Yuda Hende Hala Cerca Jehova

“Ningun hende ta yega n’e Tata sino pa medio di mi.”—JUAN 14:6.

1. Ki mandamentu Jesus resucitá a duna su disipelnan, i dor cu Testigonan di Jehova a obedecé esaki, kico tabata e resultado?

JESUCRISTO a manda su siguidónan “haci disipel di hende di tur nacion, bautisando nan den e nomber dje Tata i dje Yu i dje spiritu santu.” (Mateo 28:19) Den e último dies añanan, Testigonan di Jehova a yuda hopi mas cu tres miyon hende hala cerca Dios, i cu tempu nan a bautisá como símbolo di nan dedicacion na dje pa haci su boluntad. Ki contentu nos ta di por yuda nan hala cerca Dios!—Santiago 4:8.

2. Aunke hopi hende nobo ta bautisá, kico a sosodé?

² Sin embargo, den algun pais caminda hopi disipel nobo a bautisá, no tabatin un aumento mes grandi den e cantidad di publicadó di Reino. Claro cu mester tene cuenta cu esnan cu a muri. Pa aña, mas o ménos 1 porciento ta muri. Tog, den e último par di añanan, pa un of otro motibu, basta persona a bai for dje berdad. Pakico? E artículo aki i esun siguiente lo analisá con hende ta ser atraí na Jehova i e posibel motibunan pakico algun ta renunciá nan fe.

E Propósito di Nos Predicacion

3. (a) Con e mision confiá na Jesus su disipelnan ta coincidí cu esun dje angel mencioná na Revelacion 14:6? (b) Kico a resultá di ta un manera eficas pa lanta hende su interes den e mensahe di Reino, pero ki problema ta existí?

³ Den e “tempu di fin” aki, Jesus su disipelnan tin e comision pa plama “berdadero conocimentu” relacioná cu “e bon nobo aki dje reino.” (Daniel 12:4; Mateo 24:14) Nan mision ta coincidí cu esun dje angel cu “tabatin bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo.” (Revelacion 14:6) Den e mundu aki unda hende ta asina ocupá cu asuntunan mundano, generalmente e manera mas eficas pa interesá nan den e Reino di Dios i yuda nan hala cerca Jehova ta dor di conta nan dje speransa di bida eterno den un paradijs riba tera. Aunke esaki ta comprendibel, esnan cu ta asociá cu e pueblo di Dios solamente pa por drenta den Paradijs no ta canando spiritualmente firme riba e caminda smal cu ta hiba na bida.—Mateo 7:13, 14.

4. Segun Jesus i tambe e angel cu ta bula meimei di shelu, kico ta e propósito di nos trabou di predicá?

⁴ Jesus a declará: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) E angel cu ta bula meimei di shelu ta declará “bon nobo eterno” i ta bisa esnan cu ta biba riba tera: “Teme Dios i dun’é gloria, pasobra e ora di huicio di dje a yega, i p’esei, adorá Esun cu a traha e shelu i tera i laman i fontein di awa.” (Revelacion 14:7) P’esei, e propósito fundamental di nos predicacion dje bon nobo ta pa yuda hende hala cerca Jehova mediante Cristo Jesus.

Nos Papel den Jehova Su Obra

5. Ki declaracion di Pablo i di Jesus ta mustra cu nos ta haciendo e obra di Jehova, no di nos?

⁵ Den loke apostel Pablo ta skirbi su compañeronan cristian ungí, e ta papia di “e ministerio di reconciliacion” i e ta bisa cu Dios ta reconciliá hende cu su mes a base di Jesucristo su sacrificio di rescate. Pablo ta bisa cu ta “como si fuera Dios ta haci súplica mediante nos,” i cu “como substituto pa Cristo nos ta roga: ‘Reconciliá cu Dios.’” Ki un pensamentu alentador! Sea nos ta ‘embahador ungí substituto pa Cristo’ of nos ta mensahero cu speransa terenal, nos no mester lubidá nunca cu esaki ta e obra di Jehova, no di nos. (2 Corintionan 5:18-20) Ta Dios ta esun cu ta atraé hende i ta siña esnan cu ta bini cerca Cristo. Jesus a declará: “Ningun hende por bini cerca mi a ménos cu e Tata, kende a manda mi ta atra’é; i lo mi resucit’é den e último dia. Ta pará skirbí den e Profetanan: ‘I nan tur lo ser siñá pa Jehova.’ Tur hende cu a tende for dje Tata i a siña ta bini cerca mi.”—Juan 6:44, 45.

