E Gran Trahador di Klei i Su Obra
“[Bira] un wea pa un propósito onorabel, . . . prepará pa tur bon obra.”—2 TIMOTEO 2:21.
1, 2. (a) Den ki sentido Dios su creacion di homber i muher tabata un obra maestro? (b) Pa ki propósito e Gran Trahador di Klei a producí Adam cu Eva?
JEHOVA ta e Gran Trahador di Klei. Un obra maestro di su creacion tabata nos promé mayor, Adam. Bijbel ta bisa nos: “Jehova Dios a pasa na forma e hende di stof di tera i di supla den su nanishi e rosea di bida, i e hende a bira un alma bibiente,” esta, un “criatura cu ta hala rosea.” (Génesis 2:7, nota na pia di página) E promé creacion humano ei tabata perfecto, formá den e imágen di Dios mes, un evidencia di Su sabiduria divino i su amor pa berdadero husticia i rectitud.
2 Usando material di Adam su repchi, Dios a forma tambe un complemento i yudante p’e homber: un muher. Eva su beyesa perfecto a surpasá asta esun dje muhernan di mas bunita awe. (Génesis 2:21-23) Ademas, Dios a duna e promé pareha humano curpa i facultadnan diseñá perfectamente pa cumpli cu nan proyecto asigná di transformá e tera aki den un paradijs. Tambe a duna nan poder pa cumpli cu e mandamentu di Dios declará na Génesis 1:28: “Sea fructífero i bira hopi i yena e tera i domin’é, i tene dominio riba piscá di laman i riba criatura bulador di shelu i riba tur criatura bibiente cu ta move riba tera.” Finalmente, e hofi mundial aki mester a ser poblá pa miles di miyones di hende gososo, uní huntu den e clase di amor cu ta “un laso perfecto di union.”—Colosensenan 3:14.
3. Con nos promé mayornan a bira weanan di desonor, i cu ki resultado?
3 Lamentablemente, nos promé mayornan a scoge deliberadamente pa rebelá contra e autoridad di nan Creador Soberano, e Gran Trahador di Klei. Nan curso a bira manera Isaías 29:15 i 16 a describí: “Ai di esnan cu ta baha na gran profundidad pa sconde conseho for di Jehova mes, i kende nan obranan a tuma lugá den un lugá scur, miéntras nan ta bisa: ‘Ken ta mira nos, i ken sa di nos?’ . . . Acaso mester considerá e trahadó di klei igual cu e klei? Pues e cos trahá mester bisa di esun cu a trah’é: ‘E no a traha mi’? I realmente e cos formá mes ta bisa di su formadó: ‘E no a mustra comprendimentu’?” Nan desobedencia a hiba na desaster: e sentencia di morto eterno. Ademas, henter e rasa humano cu a originá for di nan a heredá picá i morto. (Romanonan 5:12, 18) E bunitesa dje creacion dje Gran Trahador di Klei a keda cu un sicatris profundo.
4. Pa ki propósito onorabel nos por sirbi?
4 No obstante, asta den nos condicion actual imperfecto, nos como desendiente di Adam pecaminoso por alabá Jehova cu e palabranan di Salmo 139:14: “Lo mi alabá bo pasobra di un manera cu ta inspirá temor mi ta trahá maraviyosamente. Bo obranan ta maraviyoso, manera mi alma sa masha bon.” Sin embargo, ki tristu cu e obra original dje Gran Trahador di Klei a haña un mancha asina mahos!
E Trahador di Klei Ta Extendé Su Obra
5. Con e Gran Trahador di Klei a ehercé su abilidad despues?
5 Afortunadamente, nos Creador lo a ehercé su abilidad como Trahador di Klei muchu mas ayá cu formacion so di su creacion inicial di humanidad. Apostel Pablo ta bisa nos: “O hende, ken pues abo ta realmente, cu bo ta contestá Dios bek? Acaso e cos moldeá lo bisa esun cu a molde’é: ‘Pakico bo a traha mi asina aki?’ Kico? E trahadó di wea di klei no tin autoridad riba e klei pa traha for dje mésun klompi un wea pa un uso onorabel, i e otro pa un uso desonrabel?”—Romanonan 9:20, 21.
6, 7. (a) Den ki manera hopi hende awe ta scoge pa ser moldeá pa uso desonrabel? (b) Con e hustunan ta ser moldeá pa un uso onorabel?
