Berdadero Yudansa pa Famia

“Francamente bisá, tin un crísis di famia na Merca. Ta imposibel saca cualkier otro conclusion for dje cantidad di divorcio, estadística di yu cu ta nace pafó di matrimonio, [i] casonan di maltrato di hóben i di casá.”

E PALABRANAN aki dje comentarista di television mericano, Tom Brokaw, ta conta pa mayoria pais. Kico e crísis aki ta nificá?

Den hopi manera famia ta e bloki básico di construccion di sociedad. Si famia ta den problema, e sociedad tambe ta den problema. Ademas, famia ta e fuente di sosten emocional i financiero pa yu. Ta caminda nan ta siña e promé lesnan i e lesnan mas importante di bida. Si famia ta den problema, kico e yunan ta siña? Unda nan siguridad ta? Ki clase di adulto nan lo bira?

Tin yudansa pa famia den e tempu di crísis aki? Sí. Famia ta un institucion cu Dios mes a establecé. (Génesis 1:27, 28) I den su Palabra, Bijbel, el a duna guia indispensabel pa famia. (Colosensenan 3:18-21) Ta cierto cu nos no por cambia sociedad den su totalidad, pero sí nos por aplicá conseho di Bijbel na nos mes famia. Nos lo kier conta bo di algun hende cu a haci esaki i e bon resultadonan cu nan a haña.

Prevení Divorcio

Den vários pais, rond di 50 porciento di tur matrimonio ta caba den divorcio. Esei ta un fracaso na gran escala den relacionnan humano! Ta berdad cu hopi hende cu pa e motibu aki ta bira mayor soltero ta haci un trabou heroico den lanta nan yunan. Pero sigur mayoria lo ta di acuerdo cu ta mihó ora un pareha por resolvé nan problemanan i keda huntu.

E matrimonio di un pareha na Islanan Sálomon tabata na punto di kibra. E esposo, yu di un kasike, tabata violento i tabatin hopi mal custumber. Bida tabata asina difícil pa su casá cu esaki asta a intentá na cometé suicidio. Un dia, e esposo a bai di acuerdo pa studia Bijbel cu Testigonan di Jehova. El a siña cu ken cu kier agradá Dios no solamente tin cu sa kico ta malu, sino tambe mester “odia loke ta malu.” (Salmo 97:10) Esei ta incluí odia cosnan manera gañamentu, ladronicia, violencia i buracheria. El a tuma esaki na pechu i pronto a vence su mal custumbernan i su caracter violento. E cambio a asombrá su esposa, i nan matrimonio a mehorá considerablemente, danki n’e influencia dje Palabra di Dios.

Na Sur Africa, un señora cu ta Testigo di Jehova a tende cu su doño di trabou tabata pensa di divorciá for di su esposo. E Testigo a papia cuné tocante Dios su punto di bista di matrimonio i a mustr’é e buki titulá E Secreto pa Felicidad den Famia. E buki aki, publicá dor di Testigonan di Jehova, ta resaltá e principionan di Bijbel cu ta aplicá na matrimonio, i ta pone énfasis particular riba con Bijbel ta yuda parehanan resolvé problema. Tantu e doño di trabou como su casá a lesa e buki i a trata sinceramente na aplicá e conseho di Bijbel cu e buki a duna. Como resultado, nan a dicidí pa no divorciá mas. Otro matrimonio cu a salba dor di aplicacion di principio bíblico.

Distinto Religion den Cas

Kico di un matrimonio caminda e casánan tin religion distinto di otro? Bijbel ta consehá cristiannan den un manera realístico pa casa “solamente den Señor.” (1 Corintionan 7:39) Pero, tin bes un casá ta cambia di religion. Esei mester nificá fin dje matrimonio? Di ningun manera.

