Cargando Responsabilidad pa Cuido di Famia

“TATANAN, no iritá boso yunan, sino sigui cria nan den e disiplina i reglamentu mental di Jehova.” (Efesionan 6:4) Cu e palabranan inspirá ei, apostel Pablo claramente a pone e responsabilidad pa cuido di famia na su lugá—riba scouder dje tata.

Den mayoria famia no ta e tata so ta percurá pa su yunan. Su esposa, mama di su yunan, gustosamente ta compartí e carga cu su casá. P’esei, Rey Sálomon a declará: “Scucha, mi yu, na e disiplina di bo tata, i no bandoná e ley di bo mama.”—Proverbionan 1:8.

Cuido Material i Spiritual

Mayornan cu ta stima nan yunan no ta neglishá nan intencionalmente. En berdad, si cristiannan haci esei, lo e ta ekivalente na renunciá nan fe, manera nos ta concluí for di Pablo su palabranan na Timoteo: “Siguramente si un hende no ta percurá pa esnan cu ta di dje mes, i specialmente pa esnan cu ta miembro di su famia di cas, el a nenga e fe i ta pió cu un persona sin fe.” (1 Timoteo 5:8) Cristiannan ta realisá cu pa lanta yu den “e disiplina i reglamentu mental di Jehova” ta rekerí hopi mas cu djis percurá pa nan den sentido material.

Considerá loke Moises a urgi e nacion di Israel ora nan tabata kampeer riba e yanuranan di Moab, djis promé cu nan a drenta e Tera Primintí. Ei el a ripití e leynan di Dios na nan i a instruí nan: “Boso tin cu aplicá e palabranan aki di mi na boso curason i na boso alma.” (Deuteronomio 11:18) Mas promé el a recordá nan cu nan mester stima Jehova cu tur nan curason, alma i forsa vital, i a agregá: “E palabranan aki cu mi ta mandando bo awe mester resultá di ta riba bo curason.” (Deuteronomio 6:5, 6) Tabata vital pa mayornan israelita permití e palabranan dje Ley di Dios penetrá den nan curason. Cu curason yen di aprecio spiritual, mayornan israelita por a obedecé e siguiente palabranan di Moises eficasmente: “Bo tin cu inculcá nan [e palabranan dje Ley di Dios] den bo yu homber i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.”—Deuteronomio 6:7; 11:19; compará cu Mateo 12:34, 35.

Ripará cu tatanan mester a “inculcá” e palabranan ei den nan yunan i “papia di nan.” Merriam-Webster’s Collegiate Dictionary ta definí “inculcá” como “siña i graba dor di frecuente ripiticion of spiertamentu.” Ora mayornan a papia tocante e Ley di Dios diariamente—mainta, merdia i anochi—esaki a transmití hopi cos na nan yunan. Segun cu e chikitinnan a sinti e amor cu nan mayornan tabatin p’e Ley di Dios, nan na nan turno a ser influenciá pa desaroyá un intimidad cu Jehova. (Deuteronomio 6:24, 25) Interesantemente, Moises a instruí tatanan specíficamente pa siña nan yunan ‘ora nan a sinta den nan cas.’ E siñamentu ei tabata parti dje cuido di famia. Pero kico djawe?

“Ora Bo Ta Sinta den Bo Cas”

“No ta fácil,” Janet, un mama cristian di cuater yu, ta splica.a “Bo mester tin persistencia,” su esposo Paul ta bai eens. Mescos cu hopi otro mayor Testigo, Paul i Janet ta haci esfuerso pa studia Bijbel cu nan yunan por lo ménos un biaha pa siman. “Nos ta trata na tene nos consideracion di Bijbel como famia tur dialuna anochi na un ora fiho,” Paul ta splica, admitiendo: “Pero nos no ta logra tur biaha.” Como anciano nombrá den su congregacion, tin biaha el a hañ’é ta bai trata asuntunan urgente. Su dos yunan mas grandi ta sirbi como ministernan di tempu completo. Nan ta haña cu e oranan di anochi ta bon pa haña hende na cas den e ministerio. P’esei, como famia, nan a ahustá e ora di nan studio di famia. “Tin biaha nos ta studia direct despues cu nos caba di come anochi,” Pablo ta splica.

Maske mayornan di un manera sabí ta demostrá flexibilidad den e ponementu di ora pa nan studio di famia, nan ta purba mantené su regularidad. “Si mester cambia e ora di nos studio,” e yu muher Clare ta bisa, “Tata semper ta pone e ora nobo riba porta di frishider, asina nos tur sa ki ora lo e ta.”

