Nan A Haci Jehova Su Boluntad

Cu Curashi Pablo Ta Duna Testimonio na Dignatarionan

E CONTRASTE entre e dos hombernan no por tabata mas bisto. Unu tabatin corona bistí, miéntras e otro tabata na cadena. Unu tabata rey; e otro, un prizonero. Despues cu e tabata den prizon pa dos aña, awor apostel Pablo tabata pará dilanti e gobernante dje hudiunan, Herodes Agripa II. E rey i su compañera, Bernice, a bini “cu hopi exhibicion grandioso i a drenta den e sala di reunion huntu cu comandantenan militar i tambe hombernan di eminencia dje stad.” (Echonan 25:23) Un obra di referencia ta bisa: “Probablemente, tabatin vários shen hende presente.”

E gobernadó cu a caba di haña su nombramentu, Festo, a organisá e reunion. Si tabata pa su predecesor, gobernadó Félix, Pablo por a keda putri numa den prizon. Pero Festo a cuestioná e valides dje acusacionnan contra Pablo. Sí, Pablo a insistí asina tantu cu e tabata inocente, te cu el a pidi pa presentá su caso dilanti César! E caso di Pablo a lanta Rey Agripa su curiosidad. “Ami mes tambe kier tende e homber,” el a bisa. Mesora, Festo a haci areglo pa esaki, probablemente puntrando su mes kico e rey lo a pensa dje prizonero excepcional aki.—Echonan 24:27–25:22.

E siguiente dia, Pablo a hañ’é pará dilanti un gran multitud di dignatario. “Mi ta considerá mi felis di cu ta dilanti bo mi por presentá mi defensa awe,” el a bisa Agripa, “specialmente ya cu bo ta experto den tur e custumbernan i tambe e puntonan di controversia entre e hudiunan. P’esei mi ta rogá bo pa scuchá mi cu pacenshi.”—Echonan 26:2, 3.

Pablo Su Defensa cu Curashi

Promé, Pablo a conta Agripa con el a persiguí cristiannan den pasado. “Mi a purba di obligá nan di nenga nan fe,” el a bisa. “Mi a bai asina leu di persiguí nan asta den stadnan djafó.” Pablo a sigui relatá con el a haña un vision extraordinario den cua Jesus resucitá a puntr’é: “Pakico bo ta persiguí mi? Ta duru pa bo sigui dal scop contra punta skerpi.”a—Echonan 26:4-14.

E ora ei, Jesus a comisioná Saulo p’e duna testimonio na hende di tur nacion, “tantu dje cosnan cu bo a mira como di loke lo mi hací bo mira tocante mi.” Pablo a conta cu e tabata haci esfuerso diligente pa cumpli cu su asignacion. Pero, “pa motibu di e cosnan aki,” el a bisa Agripa, “e hudiunan a cogé mi den e tempel i a purba matá mi.” Apelando na Agripa su interes den hudaismo, Pablo a pone énfasis riba e echo cu su trabou di duna testimonio en realidad ta encerá no “bisa nada fuera di loke tantu e Profetanan como Moises a bisa cu lo a bai sosodé” relacioná cu e morto i resureccion dje Mesías.—Echonan 26:15-23.

Festo a interumpí. El a sclama: “Tantu siñansa ta hibando bo na locura!” Pablo a contestá: “Mi no ta birando loco, Excelentísimo Festo, sino mi ta declarando dichonan dje berdad i di sano huicio.” Anto Pablo a bisa tocante Agripa: “E rey cu ken mi ta papiando cu frankesa di expresion sa bon dje cosnan aki; pasobra mi ta convencí di cu ni sikiera un dje cosnan aki ta scapa for di su atencion, pasobra e cos aki no a ser hací den un skina.”—Echonan 26:24-26.

Despues Pablo a dirigí su mes directamente na Agripa. “Rey Agripa, bo ta kere e Profetanan?” Sin duda, e pregunta a pone Agripa sintié incómodo. Al fin i al cabo, e tabatin un imágen cu e mester a cuida, i si e bai di acuerdo cu Pablo, lo ta mescos cu apoyá loke Festo ta yama “locura.” Pablo, cu kisas a sinti cu Agripa tabata indeciso, a contestá su mes pregunta. “Mi sa cu bo ta kere,” el a bisa. Awor Agripa a papia, pero el a soru pa su palabranan no a compromet’é cu nada. “Den poco tempu,” el a bisa Pablo, “lo bo convencé mi pa bira un cristian.”—Echonan 26:27, 28.

Abilmente, Pablo a usa Agripa su palabranan evasivo pa establecé un punto poderoso. “Lo mi deseá di Dios,” el a bisa, “cu, sea den poco tempu of hopi tempu, no solamente abo sino tur esnan cu ta tendé mi awe por bira hende manera ami tambe ta, cu excepcion dje cadenanan aki.”—Echonan 26:29.

Agripa ni Festo no a haña cu Pablo a haci nada pa merecé morto of castigu di prizon. Sin embargo, nan no por a anulá su peticion pa presentá su caso na César. Ta p’esei Agripa a bisa Festo: “E homber aki por a ser poní den libertad si e no a apelá na César.”—Echonan 26:30-32.

Les pa Nos

E método cu Pablo a usa pa duna testimonio na dignatarionan ta un excelente ehempel pa nos. Ora el a papia cu Rey Agripa, Pablo a mustra discrecion. Sin duda e tabata sa dje scandal rondó di Agripa i Bernice. Nan relacion tabata unu di incesto, ya cu eigenlijk Bernice tabata ruman muher di Agripa. Tog, na e ocasion aki, Pablo no a scoge pa duna un sermon tocante moralidad. Mas bien, el a enfatisá puntonan cu e i Agripa tabatin en comun. Ademas, maske cu Pablo a haña su educacion cerca e fariseo sabí, Gamaliel, el a reconocé cu Agripa tabata un experto riba e tereno di custumbernan hudiu. (Echonan 22:3) Apesar di Agripa su normanan moral personal, Pablo a papia cuné cu respet pasobra Agripa tabata ocupá un posicion di autoridad.—Romanonan 13:7.

Aunke nos ta duna testimonio di nos creencianan cu curashi, nos meta no ta pa exponé of condená prácticanan impuru di nos scuchadónan. Mas bien, pa nos hacié mas fácil pa nan aceptá e berdad, nos mester resaltá e aspectonan positivo dje bon nobo dor di enfatisá speransanan cu nos tin en comun. Ora nos ta papia cu hendenan mas grandi of esnan cu ta ocupá un posicion di autoridad, nos mester duna reconocimentu na nan posicion. (Levítico 19:32) Asina, nos por imitá Pablo, kende a bisa: “Mi a bira tur cos pa tur clase di hende pa di tur manera mi por salba algun.”—1 Corintionan 9:22.

[Nota]