Studia e Palabra di Dios Regularmente Como Famia
“Hende mester biba, no di pan so, sino di tur expresion cu ta sali for dje boca di Jehova.”—MATEO 4:4.
1. Kico Bijbel ta bisa tocante e responsabilidad di cabesnan di famia pa siña nan yunan Jehova su camindanan?
NA VARIOS ocasion Jehova Dios a recordá cabesnan di famia di nan responsabilidad pa siña nan yunan. E instruccion ei lo ekipá yunan p’e bida actual i tambe lo por yuda prepará nan p’e bida cu ta bini. Un angel cu a representá Dios a mustra Abraham riba su responsabilidad pa instruí su famia di manera cu nan por a “warda e caminda di Jehova.” (Génesis 18:19) Bijbel a manda mayornan israelita splica nan yunan con Dios a libra Israel for di Egipto i con el a duna nan su Ley na ceru Sínai, na Horeb. (Exodo 13:8, 9; Deuteronomio 4:9, 10; 11:18-21) Bijbel ta spierta cabesnan di famia cristian pa lanta nan yunan “den e disiplina i reglamentu mental di Jehova.” (Efesionan 6:4) Asta ora ta un mayor so ta sirbi Jehova, e mester haci esfuerso pa siña e yunan Jehova su camindanan.—2 Timoteo 1:5; 3:14, 15.
2. Studio di famia ta necesario si no tin yu den cas? Splica.
2 Esaki no ta nificá cu studia e Palabra di Dios como famia ta solamente pa casnan di famia caminda tin yu. Ora un esposo i esposa tin un studio di famia, asta si no tin yu den cas, esaki ta mustra un aprecio excelente pa cosnan spiritual.—Efesionan 5:25, 26.
3. Pakico ta importante pa tene e studio di famia regularmente?
3 Pa logra e mihó resultado, mester duna instruccion cu regularidad, na armonia cu e les cu Jehova a siña Israel den e desierto: “Hende no ta biba di pan so, sino di tur expresion cu ta sali for di boca di Jehova hende ta biba.” (Deuteronomio 8:3) Dependiendo dje circunstancianan dje famia, kisas algun famia ta haci areglo pa un studio semanal; otronan kisas tin sesionnan di studio mas corticu riba un base diario. Sea cual sea e areglo cu bo scoge, no laga e studio pa casualidad. ‘Cumpra tempu’ p’e. E prijs cu bo tin cu paga p’e tempu ei ta un inversion sano. Bida dje miembronan di bo famia ta den wega.—Efesionan 5:15-17; Filipensenan 3:16.
Metanan pa Tene na Mente
4, 5. (a) Mediante Moises, kico Jehova a pone dilanti mayornan como un meta importante den siña nan yunan? (b) Kico esei ta encerá awe?
4 Ora bo ta conducí e studio di famia, si bo tin metanan claramente definí na mente, esei lo surti un mihó efecto. Considerá un par di posibilidad.
5 Na cada studio, busca manera pa edificá amor pa Jehova Dios. Tempu Israel tabata congregá riba e yanura di Moab, promé cu nan a drenta e Tera Primintí, Moises a dirigí nan atencion riba loke Jesucristo lo a identificá despues como “e mandamentu mas grandi dje Ley.” Kico esei tabata? “Bo tin cu stima Jehova bo Dios cu henter bo curason i cu henter bo alma i cu henter bo forsa vital.” (Mateo 22:36, 37; Deuteronomio 6:5) Moises a urgi e israelitanan pa graba esaki den nan mes curason i pa siñ’é na nan yunan. Esei lo a rekerí ripiticion, hala atencion na motibunan pa stima Jehova, trata cu actitud i conducta cu lo por a stroba expresion dje amor ei, i demostrá amor pa Jehova den nan mes bida. Nos yunan tin mester dje mésun tipo di instruccion ei? Sí! I nan tambe mester di yudansa pa ‘circuncidá nan curason,’ esta, eliminá tur cos cu lo stroba nan amor pa Dios. (Deuteronomio 10:12, 16; Jeremías 4:4) Entre e strobansanan ei por tin un deseo pa cos di mundu i pa oportunidadnan pa keda absorbá den su actividadnan. (1 Juan 2:15, 16) Amor pa Jehova mester ta activo, expresivo, i mester impulsá nos pa haci e cosnan cu ta agradá nos Tata celestial. (1 Juan 5:3) Pa bo studio di famia por tin beneficio riba término largu, bo mester conducí tur sesion den un manera cu ta fortalecé e amor aki.