6. Con Jehova ta sagudiendo e nacionnan for di awor caba, i na mésun tempu, ken ta hañando siguridad den su “cas” di adoracion?

⁶ Den e último dianan aki, con Jehova ta atraé hende i ta habri e “porta di fe” pa nan? (Echonan 14:27, nota na pia di página; 2 Timoteo 3:1) Un manera clave ta dor di laga su Testigonan proclamá su mensahe di salbacion i di huicio contra e sistema di cosnan malbado aki. (Isaías 43:12; 61:1, 2) E proclamacion mundial aki ta sagudiendo e nacionnan for di awor caba—e ta un señal dje ehecucion di huicio aplastante cu lo bini pronto. Na mésun tempu, e ta logra saca hende cu ta “precioso” den bista di Dios for dje sistema aki, i nan ta haña siguridad den su “cas” di adoracion berdadero. Asina Jehova ta cumpli cu su palabranan profético cu Ageo a registrá: “Lo mi sagudí tur e nacionnan, i e cosnan deseabel di tur e nacionnan tin cu drenta paden; i lo mi yena e cas aki cu gloria.”—Ageo 2:6, 7, nota na pia di página; Revelacion 7:9, 15.

7. Con Jehova ta habri curason di hende i ta atraé individuonan na su mes i na su Yu?

⁷ Jehova ta habri curason dje temedornan di Dios aki—“e cosnan di mas selecto di tur e nacionnan”—pa nan por ‘presta atencion n’e cosnan cu su Testigonan ta papia.’ (Ageo 2:7, Jewish Publication Society; Echonan 16:14) Mescos cu den promé siglo, tin biaha Jehova ta usa su angelnan pa dirigí su Testigonan na hende sincero cu a sclama na dje pa yudansa. (Echonan 8:26-31) Ora hende siña dje percuracionnan maraviyoso cu Dios a haci pa nan mediante su Yu, Jesucristo, nan ta ser atraí na Jehova pa medio di su amor. (1 Juan 4:9, 10) Sí, Dios ta atraé hende na su mes i na su Yu pa medio di Su “bondad amoroso,” of “amor leal.”—Jeremías 31:3, nota na pia di página.

Ken Jehova Ta Atraé?

8. Ki clase di hende Jehova ta atraé?

⁸ Jehova ta atraé esnan cu ta busk’é na su mes i na su Yu. (Echonan 17:27) Esakinan ta encerá hende cu ‘ta suspirá i keha riba tur e cosnan detestabel cu ta ser hací’ den cristiandad i, de facto, rond mundu. (Ezekiel 9:4) Nan ta “conciente di nan necesidad spiritual.” (Mateo 5:3) Sí, nan ta “e mansunan [“humildenan,” nota na pia di página] di tera,” cu lo biba pa semper den paradijs riba tera.—Sofonías 2:3.

9. Con Jehova por mira si hende ta “corectamente dispuesto pa bida eterno,” i con e ta atraé esakinan?

⁹ Jehova por lesa curason di un persona. Rey David a bisa su yu Sálomon: “Tur curason Jehova ta scudriñá, i tur inclinacion dje pensamentunan e ta dicerní. Si bo busk’é, lo e laga bo hañ’é.” (1 Crónicanan 28:9) A base di un individuo su condicion di curason i su spiritu, esta su disposicion predominante, Jehova por mira si ta probabel cu lo e respondé na percuracionnan divino pa pordon di picá i e speransa di bida eterno den Dios su hustu sistema nobo. (2 Pedro 3:13) Pa medio di su Palabra, cu su Testigonan ta predicá i siña, Jehova ta atraé ‘tur esnan cu ta corectamente dispuesto pa bida eterno’ na su mes i na su Yu, i esakinan ta ‘bira creyente.’—Echonan 13:48.

