Bendicionnan Mas Grandi Mediante e Pacto Nobo

“Jesus . . . ta tambe e mediador di un pacto corespondientemente mihó.”—HEBREONAN 8:6.

1. Ken a resultá di ta e ‘simia dje muher’ primintí den Eden, i con el a ser ‘machicá den hilchi’?

DESPUES cu Adam i Eva a peca, Jehova a pronunciá huicio riba Satanas, esun cu a gaña Eva, bisando: “Lo mi pone enemistad entre abo i e muher i entre bo simia i su simia. Lo e machicá bo den cabes i abo lo machik’é den hilchi.” (Génesis 3:15) Ora Jesus a ser bautisá den Riu Jordan na 29 E.C., e Simia primintí den Eden finalmente a aparecé. Ora el a muri na un staca di tormento na 33 E.C., un parti dje profecia antiguo ei a cumpli. Satanas a ‘machicá e hilchi’ dje Simia.

2. Segun e propio palabranan di Jesus, con su morto ta beneficiá humanidad?

² Afortunadamente, aunke e herida ei tabata sumamente doloroso, e no tabata permanente. Jesus a ser lantá for di morto como un spiritu inmortal i a subi cerca su Tata na shelu, caminda el a ofrecé e balor di su sanger dramá como un “rescate en cambio pa hopi.” Asina, su propio palabranan a ser realisá: “E Yu di hende mester ser hisá, pa tur cu ta kere den dje por tin bida eterno. Pasobra Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Mateo 20:28; Juan 3:14-16; Hebreonan 9:12-14) E pacto nobo ta hunga un papel clave den cumplimentu di Jesus su profecia.

E Pacto Nobo

3. Na ki tempu hende a mira e pacto nobo den funcion pa promé biaha?

³ Djis promé cu su morto, Jesus a bisa su siguidónan cu su sanger dramá tabata e “sanger dje pacto [nobo].” (Mateo 26:28; Lucas 22:20) Dies dia despues cu el a subi na shelu, tabata bisto cu e pacto nobo tabata den funcion ora spiritu santu a ser dramá riba rond di 120 disipel cu a reuní den un sala ariba den Jerusalem. (Echonan 1:15; 2:1-4) E echo cu e 120 disipelnan aki a ser introducí den e pacto nobo a mustra cu e pacto “anterior,” e pacto di Ley, awor no tabata vigente mas.—Hebreonan 8:13.

4. E pacto bieu tabata un fracaso? Splica.

⁴ E pacto bieu tabata un fracaso? Di ningun manera. Siendo cu el a ser reemplasá awor, ta cierto cu Israel carnal no tabata Dios su pueblo special mas. (Mateo 23:38) Pero esei tabata pa motibu di Israel su desobedencia i pa motibu cu nan a rechasá e Ungí di Jehova. (Exodo 19:5; Echonan 2:22, 23) Sin embargo, promé cu e Ley a ser reemplasá, el a logra hopi. Pa siglonan, el a percurá un manera pa acercá Dios i el a percurá proteccion for di religion falsu. E Ley a contené rasgonan cu a prefigurá e pacto nobo i, cu su sacrificionan un tras di otro, el a demostrá cu hende tin un necesidad urgente pa libra di picá i morto. En berdad, e Ley tabata un ‘maestro cu a guia hende na Cristo.’ (Galationan 3:19, 24; Romanonan 3:20; 4:15; 5:12; Hebreonan 10:1, 2) Sin embargo, tabata mediante e pacto nobo cu e bendicion primintí na Abraham lo a ser realisá completamente.

Nacionnan Bendicioná Mediante e Simia di Abraham

5, 6. Den e cumplimentu spiritual básico dje pacto di Abraham, ken ta e Simia di Abraham, i cua tabata e promé nacion cu a ricibí un bendicion mediante dje?

⁵ Jehova a primintí Abraham: “Pa medio di bo simia tur nacion dje tera siguramente lo bendicioná nan mes.” (Génesis 22:18) Bou dje pacto bieu, hopi stranhero di curason mansu a ser bendicioná dor di nan asociacion cu Israel, e simia nacional di Abraham. Sin embargo, den su cumplimentu spiritual básico, e Simia di Abraham tabata un solo homber perfecto. Pablo a splica esaki ora el a bisa: “E promesanan a ser papiá cu Abraham i na su simia. E no ta bisa: ‘I na simianan,’ manera den e caso di hopi di eseinan, sino manera den e caso di un so: ‘I na bo simia,’ cu ta Cristo.”—Galationan 3:16.