6 Sí, un parti dje Gran Trahador di Klei su obra lo ser moldeá pa uso onorabel, i e otro parti, pa uso desonrabel. Esnan cu ta scoge pa bai cu mundu segun cu e ta sink cada bes mas hundu den e moeras di maldad, ta ser moldeá den un manera cu lo marca nan pa destruccion. Ora e glorioso Rey, Cristo Jesus, bini pa huicio, e weanan desonrabel ei lo incluí tur hende cabesura, semehante na cabritu, cu, manera Mateo 25:46 ta declará, “lo bai pa cortamentu eterno.” Pero “esnan hustu,” mansu manera carné, cu ta moldeá pa un uso “onorabel,” lo heredá “bida eterno.”
7 Humildemente, e hustunan aki lo a someté nan mes pa Dios moldea nan. Nan a drenta den Dios su caminda di bida. Nan a aceptá e conseho na 1 Timoteo 6:17-19: “Pone [boso] speransa, no den rikesa insigur, sino den Dios, cu ta percurá pa nos tur cos ricamente, pa nos por disfrutá di nan.” Nan a dedicá nan mes “pa obra loke ta bon, pa ta ricu den obranan excelente, pa ta generoso, cla pa compartí, atesorando pa nan mes cu siguridad un fundeshi excelente pa futuro, pa nan por haña un gara firme riba e berdadero bida.” E berdad divino ta moldea nan i nan ta ehercé un fe inkebrantabel den Jehova su percuracion mediante Cristo Jesus, cu “a duna su mes como un rescate corespondiente” pa por restorá tur loke a bai perdí dor dje picá di Adam. (1 Timoteo 2:6) Cu ki un spiritu boluntario anto, nos mester someté nos n’e conseho di Pablo pa “bisti [nos mes] cu e personalidad nobo, cu mediante conocimentu exacto ta ser hací [moldeá] nobo segun e imágen di Esun cu a cre’é”!—Colosensenan 3:10.
Ki Clase di Wea Abo Lo Ta?
8. (a) Kico ta determiná ki clase di wea un persona ta bira? (b) Cua dos factornan ta influenciá con bo ta ser moldeá?
8 Kico ta determiná ki clase di wea un persona ta bira? Esei ta su actitud i conducta. Esakinan ta ser formá na promé lugá dor dje deseo i inclinacionnan di curason. E rey sabí Sálomon a bisa: “Curason di hende terenal por planea su caminda, pero Jehova mes ta dirigí su pasonan.” (Proverbionan 16:9) Na di dos lugá, su actitud i conducta ta ser formá dor dje cosnan cu e ta tende i mira, su asociacion i experencia. P’esei, ta ki importante pa nos haci caso dje conseho: “Esun cu ta cana cu hende sabí lo bira sabí, pero esun cu tin trato cu hende estúpido lo bai e malu.” (Proverbionan 13:20) Manera 2 Pedro 1:16 ta spierta nos, nos tin cu evitá di sigui “cuentanan falsu mañosamente inventá,” of segun e version católico romano di Knox, “fábula cu hende ta inventá.” Esakinan lo incluí hopi dje siñansanan apóstata i celebracionnan religioso di cristiandad.
9. Con nos por respondé faborablemente n’e manera cu e Gran Trahador di Klei ta moldea nos?
9 N’e manera cu nos ta reaccioná anto, Dios por moldea nos. Cu humildad dilanti Jehova, nos por ripití e oracion di David: “Scudriñá mi completamente, o Dios, i conocé mi curason. Examiná mi, i conocé mi pensamentunan inkietante, i mira si tin den mi algun caminda doloroso, i guia mi den e caminda di tempu indefiní.” (Salmo 139:23, 24) Jehova ta percurá p’e mensahe di Reino ser predicá. Nos curason a respondé cu aprecio n’e bon nobo i na Dios su guia. Mediante su organisacion e ta ofrecé nos vários privilegio cu tin di haci cu predicacion dje bon nobo; laga nos gara esakinan i apreciá nan profundamente.—Filipensenan 1:9-11.
10. Ki esfuerso nos tin cu haci pa sigui programanan spiritual?
10 Ta masha importante mes pa nos presta atencion constante n’e Palabra di Dios, dor di sigui un programa diario di lesa Bijbel i dor di haci e Scritura i sirbishi na Jehova un tema di combersacion den nos famia i entre nos rumannan. Por lo general, e programa di adoracion di mainta cu tur famia di Betel i grupo di misionero di Testigonan di Jehova ta conducí na mesa di desayuno, ta encerá, un siman pa lectura corticu di Bijbel, i e otro siman pa consideracion dje Anuario dje aña coriente. Bo famia por tin un areglo similar? Esta un cantidad di beneficio nos tur ta ricibí tambe, dor di nos asociacion den e congregacion cristian, dor di nos reunimentu huntu, i foral dor di nos participacion den e studio semanal di E Toren di Vigilancia!
