Pega na Teocracia

“Jehova ta nos Hues, Jehova ta nos Dunador di statuto, Jehova ta nos Rey.”—ISAIAS 33:22.

1. Pakico gobernacion ta un asuntu di interes pa mayoria hende?

E TOPICO di gobernacion ta di gran interes pa tur hende. Bon gobernacion ta trece pas i prosperidad. Bijbel ta bisa: “Mediante husticia un rey ta pone cu un pais ta sigui permanecé.” (Proverbionan 29:4) En cambio, mal gobernacion ta hiba na inhusticia, corupcion i opresion. “Ora un hende malbado ta goberná, e pueblo ta suspirá.” (Proverbionan 29:2) Atrabes di historia, hende a purba hopi sorto di gobiernu—i, lamentablemente, hopi biaha nan a “suspirá” pa motibu di opresion di parti di nan gobernantenan. (Eclesiástes 8:9) Tin un forma di gobiernu cu lo trece contentamentu duradero pa su súbditonan?

2. Pakico “teocracia” ta un bon descripcion dje gobernacion di Israel di antigwedad?

² Historiadó Josefo a mencioná un clase único di gobiernu ora el a skirbi: “Algun pueblo a confia e poder político supremo na monarkianan, otronan na oligarkianan i otronan n’e masanan. Pero ningun dje formanan di política aki a atraé nos dunadó di ley [Moises], mas bien el a duna su constitucion e forma di loke—si ta permití pa usa un expresion straño—por ser yamá un ‘teocracia,’ cu ta pone tur soberania i autoridad den man di Dios.” (Against Apion, II, 164-5) Segun e Concise Oxford Dictionary, teocracia ta nificá “un forma di gobiernu di parti di Dios.” E palabra no ta aparecé den Bijbel, pero e ta un bon descripcion dje gobernacion di Israel di antigwedad. Aunke e israelitanan a bin haña un rey visibel, nan berdadero gobernante tabata Jehova. E profeta israelita Isaías a bisa: “Jehova ta nos Hues, Jehova ta nos Dunador di statuto, Jehova ta nos Rey.”—Isaías 33:22.

Kico Ta Berdadero Teocracia?

3, 4. (a) Kico ta berdadero teocracia? (b) Ki bendicionnan teocracia lo trece pa henter humanidad aki poco tempu?

³ For di tempu cu Josefo a inventá e palabra, hopi sociedad a ser describí como teocracia. Algun di nan a parce intolerante, fanático i cruelmente opresivo. Nan tabata berdadero teocracia? No den e sentido cu Josefo a usa e palabra. E problema ta cu hende a amplia e nificacion di “teocracia.” World Book Encyclopedia ta definié como “un forma di gobernacion den cua un pastor of pastornan ta goberná e estado, i den cua miembronan dje sacerdocio tin autoridad den asuntunan civil i religioso.” Sin embargo, berdadero teocracia no ta gobiernu den man di pastor. E ta berdaderamente gobernacion di Dios, gobiernu den man dje Creador di universo, Jehova Dios.

⁴ Aki poco dia, henter e tera lo ta bou di teocracia, i ki un bendicion esei lo ta! “Dios mes lo ta cu [humanidad]. I lo e seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.” (Revelacion 21:3, 4) Ningun gobiernu den man di pastor imperfecto lo por trece e felicidad ei. E gobernacion di Dios so por. P’esei, cristiannan berdadero no ta purba introducí teocracia mediante accion político. Nan ta warda cu pacenshi pa Dios mes establecé un teocracia mundial na su mes tempu i na su mes manera.—Daniel 2:44.

5. Unda berdadero teocracia ta funcionando awe, i ki preguntanan ta lanta tocante dje?

⁵ Sin embargo, miéntras tantu tin un berdadero teocracia cu sí ta funcionando caba. Na unda? Entre esnan cu boluntariamente ta someté nan n’e gobernacion di Dios i cu ta cooperá huntu pa haci su boluntad. Hende fiel asina a ser reuní como un “nacion” spiritual mundial riba su “tera” spiritual. Nan ta e resto di “e Israel di Dios” huntu cu nan mas cu cincu miyon i mei compañeronan cristian. (Isaías 66:8; Galationan 6:16) Nan ta sumiso na Jesucristo, e Rey celestial entronisá dor di Jehova Dios, “e Rey di eternidad.” (1 Timoteo 1:17; Revelacion 11:15) Den ki manera e organisacion aki ta teocrático? Con su miembronan ta mira e autoridad di gobiernunan seglar? I con e personanan cu ta ehercé autoridad den nan comunidad spiritual ta mantené e principio di teocracia?