⁶ Sí, Jesus ta e Simia di Abraham, i mediante Dje e nacionnan ta ricibí un bendicion muchu mas superior cu cualkier cos cu tabata posibel pa Israel carnal. En berdad, e promé nacion pa ricibí e bendicion aki tabata Israel mes. Pronto despues di Pentecoste 33 E.C., apostel Pedro a bisa un grupo di hudiu: “Boso ta yunan dje profetanan i dje pacto cu Dios a cera cu boso antepasadonan, bisando Abraham: ‘I na bo simia tur e famianan dje tera lo ser bendicioná.’ Na boso promé Dios, despues di a lanta su Sirbidor, a mand’é pa bendicioná boso, apartando boso cada un for di boso malechonan.”—Echonan 3:25, 26.

7. Ki nacionnan a ser bendicioná mediante Jesus, e Simia di Abraham?

⁷ Pronto e bendicion a ser extendé na samaritanonan i despues na gentilnan. (Echonan 8:14-17; 10:34-48) Un tempu entre 50 i 52 E.C., Pablo a skirbi e cristiannan na Galacia den Asia Menor: “E Scritura, mirando di antemano cu Dios lo declará hende dje nacionnan hustu debí na fe, a declará e bon nobo di antemano na Abraham, esta: ‘Pa medio di bo tur nacion lo ser bendicioná.’ Consecuentemente, esnan cu ta pega n’e fe ta ser bendicioná huntu cu fiel Abraham.” (Galationan 3:8, 9; Génesis 12:3) Aunke hopi cristian na Galacia tabata “hende dje nacionnan,” nan a ser bendicioná mediante Jesus pa motibu di nan fe. Den ki manera?

8. Pa cristiannan den Pablo su tempu, kico ser bendicioná mediante e Simia di Abraham a encerá, i cuantu, finalmente, ta ricibí un bendicion asina?

⁸ Pablo a bisa e cristiannan galatio, sin importá di cua antecedente nan por tabata: “Si boso ta pertenecé na Cristo, boso realmente ta simia di Abraham, herederonan respecto un promesa.” (Galationan 3:29) P’e galationan ei, e bendicion mediante e Simia di Abraham a encerá ser participante den e pacto nobo i tambe ser co-heredero huntu cu Jesus, socio cu Jesus den e simia di Abraham. Nos no sa con grandi e poblacion di Israel antiguo tabata. Solamente nos sa cu el a yega di ta “manera e pipitanan di santu cu tin cant’i laman di hopi cu nan tabata.” (1 Reynan 4:20) Pero sí nos sa cuantu ta e cantidad final di Jesus su socionan den e simia spiritual—144.000. (Revelacion 7:4; 14:1) E 144.000 personanan ei ta bini for di “tur tribu i lenga i pueblo i nacion” di humanidad i ta participá den administrá na otronan mas e bendicionnan dje pacto di Abraham.—Revelacion 5:9.

Un Profecia Cumplí

9. Den ki manera esnan cu ta den e pacto nobo tin e ley di Jehova den nan?

⁹ Ora Jeremías a profetisá dje pacto nobo, el a skirbi: “‘Esaki ta e pacto cu lo mi cera cu e cas di Israel despues dje dianan ei,’ ta e expresion di Jehova. ‘Lo mi pone mi ley den nan, i lo mi skirbié den nan curason.’” (Jeremías 31:33) Un característica di esnan cu ta den e pacto nobo ta cu nan ta sirbi Jehova conmoví pa amor. (Juan 13:35; Hebreonan 1:9) E ley di Jehova ta skirbí den nan curason, i nan tin un deseo ferviente pa haci su boluntad. Ta cierto cu den Israel di antigwedad algun individuo fiel a stima Jehova su ley intensamente. (Salmo 119:97) Pero cerca hopi esei no tabata e caso. Tog nan a keda forma parti dje nacion. Ningun hende por keda den e pacto nobo si e ley di Dios no ta skirbí den su curason.

