E Mihó Manera pa Trata ku Inhustisia

1-2. Ki hopi hende awe ta pensa ta e solushon pa inhustisia, i ki nos por puntra nos mes?

UNDA ku bo bira awe, tin inhustisia. Hende ta ser deskriminá pa nan koló, aparensia òf kuantu sèn nan tin. Ademas, hopi hende ta sufri pasobra empresario- i gobièrnunan ta interesá den traha plaka so. Esakinan i otro tipo di inhustisia ta afektá nos tur, sea direktamente òf indirektamente.

² Tur hende ke biba den un mundu kaminda nan ta sinti nan safe i ta ser tratá hustu. P’esei ta di komprondé dikon hopi hende ta rabiá debí na e situashon ku nan ta mira. Pa nan e solushon ta sintá den protesta, kolektá firma i vota pa un hende òf partido ku ta primintí di trese kambio. Pero pa nos komo kristian, nos a siña pa “no ta parti di mundu” i pa konfia ku e Reino di Dios lo kita tur inhustisia. (Huan 17:16) Ma esei no ta kita ku nos ta sinti nos malu òf asta rabiá ora nos mira kon malu hende ta trata otro. Kisas bo ta puntra bo mes: ‘Ki mi tin ku hasi si mi mira algu asina? Tin algu ku mi por hasi aworakí kontra inhustisia?’ Promé ku nos kontestá e dos preguntanan ei, laga nos wak kon Yehova i Hesus ta sinti tokante inhustisia.

YEHOVA I HESUS TA ODIA INHUSTISIA

3. Dikon nos ta rabia ora nos mira inhustisia? (Isaías 5:7)

³ Beibel ta splika dikon nos no gusta niun tipo di inhustisia. E motibu ta pasobra Yehova a krea nos den su semehansa i e “stima hustisia i loke ta rekto.” (Sal. 33:5; Gén. 1:26) E no ta trata niun persona malu i e no ke pa nos hasi esei tampoko. (Deu. 32:​3, 4; Mik. 6:8; Zak. 7:9) Por ehèmpel, durante e tempu di Profeta Isaías, e israelitanan tabata trata otro malu i Yehova tabata tende gritu di esnan ku tabata ser maltratá. (Lesa Isaías 5:7.) Yehova a kastigá esnan ku bes tras bes a desobedesé su Lei i a trata otro malu.—Isa. 5:​5, 13.

4. Kon nos sa ku Hesus tambe odia inhustisia? (Wak e plachi.)

⁴ Hesus tambe stima hustisia i ta odia inhustisia. Un biaha el a topa ku un hòmber ku desabilidat, e tabatin un man mankaron. Hesus a haña hopi duele di dje i a kur’é. Pero ora e lidernan religioso a mira esei, nan a rabia masha pisá. Nan no a wòri mes ku e hòmber no tabata sufri mas. Nan a focus riba loke segun nan Hesus a hasi, esta, kibra lei di sabat. Kon Hesus a sinti ora ku el a mira e manera ku nan a reakshoná? El a bira “masha tristu pa motibu di nan kurason sin heful.”—Mar. 3:​1-6.

5. Kiko nos tin ku keda kòrda ora nos rabia?

⁵ Awor, kiko di nos? Ta robes pa nos rabia ora nos mira inhustisia? Nò, pasobra manera nos a mira, Yehova i Hesus tambe a rabia debí na inhustisia. (Efe. 4:26) Pero loke nos tin ku kòrda ta ku ora nos rabia, nos tin ku dominá nos mes. Pasobra, ni maske kuantu nos ke, nos no por kaba ku inhustisia. Si nos keda rabiá pa hopi tempu, nos por bira malu òf asta deprimí. (Sal. 37:​1, 8; Sant. 1:20) Pero kiko sí nos por hasi? Ban wak kiko nos por siña for di Hesus.

KON HESUS A TRATA KU INHUSTISIA

6. Ki tipo di inhustisia tabata tuma lugá ora Hesus tabata riba tera? (Wak e plachi.)

⁶ Ora Hesus tabata aki riba tera, el a mira hopi inhustisia. El a wak kon e lidernan religioso a hasi bida di hende imposibel trahando masha hopi regla adishonal. (Mat. 23:​2-4) El a mira tambe kon e gobièrnu romano tabata maltratá hende. Hopi hudiu tabata ke libra nan mes for di Roma. Algun di nan, manera e zelotenan, tabata dispuesto pa bringa pa nan libertat. Apesar di tur esei, tòg Hesus no a lanta ni a djòin niun movementu pa trese kambio. Asta ora el a haña sa ku nan kier a hasié rei, el a kita bai laga e hendenan.—Huan 6:15.

