“Den Peliger Riba Laman”

DEN scuridad di anochi, un boto di bela cu 276 hende na bordo ta acercá un isla den laman Mediteráneo. E tripulacion i e pasaheronan ta agotá dor cu pa 14 dia largu, laman brutu a hisa nan benta p’aki p’aya. Ora cu di dia ta cuminsá habri i nan ta mira un playa, nan ta purba hiba e boto cantu. Pero e proa ta pega i olanan ta kibra e parti patras dje barcu na pida-pida. Tur persona abordo ta bandoná e boto i ta logra yega na costa di Malta dor di landa of tene na un planki of un otro obheto. Cu calafriu i agotá nan ta lastra sali for dje bahia brutu. Apostel cristian, Pablo, ta entre e pasaheronan. Nan ta transportando e pa Roma p’e ser husgá.—Echonan 27:27-44.

Pa Pablo, e naufragio n’e isla di Malta no ta e promé episodio riba laman cu a pone su bida na peliger. Un par di aña promé, el a skirbi: “Tres bes mi a experenciá naufragio, mi a pasa un dia i un anochi den profundidad.” El a agregá cu e tabata “den peliger riba laman.” (2 Corintionan 11:25-27) Biahamentu riba laman a yuda Pablo cumpli cu su papel cu Dios a dun’é como “un apostel dje nacionnan.”—Romanonan 11:13.

Con extensivo biahamentu riba laman tabata den promé siglo? Ki papel el a hunga den plamamentu di cristianismo? Con sigur e tabata? Ki tipo di boto nan a usa? Con a acomodá e pasaheronan?

Roma Su Necesidad pa Haci Negoshi via Laman

E romanonan tabata yama e laman Mediteráneo Mare Nostrum—Nos Laman. Control riba rutanan di laman tabata imperativo pa Roma, no solamente pa motibunan militar. Den e Imperio Romano hopi stad mes sea a sirbi como haf of nan a haci uso di otro haf. Por ehempel, Roma tabatin su haf cerca di Ostia, miéntras cu Corinto a haci uso di Lequeo i Cencreas como haf, i Seleucia tabata e haf di Antiokia di Siria. Bon coneccion marítimo entre hafnan a percurá pa un comunicacion rápido cu e stadnan principal, i a facilitá un maneho eficas dje provincianan romano.

Roma a dependé tambe di e industria di transporte via laman pa suministro di cuminda. Dor cu Roma tabatin un poblacion di rond di un miyon hende, e tabatin mester di masha hopi grano, mas of ménos 250.000 pa 400.000 ton pa aña. Di unda tur e grano ei tabata bini? Flavio Josefo ta cita Herodes Agripa II bisando cu, durante ocho luna pa aña, Nort Africa a percurá e suministro di cuminda pa Roma, miéntras cu Egipto a manda grano cu tabata suficiente pa e sobrá cuater lunanan. Miles di boto tabata enbolbí den suministro di grano p’e stad ei.

Cumpliendo cu e deseo di Roma pa artículonan di luho, e negoshi floreciente via laman a percurá pa tur tipo di mercancia. Nan a importá mineral, bloki i marmer for di Chipre, Grecia i Egipto, i palu for di Líbanon. Biña a bini for di Smirna, nechi (noot) for di Damasco i dadel for di Palestina. Na Cilicia nan a pone cosmética cu rubber na bordo, na Mileto cu Laodicea, lana, na Siria cu Líbanon, tela, i na Tiro cu Sidon tela di púrpura. For di Tiatira nan a manda tiña i for di Alehandria i Sidon nan a manda glas. Seda, catuna, ivor i specerei a ser importá for di China cu India.

Kico nos por bisa dje boto cu a naufragá na Malta cu Pablo na bordo? E tabata un boto cu a transportá grano, “un boto di Alehandria cu tabata bayendo rumbo Italia.” (Echonan 27:6, mira nota na pia di página) E flotanan cu tabata transportá grano tabata propiedad privá dje habitantenan di Grecia, di Fenicia i di Siria kendenan tabata dirigí i carga nan. Sin embargo, gobiernu romano tabata huur e botonan aki. Historiadó William M. Ramsay ta bisa: “Mescos cu den caso di cobra belasting, gobiernu a haña cu ta mas fácil pa contratá cierto companianan, en bes di nan mes bai organisá e ekipo enorme di hende i material cu mester pa haci e trabou grandi ei.”

Pablo a completá su biahe pa Roma riba un flota cu tabatin e figura dje “Yunan di Zeus” na cabes. Esaki tambe tabata un boto di Alehandria. E boto a mara na Puteoli den e Golfo di Nápoli, haf unda normalmente flotanan di grano tabata desembarcá. (Echonan 28:11-13) For di Puteoli, Pozzuoli djawe, nan tabata sea hiba e carga via tera of nan tabata transport’é riba flotanan mas chikitu bai nort cantu di costa i via riu Tiberio bai den curason di Roma.

Pasahero Riba Boto di Carga?

Di con Pablo cu su guardianan a biaha den un boto di carga? Promé cu nos contestá e pregunta ei, nos tin cu sa kico biaha via laman a nificá e tempu ei pa un pasahero.

Den e promé siglo E.C., no tabata existí boto di pasahero. Pasaheronan tabata biaha den botonan di mercancia. Tur clase di hende a biaha den nan, esaki a incluí funcionario di gobiernu, intelectual, predicadó, mago, artista, atleta, comerciante, turista i peregrino.