10, 11. Pa esnan cu ta den e pacto nobo, den ki manera Jehova ta “bira nan Dios,” i con nan tur lo conoc’é?

¹⁰ Jehova a sigui bisa relacioná cu esnan cu ta den e pacto nobo: “Lo mi bira nan Dios, i nan mes lo bira mi pueblo.” (Jeremías 31:33) Den Israel di antigwedad hopi hende a adorá e diosnan dje nacionnan, pero nan a keda israelita. Riba base dje pacto nobo, Jehova a crea un nacion spiritual, “e Israel di Dios,” pa reemplasá Israel carnal. (Galationan 6:16; Mateo 21:43; Romanonan 9:6-8) Sin embargo, ningun persona ta keda parti dje nacion spiritual nobo si e stop di adorá Jehova exclusivamente.

¹¹ Jehova a bisa tambe: “Nan tur lo conocé mi, for di esun menor di nan te na esun mayor di nan.” (Jeremías 31:34) Den Israel, hopi a djis ignorá Jehova, bisando en efecto: “Jehova lo no haci bon, i lo e no haci malu.” (Sofonías 1:12) Ningun persona ta keda parti di Israel di Dios si e ta ignorá Jehova of contaminá adoracion puru. (Mateo 6:24; Colosensenan 3:5) Israelitanan spiritual ta “e pueblo cu conocé nan Dios.” (Daniel 11:32) Nan tin deleite den ‘gana conocimentu dje único Dios berdadero i di Jesucristo.’ (Juan 17:3) Dor di conocé Jesus, nan conocimentu di Dios ta bira mas profundo ya cu, den un manera único, Jesus “ta esun cu a splica [Dios].”—Juan 1:18; 14:9-11.

12, 13. (a) Riba ki base Jehova ta pordoná e picánan di esnan cu ta den e pacto nobo? (b) Pa loke ta pordon di picá, con e pacto nobo ta superior na e pacto bieu?

¹² Finalmente, Jehova a primintí: “Lo mi pordoná nan eror, i lo mi no corda nan picá mas.” (Jeremías 31:34b) E Ley di Moises a contené cientos di reglamentu skirbí cu israelitanan mester a obedecé. (Deuteronomio 28:1, 2, 15) Tur esnan cu a kibra e Ley tabata ofrecé sacrificio pa cubri nan picánan. (Levítico 4:1-7; 16:1-31) Hopi hudiu a cuminsá kere cu nan por a bira hustu mediante nan mes obranan conforme cu Ley. Pero, cristiannan ta realisá cu nan nunca por merecé husticia dor di nan mes obranan. Nan no por evitá di peca. (Romanonan 5:12) Bou dje pacto nobo, un posicion hustu dilanti Dios ta posibel solamente riba base dje sacrificio di Jesus. Sin embargo, un posicion asina ta un don, un bondad inmerecí for di Dios. (Romanonan 3:20, 23, 24) Ainda Jehova ta exigí obedencia for di su sirbidónan. Pablo ta bisa cu esnan den e pacto nobo ta “bou di ley pa cu Cristo.”—1 Corintionan 9:21.

¹³ P’esei, pa cristiannan tambe tin un sacrificio pa picá, pero unu di muchu mas balor cu e sacrificionan bou dje pacto di Ley. Pablo a skirbi: “Tur sacerdote [bou dje pacto di Ley] ta ocupá su puesto dia tras dia pa rindi sirbishi público i pa ofrecé e mésun sacrificionan hopi bes, pasobra eseinan na ningun tempu por kita picá completamente. Pero [Jesus] a ofrecé un solo sacrificio pa picá perpetuamente i a sinta na man drechi di Dios.” (Hebreonan 10:11, 12) Dor cu cristiannan den e pacto nobo ta ehercé fe den e sacrificio di Jesus, Jehova ta declará nan hustu, sin picá, i asina den un posicion pa ser ungí como su yunan spiritual. (Romanonan 5:1; 8:33, 34; Hebreonan 10:14-18) Ora nan peca debí na imperfeccion humano, nan por roga Jehova pa su pordon, i riba base dje sacrificio di Jesus, Jehova ta pordoná nan. (1 Juan 2:1, 2) Sin embargo, si nan scoge pa peca deliberadamente, nan ta perde nan posicion hustu i e privilegio di ser participante den e pacto nobo.—Hebreonan 2:2, 3; 6:4-8; 10:26-31.