10. Kico ta mustra cu e echo cu Jehova ta atraé algun persona i otronan no, no ta predestinacion?

¹⁰ E echo cu Jehova ta atraé algun persona i otronan no, ta un forma di predestinacion? Di ningun manera! Ta hende su propio deseonan ta determiná si Dios ta atraé nan of no. E ta respetá nan boluntad liber. Jehova ta pone dilanti e habitantenan di tera djawe e mésun opcion cu el a pone dilanti e israelitanan mas cu 3.000 aña pasá, ora Moises a bisa: “Di berdad mi ta pone dilanti bo awe bida i loke ta bon, i morto i loke ta malu. . . . Di berdad mi ta tuma shelu i tera como testigo contra boso awe, cu mi a pone bida i morto bo dilanti, e bendicion i e maldicion; i bo tin cu scoge bida pa bo por keda na bida, abo i bo desendencia, dor di stima Jehova bo Dios, dor di scucha na su bos i dor di pega na dje; pasobra e ta bo bida i largura di bo dianan.”—Deuteronomio 30:15-20.

11. Con e israelitanan mester a scoge bida?

¹¹ Tuma nota cu e israelitanan mester a scoge bida ‘dor di stima Jehova, dor di scucha na su bos i dor di pega na dje.’ Tempu Moises a papia e palabranan ei, e pueblo di Israel no a tuma posesion dje Tera Primintí ainda. Nan tabata posicioná riba e yanura di Moab, preparando nan mes pa crusa riu Jordan i drenta Canan. Aunke tabata natural pa nan pensa riba e “tera bon i espacioso” cu tabata “abundá cu lechi i miel” cu nan lo a ricibí pronto, realisacion di nan soñonan a dependé di nan amor pa Jehova, i di cu si nan ta scucha na su bos i ta pega na dje. (Exodo 3:8) Moises a splica esaki ora el a declará: “Si bo scucha e mandamentunan di Jehova bo Dios, cu mi ta manda bo awe, dor di stima Jehova bo Dios, cana den su camindanan i warda su mandamentunan i su statutonan i su decisionnan hudicial, e ora ei sigur lo bo keda na bida i lo bo multiplicá, i Jehova bo Dios tin cu bendicioná bo den e tera unda bo ta bai pa tuma posesion di dje.”—Deuteronomio 30:16.

12. Kico e ehempel dje israelitanan mester siña nos tocante nos trabou di predicá i siña?

¹² Loke nos a caba di considerá no mester siña nos algu tocante nos trabou di predicá i siña den e tempu di fin aki? Nos ta pensa riba e binidero Paradijs riba tera i ta papia di dje den nos ministerio. Pero ni nos ni e disipelnan cu nos haci lo no mira e cumplimentu dje promesa, si nos of nan ta sirbi Dios pa motibunan egoista. Mescos cu e israelitanan, nos i esnan cu nos ta instruí tin cu siña ‘stima Jehova, scucha na su bos i pega na dje.’ Si nos corda esaki ora nos ta efectuá nos ministerio, e ora ei sí nos lo ta colaborando cu Dios den atraé hende na dje.

Dios Su Colaboradónan

13, 14. (a) Segun 1 Corintionan 3:5-9, den ki manera nos ta bira colaboradó cu Dios? (b) Ken tin cu ricibí e onor pa cualkier crecementu, i pakico?

¹³ Pablo a ilustrá colaboracion cu Dios dor di referí na cultivacion di un cunucu. El a skirbi: “Kico anto, Apólos ta? Sí, kico Pablo ta? Ministernan mediante ken boso a bira creyente, net manera e Señor a concedé na cada un. Ami a planta, Apólos a muha, pero Dios a sigui hacié crece; di manera cu ni esun cu ta planta ta algu ni esun cu ta muha, sino Dios cu ta hacié crece. Awor esun cu ta planta i esun cu ta muha ta un, pero cada persona lo ricibí su propio recompensa segun su propio labor. Pasobra nos ta colaboradó di Dios. Boso ta e cunucu di Dios bou di cultivacion.”—1 Corintionan 3:5-9.

