Jehova Mester Ta Nos Confiansa

“Jehova mes lo resultá di ta, de echo, bo confiansa.” —PROVERBIONAN 3:26.

1. Aunke hopi hende ta pretendé di ta confia den Dios, kico ta mustra cu no ta semper nan ta haci esei?

E LEMA “Den Dios Nos Ta Confia” ta aparecé riba moneda di Merca. Pero tur esnan cu ta usa e placa aki, sea n’e pais ei of otro caminda, realmente ta pone nan confiansa den Dios? Of nan ta pone mas confiansa den e placa mes? Un confiansa asina den moneda dje pais ei of di cualkier otro nacion no ta armonisá cu confiansa den un Dios Todopoderoso di amor, cu nunca ta malusá su poder i cu den ningun sentido ta golos. De facto, cu palabra masha cla e ta condená golosidad.—Efesionan 5:5.

2. Con cristiannan berdadero ta considerá e poder di rikesa?

² Cristiannan berdadero ta pone nan confiansa den Dios, no den rikesa, cu su “poder engañoso.” (Mateo 13:22) Nan ta reconocé cu e poder di placa pa promové felicidad i pa conserbá bida ta masha limitá. Esaki no ta e caso cu e poder di Dios Todopoderoso. (Sofonías 1:18) P’esei, ki sabí ta e spiertamentu: “Laga boso moda di biba sea liber di amor pa placa, miéntras boso ta contentu cu e cosnan actual. Pasobra el a bisa: ‘Lo mi no bandoná bo di ningun manera ni desampará bo di ningun manera.’”!—Hebreonan 13:5.

3. Con e contexto di Deuteronomio 31:6 ta tira lus riba e motibu pakico Pablo a cita e texto aki?

³ Ora apostel Pablo a skirbi e palabranan mencioná ariba n’e cristiannan hebreo, el a cita instruccionnan cu Moises a duna e israelitanan net promé cu su morto: “Tene curashi i sea fuerte. No tene miedu ni sufri un shok dilanti nan, pasobra Jehova bo Dios ta esun cu ta marcha cu bo. Lo e no desampará bo ni bandoná bo henteramente.” (Deuteronomio 31:6) E contexto ta mustra cu Moises tabata animando e israelitanan pa nan tin un confiansa den Jehova, cu a bai mas leu cu djis confi’é pa percurá pa nan necesidadnan material. Con asina?

4. Con Dios a proba n’e israelitanan cu e por a ser confiá?

⁴ Durante e 40 añanan cu Israel tabatin cu dual den desierto, Dios a percurá fielmente pa nan necesidadnan di bida. (Deuteronomio 2:7; 29:5) Tambe el a percurá liderato. Un muestra di esaki tabata un nubia den dia i un candela anochi, cu a guia e israelitanan na ‘un tera cu a abundá cu lechi i miel.’ (Exodo 3:8; 40:36-38) Segun cu e tempu a yega pa nan realmente drenta e Tera Primintí, Jehova a scoge Hosué como e sucesor di Moises. E ocupantenan dje tera lo por a ofrecé resistencia. Pero Jehova a marcha cu su pueblo pa décadanan, pues nan no tabatin nodi tene miedu. E israelitanan tabatin tur motibu pa conocé Jehova como un Dios cu nan por a confia!

5. Con e situacion di cristiannan awe ta similar na esun dje israelitanan promé cu nan a drenta e Tera Primintí?

⁵ Awe cristiannan ta marchando dor dje desierto dje mundu malbado actual, rumbo p’e mundu nobo di Dios. Algun di nan ta siguiendo e curso aki pa mas cu 40 aña. Awor nan ta pará na frontera dje mundu nobo di Dios. Sin embargo, ainda tin enemigu den caminda, cu tin e intencion di stroba cualkier un di nan drenta loke lo bira manera un Tera Primintí, mas glorioso cu esun antiguo cu a abundá cu lechi i miel. Pues pa cristiannan awe, e palabranan di Moises cu Pablo a ripití ta masha apropiado: “Lo mi no bandoná bo di ningun manera ni desampará bo di ningun manera”! Tur cu ta permanecé firme i cu curashi, yen di fe, poniendo confiansa den Jehova, ta sigur di un recompensa.