E Pacto Bieu i Esun Nobo

14. Ki circuncision tabata rekerí bou dje pacto di Ley? I bou dje pacto nobo?

¹⁴ Hende homber den e pacto bieu a ser circuncidá como un señal cu nan tabata bou dje Ley. (Levítico 12:2, 3; Galationan 5:3) Despues cu e congregacion cristian a cuminsá, algun a pensa cu cristiannan no-hudiu tambe mester a ser circuncidá. Pero e apostelnan i ancianonan na Jerusalem, bou di guia dje Palabra di Dios i di spiritu santu, a percibí cu esaki no tabata necesario. (Echonan 15:1, 5, 28, 29) Algun aña despues, Pablo a bisa: “E hudiu no ta esun cu ta hudiu di pafó, tampoco circuncision ta loke ta di pafó riba e carni. Pero e hudiu ta esun cu ta hudiu di paden, i su circuncision ta esun di curason mediante spiritu, i no mediante un código skirbí.” (Romanonan 2:28, 29) Circuncision literal, asta pa hudiunan carnal, no tabatin balor spiritual mas den bista di Jehova. Esnan cu ta den e pacto nobo mester circuncidá curason i no e carni. Tur cos den nan pensamentu, deseonan i motivacion cu ta desagradá Jehova of cu ta impuru den su bista, tin cu ser cortá afó.a Awe hopi persona ta testimonio bibu dje poder di spiritu santu pa transformá e patronchi di pensa asina aki.—1 Corintionan 6:9-11; Galationan 5:22-24; Efesionan 4:22-24.

15. Den ki manera Israel carnal i e Israel di Dios ta igual pa loke ta gobernacion real?

¹⁵ Den e areglo dje pacto di Ley, Jehova tabata Rey di Israel, i cu tempu el a ehercé su soberania mediante reynan humano den Jerusalem. (Isaías 33:22) Jehova ta tambe Rey di e Israel di Dios, Israel spiritual, i desde 33 E.C., el a goberná mediante Jesucristo, kende a ricibí “tur autoridad . . . den shelu i riba tera.” (Mateo 28:18; Efesionan 1:19-23; Colosensenan 1:13, 14) Awe, e Israel di Dios ta reconocé Jesus como Rey dje Reino celestial di Dios, cu a ser establecé na 1914. Jesus ta un Rey muchu mas mihó cu asta Ezekías, Hosías i e otro reynan fiel di Israel di antigwedad.—Hebreonan 1:8, 9; Revelacion 11:15.

16. Ki clase di sacerdocio Israel di Dios ta?

¹⁶ Israel no tabata solamente un reino sino tambe tabatin un sacerdocio ungí. Na 33 E.C., e Israel di Dios a reemplasá Israel carnal i a bira Jehova su “sirbidó,” su “testigonan.” (Isaías 43:10) Jehova su palabranan na Israel registrá na Isaías 43:21 i Exodo 19:5, 6 dje tempu ei padilanti a aplicá na e Israel spiritual di Dios. Awor Dios su nacion spiritual nobo tabata “un rasa scogí, un sacerdocio real, un nacion santu, un pueblo pa posesion special,” responsabel pa ‘declará e excelencianan di Jehova na tur parti.’ (1 Pedro 2:9) Tur persona den e Israel di Dios, homber i muher, ta forma un sacerdocio colectivo. (Galationan 3:28, 29) Como e parti secundario dje simia di Abraham, nan ta bisa awor: “Alegrá, O nacionnan, cu su pueblo.” (Deuteronomio 32:43) Esnan di Israel spiritual cu ta riba tera ainda ta forma “e esclabo fiel i discreto.” (Mateo 24:45-47) Solamente den asociacion cu nan, hende por rindi sirbishi sagrado na Dios den un forma aceptabel.

