Fortaleciendo Nos Confiansa den e Husticia di Dios

“Pa bo confiansa yega di ta den Jehova mes mi a duná bo conocimentu.”—PROVERBIONAN 22:19.

1, 2. (a) Pakico Testigonan di Jehova ta desplegá confiansa den Jehova? (Proverbionan 22:19) (b) Kico ta indicá cu algun individuo tin cu fortalecé nan confiansa den Jehova?

CRISTIANNAN berdadero ta bendicioná cu un conocimentu exacto di Jehova i di su propósitonan. Un “esclabo fiel i discreto” amorosamente ta suministrá nan e ‘alimento spiritual n’e debido tempu.’ (Mateo 24:45) E conocimentu cu nan ta gana ta duna nan un fundeshi sólido riba cua nan ta basa nan confiansa den Dios. Pues, como grupo, Testigonan di Jehova ta desplegá un confiansa remarcabel den Jehova i den su husticia.

² Sin embargo, ta parce cu kisas algun Testigo individual tin cu fortalecé e confiansa ei. De bes en cuando Sociedad ta ricibí cartanan cu ta expresá insiguridad tocante splicacionnan cu ta ser duná den su publicacionnan. E dudanan aki kisas ta un reaccion riba ahustenan den comprendimentu, of kisas nan ta trata cu asuntunan cu ta afectá esun cu ta puntra, specialmente den un manera emocional.—Compará cu Juan 6:60, 61.

3. Kico por sosodé asta cu fiel sirbidónan di Jehova, i pakico?

³ Asta sirbidónan berdadero di Jehova ta experenciá e veracidad di Eclesiástes 9:11: “Mi a bolbe pa mira cu bou di solo no ta hende lihé tin e careda, ni hende poderoso e bataya, ni hende sabí tampoco tin e cuminda, ni hende entendido no tin e rikesa, ni sikiera hende cu tin conocimentu tin e fabor; pasobra tempu i suceso imprevisto ta cai riba nan tur.” Con esaki por resultá di ta berdad den un sentido mas amplio, of spiritual? Tal bes nos a conocé cristiannan cu tabata lihé pa aplicá conseho di Bijbel, poderoso den defendé e berdad, sabí den aplicá principionan di Bijbel i celoso den busca conocimentu exacto. Tog, debí na “tempu i suceso imprevisto,” algun lo por tin limitacionnan como resultado di un accidente of edad avansá. Kisas nan ta puntra nan mes si nan lo drenta e mundu nobo di Dios sin cu nan tin cu muri hamas.

4, 5. Pakico cristiannan no tin ningun motibu pa perde nan confiansa den e husticia di Jehova?

⁴ Ora un cristian perde su casá, e dolor i sintimentu di pérdida ta grandi. Kisas, huntu como pareha, nan a sirbi Jehova pa añanan of asta décadanan. Esun cu ta keda atras sa cu morto ta corta e laso matrimonial.a (1 Corintionan 7:39) Awor, pa su confiansa no debilitá, e tin cu dominá su emocionnan.—Compará cu Marco 16:8.

⁵ Ki sabí ta pa mira morto di un casá, mayor, yu of amigu cristian yegá como un oportunidad pa mustra confiansa den e husticia di Jehova! Asta ora nos perde un famia den morto, nos por ta sigur cu Jehova no ta inhustu. Nos por tin confiansa cu tur hende cu ta haña bida eterno—sea dor di sobrebibí e fin of dor di un resureccion—lo ta felis. E salmista ta bisa di Dios: “Bo ta habri bo man i ta satisfacé e deseo di tur cos bibiente. Jehova ta hustu den tur su camindanan i leal den tur su obranan. Jehova ta cerca tur hende cu ta inbok’é, cerca tur hende cu ta inbok’é den sinceridad. Lo e cumpli cu e deseo di hende cu ta tem’é, i lo e tende nan sclamacion pa yudansa, i lo e salba nan.”—Salmo 145:16-19.

E Sintimentu di A Sufri Innecesariamente

6, 7. (a) Pakico algun Testigo cu a sufri den pasado por tin un comprendimentu diferente awor? (b) Pakico nos no mester mira Jehova como inhustu dor cu el a permití tal sufrimentu den pasado?

⁶ Den pasado, algun Testigo a sufri dor cu nan a nenga di participá den un actividad cu tal bes awor nan concenshi ta permití nan haci. Por ehempel, kisas esaki tabata nan decision hopi aña pasá pa loke ta cierto tipo di servicio civil. Un ruman por sinti awor cu su concenshi lo por permitié haci esei sin violá su neutralidad cristian relacioná cu e sistema di cosnan actual.