Confiansa Basá Riba Conocimentu i Amistad

6, 7. (a) Kico a pone e confiansa di Abraham den Jehova na prueba? (b) Con Abraham por a sinti ora e tabata biahando p’e lugá caminda e mester a sacrificá Isaac?

⁶ Na un dado momento Jehova a manda Abraham, antepasado dje israelitanan, sacrificá su yu Isaac como un ofrenda kimá. (Génesis 22:2) Kico a pone e tata amoroso aki tene un confiansa asina inkebrantabel den Jehova cu e tabata mesora cla pa obedecé? Hebreonan 11:17-19 ta contestá: “Pa medio di fe Abraham, ora el a ser probá, casi a ofrecé Isaac, i e homber cu gustosamente a ricibí e promesanan a purba ofrecé su yu unigénito, aunke el a ser bisá: ‘Loke lo ser yamá “bo desendencia” lo ta mediante Isaac.’ Pero el a considerá cu Dios por a lant’é asta for di morto; i for di ei el a ricibié tambe den un manera di ilustracion.”

⁷ Corda cu a tuma Abraham i Isaac tres dia pa yega n’e sitio caminda e sacrificio mester a tuma lugá. (Génesis 22:4) Tabatin bastante tempu pa Abraham reconsiderá loke el a ser pidí pa haci. Nos por imaginá su sintimentunan, su emocionnan? E nacementu di Isaac tabata sigur un causa inesperá di goso. E evidencia ei di intervencion divino a profundisá e afecto cu Abraham i su esposa, Sara, cu un tempu tabata steril, tabatin pa Dios. Nan sigur a biba despues di esei den expectativa di loke futuro a encerá pa Isaac i pa su desendientenan. Nan soño tabata yegando awor na un fin abrupto, manera por a parce debí na loke Dios a pidi?

8. Con Abraham su confiansa den Dios a bai mas leu cu kere cu Dios por a resucitá Isaac?

⁸ Tog, Abraham tabatin confiansa basá riba conocimentu personal cu amigunan íntimo tin di otro. Como “amigu di Jehova,” Abraham “a pone fe den Jehova, i esei a ser contá na dje como husticia.” (Santiago 2:23) Abraham su confiansa den Jehova a bai mas leu cu djis kere cu Dios por a resucitá Isaac. Abraham tabata convencí tambe cu loke Jehova tabata pidié p’e haci tabata corecto, maske Abraham no tabata conocé tur e detayenan. E no tabatin motibu pa cuestioná cu Jehova tabata hustu pa haci e peticion aki. Despues, Abraham su confiansa a ser fortalecí ora e angel di Jehova a cai aden pa prevení cu Isaac a ser matá di berdad den sacrificio.—Génesis 22:9-14.

9, 10. (a) Na ki tempu mas promé Abraham a desplegá confiansa den Jehova? (b) Ki les importante nos por siña for di Abraham?

⁹ Rond di 25 aña mas promé, Abraham a desplegá e mésun clase di confiansa aki den Jehova su husticia. Ora el a ser spiertá cu Sódoma i Gomora lo a bai ser destruí, tabata lógico cu e tabata preocupá tocante e bienestar di cualkier hende hustu cu tabata biba ei, incluyendo su subrino Lot. Abraham a apelá na Dios cu e palabranan: “Ta inconcebibel di bo cu bo ta actua den e manera aki pa mata e hustu huntu cu e malbado di manera cu mester sosodé cu e hustu mescos cu ta sosodé cu e malbado! Ta inconcebibel di bo. E Hues di tur e tera no ta bai haci loke ta recto?”—Génesis 18:25.

