E Otro Carnenan i e Pacto Nobo

“E stranheronan . . . , tur esnan cu ta warda e sabat afin di no profan’é i pa nan pega na mi pacto, lo mi trece nan tambe na mi ceru santu.”—ISAIAS 56:6, 7.

1. (a) Segun e vision di Juan, kico ta ser lográ miéntras e bientunan di Jehova su huicio ta ser wantá? (b) Ki multitud remarcabel Juan a mira?

DEN e di cuater vision den e buki di Revelacion, apostel Juan a mira cu e bientunan destructivo di Jehova su huicio ta ser wantá miéntras e seyamentu di tur miembro di “e Israel di Dios” tabata ser completá. Esakinan ta e proménan pa ser bendicioná mediante Jesus, e parti principal dje simia di Abraham. (Galationan 6:16; Génesis 22:18; Revelacion 7:1-4) Den e mésun vision ei, Juan a mira “un multitud grandi, cu ningun hende por a conta, for di tur nacion i tribu i pueblo i lenga . . . , sclama cu un bos fuerte, bisando: ‘Salbacion nos ta debe na nos Dios, kende ta sintá riba e trono, i n’e Lamchi.’” (Revelacion 7:9, 10) Dor di bisa, “salbacion nos ta debe . . . n’e Lamchi,” e multitud grandi ta mustra cu nan tambe ta ser bendicioná pa medio dje Simia di Abraham.

2. Na ki tempu e multitud grandi a aparecé, i con e ta ser identificá?

² Aya na 1935, a reconocé e multitud grandi aki i awe nan ta mas cu cincu miyon na cantidad. Marcá pa sobrebibí e tribulacion grandi, su miembronan lo ser apartá pa bida eterno ora Jesus separá “e carnénan” for di “e cabritunan.” Cristiannan dje multitud grandi ta entre e “otro carnénan” den Jesus su ilustracion dje curánan di carné. Nan ta spera di biba pa semper den un paradijs riba tera.—Mateo 25:31-46; Juan 10:16; Revelacion 21:3, 4.

3. Den ki manera cristiannan ungí i otro carnénan ta diferenciá for di otro pa loke ta e pacto nobo?

³ Pa e 144.000, e bendicion dje pacto di Abraham ta ser efectuá mediante e pacto nobo. Como participante den e pacto nobo aki, nan ta cai “bou di bondad inmerecí” i “bou di ley pa cu Cristo.” (Romanonan 6:15; 1 Corintionan 9:21) P’esei, ta apropiado cu solamente e 144.000 miembronan dje Israel di Dios a tuma dje emblemanan durante e Memorial di Jesus su morto, i ta solamente cu nan Jesus a cera su pacto pa un Reino. (Lucas 22:19, 20, 29) Miembronan dje multitud grandi no ta participá den e pacto nobo. Sin embargo, nan ta asociá cu e Israel di Dios i ta biba cu nan den nan “tera.” (Isaías 66:8) P’esei ta razonabel pa bisa cu nan tambe ta cai bou di Jehova su bondad inmerecí i bou dje ley pa cu Cristo. Aunke nan no ta participá den e pacto nobo, nan ta beneficiá for di dje sí.

“Stranheronan” i “e Israel di Dios”

4, 5. (a) Segun Isaías, ki grupo lo a sirbi Jehova? (b) Con Isaías 56:6, 7 ta cumpli riba e multitud grandi?

⁴ Profeta Isaías a skirbi: “E stranheronan cu a uni nan mes cu Jehova pa sirbié i pa stima e nomber di Jehova, afin di bira sirbidó di dje, tur esnan cu ta warda e sabat afin di no profan’é i pa nan pega na mi pacto, lo mi trece nan tambe na mi ceru santu i haci nan alegrá den mi cas di oracion. Nan ofrendanan kimá henteramente i nan sacrificionan lo ta pa aceptacion riba mi altar.” (Isaías 56:6, 7) Den Israel, esaki a nificá cu “stranheronan,” no-israelita, lo a adorá Jehova—stimando su nomber, obedeciendo e condicionnan dje pacto di Ley, wardando e sabat, i ofreciendo sacrificio n’e tempel, Dios su “cas di oracion.”—Mateo 21:13.