⁷ Tabata inhustu di parti di Jehova pa permitié sufri pa a nenga di haci loke awor lo e por haci sin consecuencia? Mayoria persona cu tabatin e experencia ei no ta pensa asina. Mas bien, nan ta masha contentu cu nan a haña e oportunidad di demostrá públicamente i claramente cu nan tabata determiná pa ta firme riba e cuestion di soberania universal. (Compará cu Job 27:5.) Ki motibu un hende por tin pa lamentá di a sigui su concenshi den tuma un posicion firme na fabor di Jehova? Dor di sostené principionan cristian lealmente segun nan comprendimentu of dor di actua di acuerdo cu e impulsonan di nan concenshi, nan a demostrá di ta digno di Jehova su amistad. Siguramente, ta sabí pa evitá un curso cu lo molestiá bo concenshi of cu probablemente lo pone otro hende trompecá. En coneccion cu esaki nos por pensa riba e ehempel cu apostel Pablo a pone.—1 Corintionan 8:12, 13; 10:31-33.

8. Pakico cristiannan hudiu, cu anteriormente a pega n’e Ley, no tabatin motibu pa cuestioná e husticia di Jehova?

⁸ P’e hudiunan agradá Jehova, el a exigí pa nan obedecé e Dies Mandamentunan i tambe un gran variedad di 600 ley mas. Mas despues, bou dje areglo cristian, obedencia n’e leynan aki como tal no tabata un rekisito mas pa sirbi Jehova, ni sikiera pa hudiu carnal. Entre e leynan cu no tabata obligatorio mas tabatin esnan cu a trata cu circuncision, warda sabat, ofrecé sacrificio di animal i sigui cierto restriccionnan relacioná cu dieta. (1 Corintionan 7:19; 10:25; Colosensenan 2:16, 17; Hebreonan 10:1, 11-14) Hudiunan—incluso e apostelnan—cu a bira cristian a ser librá for dje obligacion di warda leynan cu nan mester a obedecé tempu nan tabata bou dje pacto di Ley. Nan a keha cu Dios su areglo tabata inhustu ora cu anteriormente el a rekerí cosnan di nan cu awor no tabata necesario mas? No, nan a alegrá cu nan a haña un comprendimentu mas amplio dje propósitonan di Jehova.—Echonan 16:4, 5.

9. Kico a pasa cu algun Testigo, pero pakico nan no tin motibu pa lamentá?

⁹ Den tempu moderno, tabatin algun Testigo cu tabata masha estricto den nan punto di bista di loke nan lo a haci of keda sin haci. P’e motibu ei nan a sufri mas cu otronan. Mas despues, un mayor conocimentu a yuda nan amplia nan manera di mira asuntunan. Pero nan no tin motibu pa lamentá di a actua anteriormente na armonia cu nan concenshi, asta ora esaki posiblemente a trece mas sufrimentu. Ta berdaderamente encomendabel cu nan a demostrá nan buena gana pa sufri den fieldad na Jehova, pa “haci tur cos pa causa dje bon nobo.” Jehova ta bendicioná e clase di debocion piadoso ei. (1 Corintionan 9:23; Hebreonan 6:10) Apostel Pedro a skirbi cu perspicacia: “Si, ora boso ta haci bon i ta sufri, boso want’é, esei ta algu agradabel pa Dios.”—1 Pedro 2:20.

Siña for di Jónas

10, 11. Con Jónas a mustra un falta di confiansa den Jehova (a) ora el a haña e asignacion pa bai Nínive? (b) ora Dios a keda sin destruí e ninivitanan?

¹⁰ Ora Dios a manda Jónas pa Nínive, el a mustra un falta di aprecio p’e confiansa cu Jehova tabata poniendo den dje. Despues di un experencia spantoso causá dor di su mes mal gana di obedecé, Jónas a recobrá su sentidonan, a realisá su eror, a aceptá su asignacion den estranheria, i a spierta e ninivitanan dje inminente destruccion. E ora ei a bini lo inesperá: Pa motibu dje actitud repentí dje ninivitanan, Jehova a dicidí di no destruí nan.—Jónas 1:1–3:10.

