E Caminda di Amor No Ta Faya Nunca
“Sigui busca celosamente e donnan mayor. I ainda mi ta mustra boso un caminda surpasante.”—1 CORINTIONAN 12:31.
1-3. (a) Den ki sentido siña expresá amor ta casi mescos cu siña un otro idioma? (b) Ki factornan por hacié difícil pa siña expresá amor?
BO A yega di purba siña un otro idioma? Esei ta un desafio, pa no bisa otro cos! Claro cu un mucha chikitu por siña un idioma djis dor di ser exponí na dje. Su celebro ta mescos cu un spons cu ta absorbá e zonido i nificacionnan di palabra, di manera cu pronto e chikitin ta expresá su mes cu bastante facilidad, tal bes asta sin pega. Esei no ta e caso cu hende grandi. Bes tras bes nos tin cu busca den diccionario di otro idioma, djis pa dominá algun frase básico den un lenga straño. Pero cu tempu i cu suficiente experencia cu e idioma nobo, nos ta cuminsá pensa den e idioma ei i ta bira mas fácil pa papi’é.
2 Siña expresá amor ta casi mescos cu siña un otro idioma. Ta berdad cu un grado dje cualidad divino aki ta inherente den hende. (Génesis 1:27; compará cu 1 Juan 4:8.) Tog, siña expresá amor ta exigí esfuerso extraordinario, specialmente awendia ora casi no tin cariño natural mas. (2 Timoteo 3:1-5) Tin bes esaki ta e caso hustamente den e círculo di famia. Sí, hopi hende ta lanta den un ambiente desagradabel caminda masha poco biaha nan ta tende palabranan amoroso, esta, si tin mes. (Efesionan 4:29-31; 6:4) Con anto, nos por siña expresá amor, asta si nos mes a tend’é masha poco bes?
3 Bijbel por yuda nos. Na 1 Corintionan 13:4-8, Pablo ta duna, no un definicion mecánico di kico amor ta, sino un descripcion bibu con e forma mas haltu aki di amor ta obra. Un consideracion dje versículonan aki lo yuda nos comprendé e caracter dje cualidad divino aki i ekipá nos mihó pa expres’é. Laga nos considerá algun faceta di amor manera Pablo a describié. Nos lo parti nan den grupo grandi segun tres categoria: nos conducta en general; despues, mas specíficamente, nos relacion cu otro hende; i, finalmente, nos awante.
Amor Ta Yuda Nos Vence Orguyo
4. (a) Den ki circunstancia ta corecto pa ta yalurs? (b) Ki tipo di yaluzí ta destructivo, i den ki maneranan?
4 Despues di su comentarionan inicial tocante amor, Pablo a skirbi e corintionan: “Amor no ta yalurs.” (1 Corintionan 13:4) Claro cu tin circunstancianan den cua ta apropiado pa ta yalurs. Por ehempel, Pablo ta usa e frase “yaluzí piadoso” pa describí su deseo ardiente pa yuda e corintionan mantené debocion exclusivo na Dios. (2 Corintionan 11:2) Sin embargo, yaluzí por manifestá su mes tambe den disgustu envidioso p’e prosperidad of logronan di otro hende. E tipo di yaluzí aki ta físicamente, emocionalmente i spiritualmente destructivo.—Proverbionan 14:30; Romanonan 13:13; Santiago 3:14-16.
5. Con amor por yuda nos vence yaluzí ora ta parce manera nan a pasa nos por haltu pa algun privilegio teocrático?
5 En bista di esaki, puntra bo mes: ‘Mi ta bira envidioso ora ta parce manera nan a pasa mi forbij cu algun privilegio teocrático?’ Si e contesta ta sí, no desesperá. E escritor bíblico Santiago ta corda nos cu “un tendencia pa cu envidia” ta presente den tur ser humano imperfecto. (Santiago 4:5) Amor pa bo ruman por yuda bo restorá bo balansa. E por permití bo alegrá cu esnan cu ta alegrá i pa no mir’é como un ofensa personal ora un otro hende ricibí un bendicion of un compliment.—Compará cu 1 Samuel 18:7-9.
6. Ki mal situacion a desaroyá den e congregacion corintio dje promé siglo?
6 Pablo ta agregá cu amor “no ta broma, no ta hincha cu orguyo.” (1 Corintionan 13:4) Si nos tin un of otro talento of abilidad, no tin nodi broma cuné. Evidentemente, esaki tabata e problema di algun homber ambicioso cu a slip drenta e congregacion corintio di antigwedad. Por ta nan tabatin abilidad superior den presentá i splica ideanan of un manera mas eficas di haci cosnan. Dor cu nan a hala atencion na nan mes, esei por a contribuí na dividí e congregacion den faccion. (1 Corintionan 3:3, 4; 2 Corintionan 12:20) E situacion a bira asina malu cu despues Pablo tabatin cu reprendé e corintionan dor cu nan a “soportá hende irazonabel,” kendenan Pablo a describí negativamente como “apostelnan superfini.”—2 Corintionan 11:5, 19, 20.