Moldeá pa Lucha Contra Prueba
11, 12. (a) Con nos lo por aplicá Santiago su conseho relacioná cu prueba den nos bida diario? (b) Con e experencia di Job ta animá nos pa mantené integridad?
11 Den nos bida diario, Dios ta permití cierto situacionnan presentá, di cua algun nos por haña difícil. Con nos mester mira esakinan? Manera Santiago 4:8 ta consehá, laga nos no bira amargá nunca, sino laga nos hala cerca Dios, confiando den dje cu henter nos curason, cu e siguransa cu segun cu nos ta ‘hala cerca dje, lo e hala cerca nos.’ Ta cierto cu nos lo tin cu wanta dificultad i prueba, pero Dios ta permití nan pasobra nan ta yuda moldea nos cu un resultado felis. Santiago 1:2 i 3 ta sigurá nos: “Consider’é tur goso, mi rumannan, ora boso ta topa cu vários prueba, ya cu boso sa cu e calidad probá aki di boso fe ta obra awante.”
12 Santiago ta bisa tambe: “No laga ningun hende, ora nan ta bou di prueba, bisa: ‘Dios ta pone mi na prueba.’ Pasobra cu cos malu no por pone Dios na prueba ni e mes no ta pone ningun hende na prueba. Pero cada un ta ser probá dor di ser atraí i tentá pa su mes deseo.” (Santiago 1:13, 14) Nos pruebanan por ta hopi i variá, pero mescos cu tabata e caso cu Job, nan tur ta yuda moldea nos. Ki un garantia magnífico e Scritura ta duna nos na Santiago 5:11: “Mira! Nos ta pronunciá felis esnan cu a wanta. Boso a tende dje awante di Job i a mira e resultado cu Jehova a duna, cu Jehova ta masha tierno di cariño i misericordioso.” Manera wea den man dje Gran Trahador di Klei, laga nos mantené integridad tur ora, cu confiansa manera esun di Job den e resultado final!—Job 2:3, 9, 10; 27:5; 31:1-6; 42:12-15.
Con pa Moldea Nos Yunan
13, 14. (a) Na ki tempu mayornan mester cuminsá moldea nan yunan, i cu mira riba ki resultado final? (b) Ki resultadonan felis bo por mencioná?
13 Mayornan por yuda moldea nan yunan for di infancia mes, i ki excelente wardadónan di integridad nos hóbennan lo por bira! (2 Timoteo 3:14, 15) Esaki tabata e caso asta ora e pruebanan tabata sumamente difícil. Algun aña pasá, tempu tabatin persecucion intenso den un pais africano, un famia confiabel a soru pa imprimí E Toren di Vigilancia clandestinamente den un ket patras di nan cas. Un dia soldánan tabata pasando den e caya, buscando hombernan hóben di cas pa cas pa hinca den e ehército. Ainda tabatin tempu p’e dos mucha hombernan den e famia aki sconde, pero den nan búskeda, e soldánan sin duda lo a bin topa e mashin di imprenta. Esaki lo por a hiba na tortura of posiblemente na morto di henter e famia. Kico nan por a haci? E dos mucha hombernan no a keda ketu, sino a cita Juan 15:13 cu curashi: “Ningun hende tin amor mas grandi cu esaki, cu un hende entregá su alma na fabor di su amigunan.” I p’esei a insistí pa keda den sala. E soldánan lo a haña nan i sin duda someté nan na tortura cruel of asta mata nan si nan a nenga di drenta ehército. Pero a lo ménos e soldánan lo no a sigui busca mas. Esei lo a spar e mashin di imprenta i e otro miembronan di famia. Pero, tabatin un resultado notabel. E soldánan a gewoon salta e cas aki i a sigui bai n’e otronan! E weanan humano ei moldeá pa uso onorabel a sobrebibí, huntu cu e mashin di imprenta, pa sigui publicá alimento spiritual oportuno. Un dje dos muchanan ei i su ruman muher ta sirbiendo awor na Betel; ainda e ta traha cu e mashin bieu di imprenta.
14 Por siña hóbennan con pa haci oracion, i Dios ta contestá nan oracion. Un ehempel sobresaliente di esaki a tuma lugá durante e masacrenan na Ruanda. Ora rebeldenan tabatin un hobencita di seis aña i su mayornan cla prepará pa ehecutá cu granada, e yu muher a pidi Jehova den un oracion ferviente na bos haltu p’e spar nan pa nan por sigui sirbié. Esei a conmové esnan cu tabata cla pa mata nan i nan a bisa: “Pa motibu dje mucha muher chikitu aki nos no por mata boso.”—1 Pedro 3:12.