7-8. Dikon Hesus no a purba di kaba ku inhustisia ora e tabata aki riba tera? (Huan 18:36)

⁷ Ora Hesus tabata aki riba tera e no a enbolbé su mes den polítika pa purba di drecha e problemanan ku el a mira. Dikon nò? Pasobra e sa ku hende no tin e derecho ni e abilidat pa goberná nan mes. (Sal. 146:3; Yer. 10:23) Anto e sa tambe ku hende no por hasi nada kontra Satanas i imperfekshon, ku ta e kousanan prinsipal di inhustisia. Satanas, e gobernante di e mundu akí, ta kruel i ta instigá hende na inhustisia. (Huan 8:44; Efe. 2:2) Anto imperfekshon ta pone ku asta hende ku tin e mihó intenshon no semper ta hasi loke ta bon.—Ekl. 7:20.

⁸ Hesus tabata sa ku ta solamente e Reino di Dios lo kita tur loke ta kousa inhustisia. P’esei el a usa tur su tempu i energia pa prediká “e bon notisia di e Reino di Dios.” (Lúk. 8:1) El a sigurá “esnan ku tin hamber i set pa hustisia” ku fin di korupshon i inhustisia lo yega. (Mat. 5:6; Lúk. 18:​7, 8) No tin niun gobièrnu humano ku por trese e tipo di kambionan akí. Ta solamente e Reino di Dios por hasi esei, i e Reino di Dios “no ta parti di e mundu akí.”—Lesa Huan 18:36.

IMITÁ HESUS

9. Ki ta konvensé bo ku ta solamente e Reino di Dios por kita tur sufrimentu?

⁹ Nos ta bibando den e “último dianan,” pues tin mas problema awor ku tempu Hesus tabata riba tera. Pero ketu bai e kousa di inhustisia ta Satanas i hende imperfekto ku e ta instigá. (2 Tim. 3:​1-5, 13; Rev. 12:12) Pero meskos ku Hesus, nos sa ku ta solamente e Reino di Dios lo eliminá Satanas, e kousa prinsipal di inhustisia, i lo kita tur maldat. Nos ta apoyá e Reino ei, esta, prediká tokante dje. P’esei, nos no ta partisipá den marcha di protesta, aportá ni apoyá niun grupo pa mustra solidaridat ni pone nos konfiansa den gobièrnu pa kaba ku inhustisia. Wak kiko a pasa ku un ruman ku yama Stacy.a Promé ku el a bin den bèrdat, hopi biaha e tabata protestá kontra inhustisia. Pero ku tempu el a kuminsá puntra su mes si e kos ku e tabata hasiendo lo a yuda ku algu. Stacy a bisa: “Tin biaha mi tabata puntra mi mes, ‘Ta ki mi ta bezig kuné? Ta esaki ta e solushon?’ Pero awor ku mi ta apoyá e Reino di Dios, mi tin sigur ku esaki ta e solushon. Mi sa ku Yehova ta bai kaba ku sufrimentu, ku ta algu ku ami no por hasi.”—Sal. 72:​1, 4.

10. Segun Mateo 5:​43-48, kiko nos tin ku evitá? (Wak e plachi.)

¹⁰ Hopi hende awe ta djòin tur sorto di grupo, organisashon òf movementu pa trese kambio. Sinembargo, algun di nan tin asina tantu rabia ku nan ta kibra lei i hasi otro hende daño. Anto esei no ta loke Hesus ke pa nos hasi. (Efe. 4:31) Un ruman ku yama Jeffrey a bisa: “Mi sa ku den un par di sekònde un protesta pasífiko por sali kompletamente fo’i man. Hende por bira asina rabiá ku nan ta kibra i hòrta kos. I asta maltratá otro.” Pero Hesus a siña nos ku nos tin ku trata tur hende bon, asta esnan ku ta persiguí nos. (Lesa Mateo 5:​43-48.) Anto nos ta hasi nos esfuerso pa imit’é.

11. Dikon tin biaha ta duru pa imitá Hesus?

¹¹ Aunke nos sa ku e Reino di Dios lo kaba ku tur inhustisia, tin biaha ta duru pa imitá Hesus ora ku hende trata nos malu. Wak kiko a pasa ku Janiya. Nan tabata diskrimin’é debí na su koló. El a bisa: “Loke nan a bisa mi a hasi mi hopi doló. M’a rabia asina tantu ku mi tabata ke pa un kos malu pasa ku nan. Mi kier a djòin un grupo ku tabata protestá kontra rasismo i diskriminashon. M’a pensa ku si mi hasi esaki lo mi sinti mi mihó.” Ku tempu Janiya a realisá ku e mester a kambia su manera di pensa. El a bisa: “M’a realisá ku na lugá di konfia den Yehova, m’a kuminsá kere loke e hendenan akí tabata bisa i m’a kuminsá pone mi konfiansa den nan. M’a disidí di distansiá mi mes kompletamente for di e grupo i keda leu for di e kosnan ei.” Aunke nos por rabia ora nos eksperensiá òf mira inhustisia, nos mester hasi esfuerso pa dominá nos rabia i semper hasi sigur ku nos no ta parti di mundu.—Huan 15:19.