6. (a) Kico ta necesario pa por duna conocimentu exacto? (b) Con e Scritura ta enfatisá e importancia di conocimentu exacto?
6 Duna conocimentu exacto dje rekisitonan di Dios. Kico esei ta encerá? E ta encerá mas cu djis por lesa un contesta for di un revista of un buki. Generalmente e ta rekerí pa papia tocante e informacion pa haci sigur cu e yunan ta comprendé palabranan clave i ideanan principal claramente. Conocimentu exacto ta un factor vital pa bisti e personalidad nobo, pa mantené e enfoke riba e cosnan realmente importante ora di trata cu problema den bida i pues, pa haci loke berdaderamente ta agradá Dios.—Filipensenan 1:9-11; Colosensenan 1:9, 10; 3:10.
7. (a) Ki preguntanan lo por usa pa yuda e famia haci aplicacion práctico dje material di studio? (b) Con e Scritura ta enfatisá e balor di un meta asina?
7 Yuda nan haci aplicacion práctico di loke nan siña. Cu e meta aki na mente, durante cada studio di famia, puntra: ‘Ki efecto e material aki mester tin riba nos bida? E ta rekerí pa nos cambia loke nos ta haci actualmente? Pakico nos lo kier haci ahuste?’ (Proverbionan 2:10-15; 9:10; Isaías 48:17, 18) Si nos duna suficiente atencion n’e aplicacion práctico di cosnan siñá, esei por ta un factor importante den e crecementu spiritual di miembronan di famia.
Usa Hermentnan pa Siña na un Manera Sabí
8. Ki hermentnan pa studia Bijbel e clase di esclabo a percurá?
8 “E esclabo fiel i discreto” a percurá un abundancia di herment cu nos por usa pa studia. E revista Toren di Vigilancia, pa usa huntu cu Bijbel, ta disponibel den 131 idioma. Tin buki pa studia Bijbel den 153 idioma, foyeto den 284, audiocaset den 61, videocaset den 41, asta un programa di computer pa investigacion bíblico na 9 idioma!—Mateo 24:45-47.
9. Con nos lo por aplicá e conseho dje textonan mencioná den e paragraf aki ora nos ta studia E Toren di Vigilancia como famia?
9 Hopi cas ta usa e periodo di studio di famia pa prepará p’e Studio di Toren di Vigilancia di congregacion. Esta probechoso esei por ta! E Toren di Vigilancia ta contené e alimento spiritual principal cu ta ser percurá pa edificá Jehova su pueblo rond mundu. Ora boso ta studia E Toren di Vigilancia como famia, haci mas cu djis lesa paragraf i contestá e preguntanan imprimí. Haci esfuerso diligente pa comprendé nan. Tuma tempu pa busca e textonan cu ta ser mencioná pero no citá. Invitá miembronan di famia pa comentá riba con esakinan ta relacioná cu loke e paragraf ta bisa. Hinca nan curason aden.—Proverbionan 4:7, 23; Echonan 17:11.
10. Kico bo por haci pa enbolbé e yunan den e studio i pa hacié un ora deleitabel pa nan?
10 Si tin yu den bo famia, kico bo por haci pa no laga boso studio bira djis un rutina di famia, sino un ora edificante, interesante i felis? Haci esfuerso pa enbolbé cada miembro den un manera apropiado, di manera cu e atencion ta keda enfocá riba e material di studio. Caminda ta posibel, haci areglo pa cada yu tin su mes Bijbel i revista di studio. Un mayor por imitá e calor di amistad cu Jesus a desplegá dor di laga un yu chikitu sinta pegá-pegá cuné, tal bes cu su brasa rond dje chikitin. (Compará cu Marco 10:13-16.) Un cabes di famia lo por laga un yu chikitu splica un plachi cu ta aparecé huntu cu e material di studio. Por asigná adelantá un yu un tiki mas grandi pa lesa un cierto texto. Por asigná unu mas grandi pa mencioná oportunidadnan caminda por haci aplicacion práctico dje material di studio.
11. Ki otro hermentnan di siñansa a ser percurá, i caminda esakinan ta disponibel, con lo por usa nan den un manera beneficioso en coneccion cu e studio di famia?