15. Contra ki influencia coruptivo Pablo a spierta nos?
15 Mayoria di nos hóbennan no ta haña nan cu situacionnan mes difícil cu esnan describí aki, pero awe nan ta enfrentá hopi prueba na scol i den sociedadnan corumpí: palabra malu, pornografia, entretenimentu degradá i preshon di nan pareunan pa participá den prácticanan malu, ta cosnan cu ta reina den hopi lugá. Bes tras bes, apostel Pablo a spierta contra e influencianan aki.—1 Corintionan 5:6; 15:33, 34; Efesionan 5:3-7.
16. Con un persona por bira un wea pa uso onorabel?
16 Despues di a referí na weanan di cua ‘algun ta wardá pa un propósito onorabel pero otronan pa un propósito faltando onor,’ Pablo ta bisa: “P’esei, si un hende ta keda leu di e últimonan ei, lo e ta un wea pa un propósito onorabel, santificá, útil pa su doño, prepará pa tur bon obra.” Pues, laga nos animá nos yunan pa vigilá nan asociacion. Laga nan “hui for di e deseonan incidental di hubentud, pero sigui tras di husticia, fe, amor, pas, huntu cu esnan cu ta inbocá Señor for di un curason limpi.” (2 Timoteo 2:20-22) Un programa di famia pa “edificá otro” por ta masha balioso den moldea nos yunan. (1 Tesalonicensenan 5:11; Proverbionan 22:6) Lesa i studia Bijbel tur dia, usando publicacionnan apropiado di Sociedad, por ta un bon yudansa.
Conseho pa Moldea Un i Tur
17. Con disiplina lo moldea nos, i cu ki resultado gososo?
17 Pa por moldea nos, Jehova ta duna conseho for di su Palabra i mediante su organisacion. Nunca resistí e conseho divino ei! Ta sabí pa respondé na dje, i lagu’e forma bo pa Jehova por tin bo pa uso onorabel. Proverbionan 3:11 i 12 ta consehá: “E disiplina di Jehova, o mi yu, no rechas’é; i no aborecé su reprendementu, pasobra Jehova ta reprendé esun cu e ta stima, mescos cu un tata ta haci cu un yu den ken e tin placer.” Nos ta haña mas conseho paternal na Hebreonan 12:6-11: “Esun cu Jehova ta stima e ta disipliná . . . Ta cierto cu ningun disiplina ta parce gososo ora di hañ’é, sino penoso; sin embargo, despues, pa esnan cu a ser entrená p’e, e ta duna fruta di pas, esta, husticia.” E canal principal pa tal disiplina mester ta e Palabra inspirá di Dios.—2 Timoteo 3:16, 17.
18. Pa loke ta repentimentu, kico nos ta siña for di Lucas capítulo 15?
18 Jehova ta misericordioso tambe. (Exodo 34:6) Ora hende ta mustra repentimentu sincero asta p’e picá di mas serio, e ta pordoná. Asta ‘yu perdí’ dje tempu actual por ser moldeá den wea pa uso onorabel. (Lucas 15:22-24, 32) Tal bes nos picánan no ta mes serio cu esnan dje yu perdí. Pero nos reaccion humilde na conseho bíblico semper lo moldea nos pa bira wea pa uso onorabel.
19. Con nos por sigui sirbi como wea pa uso onorabel den man di Jehova?
19 Ora nos a siña e berdad nobo-nobo, nos a mustra cu nos ta dispuesto pa laga Jehova forma nos. Nos a bandoná camindanan mundano, a cuminsá bisti e personalidad nobo i a bira cristiannan dedicá i bautisá. Nos a obedecé e conseho di Efesionan 4:20-24, i ‘a kita e personalidad bieu cu a conformá cu nos manera di anda anterior, cu su deseonan engañoso, i a bisti e personalidad nobo cu a ser creá segun e boluntad di Dios den berdadero husticia i lealtad.’ Ohalá nos cada un personalmente sigui ta moldeabel den man di Jehova, e Gran Trahador di Klei, semper sirbiendo como wea pa su uso onorabel!
Como Repaso
◻ Kico ta e propósito dje Gran Trahador di Klei pa nos tera?
◻ Con lo bo por ser moldeá pa uso onorabel?
◻ Den ki manera nos yunan por ser moldeá?
◻ Con nos mester mira disiplina?
[Plachi na página 10]
Lo bo ser moldeá pa uso onorabel of lo bo ser rechasá?
[Plachi na página 12]
Por moldea muchanan for di infancia