Un studio di Bijbel regular como famia tambe ta duna un oportunidad excelente p’e miembronan mas yong dje famia compartí nan preocupacion i problemanan cu nan mayornan. Un studio asina ta duna bon resultado ora e no ta asina stijf cu e chikitinnan ta djis lesa contesta riba e preguntanan imprimí den e buki pa studia Bijbel cu nan ta usa. “Nos studio di famia ta un foro pa discusion,” Martin cu tin dos yu homber ta splica. “Ora bo bini huntu un biaha pa siman pa considerá un tema bíblico, bo ta haña sa con ta bayendo cu bo famia den sentido spiritual,” e ta comentá. “Tur tipo di cos ta sali na cla den e consideracion. Bo ta haña sa kico ta pasando na scol, i mas interesantemente, bo ta haña sa ki actitud bo yunan ta desaroyando.” Su esposa, Sandra, ta di acuerdo cuné i ta haña cu e tambe ta saca hopi for dje studio di famia. “Segun cu mi esposo ta conducí e studio,” e ta conta, “mi ta siña hopi dor di scucha n’e manera cu mi yunan ta contestá su preguntanan.” Anto Sandra ta adaptá su comentarionan pa yuda su yu hombernan. E ta disfrutá mas dje studio pasobra e ta participá activamente. Sí, periodonan di studio di famia ta duna mayornan comprendimentu penetrante den nan yunan su manera di pensa.—Proverbionan 16:23; 20:5.

Sea Adaptabel i Perseverá

Ora e ora pa studio di famia yega, bo por haña cu un yu por ta mas alerto i interesá, miéntras cu bo tin cu papia mas cu un otro p’e concentrá i saca beneficio. Un mama cristian ta comentá: “Ta asina ta bida di famia! Bo sa kico bo mester haci como mayor. Pues ora bo persistí den dje, Jehova ta yuda i ta duna resultado.”

E cantidad di tempu cu un mucha chikitu por presta atencion ta varia mashá segun su edad. E mayor dicernidor ta tene cuenta cu esaki. Un pareha tin cincu yu, di cua nan edadnan ta varia for di 6 pa 20 i picu aña. E tata, Michael, ta bisa: “Duna esun mas yong e oportunidad pa contestá e preguntanan promé. Despues laga e yunan mas grandi agregá e detayenan i trece e puntonan cu nan a prepará.” E manera aki di trata yunan cu dicernimentu ta permití mayornan siña nan e balor di tuma otronan na consideracion. “Kisas un di nos yunan ta comprendé,” Martin ta observá, “pero e otro yu mester di hopi yudansa p’e capta e punto. Mi ta haña cu e sesion di studio ta bira un tereno di entrenamentu pa demostrá pacenshi cristian i otro fruta di spiritu.”—Galationan 5:22, 23; Filipensenan 2:4.

Sea prepará pa adaptá na bo yunan su diferente abilidadnan i nivel di crecementu. Simon i Mark, cu awor ta tiener, a haña cu tempu nan tabata mas yong, nan a disfrutá mashá di studia e buki E homber mas importante cu hamás a biba cu nan mayornan. “Nos tata tabata laga nos actua e diferente partinan mescos cu un obra teatral,” nan ta corda. Nan tata ta corda con e tabata cai riba su mannan i rudia pa actua e comparacion dje bon samaritano cu su yunan. (Lucas 10:30-35) “Tabata algu real i hopi dushi.”

Hopi mucha ta resistí e rutina di un studio di famia. Esaki mester stop mayornan di conducí e studio na e ora planeá? No, sigur cu no. “Bobedad ta mará na curason di mucha homber [of, mucha muher],” Proverbionan 22:15 ta reconocé. Un mama soltero a pensa cu e tabata fayando como conductor dje studio di famia ora, na hopi ocasion, distraicionnan a parce di interumpí e studio. Pero el a perseverá. Awor su yunan tin hopi respet p’e i nan a bin apreciá e amor i interes cu el a demostrá dor di persistí den conducí un studio di famia regular.

Yudando Mucha Homber i Mucha Muher “Huérfano di Tata”

Ancianonan cristian tin cu “pastoreá e tou di Dios.” (1 Pedro 5:2, 3) Bishitanan periódico n’e famianan den nan congregacion ta duna nan oportunidad pa encomendá mayornan cu ta carga nan responsabilidadnan cristian. Riba ken su scouder e responsabilidad pa siña e yunan di mayornan soltero ta sinta? Nunca lubidá cu e responsabilidad pa instruí e yunan ta sinta cerca e mayor.