¹⁰ E patriarca Abraham tabata convencí cu nunca Jehova ta haci algu inhustu. E salmista a canta despues: “Jehova ta hustu den tur su camindanan i leal den tur su obranan.” (Salmo 145:17) Nos ta haci bon di puntra nos mes: ‘Mi ta aceptá loke Jehova ta permití mi experenciá, sin duda tocante su husticia? Mi ta convencí cu kico cu e permití lo resultá pa mi bon i tambe p’e bon di otronan?’ Si nos por contestá cu sí, anto nos a siña un les importante for di Abraham.

Desplegando Confiansa den e Personanan cu Jehova Ta Scoge

11, 12. (a) Ki aspecto di confiansa tabata necesario pa sirbidónan di Dios? (b) Kico lo por ta un problema pa nos tin bes?

¹¹ Esnan cu ta mira Jehova como nan confiansa tambe ta mustra confiansa den e hombernan cu Jehova ta scoge pa usa den e realisacion di su propósitonan. P’e israelitanan, esaki a nificá mustra confiansa den Moises i mas despues den su sucesor, Hosué. P’e cristiannan di promé, esei a nificá mustra confiansa den e apostel i ancianonan dje congregacion di Jerusalem. Pa nos awe, e ta nificá tene confiansa den “e esclabo fiel i discreto” nombrá pa duna nos ‘alimento spiritual n’e debido tempu,’ i tambe esnan entre nan cu ta forma e Cuerpo Gobernante.—Mateo 24:45.

¹² Realmente, si nos pone nos confiansa den esnan cu ta hiba delantera den e congregacion cristian, esei ta pa nos mes beneficio. Bijbel ta bisa nos: “Sea obediente na esnan cu ta hibando e delantera den boso i keda sumiso, pasobra nan ta vigilando pa boso alma como esnan cu lo rindi cuenta, pa nan haci esei cu goso i no cu suspiro, pasobra esei lo ta severamente dañoso pa boso.”—Hebreonan 13:17.

Evitá di Criticá e Personanan cu Jehova Ta Scoge

13. Ki motibu nos tin pa confia esnan nombrá pa hiba delantera?

¹³ Bijbel ta yuda nos ser balansá den mustra confiansa den esnan cu ta hiba delantera den e pueblo di Jehova. Nos lo por puntra nos mes: ‘Moises no a yega di haci fout? Semper e apostelnan a desplegá e actitud manera di Cristo cu Jesus tabata kier pa nan tin?’ E contestanan ta obvio. Jehova a scoge pa usa hombernan leal i deboto pa guia su pueblo, maske nan tabata hombernan imperfecto. Di mes manera, aunke ancianonan djawe ta imperfecto, tog nos tin cu reconocé nan como “[nombrá pa] spiritu santu [pa ta] superintendente, pa pastoreá e congregacion di Dios.” Nan ta merecé nos apoyo i respet.—Echonan 20:28.

14. Kico ta notabel tocante e echo cu Jehova a scoge Moises en bes di Aron of Miriam como lider?

¹⁴ Aron tabata tres aña mas bieu cu Moises, pero tur dos tabata mas yong cu nan ruman muher, Miriam. (Exodo 2:3, 4; 7:7) I siendo cu Aron tabata mas afluente den papia cu Moises, el a ser nombrá pa sirbi como bocero di su ruman. (Exodo 6:29–7:2) No obstante, pa guia e israelitanan, Jehova no a scoge esun di mas edad, Miriam, ni esun mas afluente, Aron. El a scoge Moises, reconociendo plenamente tur e echo i necesidadnan di momento. Ora cu Aron i Miriam a falta e perspicacia claro aki pa un tempu, nan a keha: “Ta djis mediante Moises so cu Jehova a papia? E no a papia mediante nos tambe?” Miriam, probablemente e instigadó principal, a ser castigá p’e actitud irespetuoso aki pa cu e persona cu Jehova a scoge, kende Miriam i Aron tabatin cu reconocé como “esun di mas mansu di tur hende cu tabata riba e superficie dje suela.”—Númeronan 12:1-3, 9-15.