Un Organisacion Teocrático

6. Con Dios por goberná un organisacion humano visibel?

⁶ Siendo cu Jehova ta biba den shelu invisibel, con e por goberná un organisacion humano? (Salmo 103:19) Esei ta posibel pasobra esnan asociá cuné ta sigui e conseho inspirá: “Confia den Jehova cu tur bo curason i no lèn riba bo mes comprendimentu.” (Proverbionan 2:6; 3:5) Nan ta permití Dios goberná nan ya cu nan ta warda “e ley di Cristo” i ta aplicá Bijbel su principionan inspirá den nan bida di tur dia. (Galationan 6:2; 1 Corintionan 9:21; 2 Timoteo 3:16; mira Mateo 5:22, 28, 39; 6:24, 33; 7:12, 21.) Pa haci esaki, nan mester ta studiante di Bijbel. (Salmo 1:1-3) Mescos cu e bereanonan di antigwedad cu tabatin un ‘disposicion noble,’ nan no ta sigui hende, sino ta verificá constantemente den Bijbel e cosnan cu nan ta siña. (Echonan 17:10, 11; Salmo 119:33-36) Nan ta haci oracion manera e salmista: “Siñá mi bondad, sensates i conocimentu mes, pasobra den bo mandamentunan mi a ehercé fe.”—Salmo 119:66.

7. Kico ta e órden di supervision den e teocracia?

⁷ Den tur organisacion mester tin algun persona cu ta ehercé autoridad of duna guia. Testigonan di Jehova no ta un excepcion, i nan ta sigui e structura di autoridad cu apostel Pablo a describí: “E cabes di tur homber ta e Cristo; en buelta e cabes di un muher ta e homber; en buelta e cabes di e Cristo ta Dios.” (1 Corintionan 11:3) Na armonia cu esaki, solamente hombernan cualificá ta sirbi como anciano den e congregacionnan. I aunke Jesus—“e cabes di tur homber”—ta den shelu, ainda tin “e resto” di su rumannan ungí riba tera, cu tin e speransa di goberná huntu cuné den shelu. (Revelacion 12:17; 20:6) Esakinan ta forma e clase dje “esclabo fiel i discreto.” Cristiannan ta mustra nan sumision na Jesus, i p’esei na Jesus su cabes, Jehova, dor di aceptá e supervision dje “esclabo” ei. (Mateo 24:45-47; 25:40) Den e manera aki, e teocracia ta ordená. “Dios no ta un Dios di desordu, sino di pas.”—1 Corintionan 14:33.

8. Con ancianonan cristian ta sostené e principio di teocracia?

⁸ Ancianonan cristian ta sostené e principio di teocracia pasobra nan ta reconocé cu nan ta responsabel na Jehova pa e manera cu nan ta ehercé nan grado limitá di autoridad. (Hebreonan 13:17) I ora nan ta tuma decision, nan ta dependé riba e sabiduria di Dios, no esun di nan mes. Den e aspecto aki, nan ta sigui e ehempel di Jesus. E tabata e homber mas sabí cu a yega di biba. (Mateo 12:42) No obstante, el a bisa e hudiunan: “E Yu no por haci ni un solo cos di su mes iniciativa, sino solamente loke e mira e Tata haci.” (Juan 5:19) Tambe, ancianonan tin e mésun actitud cu Rey David. E tabatin un puesto di hopi responsabilidad den un teocracia. Sin embargo, e kier a sigui e caminda di Jehova, no esun di su mes. El a pidi den oracion: “Instruí mi, O Jehova, den bo caminda, i guiá mi den e caminda di rectitud.”—Salmo 27:11.

9. Relacioná cu e diferente speransa i diferente privilegionan di sirbishi den e teocracia, ki punto di bista balansá cristiannan dedicá tin?