¹¹ Kico tabata Jónas su reaccion? Malcontentu, el a keha na Dios den oracion. E esencia di su lamento tabata: ‘Mi tabata sa cu cosnan lo a sali asina aki. P’esei, na promé instante, mi no kier a bini Nínive. Awor, despues di tur loke mi a pasa aden, incluso e teror i humiyacion di ser gulí dor di un piscá grandi, i despues di mi trabou duru spiertando e ninivitanan dje destruccion inminente, wak aki! Tur mi trabou i sufrimentu tabata pornada! Mi por bien muri!’—Jónas 4:1-3.

12. Kico nos por siña for dje experencia di Jónas?

¹² Jónas tabatin un motibu válido pa keha? Jehova tabata inhustu ora el a extendé misericordia na malechornan repentí? En realidad, Jónas lo mester a alegrá; dies di miles di hende a ser di spar for di ehecucion! (Jónas 4:11) Pero su actitud irespetuoso i kehoso a demostrá cu e no tabata expresando confiansa profundo den e husticia di Dios. E tabata pensa muchu hopi riba su mes, i muchu poco riba otronan. Laga nos siña for di Jónas dor di tene nos mes i nos sintimentunan personal na di dos lugá. Laga nos keda convencí cu ta corecto pa obedecé Jehova, sigui e guia cu e ta duna mediante su organisacion i aceptá su decisionnan. Nos ta convencí cu “lo resultá bon cu esnan cu ta teme e Dios berdadero.”—Eclesiástes 8:12.

Awor Ta e Tempu pa Fortalecé Nos Confiansa!

13. Con nos tur por fortalecé nos confiansa den Jehova?

¹³ Ta sabí pa nos fortalecé nos confiansa den Jehova. (Proverbionan 3:5-8) Naturalmente, nos tin cu haci mas cu djis pidi Jehova yuda nos haña mas confiansa den dje. Confiansa ta crece basá riba conocimentu exacto, pues nos tin cu haci studio personal di Bijbel, lesamentu di Bijbel i tambe di literatura cu ta splica Bijbel, parti di nos rutina diario. Asistencia regular na reunionnan cristian ta vital, tambe bon preparacion i participacion te caminda nos por. Si nos hacié un custumber pa compartí berdadnan di Bijbel cu otro hende, venciendo obhecionnan cu tacto, tambe nos ta profundisá nos confiansa den Jehova i den su Palabra. Asina nos ta bira mas enbolbí cuné riba un base diario.

14. Pakico e pueblo di Dios pronto lo haña nan ta desplegá nan confiansa den Jehova manera nunca promé?

¹⁴ Den un futuro cercano, un tribulacion mas grandi cu a yega di dal e rasa humano lo cuminsá di ripiente. (Mateo 24:21) Ora esei sosodé, mas cu nunca promé, sirbidónan di Dios lo tin cu desplegá confiansa den e husticia di Jehova i den e guia cu su organisacion ta duna. Den un manera simbólico, nan lo obedecé e ora ei cu confiansa e ordu di Dios: “Bai, mi pueblo, drenta den bo kambernan interior, i cera bo portanan bo tras. Sconde bo mes pa un momento so te ora e denunciacion pasa.” (Isaías 26:20) Ya caba nan a drenta den e ambiente protectivo di mas cu 85.000 congregacion den 232 pais. Maske kico mas e ordu pa “drenta den bo kambernan interior” lo por encerá, nos por tin sigur cu Jehova lo yuda nos cumpli cuné.

15. Con e asuntu di confiansa a ser enfatisá durante 1998, i pakico esei tabata na su lugá?

¹⁵ Ta imperativo pa nos fortalecé nos confiansa awor. Sin confiansa den nos rumannan cristian, den e organisacion di Jehova i, riba tur cos, den Jehova mes, lo ta imposibel pa sobrebibí. P’esei ta masha apropiado cu durante 1998, e palabranan di nan texto di aña a recordá Testigonan di Jehova rond mundu bes tras bes cu “tur cu inbocá e nomber di Jehova lo ser salbá”! (Romanonan 10:13) Den esei nos tin cu sigui tene confiansa. Si nos detectá asta e menor rastro di falta den e confiansa aki, nos mester haci esfuerso pa rectifik’é awor, sí, awe.