15, 16. Con Caleb a proba cu e tabatin confiansa den Jehova?

¹⁵ Ora 12 spion a ser mandá pa spioná e Tera Primintí, 10 di nan a trece bek un informe negativo. Nan a hinca miedu den curason dje israelitanan dor di papia tocante e ‘hombernan cananeo di tamaño extraordinario.’ Na su turno, esaki a pone e israelitanan “murmurá contra Moises i Aron.” Pero no ta tur e spionnan a desplegá falta di confiansa den Moises i den Jehova. Nos ta lesa: “E ora ei Caleb a trata di silenciá e pueblo pa cu Moises i a pasa na bisa: ‘Laga nos subi directamente, i sigur nos lo tuma posesion di dje, pasobra ciertamente nos por prevalecé riba dje.’” (Númeronan 13:2, 25-33; 14:2) Caleb su compañero spion, Hosué, tambe tabatin e mes posicion firme aki. Tur dos a mustra cu nan a haci Jehova nan confiansa ora nan a bisa: “Si Jehova a haña deleite den nos, anto siguramente lo e introducí nos den e tera aki i dun’é na nos, un tera cu ta abundá cu lechi i miel. Solamente . . . no teme e hendenan dje tera . . . Jehova ta cu nos. No teme nan.” (Númeronan 14:6-9) E confiansa aki den Jehova a ser recompensá. Dje generacion adulto cu tabata na bida e tempu ei, Caleb, Hosué i algun levita so tabatin e privilegio di drenta e Tera Primintí.

¹⁶ Algun aña mas despues Caleb a bisa: “En cuanto ami, mi a sigui Jehova mi Dios plenamente . . . . I awor, mira, Jehova a conserbá mi na bida, manera el a primintí, e cuarent’i cincu añanan aki desde cu Jehova a haci e promesa aki na Moises tempu Israel tabata cana den e desierto, i awor atá mi aki awe cu ochent’i cincu aña di edad. Sin embargo, awe mi ta mes fuerte cu riba e dia cu Moises a mandá mi. Manera mi poder tabata e tempu ei, asina mi poder ta awor.” (Hosué 14:6-11) Tuma nota di Caleb su actitud positivo, su fieldad i su abilidadnan físico. Tog, Jehova no a scoge Caleb como sucesor di Moises. E privilegio aki a ser extendé na Hosué. Nos por ta sigur cu Jehova tabatin motibu pa a scoge asina, i cu esei tabata e mihó escoho.

17. Pakico a parce cu Pedro lo por a keda sin bini na remarke pa carga responsabilidad?

¹⁷ Apostel Pedro a nenga su Doño tres bes. Tambe impulsivamente el a tuma asuntunan den su mes man, cortando orea dje esclabo dje sumo sacerdote. (Mateo 26:47-55, 69-75; Juan 18:10, 11) Algun hende lo por bisa cu Pedro tabata un persona miedoso, desbalansá, indigno pa gosa di privilegionan special. Tog, ken a ricibí e yabinan di Reino, e privilegio pa habri caminda p’e yamamentu celestial na tres grupo? Tabata Pedro.—Echonan 2:1-41; 8:14-17; 10:1-48.

18. Ki eror, cu Hudas a mencioná, nos kier evitá?

¹⁸ E ehempelnan aki ta mustra cu nos tin cu tene cuidou cu husga segun aparencia djafó. Si nos pone nos confiansa den Jehova, nos lo no duda den esnan cu e ta scoge. Aunke su congregacion terenal ta consistí di hende imperfecto, cu no ta pretendé di ta infalibel, e ta usando nan den un manera poderoso. Hudas, mitar ruman di Jesus, a spierta cristiannan di promé siglo contra individuonan ‘cu no a haci caso di autoridad i cu a papia ofensivamente di esnan glorioso.’ (Hudas 8-10) Hamas nos lo kier ta manera nan.