¹⁴ Como colaboradó di Dios, nos tin cu planta “e palabra dje reino” fielmente den curason di hende, anto muha cualkier interes mustrá dor di haci rebishita i tene studio di Bijbel bon prepará. Si e tera, e curason, ta bon, Jehova lo haci su parti dor di laga e simia dje berdad di Bijbel crece bira un mata productivo. (Mateo 13:19, 23) Lo e atraé e persona na su mes i na su Yu. Finalmente, anto, cualkier aumento den e cantidad di proclamadó di Reino ta debí n’e obra di Jehova den curason di hende, cu ta haci e simia dje berdad crece i ta atraé personanan asina na su mes i na su Yu.

Obra Edificá cu Lo Permanecé

15. Ki ilustracion Pablo a usa pa mustra con nos ta yuda otro hende desaroyá fe?

¹⁵ Aunke nos ta alegrá den e aumento, sinceramente nos kier mira hende sigui stima Jehova, scucha na su bos i pega na dje. Nos ta bira tristu ora nos mira algun fria i bai for dje berdad. Nos por haci algu pa prevení esaki? Den un otro ilustracion, Pablo ta mustra con nos por yuda otro hende desaroyá fe. E ta skirbi: “Ningun hende por pone otro fundeshi sino loke ta poné, esta Jesucristo. Awor si un hende ta edificá riba e fundeshi oro, plata, piedra precioso, material di palu, yerba secu, stompi di maishi, e obra di cada un lo keda manifestá, pasobra e dia lo sak’é na cla, pasobra lo e ser revelá pa medio di candela; i e candela mes lo duna prueba ki clase e obra di cada un ta.”—1 Corintionan 3:11-13.

16. (a) Den ki manera e dos ilustracionnan cu Pablo a usa tin un obhetivo diferente? (b) Den ki manera e obra cu nos edificá lo por resultá di ta insatisfactorio cu no ta resistí candela?

¹⁶ Den Pablo su ilustracion dje cunucu, crecementu ta dependé di plantamentu conciencial, muhamentu regular i e bendicion di Dios. E otro ilustracion dje apostel ta resaltá e responsabilidad dje minister cristian pa loke lo para di su obra cu el a edificá. El a edificá riba un fundeshi sigur, cu material di calidad? Pablo ta spierta: “Laga cada un sigui vigilá con e ta edificá.” (1 Corintionan 3:10) Despues cu nos a lanta un persona su interes dor di cont’é dje speransa di bida eterno den Paradijs, nos ta enfocá nos siñansa riba e cosnan básico di conocimentu bíblico so anto pone énfasis principalmente riba loke e persona tin cu haci pa haña bida eterno? Nos siñansa ta consistí solamente di esaki: ‘Si bo kier biba pa semper den Paradijs, bo tin cu studia, bai reunion i participá den e trabou di predicá’? Si ta asina, nos no ta edificando e persona su fe riba un fundeshi sólido, i kisas loke nos edificá lo no resistí e candela di pruebanan cu por bini ni lo no dura pa hopi tempu. Purba atraé hende na Jehova djis dor dje speransa di bida den Paradijs a cambio di un par di aña dedicá na sirbié, ta manera ora bo ta edificá cu “material di palu, yerba secu, stompi di maishi.”

Cultivá Amor pa Dios i Cristo

17, 18. (a) Kico ta indispensabel pa un persona su fe dura? (b) Con nos por yuda un persona laga Cristo biba den su curason?