⁹ Algun persona a cuestioná si ta hustu cu ta solamente hombernan cualificá ta ehercé e autoridad ei den e congregacion of cu ta solamente algun tin un speransa celestial miéntras otronan tin un speransa terenal. (Salmo 37:29; Filipensenan 3:20) Sin embargo, cristiannan dedicá ta comprendé cu ta esaki ta e areglonan describí den e Palabra di Dios. Nan ta teocrático. Por lo general, ta hende cu no ta reconocé principionan di Bijbel ta cuestioná nan. Ademas, cristiannan sa cu homber i muher ta igual den bista di Jehova pa loke ta salbacion. (Galationan 3:28) Pa cristiannan berdadero, ser adoradó dje Soberano di universo ta e privilegio di mas haltu cu tin, i nan ta contentu pa ocupá cualkier posicion cu Jehova tin pa nan. (Salmo 31:23; 84:10; 1 Corintionan 12:12, 13, 18) Ademas, bida eterno, sea den shelu of den un paradijs riba tera, ta un speransa berdaderamente maraviyoso.

10. (a) Ki actitud excelente Jonatan a desplegá? (b) Con cristiannan awe ta desplegá un actitud similar na esun di Jonatan?

¹⁰ Den e sentido aki, Testigonan di Jehova ta manera Jonatan, yu di Rey Saul i un homber temeroso di Dios. Probablemente Jonatan lo a bira un excelente rey. Pero, debí n’e infieldad di Saul, Jehova a scoge David como e di dos rey di Israel. Jonatan tabata amargá pa esaki? No. El a bira un bon amigu di David i asta a proteh’é for di Saul. (1 Samuel 18:1; 20:1-42) Di manera similar, esnan cu tin un speransa terenal no ta envidiá esnan cu tin un speransa celestial. I cristiannan berdadero no ta envidiá esnan cu ta ehercé autoridad teocrático den e congregacion. Mas bien, nan ta “duna nan mas cu consideracion extraordinario den amor,” reconociendo nan trabou duru na fabor di nan rumannan spiritual.—1 Tesalonicensenan 5:12, 13.

E Punto di Bista Teocrático di Gobiernu Seglar

11. Con cristiannan cu ta someté nan mes na gobernacion teocrático ta mira autoridadnan seglar?

¹¹ Si Testigonan di Jehova ta bou di teocracia, esta, gobernacion dor di Dios, con nan ta mira gobernantenan nacional? Jesus a bisa cu su siguidónan lo “no ta parti di mundu.” (Juan 17:16) Pero, cristiannan ta reconocé nan debe na “César,” gobiernunan seglar. Jesus a bisa cu nan mester “paga bek na César e cosnan di César, pero na Dios e cosnan di Dios.” (Mateo 22:21) Segun Bijbel, “Dios a pone [gobiernunan humano] den nan posicion relativo.” Jehova, e Fuente di tur autoridad, ta permití gobiernunan existí, i e ta spera pa nan haci bon na esnan bou di nan hurisdiccion. Ora nan haci esei, nan ta “minister di Dios.” Cristiannan ta sumiso n’e gobiernu dje pais den cua nan ta biba “pa motibu di [nan] concenshi.” (Romanonan 13:1-7) Naturalmente, si estado exigí algu cu ta contrario cu e ley di Dios, cristiannan lo “obedecé Dios como gobernante mas bien cu hende.”—Echonan 5:29.

12. Ora autoridadnan ta persiguí cristiannan, ken su ehempel nan ta sigui?

¹² Kico di ora cristiannan berdadero ta ser persiguí dor di autoridadnan di gobiernu? Nan ta sigui e ehempel dje cristiannan di promé cu a wanta periodonan largu di gran persecucion. (Echonan 8:1; 13:50) E pruebanan di fe aki no a bini inesperá, siendo cu Jesus a spierta nan cu eseinan lo bini. (Mateo 5:10-12; Marco 4:17) Tog, e cristiannan di promé ei no a tuma vengansa riba esnan cu a persiguí nan; ni nan fe no a debilitá bou di presion. Mas bien, nan a sigui e ehempel di Jesus: “Ora nan a zundr’é, e no a zundra bek. Ora e tabata sufri, e no a haci menasa, sino a sigui encomendá su mes na esun cu ta husga cu husticia.” (1 Pedro 2:21-23) Sí, principionan cristian a vence e provocacionnan di Satanas.—Romanonan 12:21.

