Inhusticia Ta Inevitabel?

“Apesar di tur cos, tog te ainda mi ta kere cu hende tin bon curason si. Simplemente mi no por edificá mi speransa riba un fundeshi cu ta consistí di confusion, miseria i morto.”—Anne Frank.

ANNE FRANK, un hobencita hudiu di 15 aña, a skirbi e palabranan conmovedor ei den su dagboek poco tempu promé cu su morto. Pa mas cu dos aña, su famia tabata scondí den un zolder na Amsterdam. Su speransa pa un mihó mundu a ser desbaratá ora un persona a traicioná nan, informando e nazinan di nan paradero. E siguiente aña, na 1945, Anne a muri di tífus den e campo di concentracion Bergen-Belsen. Seis miyon hudiu mas a core e mésun suerte.

Hitler su plan diabólico pa exterminá un pueblo completo kisas ta e pió caso di inhusticia racial cu nos siglo a conocé, pero e no ta e único. Na 1994, mas cu mei miyon tutsi a ser masacrá na Ruanda, djis pasobra nan tabata pertenecé n’e tribu “robes.” I durante promé guera mundial, rond di un miyon armenio a muri den un purificacion étnico.

E Caranan Cruel di Inhusticia

Genocidio no ta e único cara di inhusticia. Inhusticia social ta condená rond di un kinta parti dje rasa humano na un bida largu di pobresa aplastante. Pió ainda, e grupo pro derecho humano Anti-Slavery International ta calculá cu tin mas di 200.000.000 hende den sclabitud. Posiblemente tin mas catibu na mundu awe cu na cualkier otro tempu den historia. Kisas nan no ta ser bendé na findishi público, pero hopi bes nan condicionnan di trabou ta pió cu esnan di mayoria catibu den pasado.

Inhusticia legal ta priva miyones di hende di nan derechonan básico. Amnesty International ta declará den su raport di 1996 cu “prácticamente tur dia, un of otro caminda na mundu, tin atrocidadnan contra derecho humano ta ser cometé. . . . Esnan mas vulnerabel ta hende pober i di ménos recurso, foral hende muher, mucha, hende grandi i refugiadonan.” E raport a remarcá: “Den algun pais, e structuranan dje estado nacional a casi cai den otro, sin laga ningun autoridad legal pa protehá e débilnan for dje fuertenan.”

Durante 1996, desénas di miles di hende den mas cu shen pais a ser detené i torturá. I den añanan recien, cientos di miles di hende a simplemente disparcé, aparentemente secuestrá dor di sea forsanan di siguridad of gruponan terorista. Probablemente hopi di nan a muri.

Claro cu di mes guera ta inhustu, pero nan ta birando mas i mas inhustu. Gueranan moderno tin como blanco poblacionnan civil cu ta consistí di hende muher i mucha. I esaki no ta djis pa motibu di bombardeo pa loco riba stadnan. Violacion sexual di hende muher i mucha muher ta un parti normal di operacionnan militar, i hopi grupo di insurgente ta usa forsa pa secuestrá muchanan pa por entrená nan como matadó. Comentando riba e tendencianan ei, e raport di Nacionnan Uní, “Impacto di Conflicto Arma Riba Mucha,” ta declará: “Mas i mas poblacion di mundu ta cai den un teribel bashí moral.”

No tin duda cu e bashí moral aki a hiba na un mundu saturá cu inhusticia—sea ta racial, social, legal of militar. Esaki no ta nada nobo naturalmente. Mas cu 2.500 aña pasá, un profeta hebreo a lamentá: “Lei ta wòrdu neglishá i hustisia nunka ta gana, pasobra malbadonan ta rondoná e hustunan; pesei hustisia ta wòrdu trosí.” (Habacuc 1:4, Editorial Evangélico) Aunke semper a reina inhusticia, mester clasificá siglo 20 como e era den cua e nivel di inhusticia a alcansá halturanan nobo.

Ta Importá cu Tin Inhusticia?

Sí, e ta importá ora abo personalmente ta sufri como resultado di inhusticia. E ta importá pasobra e ta priva e mayoria dje rasa humano di nan derecho riba felicidad. I e ta importá tambe pasobra hopi bes inhusticia ta causa conflictonan sangriento, cu, na nan turno, ta tene e vlamnan di inhusticia cendé.

Pas i felicidad ta inseparablemente ligá cu husticia, pero inhusticia ta kibra speransa i ta caba cu optimismo. Manera Anne Frank a descubrí trágicamente, hende no por edificá nan speransa riba un fundeshi cu ta consistí di confusion, miseria i morto. Mescos cuné, nos tur ta anhelá pa algu mihó.

E deseo aki a hiba hende sincero na purba trece un midí di husticia pa sociedad humano. Cu e meta ei, e Declaracion Universal di Derecho Humano, cu e Asamblea General di Nacionnan Uní a adoptá na 1948, ta declará: “Tur ser humano ta nace liber i igual den dignidad i derecho. Nan tin e don di facultad di razoná i di concenshi i mester actua pa cu otro den un spiritu di hermandad.”

Palabranan bunita sigur, pero te ainda humanidad ta leu for di realisá e meta tan deseabel ei—un sociedad hustu caminda tur hende tin e mésun derechonan i tur hende ta trata su próhimo manera su ruman. Realisacion dje meta aki, manera e preámbulo dje Declaracion di Nacionnan Uní ta mustra, lo sirbi como “e fundeshi di libertad, husticia i pas na mundu.”

Inhusticia tin rais asina profundo den e structura di sociedad humano cu lo no por elimin’é hamas? Of un fundeshi sólido pa libertad, husticia i pas lo ser poné di un of otro manera? Si ta asina, ken lo por pon’é i garantisá cu tur hende lo beneficiá di dje?

[Rekonosementu pa Potrèt na página 3]

UPI/Corbis-Bettmann