19. Pakico nos no tin motibu pa criticá e personanan cu Jehova ta scoge?

¹⁹ Aparentemente Jehova ta scoge pa cierto responsabilidad personanan cu tin e cualidadnan specífico necesario pa guia su pueblo den e caminda cu e kier pa nan bai n’e tempu particular ei. Nos tin cu trata na reconocé e echo aki i no criticá esnan cu Dios ta scoge, sino keda contentu pa sirbi humildemente caminda Jehova a pone nos individualmente. Asina nos ta mustra cu nos a haci Jehova nos confiansa.—Efesionan 4:11-16; Filipensenan 2:3.

Desplegá Confiansa den Jehova Su Husticia

20, 21. Kico nos por siña for dje manera cu Dios a trata cu Moises?

²⁰ Si de bes en cuando nos tin tendencia di pone muchu hopi confiansa den nos mes i muchu poco den Jehova, laga nos siña for di Moises. Ora e tabatin 40 aña di edad, e mes a tuma iniciativa pa libra e israelitanan for di cautiverio den Egipto. Sin duda su esfuersonan tabatin bon intencion, pero nan no a hiba n’e liberacion inmediato di Israel, i su mes situacion no a bira mihó tampoco. De facto, el a hañ’é obligá ta hui. Ta te despues di a pasa 40 aña di entrenamentu pisá na un pais stranhero, el a cualificá pa ser selectá pa haci loke e kier a haci anteriormente. E biaha aki e por tabata sigur di Jehova su apoyo, pasobra awor cosnan a ser hací n’e manera di Jehova i na un tempu cu a cuadra cu Su orario.—Exodo 2:11–3:10.

²¹ Nos cada un por puntra nos mes: ‘Mi sa pasa bai dilanti Jehova i e ancianonan nombrá den e congregacion, tratando di acelerá cosnan of haci cosnan na mi mes manera? En bes di sintí mi pasá por haltu pa cierto privilegionan, mi ta aceptá di buena gana mi periodo continuo di entrenamentu?’ Básicamente, nos a siña un les importante for di Moises?

22. Apesar di a perde un gran privilegio, con Moises a sinti pa cu Jehova?

²² Ademas, nos por siña un otro les for di Moises. Númeronan 20:7-13 ta bisa nos di un eror cu el a cometé, cu a salié caru. El a perde e privilegio di guia e israelitanan pa drenta e Tera Primintí. El a haña cu Jehova su decision den e asuntu tabata inhustu? El a hala pia for di hende, sulfurando pasobra Dios tabata trat’é asina malu? Moises a perde confiansa den e husticia di Jehova? Nos por haña e contestanan den palabranan cu Moises mes a dirigí na Israel net promé cu su morto. Moises a bisa di Jehova: “Perfecto ta su actividad, pasobra tur su camindanan ta husticia. Un Dios di fieldad, cu ken no tin inhusticia; hustu i recto e ta.” (Deuteronomio 32:4) Moises sigur a retené su confiansa den Jehova te na fin. Kico di nos? Nos individualmente ta dal e pasonan pa fortalecé nos confiansa den Jehova i su husticia? Con nos por haci esei? Laga nos mira.

Con Lo Bo Contestá?

◻ Ki motibunan e israelitanan tabatin pa confia Jehova?

◻ Pa loke ta confiansa, kico nos por siña for di Abraham?

◻ Pakico nos tin cu evitá di criticá e personanan cu Jehova ta scoge?

[Plachi na página 13]

Confiansa den Jehova ta incluí respetá esnan cu ta hiba delantera den e congregacion