Dario—Un Rey cu Sentido di Husticia

RELACIONA cu e proyectonan di construccion cu un rey famoso a efectuá, el a broma un biaha: “N’e frontera di Babilonia mi a traha un curá di un muraya fuerte n’e banda oost. Mi a coba un canal . . . Mi a traha cu breu i klenku un muraya fuerte cu, mescos cu un ceru, hende no por move.” Sí, Rey Nabucodonosor di Babilonia a ocupá su mes den un programa di construccion extenso i a traha duru pa fortificá e stad capital di su imperio. Pero e stad di Babilonia no a resultá mes impenetrabel cu el a imaginá.

Prueba di esaki a bini dia 5 di october 539 P.E.C. Riba e dia ei, e gobernante perso Ciro II, acompañá p’e ehército di Media, a conkistá Babilonia i a ehecutá su gobernante caldeo, Bélsasar. Ken lo a bira awor e promé gobernante dje stad recien conkistá aki? Daniel, profeta di Dios, kende tabata presente den e stad ora el a cai, a skirbi: “Dario e medo mes a ricibí e reino, ora e tabatin rond di sesentidos aña di edad.”—Daniel 5:30, 31.

Ken Dario tabata? Ki clase di gobernante el a resultá di ta? Con el a trata profeta Daniel, kende tabata den exilio na Babilonia pa mas cu 70 aña?

UN REY SIN MUCHU HISTORIA

No tin muchu informacion histórico tocante Dario e medo. E medonan no a laga casi ningun registro skirbí. Ademas, e cientos di miles di tablanan skirbí na spijkerschrift cu a coba saca na Medio Oriente ta presentá un historia incompleto cu hopi buracu. Tin masha poco otro skirbimentunan seglar di antigwedad cu ta existí ainda, i nan ta data di un siglo of mas despues dje sucesonan cu tin di haber cu Dario.

No obstante, evidencia ta indicá cu despues cu e gobernante perso Ciro II a capturá Ecbatana, capital di Media, el a logra gana e lealtad dje medonan. Despues di esei, medo i personan a bringa huntu bou di su liderato. Pa loke ta nan relacion, escritor Robert Collins ta remarcá den su buki The Medes and Persians (E Medo i Personan): “Den tempu di pas e medonan tabata riba mésun nivel cu e personan. Cu frecuencia a nombra nan na posicionnan haltu den gobiernu civil i puestonan di liderato den e ehército perso. Stranheronan a referí n’e medo i personan, sin haci distincion entre esnan conkistá i e conkistadónan.” Asina Media a mescla cu Persia pa forma e Imperio Medo-Persia.—Daniel 5:28; 8:3, 4, 20.

E medonan sigur a hunga e papel principal den e caida di Babilonia. E Scritura ta presentá “Dario, yu di Asuero dje simia dje medonan” como e promé rey dje Imperio Medo-Persia pa goberná riba Babilonia. (Daniel 9:1) Su poder real a incluí e autoridad pa establecé statutonan “segun e ley dje medonan i e personan, cu no ta ser anulá.” (Daniel 6:8) Loke Bijbel ta bisa tocante Dario ta duna nos un idea di su personalidad i tambe un motibu relevante p’e falta di informacion seglar tocante dje.

DANIEL FABORECÍ

Pronto despues cu Dario a asumí poder na Babilonia, el a nombra “shentibinti sátrapa, cu tabata riba henter e reino,” Bijbel ta bisa, “i riba nan tres alto funcionario, di cua Daniel tabata unu.” (Daniel 6:1, 2) Sin embargo, Daniel su posicion haltu tabata masha desagradabel p’e otro funcionarionan. Sin duda su integridad a yuda restringuí corupcion, i esei probablemente a causa rencor. Envidia tambe lo mester a influenciá e funcionarionan haltu, ya cu e rey a faborecé Daniel i e tabatin pensá di hacié promé minister.

Sperando di pone un fin n’e situacion aki, e dos funcionarionan i e sátrapanan a inventá un trampa legal. Nan a bai dilanti e rey i a trece un decreto p’e firma cu lo a prohibí hende haci “un peticion na cualkier dios of hende” cu no ta Dario pa 30 dia. Nan a proponé pa tira cualkier persona cu violá e ley den e cueba di leon. Nan a laga Dario kere cu tur funcionario di gobiernu di rango haltu lo a faborecé un decreto asina, i e proposicion a parce di ta un expresion di nan lealtad n’e rey.—Daniel 6:1-3, 6-8.

Dario a firma e decreto i pronto a haña su mes confrontá cu su efectonan. Daniel a bira e promé persona cu a violá e decreto, ya cu el a sigui haci oracion na Jehova Dios. (Compará cu Echonan 5:29.) A tira fiel Daniel den e cueba di leon apesar dje esfuersonan sincero dje rey pa haña un manera di scapa dje ley incambiabel. Dario a expresá confiansa cu e Dios di Daniel tabatin poder pa conserbá e profeta bibu.—Daniel 6:9-17.

Despues di a pasa anochi sin drumi i na yuna, Dario a pura bai n’e cueba di leon. Ki contentu el a keda pa haña Daniel bibu i ileso! Pa haci husticia, mesora e rey a laga tira Daniel su acusadónan i nan famia den e cueba di leon. Tambe el a emití un órden cu ‘den tur dominio di su reino, hende tabatin cu tembla i teme dilanti di e Dios di Daniel.’—Daniel 6:18-27.

Ta bisto cu Dario a respetá e Dios i religion di Daniel i tabata ansioso pa corigí e malu cu nan a hacié. Sin embargo, e echo cu el a castigá e acusadónan di Daniel lo mester a lanta odio den e otro funcionarionan. Ademas, Dario su proclamacion cu a manda pa tur hende den e reino “teme dilanti di e Dios di Daniel” lo mester a causa rencor profundo entre e cleronan poderoso di Babilonia. Siendo cu e factornan aki sigur a influenciá e escribanan, no ta nada straño cu nan lo a cambia registronan seglar pa eliminá informacion tocante Dario. Tog, e relato corticu den e buki di Daniel ta pinta Dario como un gobernante cu sentido di rectitud i husticia.