Prudencia cristian lo yuda ancianonan evitá situacionnan comprometedor cu por presentá si nan asumí e papel di un mayor cu ta haci falta. Aunke dos ruman homber lo por bishitá un ruman muher cristian cu ta un mayor soltero, nan lo ta semper cauteloso den e yudansa cu nan ta duna pa cu e areglo di studio di famia. De bes en cuando, un invitacion p’e yunan (i, claro, e mayor soltero tambe) djoin e anciano su mes studio di famia por resultá di ta edificante i práctico. Sin embargo, nunca lubidá cu Jehova ta nos gran Tata celestial. E sigur ta presente pa guia i yuda e mama ora e ta conducí un studio cu su yunan, aunke e mama ta haci esei su so.

Kico dje situacion caminda un persona yong tin inclinacion spiritual, pero su mayornan ta manifestá poco of ningun interes den nan responsabilidadnan spiritual? Nunca Jehova su sirbidónan fiel mester bira desanimá. “Na bo [Jehova Dios] esun desafortuná, e huérfano di tata, ta confia su mes,” e salmista a canta. “Bo mes a bira su yudante.” (Salmo 10:14) Na nan turno, ancianonan amoroso den e congregacion lo haci nan best pa animá e mayornan segun cu nan ta percurá pa nan yunan. Nan por sugerí e famia pa tene un consideracion di famia anto asistí pa duna algun sugerencia práctico riba con pa studia huntu. Claro cu nan lo no kita e responsabilidad dje mayornan, riba kende su scouder e responsabilidad ta cai bíblicamente.

Yunan kende nan mayornan no ta aceptá e fe mester di hopi apoyo. Por ta beneficioso pa incluí nan den bo studio di famia si esei ta aceptabel pa nan mayornan. Robert, awor un homber grandi cu su mes famia, tabata asistí na reunionnan cristian cu su mayornan tempu cu e tabatin tres aña so. E tabatin grato recuerdo dje reunionnan ei asta despues cu su mayornan a stop di asociá cu e congregacion cristian. Ora e tabatin dies aña, el a topa un mucha homber Testigo cu a bai e reunionnan cuné. Gustosamente e mayornan dje mucha homber Testigo a tuma Robert bou di nan hala como un huérfano spiritual i despues a studia cuné. Danki n’e cuido amoroso aki, el a progresá rápidamente i awor ta sirbiendo cu goso como anciano den e congregacion.

Asta ora mayornan ta oponé e progreso di nan yunan, e yunan no ta nan so. Jehova ta keda un fiel Tata celestial. “Tata di huérfanonan di tata . . . ta Dios den su habitacion santu,” Salmo 68:5 ta declará. Mucha homber i muhernan cu den sentido bíblico no tin tata sa cu nan por acudí na dje den oracion, i lo e sostené nan. (Salmo 55:22; 146:9) Jehova su organisacion semehante na mama ta cumpli diligentemente cu su responsabilidad di prepará cuminda spiritual deleitabel cu ta ser sirbí atrabes di su publicacionnan i n’e reunionnan dje mas cu 85.000 congregacion cristian rond mundu. Pues, cu yudansa spiritual di nos Tata, Jehova, i su organisacion semehante na mama, asta e “huérfano di tata” lo disfrutá di un cierto grado di studio di Bijbel.

Mayornan cristian cu ta conducí studio di Bijbel regular cu nan yunan ta merecé encomendacion. Mayornan soltero cu ta perseverá den entrená nan yunan chikitu den e camindanan di Jehova merecé atencion special i elogio pa nan esfuersonan. (Proverbionan 22:6) Tur cu ta mustra interes den yunan cu den sentido spiritual ta sin tata sa cu esaki ta agradá nos Tata celestial, Jehova. Pa percurá p’e necesidadnan spiritual di un famia ta un responsabilidad pisá. Pero ‘no entregá, pasobra n’e debido tempu lo bo cosechá si bo no cansa.’—Galationan 6:9.

[Nota]

[Plachi na página 23]

Un studio di famia ta percurá un excelente oportunidad p’e miembronan mas yong di famia compartí nan preocupacionnan cu nan mayornan

[Rekonosementu pa Potrèt na página 20]

Harper’s