E Huicio di Jehova Lo Ta Hustu

16. Kico por sosodé cu nos confiansa si nos no cultiv’é, i con nos por prevení esaki di sosodé?

¹⁶ Hebreonan 3:14 ta spierta cristiannan ungí: “En realidad nos ta bira participante dje Cristo solamente si nos mantené e confiansa cu nos tabatin na principio firmemente gará te na fin.” En principio, e palabranan aki ta aplicá tambe na cristiannan cu tin un speransa terenal. Si nos no desaroyá e confiansa cu nos tabatin na principio, e por caba na nada. Ta ki vital pa nos sigui busca conocimentu exacto, fortaleciendo asina e fundeshi riba cua nos confiansa ta basá!

17. Pakico nos por tin confiansa cu, pa loke ta sobrebibencia, Jesus lo husga corectamente?

¹⁷ Pronto Cristo lo examiná tur nacion pa asina e “separá hende un for di otro, mescos cu un wardadó ta separá carné for di cabritu.” (Mateo 25:31-33) Nos por tin e confiansa cu Cristo lo ta hustu den husga ken ta digno pa sobrebibí. Jehova a dun’é e sabiduria, perspicacia i otro cualidadnan necesario pa “husga e tera habitá den husticia.” (Echonan 17:30, 31) Laga nos conviccion ta manera esun di Abraham, kende a bisa: “Ta inconcebibel di bo [Jehova] cu bo ta actua den e manera aki pa mata e hustu huntu cu e malbado di manera cu mester sosodé cu e hustu mescos cu ta sosodé cu e malbado! Ta inconcebibel di bo. E Hues di tur e tera no ta bai haci loke ta recto?”—Génesis 18:25.

18. Pakico nos no mester preocupá muchu tocante loke kisas nos no sa actualmente?

¹⁸ Si nos tin confiansa completo den e husticia di Jehova, nos no tin nodi wori pa haña contesta riba preguntanan manera: ‘Con babynan i mucha chikitu lo ser husgá? Tin chens cu ora Armagedon yega un gran cantidad di hende no a tende e bon nobo ainda? Kico di . . . ?’ Ta cierto cu actualmente kisas nos no sa con Jehova lo resolvé e cuestionnan aki. Sin embargo, lo e haci esei den un manera hustu i misericordioso. Hamas nos tin cu duda den esei. De facto, nos por keda asombrá i deleitá ora nos mira Dios resolvé nan den un manera cu nos no a ni pensa mes.—Compará cu Job 42:3; Salmo 78:11-16; 136:4-9; Mateo 15:31; Lucas 2:47.

19, 20. (a) Pakico no ta malu pa haci preguntanan razonabel? (b) Na ki tempu Jehova lo duna e contestanan necesario?

¹⁹ E organisacion di Jehova no ta desanimá hende pa haci pregunta sincero i oportuno, manera algun opositor ta pretendé ekibocadamente. (1 Pedro 1:10-12) Sin embargo, Bijbel ta consehá nos pa evitá preguntanan bobo i speculativo. (Tito 3:9) Dor di haci preguntanan razonabel i busca den e Palabra di Dios i publicacionnan cristian pa haña contestanan bíblico, nos por aumentá nos conocimentu exacto i asina fortalecé nos confiansa den Jehova. E organisacion ta sigui e ehempel di Jesus. El a abstené di comentá riba preguntanan pa cua e tempu apropiado p’e contesta no a yega. El a splica: “Mi tin hopi cos pa bisa boso ainda, pero boso no por soportá nan actualmente.” (Juan 16:12) Tambe el a admití cu tabatin algun cos n’e momento ei cu e mes no tabata sa.—Mateo 24:36.

²⁰ Ainda Jehova tin hopi cos di revelá. Ta ki sabí anto pa spera riba dje, cu e confiansa cu Dios lo revelá su propósitonan n’e tempu apropiado. Nos por ta sigur cu una bes e debido tempu di Jehova yega, nos lo tin e goso di haña mas perspicacia den su camindanan. Sí, nos lo ser recompensá, basta nos ehercé confiansa absoluto den Jehova i den e organisacion cu e ta usando. Proverbionan 14:26 ta sigurá nos: “Den e temor di Jehova tin confiansa firme, i pa su yunan lo yega di tin un refugio.”

[Nota]

Kico Bo Ta Pensa?

◻ Pakico no ta sabí pa laga emocionnan debilitá nos confiansa den Jehova?

◻ Kico nos por siña for di Jónas su experencia?

◻ Pakico studio di Bijbel i asistencia na reunion ta asina importante?

[Plachi na página 16]

Asta ora nos perde un ser kerí, nos por confia cu Jehova ta hustu

[Plachinan na página 18]

Bo tin sigur cu bo confiansa ta den Jehova?