A puntra un señora na Botswana cu a caba di bira Testigo di Jehova, con su religion nobo a cambi’é. El a pidi su casá contestá p’e, i esaki ta loke su casá a bisa: “For di dia mi casá a bira Testigo di Jehova, mi a mira hopi cambio positivo den dje. Awor e tin un fortalesa ketu i sabí cu e no tabatin promé. E tabatin e fortalesa i conviccion pa stop di huma, un problema cu ami te ainda no por vence. Mi esposa a bira mas amoroso i cariñoso cu ami i mi yunan, i tambe cu otro hende. E ta tolerá mas, foral pa cu e muchanan. Mi ta mir’é dedicá tempu den su ministerio, tratando na yuda otro hende mehorá nan bida. Tambe mi a mira cambionan positivo den mi mes. Mi ta kere cu esaki ta completamente debí na su ehempel.” Ki un bon efecto principio di Bijbel tabatin riba e matrimonio aki! Hopi hende cu no ta Testigo a duna comentario similar tocante nan casá Testigo.

Ora Tata Ta Neglishá Su Responsabilidadnan

E relacion entre un tata cu su yunan ta un factor clave den edificá famia fuerte. Apostel Pablo a consehá: “Boso, tatanan, no iritá boso yunan, sino sigui cria nan den e disiplina i reglamentu mental di Jehova.” (Efesionan 6:4) Nada straño, anto, cu un artículo den The Wilson Quarterly a culpa tatanan cu no ta cumpli cu nan papel p’e cantidad di problemanan social. E artículo a bisa: “Entre 1960 pa 1990, e porcentahe di yu cu ta biba sin nan tata biológico a bira mas cu dòbel . . . Falta di un tata den cas ta un dje causanan principal dje problemanan mas preocupante cu ta plaga sociedad mericano awe.”

Esaki ta nificá cu yunan cu no ta haña e guia di nan tata ta destiná pa fracasá? No. E salmista di antigwedad a bisa: “Den caso cu mi mes tata i mi mes mama bandoná mi, asta Jehova mes lo ricibí mi.” (Salmo 27:10) Un mucha homber di nuebe aña na Tailandia a descubrí cu esaki ta berdad. El a perde su mama ora e tabata baby, i su tata, cu no tabata kier e, a lagu’é cerca su wela. Dor cu e mucha a sinti cu niun hende no tabata kier e ni stim’é, el a bira rebelde i a haña e reputacion di ta un abusadó. El a asta menasá su wela. Dos Testigo di Jehova, evangelisadó di tempu completo, a ripará cu cada bes e tabata para pafó di Salon di Reino. Un dia nan a invit’é na nan cas.

Nan a cont’é tocante Dios, cu, mescos cu un tata, ta stima su yunan. Tambe nan a papia tocante e Paradijs terenal cu Dios a primintí hende fiel. (Revelacion 21:3, 4) Tur esaki a atraé e mucha, i tur dia e tabata bini bek pa siña mas. E Testigonan a bis’é cu lo e tabatin cu stop di abusá di otro mucha si di berdad e tabata kier pa Dios ta su Tata. Esaki tabata na armonia cu Pablo su palabranan n’e romanonan: “Cuantu cu ta dependé di boso, sea pacífico cu tur hende.” (Romanonan 12:18) Tambe lo e tabatin cu trata su wela lief. (1 Timoteo 5:1, 2) No a tarda muchu cu el a cuminsá pone principionan di Bijbel na práctica, loke sin duda a mehorá su bida di famia cu su wela considerablemente. (Galationan 5:22, 23) Bisiñanan a keda asina impresioná cu e cambionan cu nan a observá den dje, cu nan tabata kier pa awor nan yunan studia Bijbel cu Testigonan di Jehova!

Un Disposicion Pacífico

Apostel Pablo a skirbi n’e colosensenan: “Bisti boso cu amor, pasobra e ta un laso perfecto di union. Tambe, laga e pas di e Cristo controlá den boso curason.” (Colosensenan 3:14, 15) Un disposicion pacífico i amor di curason sigur lo mara un famia huntu. I eseinan por uni famianan cu ta dividí pa hopi tempu. Rukia, cu ta biba na Albania, tabatin mas cu 17 aña sin papia cu su ruman homber pa motibu di un desacuerdo di famia. Ora el a studia Bijbel cu Testigonan di Jehova, el a siña cu e Scritura ta urgi tur sirbidó di Dios pa cultivá pas cu otro hende. “Lagu’e busca pas i sigui tras di dje.”​—1 Pedro 3:11.

