Bo Tin “un Curason Obediente”?

ORA Sálomon a bira rey di Israel di antigwedad, el a pensa cu e no tabata capas. P’esei el a pidi Dios sabiduria i conocimentu. (2 Crónicanan 1:10) Tambe, Sálomon a pidi den oracion: “Bo tin cu duna bo sirbidó un curason obediente pa husga bo pueblo.” (1 Reynan 3:9) Si Sálomon tabatin “un curason obediente,” e lo a sigui ley i principionan divino i asina experenciá Jehova su bendicion.

Un curason obediente no ta un carga, sino un fuente di goso. Apostel Juan a skirbi: “Esaki ta loke e amor di Dios ta nificá, cu nos ta warda su mandamentunan; i tog su mandamentunan no ta un carga pisá.” (1 Juan 5:3) Sí, nos mester obedecé Dios. Al fin i al cabo, Jehova ta nos Magnífico Creador. Na dje e tera i tur loke tin riba dje ta pertenecé, asta tur oro i plata. Pues aunke Dios ta permití nos usa nos medionan financiero pa expresá nos amor p’e, nos no por ègt duna Dios nada material. (1 Crónicanan 29:14) Jehova ta verwagt pa nos stim’é i pa nos cana cuné humildemente, haciendo su boluntad.—Mikéas 6:8.

Ora nan a puntra Jesucristo cua ta e mandamentu mas grandi dje Ley, el a bisa: “Bo tin cu stima Jehova bo Dios cu henter bo curason i cu henter bo alma i cu henter bo mente. Esaki ta e mandamentu mas grandi i esun primario.” (Mateo 22:36-38) Un manera pa expresá e clase di amor ei ta dor di obedecé Dios. P’esei nos cada un mester pidi Jehova den oracion pa un curason obediente.

Nan Tabatin un Curason Obediente

Bijbel ta abundá cu ehempel di hendenan cu tabatin un curason obediente. Por ehempel, Jehova a manda Noe construí un arca inmenso pa conserbá bida. Esaki tabata un tarea enorme cu a tuma un 40 pa 50 aña. Asta si a usa e instrumentonan eléctrico moderno i otro ekiponan cu ta disponibel awe, edificá un structura inmenso asina cu por a flota, lo tabata un hazaña di ingenieria. Ademas, Noe tabatin cu spierta hendenan cu sin duda a tene mofa di dje i cu a ridiculis’é. Pero el a obedecé te den e mínimo detaye. Bijbel ta bisa: “El a haci precisamente asina.” (Génesis 6:9, 22; 2 Pedro 2:5) Noe a mustra su amor pa Jehova mediante su fiel obedencia pa hopi aña. Ki un excelente ehempel pa nos tur!

Considerá tambe, e patriarca Abraham. Dios a mand’é muda for di e lugá próspero di Ur di caldeonan pa un tera desconocí. Abraham a obedecé sin haci pregunta. (Hebreonan 11:8) P’e resto di su bida, e i su famia a biba den tent. Despues di tabata hopi aña stranhero den e pais, Jehova a bendicioná e i su esposa obediente, Sara, cu un yu homber yamá Isaac. Cuantu Abraham, di 100 aña di edad, mester a stima su yu di su behes! Algun aña despues, Jehova a pidi Abraham pa sacrificá Isaac como ofrenda kimá. (Génesis 22:1, 2) Djis pensa pa haci esei, mester a haci Abraham dolor. No obstante, el a procedé na obedecé pasobra el a stima Jehova i e tabatin fe cu e simia primintí lo a bini mediante Isaac, asta si Dios mester a lant’é for di morto. (Hebreonan 11:17-19) Sin embargo, ora Abraham tabata cerca di mata su yu, Jehova a stop e i a bis’é: “Awor mi sa di berdad cu bo ta temeroso di Dios, siendo cu bo no a nengá mi bo yu, bo único.” (Génesis 22:12) Pa motibu di su obedencia, Abraham temeroso di Dios, a bira conocí como “amigu di Jehova.”—Santiago 2:23.

