora Jehova bisa cu nos trabou cu nan a ser completá.

18. Con nos mester reaccioná riba e palabranan di 2 Pedro 3:11, 12?

¹⁸ Pronto “e dia di Jehova” lo trece un fin n’e mal sistema di cosnan actual. P’esei laga e palabranan alentador di apostel Pedro stimulá nos na accion. “Siendo cu tur e cosnan aki lo ser disolvé asina,” Pedro a sclama, “ki clase di personanan boso mester ta den actonan santu di conducta i echonan di debocion piadoso, sperando i teniendo mashá presente e presencia dje dia di Jehova!” (2 Pedro 3:11, 12) Ora tur parti dje sistema aki ser disolvé dor dje candela di Dios su rabia expresá mediante Jesucristo, solamente esnan cu un registro di conducta recto i debocion piadoso lo scapa. Puresa moral i spiritual ta esencial. Mescos tambe amor pa próhimo, cu nos ta mustra dor di respondé na nan necesidadnan, specialmente den un sentido spiritual mediante nos ministerio cristian.

19. Kico nos mester haci pa sobrebibí “e dia di Jehova”?

¹⁹ Bo palabra i accionnan ta identificá bo como un sirbidó fiel i celoso di Dios? Si ta asina, bo por carga e speransa di sobrebibí “e dia di Jehova” i drenta e mundu nobo primintí dor di Dios. Sí, bo tambe por sobrebibí si bo haci bon n’e rumannan spiritual di Cristo pa motibu cu nan ta su siguidónan, mescos cu e pareha sunamita tabata hospitalario cu Eliseo. Pa por sobrebibí bo mester ta tambe manera Naman, kende humildemente a aceptá instruccion divino i a bira un adoradó di Jehova. Si bo ta anhelá pa biba pa semper den un paradijs terenal, bo tin cu demostrá bo apoyo sincero pa adoracion berdadero, mescos cu Jehónadab. E ora ei bo por ta entre fiel sirbidónan di Jehova, cu pronto lo experenciá e cumplimentu di Jesus su palabranan: “Bin, boso cu a ser bendicioná dor di mi Tata, heredá e reino prepará pa boso for dje fundamentu di mundu.”—Mateo 25:34.

[Nota]

Con Lo Bo Respondé?

◻ Cua ta algun cualidad necesario pa por sobrebibí “e dia di Jehova”?

◻ Ki ehempel e pareha sunamita den tempu di Eliseo a pone?

◻ Ki les nos por siña for di Naman?

◻ Con nos por sigui e ehempel di Jehónadab?

◻ Con 2 Pedro 3:11, 12 mester afectá nos?