⁵ Den nos tempu, “e stranheronan cu a uni nan mes cu Jehova” ta e multitud grandi. Esakinan ta sirbi Jehova den asociacion cu e Israel di Dios. (Zacarías 8:23) Nan ta ofrecé e mésun sacrificionan aceptabel cu e Israel di Dios. (Hebreonan 13:15, 16) Nan ta adorá den Dios su tempel spiritual, su “cas di oracion.” (Compará cu Revelacion 7:15.) Nan ta warda e sabat semanal? Bijbel no ta manda ni esnan ungí ni e otro carnénan haci esaki. (Colosensenan 2:16, 17) Sin embargo, Pablo a bisa e cristiannan ungí hebreo: “Ta keda un sabat di descanso p’e pueblo di Dios. Pasobra e hende cu a drenta den e descanso di Dios, e mes tambe a descansá di su mes obranan, mescos cu Dios a haci di esnan di dje.” (Hebreonan 4:9, 10) E hebreonan ei a drenta den e “sabat di descanso” aki ora nan a someté nan mes na “e husticia di Dios” i a stop di purba hustificá nan mes pa medio di obranan dje Ley. (Romanonan 10:3, 4) Cristiannan gentil ungí ta disfrutá dje mésun descanso dor di someté nan mes n’e husticia di Jehova. E multitud grandi ta uni cu nan den e descanso ei.

6. Con otro carnénan awe ta someté nan mes bou dje pacto nobo?

⁶ Ademas, otro carnénan ta someté nan mes bou dje pacto nobo mescos cu stranheronan di antigwedad a someté nan mes bou dje pacto di Ley. Den ki manera? No dor di bira participante den dje, sino dor di someté nan mes n’e leynan asociá cuné i beneficiá di su areglonan. (Compará cu Jeremías 31:33, 34.) Mescos cu nan compañeronan ungí, e otro carnénan tin Jehova su ley skirbí ‘den nan curason.’ Nan ta stima Jehova su mandamentu i principionan profundamente i ta obedecé nan. (Salmo 37:31; 119:97) Mescos cu cristiannan ungí, nan conocé Jehova. (Juan 17:3) Kico di circuncision? Rond di 1.500 aña promé cu a cera e pacto nobo, Moises a urgi e israelitanan: “Boso tin cu circuncidá e cueru dilanti di boso curason.” (Deuteronomio 10:16; Jeremías 4:4) Aunke circuncision carnal obligatorio a caducá huntu cu e Ley, tantu e ungínan como e otro carnénan tin cu “circuncidá” nan curason. (Colosensenan 2:11) Finalmente, Jehova ta pordoná e eror dje otro carnénan riba e base di Jesus su ‘sanger dramá dje pacto.’ (Mateo 26:28; 1 Juan 1:9; 2:2) Dios no ta adoptá nan como yu spiritual, manera e ta haci cu e 144.000. Pero sí e ta declará e otro carnénan hustu, den e sentido cu Abraham a ser declará hustu como amigu di Dios.—Mateo 25:46; Romanonan 4:2, 3; Santiago 2:23.

7. Ki prospectonan ta habri awe pa e otro carnénan, kendenan ta ser declará hustu mescos cu Abraham?

⁷ Pa e 144.000, dor cu nan a ser declará hustu, e caminda ta habri pa nan por tin e speransa di goberná huntu cu Jesus den e Reino celestial. (Romanonan 8:16, 17; Galationan 2:16) Pa e otro carnénan, ser declará hustu como amigu di Dios ta permití nan brasa e speransa di bida eterno den un paradijs riba tera—sea dor di sobrebibí Armagedon como parti dje multitud grandi of dor di e ‘resureccion dje hustunan.’ (Echonan 24:15) Ki un privilegio pa por tin un speransa asina i pa ta amigu dje Soberano di universo, pa ta un “huésped den [su] tent”! (Salmo 15:1, 2) Sí, tantu e ungínan como e otro carnénan ta bendicioná den un manera maraviyoso mediante Jesus, e Simia di Abraham.