E Reino di Dios—E Cumplimentu Final

17. Ki nacementu esnan cu ta den e pacto nobo ta experenciá?

¹⁷ E israelitanan cu a nace despues di 1513 P.E.C. a drenta den e pacto di Ley n’e momento cu nan a nace. Esnan cu Jehova ta introducí den e pacto nobo tambe ta experenciá un nacementu—den nan caso, un nacementu spiritual. Jesus a mencioná esaki n’e fariseo Nicodemo ora el a bisa: “Cu mayor berdad mi ta bisá bo: A ménos cu un hende nace di nobo, e no por mira e reino di Dios.” (Juan 3:3) E 120 disipelnan na Pentecoste 33 E.C. tabata e promé hendenan imperfecto cu a experenciá e nacementu nobo aki. Declará hustu bou dje pacto nobo, nan a ricibí spiritu santu como “un garantia di antemano” di nan herencia real. (Efesionan 1:14) Nan a “nace di spiritu” pa bira yu adoptá di Dios, loke a haci nan rumannan di Jesus i asina “co-heredero cu Cristo.” (Juan 3:6; Romanonan 8:16, 17) E echo cu nan a “nace di nobo” a habri caminda pa prospectonan maraviyoso.

18. Ki prospectonan maraviyoso ta habri pa esnan cu ta den e pacto nobo, pa e echo cu nan ta nace di nobo?

¹⁸ Ora Jesus a media e pacto nobo, el a cera un pacto adicional cu su siguidónan, bisando: “Mi ta cera un pacto cu boso, mescos cu mi Tata a cera un pacto cu mi, pa un reino.” (Lucas 22:29) E pacto di Reino aki ta prepará e caminda pa e cumplimentu di un vision remarcabel, registrá na Daniel 7:13, 14, 22, 27. Daniel a mira “un persona manera un yu di hende” cu “e Anciano di Dianan,” Jehova Dios, a duna autoridad real. Anto Daniel a mira cu e “santunan a tuma posesion dje reino mes.” Jesus ta esun “manera un yu di hende,” cu, na 1914, a ricibí e Reino celestial for di Jehova Dios. Su disipelnan ungí cu spiritu ta “e santunan” cu ta participá cuné den e Reino ei. (1 Tesalonicensenan 2:12) Con?

19, 20. (a) Pa esnan cu ta den e pacto nobo, ki cumplimentu final i glorioso Jehova su promesa na Abraham lo tin? (b) Ki preguntanan mas mester ser considerá?

¹⁹ Despues di nan morto, e ungínan aki mescos cu Jesus ta ser lantá for di morto como criaturanan spiritual inmortal pa sirbi huntu cuné como rey i sacerdote den shelu. (1 Corintionan 15:50-53; Revelacion 20:4, 6) Ki un speransa glorioso! “Nan tin cu reina como rey riba tera,” no djis riba e tera di Canan. (Revelacion 5:10) Nan lo ‘poseé e portanan di nan enemigunan’? (Génesis 22:17) Sí, anto den un manera decisivo, ora nan ta testigo dje destruccion dje prostituta religioso hostil, Babilonia e Grandi, i ora e ungínan resucitá aki participá cu Jesus den pastoreá e nacionnan “cu un bara di heru” i den aplastá e cabes di Satanas. Asina nan lo tuma parti den cumpli cu e detaye final dje profecia na Génesis 3:15.—Revelacion 2:26, 27; 17:14; 18:20, 21; Romanonan 16:20.

²⁰ Tog, nos por puntra: E pacto di Abraham i e pacto nobo ta enbolbé solamente e 144.000 almanan fiel aki? No, otronan cu no ta directamente den e pactonan aki lo ser bendicioná mediante nan, manera nos lo mira den e siguiente artículo.

[Nota]

Bo Ta Corda?

◻ Na ki tempu hende a mira e pacto nobo den funcion pa promé biaha?

◻ Kico a ser lográ mediante e pacto bieu?

◻ Ken principalmente ta e Simia di Abraham, i den ki secuencia nacionnan a ser bendicioná mediante e Simia ei?

◻ Pa e 144.000, kico ta e cumplimentu final dje pacto di Abraham i e pacto nobo?

[Plachi na página 15]

Pordon di picá tin nificacion mas profundo pa esnan cu ta bou dje pacto nobo cu pa esnan cu tabata bou dje pacto bieu