11 Aunke kisas bo ta usando E Toren di Vigilancia como base pa bo consideracion, no lubidá e otro hermentnan di studio cu ta disponibel den hopi idioma. Si bo tin mester di mas informacion of splicacion di un expresion bíblico, Perspicacia para comprender las Escrituras por percurá esei. Por contestá otro preguntanan dor di consultá e Índice de las publicaciones Watch Tower of dor di usa e programa di computer pa investigacion bíblico cu Sociedad a percurá. Siña con pa usa e hermentnan aki, si nan ta disponibel den bo idioma, por ta un parti balioso di studio di famia. Cu e meta pa stimulá e interes di esnan chikitu, tambe bo por apartá parti di bo ora di studio pa wak pida dje videonan instructivo di Sociedad of pa scucha un seccion di un drama riba audiocaset i despues papia over di dje. Bon uso dje hermentnan aki di studio por yuda haci bo studio di famia interesante i beneficioso pa henter e famia.
Adaptá n’e Necesidadnan di Bo Famia
12. Con e studio di famia por hunga un rol den trata cu e necesidadnan urgente di famia?
12 Podisé bo famia generalmente ta studia e les di Toren di Vigilancia p’e siman. Pero soru pa bo ta na haltura di loke ta pasa den bo famia. Si e mama no tin trabou seglar, lo e por dedicá tempu n’e yunan tur dia ora nan bini cas for di scol. E ora ei e por trata algun situacion; otro situacion podisé tin mester di mas atencion. Ora tin necesidadnan urgente di famia, no ignorá nan. (Proverbionan 27:12) Esakinan lo por encerá no solamente problema na scol sino tambe otro situacionnan. Scoge material apropiado, i notificá e famia adelantá tocante kico lo bai studia.
13. Pakico consideracion den famia tocante con pa lucha cu pobresa por ta beneficioso?
13 Un ehempel. Gran parti dje tera ta den gara di pobresa; p’esei den hopi lugá lo por ta necesario pa papia tocante con pa lucha cuné. Un studio di famia cu ta enfocá riba situacionnan di bida real i principionan bíblico lo ta probechoso pa bo famia?—Proverbionan 21:5; Eclesiástes 9:11; Hebreonan 13:5, 6, 18.
14. Ki situacionnan lo por haci consideracion den famia di Jehova su punto di bista di violencia, guera, i neutralidad cristian oportuno?
14 Un otro tema cu famia tin cu papia over di dje ta violencia. Nos tur mester tin Jehova su punto di bista firmemente grabá den nos mente i curason. (Génesis 6:13; Salmo 11:5) Studio di famia riba e tema aki por percurá un foro pa discutí con pa trata cu mucha abusador na scol, si ta bon pa practicá arte marcial of no, i con pa scoge entretenimentu apropiado. Conflictonan violento a bira algu comun; guera civil, conflicto político of étnico of guera di gèng ta plaga casi tur pais. Como resultado, lo bo tin cu considerá den famia con pa mantené conducta cristian ora nos haña nos meimei di faccionnan cu ta na conflicto cu otro.—Isaías 2:2-4; Juan 17:16.
15. Con mester duna instruccion tocante sex i matrimonio na yunan?
15 Segun cu yunan ta crece, nan tin mester di instruccion apropiado pa nan edad tocante sex i matrimonio. Den algun cultura, mayoria mayor no sa papia mes tocante sex cu nan yunan. Yunan no-informá lo por haña punto di bista trocí for di otro hóbennan, i e resultado por ta desastroso. Lo no ta mihó pa imitá Jehova, kende ta duna conseho franco pero cu tacto riba e asuntu aki den Bijbel? Conseho di Dios lo yuda nos yunan mantené respet propio i trata esnan di sexo opuesto cu dignidad. (Proverbionan 5:18-20; Colosensenan 3:5; 1 Tesalonicensenan 4:3-8) Asta si bo a trata e asuntunan aki caba, no vacilá pa hacié atrobe. Segun cu situacionnan nobo ta surgi, ripiticion ta vital.
16. (a) Den vários cas, ki ora e famia ta studia? (b) Con abo a trata cu obstáculo pa asina boso por tin un studio di famia regular?