Un Dia di Expiacion Mas Grandi

8. Kico e sacrificionan bou dje Ley riba e Dia di Expiacion a prefigurá?

⁸ Ora Pablo a papia tocante e pacto nobo, el a recordá su lectornan dje Dia di Expiacion anual bou dje pacto di Ley. Riba e dia ei, nan tabata ofrecé sacrificionan separá—un pa e tribu sacerdotal di Levi i un otro pa e 12 tribunan no-sacerdotal. Pa hopi tempu a splica cu esaki ta algu cu ta prefigurá Jesus su gran sacrificio cu lo a beneficiá tantu e 144.000 cu un speransa celestial, como e miyones di hende cu tin un speransa terenal.a Pablo a mustra cu den e cumplimentu dje Dia di Expiacion, e beneficionan di Jesus su sacrificio ta ser administrá mediante un Dia di Expiacion mas grandi bou dje pacto nobo. Como Sumo Sacerdote dje dia mas grandi aki, Jesus a duna su bida perfecto como un sacrificio di expiacion afin di obtené “un liberacion eterno” pa hende.—Hebreonan 9:11-24.

9. Dor cu cristiannan ungí hebreo ta den e pacto nobo, kico nan por tabatin?

⁹ Ainda hopi cristian hebreo dje promé siglo tabata “celoso p’e Ley [di Moises].” (Echonan 21:20) Tabata apropiado anto pa Pablo recordá nan: “[Jesus] ta un mediador di un pacto nobo, afin cu, debí cu un morto a sosodé pa nan liberacion pa medio di rescate for dje ofensanan bou dje pacto anterior, esnan cu a ser yamá por ricibí e promesa dje herencia eterno.” (Hebreonan 9:15) E pacto nobo a libra cristiannan hebreo for dje pacto bieu, cu a exponé nan estado pecaminoso. Ta danki na e pacto nobo cu nan por tin “e promesa dje herencia [celestial] eterno.”

10. Pa kico cristiannan ungí i otro carnénan ta gradicí Dios?

¹⁰ “Tur” cu “ehercé fe den e Yu” lo beneficiá dje sacrificio di rescate. (Juan 3:16, 36) Pablo a bisa: “E Cristo a ser ofrecí una bes pa semper pa carga e picánan di hopi; i e di dos bes cu e ta presentá lo ta aparte di picá i pa esnan cu ta sper’é cu anhelo intenso pa nan salbacion.” (Hebreonan 9:28) Awe, entre esnan cu ta spera riba Jesus cu anhelo intenso tin cristiannan ungí di e Israel di Dios cu ta na bida awor, i e miyones di hende cu ta forma e multitud grandi i cu tambe tin un herencia eterno. Ambos clase ta gradicí Dios pa e pacto nobo i pa e bendicionnan dunadó di bida asociá cuné, incluyendo e Dia di Expiacion mas grandi i e ministerio dje Sumo Sacerdote, Jesus, den e Santísimo celestial.

Ocupá den Sirbishi Sagrado

11. Despues cu nan a haci nan concenshi limpi mediante Jesus su sacrificio, kico e ungínan i otro carnénan ta haci gososamente?

¹¹ Den su carta n’e hebreonan, Pablo a enfatisá e balor superior di Jesus su sacrificio den e areglo dje pacto nobo compará cu e ofrendanan di picá bou dje pacto bieu. (Hebreonan 9:13-15) Jesus su mihó sacrificio por “limpia nos concenshi for di obranan morto pa nos por rindi sirbishi sagrado n’e Dios bibu.” Pa cristiannan hebreo, “obranan morto” a incluí “e ofensanan bou dje pacto anterior.” Pa cristiannan awe, nan ta incluí picánan cometé den pasado pa cua nan berdaderamente a repentí i cu Dios a pordoná. (1 Corintionan 6:9-11) Cu un concenshi limpi, cristiannan ungí ta rindi “sirbishi sagrado n’e Dios bibu.” Mescos ta conta p’e multitud grandi. Despues cu nan a limpia nan concenshi mediante “e sanger dje Lamchi,” nan ta den Dios su gran tempel spiritual, “rindiendo sirbishi sagrado na dje di dia i anochi.”—Revelacion 7:14, 15.