7, 8. Mustra for di Bijbel con nos por usa cualkier talento natural cu nos ta poseé pa promové unidad.
7 Un situacion similar por desaroyá awe. Por ehempel, algun ruman por tin un tendencia di broma cu nan logronan den e ministerio of cu nan privilegionan den e organisacion di Dios. Asta si nos tin un talento of abilidad particular cu otronan den e congregacion no tin, esei ta duna nos motibu pa hincha di orguyo? Al fin i al cabo, nos mester usa cualkier talento natural cu nos ta poseé pa promové unidad, no nos mes.—Mateo 23:12; 1 Pedro 5:6.
8 Pablo a skirbi cu aunke un congregacion tin hopi miembro, ta “Dios a componé e curpa.” (1 Corintionan 12:19-26) E palabra griego traducí como “componé” ta nificá mesclamentu armonioso, manera den e caso di bruha color. P’esei, ningun individuo den un congregacion mag sinti su mes masha cos tocante su abilidadnan i purba dominá otronan. No tin lugá pa orguyo ni ambicion den e organisacion di Dios.—Proverbionan 16:19; 1 Corintionan 14:12; 1 Pedro 5:2, 3.
9. Ki ehempelnan spiertador Bijbel ta duna di individuonan cu tabata busca nan mes interesnan?
9 Amor “no ta busca su mes interes.” (1 Corintionan 13:5) Un persona amoroso no ta manipulá otronan pa cosnan bai na su manera. Bijbel ta contené ehempelnan spiertador den e asuntu aki. Pa ilustrá: Nos ta lesa di Dalila, Jezabel i Atalia—muhernan cu a manipulá otronan pa nan mes interes egoista. (Huesnan 16:16; 1 Reynan 21:25; 2 Crónicanan 22:10-12) Tambe tabatin Absalom, yu di Rey David. E tabata acercá esnan cu tabata bini Jerusalem pa huicio i insinuá astutamente cu e tribunal dje rey no tabatin interes genuino den nan problemanan. Anto e tabata bisa abiertamente cu loke e tribunal realmente tabatin mester tabata un homber di bon curason manera e! (2 Samuel 15:2-4) Claro cu Absalom no tabata interesá den esnan oprimí, sino solamente den su mes. Actuando manera un rey cu a nombra su mes, el a influenciá curason di hopi hende. Pero cu tempu, Absalom a haña un derota aplastante. Ora el a muri, no a ni consider’é digno di un entiero decente.—2 Samuel 18:6-17.
10. Con nos por demostrá cu nos ta vigilá interes personal di otronan?
10 Esaki ta un spiertamentu pa cristiannan awe. Sea homber of muher, kisas di naturalesa nos ta bon den persuadí hende. Tal bes ta fácil pa pone cosnan bai na nos manera, na moda di papia, dor di dominá un combersacion of dor di persistí i imponé nos opinion riba esnan cu tin un punto di bista diferente. Pero si nos ta berdaderamente amoroso, nos lo vigilá e interesnan personal di otro hende. (Filipensenan 2:2-4) Nos lo no saca probecho di otronan ni promové ideanan cuestionabel debí na nos experencia of nos posicion den e organisacion di Dios, como si fuera nos opinion ta e único cu tin peso. Mas bien, nos lo corda e proverbio bíblico: “Orguyo ta promé cu caida; i un spiritu halsá promé cu trompecamentu.”—Proverbionan 16:18.
Amor Ta Promové Relacionnan Pacífico
11. (a) Den ki maneranan nos por mustra amor cu ta bondadoso i decente? (b) Con nos por mustra cu nos no ta alegrá riba inhusticia?
11 Pablo a skirbi tambe cu amor ta “bondadoso” i cu e “no ta comportá su mes indecentemente.” (1 Corintionan 13:4, 5) Sí, amor lo no permití nos actua na un manera brutu, vulgar of irespetuoso. Na lugá di esei, nos lo tuma sintimentu di otronan na consideracion. Por ehempel, un persona amoroso lo evitá di haci cos cu lo molestiá concenshi di otro hende. (Compará cu 1 Corintionan 8:13.) Amor “no ta alegrá riba inhusticia, sino ta alegrá cu e berdad.” (1 Corintionan 13:6) Si nos ta stima e ley di Jehova, nos lo no cera wowo pa inmoralidad ni dibertí cu loke Dios ta odia. (Salmo 119:97) Amor lo yuda nos haña goso den cosnan cu ta edificá en bes di kibra.—Romanonan 15:2; 1 Corintionan 10:23, 24; 14:26.