12. Dikon ta bon pa nos paga tinu ku kiko nos ta lesa, skucha i wak?

¹² Kiko por yuda bo keda kalmu ora abo eksperensiá òf mira inhustisia? Algu ku bo por hasi ta di paga tinu kiko bo ta lesa, skucha i wak. Algun informashon riba retnan sosial ta eksagerá inhustisia ku e intenshon di hinka rabia den hende. I hopi reportero ta duna notisia basá riba nan mes opinion i no riba loke realmente a sosodé. Asta si e notisia ta bèrdat, puntra bo mes esaki: ‘Kiko mi ta gana dor di keda na altura ku e notisia ei? Esei ta yuda ku algu?’ Eigenlijk si nos dediká hopi tempu pa keda bei ku tipo di notisianan asina, nos por bira mas frustrá, tristu i rabiá. (Pro. 24:10) I asta mas pió ainda, nos por pèrdè for di bista ku ta e Reino di Dios ta bai drecha tur kos.

13. Kon nos lesamentu di Beibel ta yuda nos?

¹³ Si tur dia nos lesa nos Beibel i meditá riba dje, e ta bai yuda nos sa kiko pa hasi ora nos eksperensiá òf mira inhustisia. Un ruman ku yama Alia tabata tur preokupá i tristu pa loke e tabata mira ta pasa ku e hendenan den su komunidat. Tabata parse ku niun hende no tabata hasi nada kontra esnan responsabel. El a bisa: “Mi mester a para ketu pensa i puntra mi mes si di bèrdat mi ta kere ku Yehova ta bai resolvé e problemanan ei. Durante e tempu ei mi a lesa Yòb 34:​22-29. E versíkulonan ei a kòrda mi ku Yehova ta mira tur kos. Ta é so sa kiko ta hustu i ta é so lo por resolvé tur problema pa tur hende.” Pero turesten ku nos ta warda pa e Reino di Dios kita tur inhustisia, kiko nos por hasi?

LOKE NOS POR HASI AWOR

14. Kiko ta algu ku nos por hasi awor? (Kolosensenan 3:​10, 11)

¹⁴ Bo no por kambia e manera inhustu ku hende ta trata otro. Pero loke sí bo por hasi ta di trata hende bon. Manera nos a mira kaba, nos ta imitá Hesus dor di mustra amor. Pues, nos ta trata tur hende bon, asta esnan ku ta trata nos malu. (Mat. 7:12; Rom. 12:17) Yehova ta keda kontentu ora nos ta trata tur hende na un manera hustu i bon.—Lesa Kolosensenan 3:​10, 11.

15. Ki efekto nos trabou di prediká tin riba inhustisia?

¹⁵ E mihó manera ku bo por yuda hende ta di siña nan tokante Yehova. Dikon nos ta bisa esei? Pasobra pa kon agresivo i violento un hende por ta, ora e siña “konosé Yehova” lo e hasi kambio i siña pa ta amabel i pa mustra amor. (Isa. 11:​6, 7, 9) Promé ku un hòmber ku yama Jemal a siña konosé Yehova, e tabata forma parti di un grupo ku tabata bringa pa baha e gobièrnu di su pais. El a bisa: “Bo no por fòrsa un hende pa kambia. Pero Beibel sí por kambia hende. Ta Beibel a kambia ami.” Loke Jemal a siña, a motiv’é pa sali for di e grupo. Pues, mas hende nos yuda siña for di Beibel, ménos hende lo tin pa hasi inhustisia.

16. Dikon bo ke konta hende tokante e Reino di Dios?

¹⁶ Meskos ku Hesus, nos ke yuda hende mira ku ta e Reino di Dios so por kaba ku inhustisia pa semper. E bunita speransa ei ta duna ánimo na esnan ku a eksperensiá inhustisia. (Yer. 29:11) Stacy, menshoná na paragraf 9, a splika: “Komo ku mi sa ku Dios lo kita tur sufrimentu, mi ta keda trankil ora mi eksperensiá òf mira inhustisia. Mi sa ku Yehova ta usa e mensahe den Beibel pa duna konsuelo.” Pero pa nos ta kla pa konsolá otro hende ku e promesanan den Beibel nos mester ta prepará. Mas konvensí bo ta di e bèrdatnan di Beibel ku nos a trata den e artíkulo akí, mas mihó prepará lo bo ta pa papia na skol òf trabou tokante kon Yehova lo kaba ku inhustisia.b

17. Kon Yehova ta yuda nos trata ku inhustisia?

¹⁷ Nos sa ku tan ten Satanas ta “e gobernante di e mundu akí” lo bai tin inhustisia. Pero, nos no ta sin yudansa ni speransa miéntras ku nos ta warda pa Yehova kaba ku Satanas. (Huan 12:31) Mediante Beibel, Yehova ta splika nos dikon tin tantu inhustisia i tambe kon e ta sinti tokante sufrimentu. (Sal. 34:​17-19) Mediante su Yu, Yehova ta siña nos kiko nos tin ku hasi ora nos haña nos ku inhustisia. Tambe ku pronto su Reino lo kaba ku inhustisia unabes i pa semper. (2 Ped. 3:13) Pues, laga nos sigui prediká e bon notisia tokante e Reino ei ku entusiasmo segun ku nos ta warda e dia yega ku mundu lo ta yen di “hustisia i rektitut.”—Isa. 9:7.