16 Ki ora por tene e studio di famia? Hopi cas ta imitá famianan di Betel rond mundu i nan ta programá nan studio di famia riba dialuna anochi. Pa otronan esei ta diferente. Na Argentina un famia di 11 miembro, cu tin 9 yu, tabata lanta cinc’or tur mainta pa tene nan studio di famia. Pa motibu di nan orarionan variá di trabou, otro ora no tabata posibel. No tabata fácil, pero el a graba den mente i curason dje yunan e importancia di studio di famia. Na Filipínas, un anciano tabatin un studio di famia regular cu su esposa i nan tres yunan segun cu nan tabata creciendo. Durante siman tambe e mayornan tabatin studio personal cu cada un dje yunan di manera cu cada un por a haci e berdad di su mes. Na Merca, un ruman muher kende su casá no ta Testigo, ta compañá su yunan tur mainta bai coge bus di scol. Miéntras nan ta warda riba e bus, nan ta dedicá rond di dies minuut huntu pa lesa i considerá material apropiado di studio basá riba e Scritura. Despues e mama ta haci un oracion corticu promé cu e yunan drenta bus. Na República Democrático di Congo, un señora kende su casá incrédulo a bai laga e famia, tin cu haci hopi esfuerso pa studia pa motibu di su educacion limitá. Su yu homber adulto ta yud’é dor di bishitá e famia tur siman pa hiba delantera den un studio cu e ta conducí cu su mama i rumannan mas chikitu. E mama ta pone un bon ehempel dor di su preparacion diligente. Tin algun situacion cu ta haci studio regular di famia difícil den bo cas? No entregá. Pidi Jehova sinceramente p’e bendicioná bo esfuersonan pa tene un studio di Bijbel regular.—Marco 11:23, 24.
Recompensanan di Perseverancia
17. (a) Kico ta necesario pa por tin un studio di famia regular? (b) Ki experencia ta ilustrá e balor di instruccion regular den famia di Jehova su camindanan?
17 Planificacion ta necesario. Perseverancia ta necesario. Pero e beneficionan cu ta bini for di un studio regular di famia ta bale la pena. (Proverbionan 22:6; 3 Juan 4) Franz i Hilda di Alemania, a lanta un famia di 11 yu. Añanan despues, nan yu muher Magdalena a bisa: “Loke mi ta considerá di mayor importancia awe ta cu no a pasa ni un solo dia sin cu nos a ricibí algun instruccion spiritual.” Ora e spiritu di nacionalismo a bira intenso bou di Adolf Hitler, Magdalena su tata tabata usa Bijbel pa prepará su famia p’e pruebanan cu el a realisá cu tabata na caminda. Cu tempu, autoridadnan a bai cu e miembronan di famia mas hóben i a hiba nan un scol reformatorio; a arestá otro miembronan dje famia i cera nan den prizon i camponan di concentracion. Algun a ser ehecutá. E fe di nan tur a permanecé firme—no solamente durante e tempu ei di persecucion cruel, sino tambe, p’e sobrebibientenan, durante e añanan cu a sigui.
18. Con e esfuersonan di mayornan soltero a ser recompensá?
18 Hopi mayor soltero, i tambe esnan kende nan casá no ta Testigo, tambe a duna nan yunan instruccion bíblico regularmente. Na India, un mama soltero, kende ta un biuda, a traha duru pa inculcá amor pa Jehova den su dos yunan. Sin embargo, su curason a kibra ora su yu homber a stop di asociá cu e pueblo di Jehova. El a roga Jehova pa pordon’é pa cualkier fayo cu el a cometé den entrenamentu di su yu. Pero e yu no a lubidá realmente loke el a siña. Despues di mas cu un década, el a bini bek, el a haci bon progreso spiritual, i a bira anciano di congregacion. Awor e cu su esposa ta sirbi como ministernan pionero di tempu completo. Mayornan cu a tuma na pechu e conseho di Jehova i di su organisacion pa duna instruccion bíblico regularmente den e círculo di famia awor ta hopi gradicidu! Abo ta aplicando e conseho ei den bo famia?
Bo Por Splica?
◻ Pakico studio regular di famia ta importante?
◻ Kico mester ta nos metanan durante cada studio di famia?
◻ Ki hermentnan di siñansa nos tin?
◻ Con por adaptá e studio na necesidadnan dje famia?
[Plachi na página 15]
Metanan definí lo mehorá bo studio di famia