12, 13. (a) Con nos mester reaccioná ora un persona ofendé nos? (b) Cita ehempelnan di Bijbel pa mustra cu asta rabia hustificá por pone nos actua imprudentemente.
12 Pablo ta skirbi cu amor “no ta bira provocá” (“no ta krepchi,” Phillips). (1 Corintionan 13:5) Nos tin cu reconocé sí cu ta normal pa nos como hende imperfecto excitá of sinti un poco rabia ora un hende ofendé nos. Sin embargo, lo ta incorecto pa carga rencor pa un tempu largu of pa continuá den un estado provocá. (Salmo 4:4; Efesionan 4:26) Si nos no control’é, asta rabia hustificá por pone nos actua di un manera imprudente, i Jehova lo por tene nos responsabel pa esaki.—Génesis 34:1-31; 49:5-7; Númeronan 12:3; 20:10-12; Salmo 106:32, 33.
13 Algun ruman a permití imperfeccion di otro personanan afectá nan decision di asistí na reunionnan cristian of di participá den e ministerio di veld. Anteriormente, hopi di esakinan a lucha duru pa e fe, tal bes wantando bou di oposicion di famia, bofon di colega di trabou i cosnan por estilo. Nan a wanta e obstáculonan ei pasobra nan a mira nan debidamente como prueba di integridad. Pero kico ta pasa ora un compañero cristian bisa of haci algu cu no ta sinta nan bon? Esaki tambe no ta un prueba di integridad? Sigur cu sí, pasobra si nos keda den un estado provocá, nos lo “permití lugá p’e Diabel.”—Efesionan 4:27.
14, 15. (a) Kico kier men “tene cuenta di daño”? (b) Con nos por imitá Jehova den ser pordonador?
14 Cu bon motibu, Pablo ta agregá cu amor “no ta tene cuenta di daño.” (1 Corintionan 13:5) Aki e ta usa un término di ‘boekhouden,’ evidentemente pa indicá e acto di nota e ofensa den un ‘grootboek’ pa no lubidá riba dje. Ta amoroso pa haci un registro mental permanente dje palabra of accion ofensivo, manera cos cu nos lo tin cu referí na dje un dia den futuro? Ki contentu nos por ta cu Jehova no ta scudriñá nos sin misericordia asina! (Salmo 130:3) Sí, ora nos ta repentí, e ta veeg nos erornan.—Echonan 3:19.
15 Nos por imitá Jehova den esaki. Nos no mester ta muchu delicado ora cu, na nos parecer, un persona menospreciá nos. Si nos ta lihé pa sinti nos ofendí, nos lo por causa nos mes mas dolor cu e persona cu a ofendé nos por a causa nos. (Eclesiástes 7:9, 22) Mas bien, nos tin cu corda cu amor “ta kere tur cos.” (1 Corintionan 13:7) Naturalmente, ningun di nos kier ta ingenuo, pero tampoco nos mester ta indebidamente desconfiá dje motibunan di nos rumannan. Caminda ta posibel, laga nos duna otro e beneficio di duda.—Colosensenan 3:13.
Amor Ta Yuda Nos Wanta
16. Den ki circunstancianan amor por yuda nos mustra gran pacenshi?
16 Despues Pablo ta bisa nos cu “amor tin gran pacenshi.” (1 Corintionan 13:4) E ta yuda nos soportá condicionnan difícil, tal bes pa un periodo largu di tempu. Por ehempel, hopi cristian a biba pa añanan largu den un famia dividí pa motibu di religion. Otronan ta soltero, no pasobra nan kier, sino pasobra nan no por a haña un partner adecuá “den Señor.” (1 Corintionan 7:39; 2 Corintionan 6:14) Tambe tin esnan cu ta lucha cu problemanan debilitador di salú. (Galationan 4:13, 14; Filipensenan 2:25-30) Realmente, den e sistema imperfecto aki, ningun hende tin un situacion den bida cu no ta rekerí un of otro clase di awante.—Mateo 10:22; Santiago 1:12.
17. Kico lo yuda nos wanta tur cos?
17 Pablo ta sigurá nos cu amor “ta soportá tur cos, . . . ta spera tur cos, ta wanta tur cos.” (1 Corintionan 13:7) Amor pa Jehova lo permití nos sufri cualkier situacion pa causa di husticia. (Mateo 16:24; 1 Corintionan 10:13) Nos no ta busca pa bira martir. Al contrario, nos meta ta pa hiba un bida ketu i pacífico. (Romanonan 12:18; 1 Tesalonicensenan 4:11, 12) No obstante, ora surgi prueba di fe, nos ta wanta nan di buena gana como parti di loke ta costa nos pa ser un disipel cristian. (Lucas 14:28-33) Segun cu nos ta wanta, nos ta purba mantené un punto di bista positivo, sperando e mihó resultado meimei di situacionnan difícil.