¹⁷ Pa fe por dura, e mester ta basá riba un relacion personal cu Jehova Dios mediante Jesucristo. Como ser humano imperfecto, nos por logra un relacion pacífico asina cu Dios solamente mediante su Yu. (Romanonan 5:10) Corda cu Jesus a bisa: “Ningun hende ta yega n’e Tata sino pa medio di mi.” Pa yuda otro hende edificá fe, “ningun hende por pone otro fundeshi sino loke ta poné, esta Jesucristo.” Kico esaki ta encerá?—Juan 14:6; 1 Corintionan 3:11.

¹⁸ Edificá riba Cristo como fundeshi ta nificá siña studiantenan di Bijbel den un manera cu nan ta desaroyá un amor profundo pa Jesus dor di ricibí conocimentu cabal di Su papel como Rescatador, Cabes dje congregacion, Sumo Sacerdote amoroso i Rey reinante. (Daniel 7:13, 14; Mateo 20:28; Colosensenan 1:18-20; Hebreonan 4:14-16) Esei ta nificá haci Jesus asina real pa nan cu prácticamente e ta biba den nan curason. Nos oracion pa nan mester ta manera e súplica di Pablo na fabor dje cristiannan na Efeso. El a skirbi: ‘Mi ta dobla mi rudianan n’e Tata, . . . pa e por duna boso . . . pa mediante boso fe e Cristo biba den boso curason cu amor; pa boso saca rais i ser establecí riba e fundeshi.’—Efesionan 3:14-17.

19. Si nos edificá amor pa Cristo den curason di nos studiantenan di Bijbel, den kico esei lo resultá, pero kico nos tin cu siña nan?

¹⁹ Si nos edificá di tal manera cu nos studiantenan ta desaroyá amor pa Cristo den nan curason, esaki lógicamente lo pone cu nan ta cultivá amor pa Jehova Dios. Jesus su amor, su sintimentu i compasion ta un refleho exacto di Jehova su cualidadnan. (Mateo 11:28-30; Marco 6:30-34; Juan 15:13, 14; Colosensenan 1:15; Hebreonan 1:3) Pues segun cu hende ta conocé i stima Jesus, nan lo bin conocé i stima Jehova.a (1 Juan 4:14, 16, 19) Nos tin cu siña studiantenan di Bijbel cu Jehova ta tras di tur loke Cristo a haci pa humanidad i cu p’esei ta e nos tin cu yama danki, i duna alabansa i adoracion na Dje como e “Dios di nos salbacion.”—Salmo 68:19, 20; Isaías 12:2-5; Juan 3:16; 5:19.

20. (a) Con nos por yuda hende hala cerca Dios i su Yu? (b) Kico nos lo considerá den e siguiente artículo?

²⁰ Como colaboradó di Dios, laga nos yuda hende hala cerca dje i su Yu, i yuda nan desaroyá amor i fe den nan curason. Asina Jehova lo bira real pa nan. (Juan 7:28) Mediante Cristo, nan lo por establecé un relacion íntimo cu Dios, i nan lo stim’é i pega na dje. Nan lo no fiha límite di tempu pa nan sirbishi amoroso, i nan ta ehercé fe cu Jehova su promesanan maraviyoso lo cumpli na su debido tempu. (Lamentacionnan 3:24-26; Hebreonan 11:6) Pero, miéntras nos ta yuda otro hende desaroyá fe, speransa i amor, nos tin cu edificá nos mes fe p’e por ta manera un barcu stabil cu ta capas di pasa dor di tormenta severo. Nos lo considerá esaki den e siguiente artículo.

[Nota]

Como Repaso

◻ Den ki manera hopi bes nos ta lanta hende su interes den e mensahe di Reino, pero ki peliger ta existí?

◻ Ki clase di hende Jehova ta atraé na su mes i na su Yu?

◻ Israel su drentamentu den e Tera Primintí lo a dependé di kico, i kico nos por siña for di esaki?

◻ Ki papel nos ta hunga den yuda hende hala cerca Jehova i su Yu?

[Plachi na página 10]

Aunke nos ta ofrecé hende e speransa di bida eterno den Paradijs, nos obhetivo principal ta pa yuda nan hala cerca Jehova

[Plachi na página 13]

Nos rebishitanan por ta masha eficas si nos prepará bon