Naturalmente tabatin botonan chikitu cu a transportá pasahero i carga den awanan cantu di costa. Kisas ta den un boto chikitu asina Pablo a “pasa pa Macedonia” for di Tróas. Por ta cu na mas cu un ocasion el a traficá den boto chikitu pa bai i bini for di Aténas. Ta probabel tambe cu Pablo a usa boto chikitu pa biaha despues for di Tróas bai Patara entre e islanan cerca dje costa di Asia Menor. (Echonan 16:8-11; 17:14, 15; 20:1-6, 13-15; 21:1) Uso di boto chikitu asina a scapa tempu, pero nan no por a bai masha leu for di tera. P’esei, e botonan cu a hiba Pablo Chipre i despues na Panfilia, i esnan den cua el a sali di Efeso bai Cesarea i di Patara bai Tiro mester tabata hopi mas grandi. (Echonan 13:4, 13; 18:21, 22; 21:1-3) E boto riba cua Pablo a experenciá naufragio na Malta tambe mester tabata loke nan a considerá un boto grandi. Con grandi un boto asina por tabata?

Fuentenan académico a pone cu un erudito a bisa: “E capacidad mas chikitu [di boto] cu generalmente tabata útil p’e clásiconan tabata di 70 pa 80 ton. Un tamaño mashá comun, por lo ménos den e era di helenisacion, tabata esun di 130 ton. Aunke tabata normal pa bo a mira boto di 250 ton, definitivamente e tabata mas grandi cu lo normal. Den tempu dje romanonan, nan tabata usa botonan asta mas grandi pa transportá carga p’e gobiernu imperial, i e tamaño preferí tabata 340 ton. E capacidad dje boto mas grandi cu a flota tabata un 1.300 ton, i kisas algu mas.” Segun un descripcion skirbí den siglo 2 E.C., Isis, e boto cu a transportá grano for di Alehandria tabata midi mas cu 55 meter largu, rond di 14 meter hanchu i un 13 meter na profundidad, i probablemente e por a carga mas cu mil ton di grano i kisas un par di shen pasahero.

Con nan a trata e pasaheronan riba un boto cu ta transportá grano? Dor cu e botonan tabata primordialmente destiná pa carga, pasahero a bini na di dos lugá. Nan no tabata sirbi nan ni duna nan cuminda, awa so. Nan por a drumi riba dek, kisas bou di algu manera un tent cu nan a arma anochi i cu mainta nan a desarmá. Aunke kisas e pasaheronan tabatin mag di usa e cushina, nan mes mester a percurá pa tur cos necesario pa nan cushiná, come cuné, baña i drumi: for di wea cu panchi te na paña di cama.

Biaha Riba Laman—Con Sigur?

Dor cu nan no tabatin instrument, ni sikiera un compas, e nabegantenan di promé siglo tabata funcioná solamente riba bista. P’esei, biahamentu tabata mas sigur ora tabatin mihó visibilidad: generalmente durante fin di mei te cu meimei september. Tin biaha e negoshantenan tabata risca biaha durante dos luna promé of despues dje periodo ei. Pero durante winter, mist i nubia tabata tapa señalnan riba tera, e solo di dia i e streanan djanochi. For di 11 di november te cu 10 di mart no tabatin biahamentu riba laman (na latin, mare clausum) cu excepcion di ora tabata trata casonan absolutamente necesario of urgente. Esnan cu a biaha lat den e temporada a core e rísico di pasa winter den un haf stranhero.—Echonan 27:12; 28:11.

Apesar dje echo cu biaha den boto tabata algu peligroso i mará na cierto temporada, e tabata mas bentahoso cu biaha riba tera? Sigur cu sí! Biahamentu via laman tabata ménos agotador, mas barata i mas lihé. Ora bientu ta faborabel, un boto por a biaha kisas 150 kilometer pa dia. E averahe normal pa un biahe largu na pia tabata 25 pa 30 kilometer pa dia.

E velocidad dje botonan a dependé completamente di bientu. Un biahe for di Egipto pa Italia tabata unu cu stret bai tabata contra bientu, asta durante e mihó temporada. Normalmente e ruta di mas corticu tabata via Rodas of Mira, of via otro hafnan na costa di Licia na Asia Menor. Na un ocasion, despues cu el a sali for di Alehandria, e boto di grano Isis a hañ’é cu mal tempu i a perde caminda, i e mester a mara 70 dia na Pireos. Cu e bientu nortwest dominando su tras, e distancia bek for di Italia kisas lo a dura 20 pa 25 dia. Riba tera, e mésun ruta aki bai i bini lo a tuma mas cu 150 dia, si tin bon weer.

Nan A Hiba e Bon Nobo Leu Via Laman

Evidentemente Pablo tabata conciente dje peligernan cu biahamentu riba laman fuera dje periodo apropiado, a trece cuné. Asta el a consehá pa no nabegá durante fin di september pa principio di october, ora el a bisa: “Hombernan, mi ta percibí cu e nabegacion lo ta cu daño i hopi pérdida no solamente dje carga i dje barcu, sino tambe di nos mes alma.” (Echonan 27:9, 10) Sin embargo, e oficial di ehército cu tabata na warda a ignorá e palabranan ei, i esaki a resultá den naufragio na Malta.

P’e tempu cu Pablo a terminá su carera como misionero, el a experenciá por lo ménos cuater naufragio. (Echonan 27:41-44; 2 Corintionan 11:25) Tog, indebido ansiedad tocante posibel sucesonan asina no a stroba e promé predicadónan dje bon nobo di biaha via laman. Nan a haci bon uso di tur medio cu tabatin disponibel pa plama e mensahe di Reino. Obedeciendo e mandato di Jesus, nan a duna testimonio amplio tur caminda. (Mateo 28:19, 20; Echonan 1:8) Danki na celo, fe di esnan cu a sigui nan ehempel, i e guia di Jehova su spiritu santu, e bon nobo a alcansá e hukinan mas leu dje tera habitá.

[Rekonosementu pa Potrèt na página 31]

Pictorial Archive (Near Eastern History) Est.