Rukia a realisá cu e tabatin cu haci pas cu su ruman. El a haci oracion henter anochi, i e siguiente mainta, cu un curason ansioso, el a cana bai cas di su ruman. Rukia su subrina a habri porta i a puntra sorprendí: “Kico bo ta haci aki?” Cu calmu Rukia a pidié pa papia cu su ruman, splicando cu e kier a haci pas cuné. Pakico? Pasobra awor el a realisá cu esaki ta e boluntad di Dios. Su ruman a reaccioná faborablemente, i nan rencuentro a bai compañá cu brasa i lágrima di goso—otro famia trecé huntu debí cu nan a sigui principionan di Bijbel.

Mal Asociacion

“Awendia, cualkier mucha ta wak television shete ora pa dia. Pa ora e caba scol básico, el a mira mas cu ocho mil asesinato i shen mil acto di violencia.” Asina e buki The 7 Habits of Highly Effective Families (E 7 Custumbernan di Famianan Hopi Exitoso) ta bisa. Ki efecto e esenanan aki tin riba mucha? Tocante esei “expertonan” no ta di acuerdo entre nan cu nan, pero Bijbel sí ta spierta fuertemente contra mal asociacion. Por ehempel, e ta bisa: “Esun cu tin trato cu hende estúpido lo bai e malu.” (Proverbionan 13:20) Tambe e ta bisa: “Mal asociacion ta daña custumbernan útil.” (1 Corintionan 15:33) Nos por mehorá bida di famia si nos considerá sabiamente cu e principio aki ta aplicá sea cu e mal asociacion ta cu personanan mes of den un programa di television.

n mama na Luxemburgo tabata studia Bijbel cu un Testigo di Jehova. Un dia el a conta e Testigo cu parti anochi su dos yu muhernan di shete i ocho aña di edad tabata gusta pleita i bringa cu otro. E Testigo a puntra kico e muchanan ta haci parti anochi. E mama a bisa cu nan ta wak television miéntras e ta limpia cushina. Ki programa? “Ai, un par di kinderuurtje,” e mama a contestá. Ora su bishitante a mencioná cu e programanan ei ta violento, mama dje muchanan a primintí di chek nan.

E siguiente dia mes, e mama a bisa cu e kinderuurtje cu su yunan tabata wak a shok e. Tabata trata di monsternan imaginario extraterestre cu di un manera feros ta destruí tur cos den nan caminda. El a splica su yunan cu Jehova ta odia violencia i no ta contentu ora nos ta wak e crueldadnan ei. (Salmo 11:5) Dor cu e muchanan kier agradá Jehova, nan a bai eens pa pinta i kleur en bes di wak television. Mesora, nan conducta agresivo a cambia, i e ambiente di famia a mehorá.

Esakinan ta djis algun ehempel pa mustra cu aplicacion di principio bíblico ta mehorá bida di famia. E conseho di Bijbel ta aplicabel den tur tipo di situacion. E ta auténtico i tin un efecto poderoso riba hende su bienestar. (Hebreonan 4:12) Ora hende ta studia Bijbel i ta purba sinceramente di aplicá loke e ta bisa, esei ta fortalecé famia, e ta mehorá personalidad i ta yuda evitá fayonan. Asta si ta un miembro so di un famia ta sigui e conseho di Dios, cosnan ta bira mihó. Berdaderamente, den tur área di bida, nos mester mira e Palabra di Dios mescos cu e salmista cu a skirbi: “Bo palabra ta un lampi pa mi pia, i un lus pa mi caminda.”​—Salmo 119:105.

[Plachi na página 5]

Hende a resolvé problema di famia dor di aplicá principio bíblico