Jesucristo ta nos mihó ehempel di obedencia. Durante su existencia prehumano, e tabatin goso den sirbi su Tata den shelu obedientemente. (Proverbionan 8:22-31) Como hende, Jesus a obedecé Jehova den tur cos, semper teniendo un goso den haci su boluntad. (Salmo 40:8; Hebreonan 10:9) P’esei, Jesus por a bisa cu tur sinceridad: “Mi no ta haci nada di mi mes iniciativa; sino mescos cu e Tata a siñá mi, mi ta papia e cosnan aki. I esun cu a mandá mi ta cu mi; e no a lagá mi so, pasobra semper mi ta haci e cosnan cu ta agrad’é.” (Juan 8:28, 29) Finalmente, pa vindicá Jehova su soberania i rescatá humanidad obediente, boluntariamente Jesus a duna su bida, sufriendo un morto sumamente humiyante i doloroso. Sí, “ora el a haña su mes manera hende, el a humiyá su mes i a bira obediente te na morto, sí, morto riba un staca di tormento.” (Filipensenan 2:8) Ki un ehempel di desplegá un curason obediente!

Obedencia Parcial No Ta Suficiente

No ta tur hende cu a pretendé di obedecé Dios a ègt obedec’é. Considerá rey Saul di Israel di antigwedad. Jehova a dun’é instruccion pa exterminá e amalekitanan malbado. (1 Samuel 15:1-3) Aunke Saul a destruí nan como nacion, el a spar nan rey i a laga na bida algun di nan carné cu baca. Samuel a puntr’é: “Pakico bo no a obedecé e bos di Jehova?” Como contesta Saul a bisa: “Pero mi a obedecé e bos di Jehova . . . E pueblo [di Israel] a cuminsá tuma carné cu baca dje botin, e mihónan . . . , pa haci sacrificio na Jehova.” Enfatisando e necesidad pa desplegá pleno obedencia, Samuel a contestá: “Jehova tin mes tantu deleite den ofrendanan kimá i sacrificionan cu den obedecé e bos di Jehova? Mira! Obedecé ta mihó cu un sacrificio, presta atencion cu e sebu di chubat’i carné; pasobra rebeldia ta mescos cu e picá di divinacion, i pusha bai dilanti presuntuosamente ta mescos cu usa poder mágico i terafim. Siendo cu bo a rechasá e palabra di Jehova, conforme cu esei e ta rechasá bo como rey.” (1 Samuel 15:17-23) Cuantu Saul a perde pa motibu cu e no tabatin un curason obediente!

Asta sabí Rey Sálomon, cu a pidi den oracion pa un curason obediente, no a sigui obedecé Jehova. Contrario cu e boluntad di Dios, el a casa cu muhernan stranhero cu a pon’é peca contra Dios. (Nehemías 13:23, 26) Sálomon a perde aprobacion divino pasobra e no a sigui mantené un curason obediente. Ki un spiertamentu esaki ta pa nos!

Esaki no ta nificá cu Jehova ta rekerí perfeccion for di su sirbidónan humano. E ‘ta corda cu nos ta stof.’ (Salmo 103:14) Nos tur sigur ta cometé fayo de bes en cuando, pero Dios por mira si nos ègt tin un deseo di curason pa agrad’é. (2 Crónicanan 16:9) Si nos faya debí na imperfeccion, pero nos repentí, nos por pidi pordon a base dje sacrificio di rescate di Cristo, cu e confiansa cu Jehova lo “pordoná den un gran manera.” (Isaías 55:7; 1 Juan 2:1, 2) Tambe nos lo por tin mester dje yudansa di ancianonan cristian amoroso pa nos por recuperá spiritualmente i logra un fe saludabel i un curason obediente.—Tito 2:2; Santiago 5:13-15.

Con Completo Bo Obedencia Ta?