18. Di con awante ta necesario asta den tempu faborabel?
18 Tribulacion no ta e único circunstancia cu ta exigí awante. Tin biaha, wanta ta nificá simplemente continuá, sigui riba un caminda fiho, sea e situacionnan cu nos ta aden ta difícil of no. Awante ta encerá mantené un bon rutina spiritual. Por ehempel, bo tin un participacion significativo den e ministerio, di acuerdo cu bo circunstancianan? Bo ta lesa i meditá riba e Palabra di Dios i ta comunicá cu bo Tata celestial mediante oracion? Bo ta asistí regularmente n’e reunionnan di congregacion, i bo ta saca beneficio for di un intercambio di estímulo cu bo compañeronan creyente? Si ta asina, anto sea bo ta den un tempu faborabel of den un tempu difícil awor, bo ta wantando. No entregá, “pasobra n’e debido tempu nos lo cosechá si nos no cansa.”—Galationan 6:9.
Amor Ta “Un Caminda Surpasante”
19. Den ki sentido amor ta “un caminda surpasante”?
19 Pablo a enfatisá e importancia di expresá amor dor di yama e cualidad divino aki “un caminda surpasante.” (1 Corintionan 12:31) “Surpasante” den ki sentido? Wel, Pablo a caba di enumerá e donnan di spiritu, cu tabata comun entre e cristiannan di promé siglo. Algun a haña e capacidad di profetisá, otronan a haña poder pa cura malesa, hopi a ricibí e abilidad di papia den lenga. Donnan sobresaliente en berdad! Tog, Pablo a bisa e corintionan: “Si mi ta papia den lenga di hende i di angel, pero no tin amor, mi a bira un pida di koper cu ta zona of un cimbal cu ta borotá. I si mi tin e don di profetisá i mi conocé tur e secretonan sagrado i tur conocimentu, i si mi tin tur e fe pa por trasladá cerunan, pero no tin amor, mi no ta nada.” (1 Corintionan 13:1, 2) Sí, asta actonan cu riba nan mes tin balor, ta bira “obra morto” si e motibu tras di nan no ta amor pa Dios i pa próhimo.—Hebreonan 6:1.
20. Pakico esfuerso continuo ta necesario si nos kier cultivá amor?
20 Jesus ta duna nos un otro motibu pakico nos mester cultivá e cualidad divino di amor. “Den esaki tur lo sa cu boso ta mi disipelnan,” el a bisa, “si boso tin amor entre boso.” (Juan 13:35) E palabra “si” ta laga na cada cristian mes si lo e siña expresá amor of no. Al fin i al cabo, djis biba den un pais stranhero riba su mes lo no forsa nos siña papia su idioma. Djis bai reunion na un Salon di Reino of asociá cu compañeronan cristian tampoco ta siña nos automáticamente pa expresá amor. Siña e “idioma” aki ta exigí esfuerso continuo.
21, 22. (a) Con nos mester reaccioná ora nos faya den algun aspecto di amor cu Pablo a considerá? (b) Den ki sentido nos por bisa cu “amor no ta faya nunca”?
21 Algun biaha, lo bo faya den algun aspecto di amor cu Pablo a considerá. Pero no desanimá. Traha cu pacenshi riba nan. Sigui consultá Bijbel i aplicá su principionan den bo trato cu otro hende. Nunca lubidá e ehempel cu Jehova mes ta pone pa nos. Pablo a spierta e efesionan: “Bira bondadoso cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.”—Efesionan 4:32.
22 Mescos cu a lo largu ta bira mas fácil pa siña expresá bo mes den un otro idioma, probablemente cu tempu lo bo haña cu ta bira mas fácil pa expresá amor. Pablo ta sigurá nos cu “amor no ta faya nunca.” (1 Corintionan 13:8) Distinto dje donnan milagroso di spiritu, hamas amor lo stop di existí. Pues, sigui siña expresá e cualidad divino aki. E ta, manera Pablo ta yam’é, “un caminda surpasante.”
Bo Por Splica?
◻ Con amor por yuda nos vence orguyo?
◻ Den ki maneranan amor por yuda nos promové pas den congregacion?
◻ Con amor por yuda nos wanta?
◻ Den ki sentido amor ta “un caminda surpasante”?
[Plachi na página 19]
Amor lo yuda nos pasa por haltu dje faltanan di nos compañeronan creyente
[Plachi na página 23]
Awante ta nificá mantené nos rutina teocrático