13. Con Testigonan di Jehova a respondé na persecucion i campañanan di calumnia contra nan?

¹³ Mescos ta cierto awe. Durante e siglo aki, Testigonan di Jehova a sufri teriblemente na man di gobernantenan tiránico—manera Jesus a predicí. (Mateo 24:9, 13) Den algun pais, esnan cu ta trata na pone presion riba autoridadnan pa actua contra e cristiannan sincero aki ta plama mentira i acusacionnan falsu. Tog, apesar di “mal informe” asina, pa medio di nan conducta excelente e Testigonan ta recomendá nan mes como ministernan di Dios. (2 Corintionan 6:4, 8) Ora ta posibel, nan ta presentá nan caso na funcionarionan i den corte dje pais pa asina nan demostrá nan inocencia. Nan ta usa tur medio disponibel pa yuda nan haci un defensa público dje bon nobo. (Filipensenan 1:7) Pero despues cu nan a haci tur loke nan por den márgen di ley, nan ta laga asuntunan den man di Jehova. (Salmo 5:8-12; Proverbionan 20:22) Si ta necesario, mescos cu e cristiannan di promé, nan no tin miedu di sufri pa causa di husticia.—1 Pedro 3:14-17; 4:12-14, 16.

Pone e Gloria di Dios na Promé Lugá

14, 15. (a) Kico ta e cos di mas importante pa esnan cu ta sostené e principio di teocracia? (b) Na ki ocasion Sálomon a pone un ehempel excelente di humildad den su posicion di supervision?

¹⁴ Ora Jesus a siña su siguidónan haci oracion, e promé cos cu el a mencioná tabata e santificacion dje nomber di Jehova. (Mateo 6:9) Na armonia cu esaki, esnan cu ta biba bou di teocracia ta busca e gloria di Dios, no esun di nan mes. (Salmo 29:1, 2) Bijbel ta informá cu den e promé siglo, esaki tabata un piedra di trompecá pa algun cu a nenga di sigui Jesus pasobra “nan a stima e gloria di hende,” nan a gusta pa hende glorificá nan. (Juan 12:42, 43) Sí, humildad ta necesario pa pone Jehova dilanti bo mes importancia personal.

¹⁵ Den esaki, Sálomon a demostrá un actitud excelente. Compará su palabranan n’e dedicacion dje tempel glorioso cu el a construí, cu e palabranan di Nabucodonosor relacioná cu su hazañanan di construccion. Cu un orguyo exagerá, Nabucodonosor a broma: “No ta Babilonia e Grandi esaki ta, cu mi mes a construí p’e cas real cu e fortalesa di mi poder i p’e dignidad di mi mahestad?” (Daniel 4:30) Na contraste, cu modestia Sálomon a rebahá su logro, bisando: “Di berdad Dios lo biba cu humanidad riba tera? Mira! Shelu, sí, shelu di shelunan mes, no por contené bo; cuantu ménos, anto, e cas aki cu mi a construí?” (2 Crónicanan 6:14, 15, 18; Salmo 127:1) Sálomon no a halsa su mes. E tabata sa cu e tabata djis un representante di Jehova i a skirbi: “Pretension a bini? Anto desonor lo bini; pero sabiduria ta cu esnan modesto.”—Proverbionan 11:2.

16. Con ancianonan ta resultá di ta un berdadero bendicion dor di no glorificá nan mes?

¹⁶ Di un manera similar, ancianonan cristian ta halsa Jehova, no nan mes. Nan ta sigui e conseho di Pedro: “Si un hende ta sirbi, lagu’é sirbi como dependiendo dje forsa cu Dios ta suministrá; di manera cu den tur cos Dios por ser glorificá mediante Jesucristo.” (1 Pedro 4:11) Apostel Pablo a describí e “puesto di superintendente,” no como un posicion importante di prominencia, sino como “un trabou excelente.” (1 Timoteo 3:1) Ancianonan ta nombrá pa sirbi, no pa manda. Nan ta maestro i wardadónan dje tou di Dios. (Echonan 20:28; Santiago 3:1) Ancianonan humilde, cu tin e spiritu di sacrificio propio, ta un berdadero bendicion pa un congregacion. (1 Pedro 5:2, 3) “Sigui tene aprecio p’e clase di hombernan ei,” i gradicí Jehova cu el a percurá asina tantu anciano cualificá pa sostené teocracia den e “último dianan” aki.—Filipensenan 2:29; 2 Timoteo 3:1.