Como Jehova su sirbidó, sin duda mayoria di nos ta pensa cu nos tin un curason obediente. Nos por razoná: Ata mi ta participá den e trabou di predicá e Reino? Mi no ta para firme ora cuestionnan serio manera esun di neutralidad surgi? I mi no ta asistí regularmente na reunionnan cristian, manera apostel Pablo a urgi? (Mateo 24:14; 28:19, 20; Juan 17:16; Hebreonan 10:24, 25) Ta cierto cu, como grupo, Testigonan di Jehova ta desplegá un obedencia di curason den asuntunan importante asina.

Pero kico di nos conducta pa cu asuntunan di tur dia, cosnan cu kisas ta parce chikitu? Jesus a bisa: “E persona fiel den loke ta mínimo ta fiel tambe den loke ta hopi, i e persona inhustu den lo mínimo ta inhustu tambe den loke ta hopi.” (Lucas 16:10) P’esei lo ta bon pa cada un di nos haci nos mes e pregunta: Mi tin un curason obediente ora ta trata di cosnan chikitu of di asuntunan cu otro hende ni sikiera sa di dje?

E salmista a mustra cu asta den su cas, unda otro hende no ta mir’é, el ‘a cana den e integridad di su curason.’ (Salmo 101:2) Sintá den bo cas, kisas bo ta cende bo television i ta cuminsá wak un película. N’e momento ei mes, bo obedencia por ser poní na prueba. Tal bes e película ta cuminsá bira inmoral. Lo bo sigui wak, cu e excuus cu ta esaki ta e clase di películanan cu nan ta pasa awendia? Of bo curason obediente lo impulsá bo pa cumpli cu e mandato bíblico pa ‘no laga fornicacion i impuresa ni sikiera ser mencioná entre boso’? (Efesionan 5:3-5) Lo bo paga e television asta si e película ta interesante? Si un programa bira violento, lo bo cambia e canal? E salmista a canta: “Jehova mes ta examiná e hustu i tambe e malbado, i cualkier persona cu ta stima violencia, Su alma ta odia sigur.”—Salmo 11:5.

Un Curason Obediente Ta Trece Bendicion

Naturalmente, tin hopi área den cua nos por examiná nos mes bon, pa mira si nos ta ègt obedecé Dios di curason. Nos amor pa Jehova mester impulsá nos pa agrad’é i pa haci loke e ta bisa nos den su Palabra, Bijbel. Un curason obediente lo yuda nos mantené un bon relacion cu Jehova. Sí, si nos obedencia ta completo, ‘e dichonan di nos boca i e meditacion di nos curason lo bira agradabel dilanti Jehova.’—Salmo 19:14.

Dor cu Jehova ta stima nos, e ta siña nos obedec’é pa nos mes bon. I nos ta beneficiá nos mes mashá dor di pone pleno atencion na siñansa divino. (Isaías 48:17, 18) P’esei laga nos aceptá cu gustu e yudansa cu nos Tata celestial ta percurá mediante su Palabra, su spiritu i su organisacion. Nos ta ser siñá asina bon cu ta como si fuera nos ta tende un bos nos tras cu ta bisa: “Esaki ta e caminda. Boso cana den dje.” (Isaías 30:21) Segun Jehova ta siña nos mediante Bijbel, publicacionnan cristian i reunionnan di congregacion, laga nos presta atencion, aplicá loke nos ta siña i ser “obediente den tur cos.”—2 Corintionan 2:9.

Un curason obediente lo hiba na goso i hopi bendicion. Lo e duna nos pas mental, ya cu nos sa cu nos ta agradá Jehova Dios i ta alegrá su curason. (Proverbionan 27:11) Un curason obediente lo protehá nos ora nos ta ser tentá pa haci loke ta malu. E ora ei, sigur-sigur nos mester obedecé nos Tata celestial i pidi den oracion: “Duna bo sirbidó un curason obediente.”

[Rekonosementu pa Potrèt na página 29]

For di Self-Pronouncing Edition of the Holy Bible, cu ta contené e versionnan King James i Revised