12. Con nos ta mustra cu nos tin “e pleno siguridad di fe”?

¹² Ademas, Pablo a bisa: “Laga nos acercá cu curason sincero den e pleno siguridad di fe, teniendo nos curason di sprengu limpiá di un concenshi malu i nos curpa bañá cu awa limpi.” (Hebreonan 10:22) Con nos por mustra cu nos tin “e pleno siguridad di fe”? Pablo a urgi cristiannan hebreo: “Laga nos tene firmemente gará e declaracion público di nos speransa [celestial] sin vacilá, pasobra esun cu a primintí ta fiel. I laga nos considerá un e otro pa incitá otro na amor i na obranan excelente, sin bandoná nos reunimentu huntu, manera algun tin pa custumber, sino animando un e otro, i tantu mas segun cu boso ta contemplá e dia yegando cerca.” (Hebreonan 10:23-25) Si nos fe ta bibu, nos tambe lo no “bandoná nos reunimentu huntu.” Nos lo tin deleite pa incitá nos rumannan i pa ser incitá dor di nan na amor i na obranan excelente i pa ser fortalecí p’e trabou vital di declará públicamente nos speransa, sea esei ta terenal of celestial.—Juan 13:35.

E “Pacto Eterno”

13, 14. Den ki maneranan e pacto nobo ta eterno?

¹³ Kico ta sosodé ora e últimonan dje 144.000 realisá nan speransa celestial? E pacto nobo lo stop di aplicá? N’e tempu ei, lo no resta ningun miembro di e Israel di Dios riba tera. Tur participante den e pacto lo ta cu Jesus “den e reino di [su] Tata.” (Mateo 26:29) Pero nos ta corda Pablo su palabranan den su carta n’e hebreonan: “E Dios di pas . . . a lanta for di morto e gran wardador di carné cu e sanger di un pacto eterno.” (Hebreonan 13:20; Isaías 55:3) Den ki sentido e pacto nobo ta eterno?

¹⁴ Na promé lugá, distinto dje pacto di Ley, hamas lo e ser reemplasá. Na di dos lugá, e resultadonan di su funcionamentu ta permanente, mescos cu Jesus su gobernacion. (Compará Lucas 1:33 cu 1 Corintionan 15:27, 28.) E Reino celestial tin un lugá eterno den Jehova su propósitonan. (Revelacion 22:5) I na di tres lugá, otro carnénan lo sigui beneficiá dje areglo di e pacto nobo. Durante e Reinado di Mil Aña di Cristo, hende fiel lo sigui ‘rindi sirbishi sagrado [na Jehova] di dia i anochi’ mescos cu nan ta haci awor. Jehova lo no bolbe trece contra nan nan picánan di pasado cu a ser pordoná riba base di Jesus su “sanger di pacto.” Nan lo sigui disfrutá di un posicion hustu como amigu di Jehova, i su ley lo ta skirbí ainda den nan curason.

15. Describí Jehova su relacion cu su adoradónan terenal den e mundu nobo.

¹⁵ Jehova lo por bisa e ora ei di e sirbidónan humano aki: ‘Mi ta nan Dios, i nan ta mi pueblo’? Sí, “Lo e biba cu nan, i nan lo ta su pueblo. I Dios mes lo ta cu nan.” (Revelacion 21:3) Nan lo bira “e campamentu dje santunan,” representantenan terenal di “e stad stimá,” e bruid celestial di Jesucristo. (Revelacion 14:1; 20:9; 21:2) Tur esaki lo ta posibel debí na nan fe den Jesus su ‘sanger dramá dje pacto’ i nan sumision n’e reynan i sacerdotenan celestial, cu tempu nan tabata riba tera tabata e Israel di Dios.—Revelacion 5:10.

16. (a) Ki posibilidadnan ta spera esnan resucitá riba tera? (b) Ki bendicionnan lo bini na fin dje mil añanan?