“Bira Imitadónan di Dios”

17. Den ki maneranan esnan cu ta bou di teocracia ta imitá Dios?

¹⁷ Apostel Pablo a insta: “Bira imitadónan di Dios, manera yunan stimá.” (Efesionan 5:1) Esnan cu ta someté nan mes na teocracia ta purba di ta mas tantu posibel manera Dios, te asina leu cu imperfeccion humano ta permití. Por ehempel, Bijbel ta bisa di Jehova: “E Baranca, perfecto ta su actividad, pasobra tur su camindanan ta husticia. Un Dios di fieldad, cu ken no tin inhusticia; hustu i recto e ta.” (Deuteronomio 32:3, 4) Pa imitá Dios den e contexto aki, cristiannan ta busca fieldad, rectitud i un sentido balansá di husticia. (Mikéas 6:8; 1 Tesalonicensenan 3:6; 1 Juan 3:7) Nan ta evitá hopi cos cu a bira aceptabel den mundu, manera inmoralidad, cudishi i golosidad. (Efesionan 5:5) Pa motibu cu Jehova su siguidónan ta sigui normanan divino i no humano, su organisacion ta teocrático, limpi i saludabel.

18. Cua ta Dios su cualidad predominante, i con cristiannan ta reflehá e cualidad aki?

¹⁸ E cualidad predominante di Jehova Dios ta amor. “Dios ta amor,” segun apostel Juan. (1 Juan 4:8) Siendo cu teocracia ta nificá gobernacion dor di Dios, eigenlijk teocracia ta nificá gobernacion dor di amor. Jesus a bisa: “Den esaki tur lo sa cu boso ta mi disipelnan, si boso tin amor entre boso.” (Juan 13:35) E organisacion teocrático a demostrá amor sobresaliente den e último dianan trabahoso aki. Durante e genocidio na Africa, Testigonan di Jehova a manifestá amor pa tur hende, sin importá na cua grupo étnico nan a pertenecé. Durante e guera na ex-Yugoslavia, Testigonan di Jehova den tur área a yuda otro, miéntras cu otro gruponan religioso a participá den e asina yamá purificacion étnico. Riba nivel personal, Testigonan di Jehova ta haci esfuerso pa sigui e conseho di Pablo: “Boso kita tur amargura malicioso i furia i rabia i griteria i abla ofensivo for di boso, huntu cu tur maldad. Mas bien, bira bondadoso un cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.”—Efesionan 4:31, 32.

19. Ki bendicionnan ta bini awor i tambe den futuro pa esnan cu ta someté nan mes na teocracia?

¹⁹ Esnan cu ta someté nan mes na teocracia ta disfrutá di bendicionnan grandi. Nan tin pas cu Dios i cu nan compañeronan cristian. (Hebreonan 12:14; Santiago 3:17) Nan tin un propósito den bida. (Eclesiástes 12:13) Nan tin siguridad spiritual i un speransa sigur pa futuro. (Salmo 59:9) En berdad, nan ta disfrutá di un muestra di con lo ta ora henter humanidad ta bou di gobernacion teocrático. E ora ei, manera Bijbel ta bisa, “nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.” (Isaías 11:9) Ki un tempu glorioso esei lo ta! Laga nos tur sigurá nos lugá den e futuro Paradijs ei dor di pega na teocracia awor.

Bo Por Splica?

◻ Kico ta berdadero teocracia i unda nos por hañ’é awe?

◻ Con sernan humano ta someté nan mes na gobernacion teocrático den nan bida?

◻ Den ki maneranan tur persona bou di teocracia ta busca e gloria di Dios promé cu esun di nan?

◻ Cua ta algun cualidad piadoso cu esnan cu ta sostené teocracia ta imitá?

[Plachi na página 17]

Sálomon a pone gloria di Dios promé cu esun di su mes