Yuda Otro Hende Bira “Obedesidu di Kurason”
1 Obedensia ta fundamental pa adorá Yehova aseptablemente. (Deu. 12:28; 1 Ped. 1:14-16) Pronto, Dios su huisio lo bin riba ‘esnan ku no konosé Dios i esnan ku no ta obedesé e evangelio.’ (2 Tes. 1:8) Kon nos por yuda otro hende bira “obedesidu di kurason” na e siñansanan di e Palabra di Dios?—Rom. 6:17.
2 Dor di Yuda Nan Edifiká Fe i Amor: Den e Skritura, obedensia ta estrechamente ligá ku fe. Apòstel Pablo a papia di ‘e mandamentu di e Dios eterno pa promové obedensia dor di fe.’ (Rom. 16:26) Hebreonan kapítulo 11 ta menshoná vários ehèmpel di fe, i hopi di nan a enserá ku e personanan a aktua na armonia ku Yehova su boluntat ku el a ekspresá. (Heb. 11:7, 8, 17) Di otro banda, desobedensia ta ser ligá ku inkredulidat òf falta di fe. (Juan 3:36; Heb. 3:18, 19) Nos tin ku siña usa e Palabra di Dios na un manera ábil afin di por yuda otro hende kultivá e klase di fe ku ta produsí obedensia.—2 Tim. 2:15; Sant. 2:14, 17.
3 Obedensia ta ligá tambe ku amor pa Dios. (Deu. 5:10; 11:1, 22; 30:16) Segun 1 Juan 5:3: “Esaki ta e amor di Dios, ku nos ta warda su mandamentunan; i su mandamentunan no ta pisá.” Kon nos por yuda studiantenan di Beibel kultivá amor pa Yehova? Buska oportunidatnan durante e estudio pa edifiká apresio pa e kualidatnan di Yehova. Ekspresá bo propio sintimentunan profundo pa Dios. Yuda e studiante pensa riba kultivá un amistat personal ku Yehova. Mas ku kualke otro kos, ta amor pa Yehova lo motivá otro hende—i tambe nos mes—pa obedes’é di kurason.—Mat. 22:37.
4 Mediante Nos Ehèmpel: Un manera poderoso ku nos por enkurashá otro hende pa obedesé e bon nobo ta mediante nos ehèmpel. Sin embargo di nos parti, nos tin ku hasi esfuerso konstante pa kultivá “un kurason obedesidu.” (1 Rei. 3:9, NW; Pro. 4:23) Kiko asina nos tin ku hasi? Alimentá bo kurason dor di studia Beibel i asistí na reunion ku regularidat. (Sal. 1:1, 2; Heb. 10:24, 25) Buska asosiashon ku hende kende nan kurason ta uní den adorashon berdadero. (Pro. 13:20) Sali regularmente den sirbishi di vèlt, ku un deseo sinsero pa yuda hende den bo teritorio. Pidi Yehova su yudansa pa guia bo esfuerso pa kultivá un bon kurason. (Sal. 86:11) Evitá kosnan ku por korumpí bo kurason, manera dibertishon inmoral òf violento. Sigui tras di kosnan ku ta hala bo mas serka di Dios i ku ta fortalesé bo relashon kuné.—Sant. 4:7, 8.
5 Yehova a sigurá su pueblo di antigwedat ku bendishon lo a alkansá nan si nan obedesé su bos. (Deu. 28:1, 2) Awe tambe ta meskos, Yehova ta bendishoná rikamente “esnan ku ta obedes’é.” (Echo. 5:32) P’esei, mediante nos siñansa i ehèmpel, laga nos yuda otro hende bira obedesidu di kurason.
[Study Questions]
1. Kiko Yehova ta rekerí di su adoradónan?
2. Dikon ta importante pa yuda otro hende edifiká fe firme?
3. (a) Kon obedensia ta ligá ku amor? (b) Kon nos por yuda studiantenan di Beibel kultivá amor pa Yehova?
4. (a) Dikon nos ehèmpel ta importante? (b) Kiko nos mester hasi pa kultivá “un kurason obedesidu”?
5. Kon hende obedesidu ta ser bendishoná?