¹⁶ Kico dje mortonan cu ta ser resucitá riba tera? (Juan 5:28, 29) Nan tambe lo ser invitá pa “bendicioná nan mes” mediante Jesus, e Simia di Abraham. (Génesis 22:18) Nan tambe lo tin cu stima e nomber di Jehova, sirbié, ofrecé sacrificio aceptabel i rindi sirbishi sagrado den su cas di oracion. Esnan cu ta haci esei lo drenta den e descanso di Dios. (Isaías 56:6, 7) Pa fin dje mil añanan, tur esnan fiel lo a ser elevá na perfeccion humano mediante e sirbishi di Jesucristo i su 144.000 co-sacerdotenan. Nan lo ta hustu, no simplemente declará hustu como amigu di Dios. Nan lo “yega na biba,” siendo completamente liber di picá i morto heredá for di Adam. (Revelacion 20:5; 22:2) Ki un bendicion esei lo ta! For di nos punto di bista actual, ta parce cu e trabou sacerdotal di Jesus i e 144.000 p’e tempu ei lo a ser completá. E bendicionnan dje Dia di Expiacion mas grandi lo a ser aplicá completamente. Ademas, Jesus ‘lo entregá e reino na su Dios i Tata.’ (1 Corintionan 15:24) Lo tin un prueba final pa humanidad, i despues Satanas i su demoñonan lo ser destruí pa semper.—Revelacion 20:7, 10.

17. En bista dje goso cu ta spera nos, kico cada un di nos mester ta determiná pa haci?

¹⁷ Ki papel, si tin mes, e “pacto eterno” lo hunga den e era excitante cu lo cuminsá e tempu ei? Esei no ta na nos pa bisa. Loke Jehova a revelá te asina leu ta suficiente pa awor. E ta yena nos cu temor reverencial. Djis imaginá bo—bida eterno como parti di “shelu nobo i un tera nobo”! (2 Pedro 3:13) No laga nada debilitá nos deseo pa heredá e promesa ei. Kisas no ta fácil pa para firme awor. Pablo a bisa: “Boso tin mester di awante, afin cu, despues di a haci e boluntad di Dios, boso por ricibí e cumplimentu dje promesa.” (Hebreonan 10:36) Pero corda cu cualkier problema cu nos mester vence, cualkier oposicion cu nos tin cu superá, ta bira insignificante ora nos compará nan cu e goso cu ta warda nos. (2 Corintionan 4:17) P’esei, no laga ningun di nos sea “e sorto cu ta hala atras, loke ta hiba na destruccion.” Mas bien, laga nos resultá di ta “e sorto cu tin fe, loke ta hiba na conserbá e alma bibu.” (Hebreonan 10:39) Laga nos tur tin pleno confiansa den Jehova, e Dios di pacto, p’e bendicion eterno di cada un di nos.

[Nota]

Bo A Comprendé?

◻ Ademas di cristiannan ungí, ken ta ser bendicioná mediante e Simia di Abraham?

◻ Den e manera cu e otro carnénan ta ser bendicioná mediante e pacto nobo, con asina nan ta manera e prosélitonan bou dje pacto bieu?

◻ Con e otro carnénan ta ser bendicioná mediante e areglo dje Dia di Expiacion mas grandi?

◻ Pakico Pablo a yama e pacto nobo un “pacto eterno”?

[Kuadro na página 21]

Sirbishi Sagrado den e Tempel

E multitud grandi ta adorá Dios huntu cu cristiannan ungí den e patio terenal di Jehova su gran tempel spiritual. (Revelacion 7:14, 15; 11:2) No tin motibu pa concluí cu nan ta den un Plenchi di Gentilnan separá. Tempu cu Jesus tabata riba tera, tabatin un Plenchi di Gentilnan den e tempel. Sin embargo, den e mapanan dje tempelnan di Sálomon i Ezekiel, inspirá dor di Dios, no tabatin percuracion pa un Plenchi di Gentilnan. Den e tempel di Sálomon, tabatin un patio parti pafó unda e israelitanan i prosélitonan, homber i muher, a adorá Dios huntu. Esaki ta e patronchi profético dje patio terenal dje tempel spiritual, unda Juan a mira e multitud grandi rindi sirbishi sagrado.

Sin embargo, solamente sacerdote i levitanan por a drenta e patio interior, unda e gran altar tabata situá; solamente sacerdotenan por a drenta e Lugá Santu; i solamente e sumo sacerdote por a drenta e Santísimo. Nos ta comprendé cu e patio interior i e Lugá Santu ta prefigurá e condicion spiritual único di cristiannan ungí riba tera. I e Santísimo ta prefigurá shelu mes, unda cristiannan ungí ta ricibí bida inmortal huntu cu nan Sumo Sacerdote celestial.—Hebreonan 10:19, 20.

[Plachi na página 23]

En bista dje goso cu ta spera nos, laga nos “tin fe, loke ta hiba na conserbá e alma bibu”