Bo Por Wanta te na Fin

“Laga nos core e careda cu ta poné dilanti nos cu awante.”—HEBREONAN 12:1.

1, 2. Kico ta nificá wanta?

“BOSO tin mester di awante,” apostel Pablo a skirbi e cristiannan hebreo di promé siglo. (Hebreonan 10:36) Enfatisando e importancia dje cualidad aki, apostel Pedro tambe a urgi cristiannan: “Agregá na boso fe . . . awante.” (2 Pedro 1:5, 6) Pero kico exactamente ta awante?

² Un diccionario griego-ingles ta definí e verbo griego pa “wanta” como “keda en bes di hui . . . para firme, resistí.” Relacioná cu e sustantivo griego pa “awante,” un obra di referencia ta bisa: “Ta e spiritu cu por soportá cos, no simplemente cu resignacion, sino cu speransa ferviente . . . Ta e cualidad cu ta tene un hende riba pia cu cara pa bientu. Ta e birtud cu por transformá e prueba di mas difícil den gloria, pasobra mas ayá cu e dolor e ta mira e meta.” Awante anto, ta permití bo para firme apesar di obstáculo i contratempu i pa no perde speransa. Ken specialmente tin mester dje cualidad aki?

3, 4. (a) Ken tin mester di awante? (b) Pakico nos tin cu wanta te na fin?

³ Den un sentido figurativo, tur cristian ta participando den un careda cu ta rekerí awante. Pa rond di aña 65 E.C., apostel Pablo a skirbi su colaboradó i fiel compañero di biahe, Timoteo, e palabranan trankilisante aki: “Mi a lucha e lucha excelente, mi a core e careda te na fin, mi a observá e fe.” (2 Timoteo 4:7) Cu e expresion “core e careda te na fin,” Pablo a compará su bida como cristian cu un careda, cu tin un curso establecí i un liña final. P’e tempu ei, Pablo tabata acercando triunfalmente e fin dje careda, i e tabata anhelá cu confiansa pa ricibí e recompensa. El a sigui bisa: “Dje tempu aki padilanti tin reservá pa mi e corona di husticia, cu e Señor, e hues hustu, lo duna mi como recompensa den e dia ei.” (2 Timoteo 4:8) Pablo tabatin sigur cu lo el a gana e recompensa pasobra el a wanta te na fin. Kico di nos?

⁴ Pa animá esnan cu a cuminsá e careda, Pablo a skirbi: “Laga nos core e careda cu ta poné dilanti nos cu awante.” (Hebreonan 12:1) Como cristian, nos ta drenta e careda di awante aki ora nos dedicá nos mes na Jehova Dios mediante Jesucristo. Un bon cuminsamentu riba e curso di haci disipel ta importante, pero loke ta conta finalmente ta cu nos ta terminá e curso. Jesus a declará: “Esun cu a wanta te na fin ta esun cu lo ser salbá.” (Mateo 24:13) E premio cu tin prepará pa esnan cu ta terminá e careda cu éxito ta bida eterno! P’esei, cu e meta ei na mente, nos tin cu wanta te na fin. Kico lo yuda nos alcansá e meta ei?

Nutricion Apropiado Ta un Mester

5, 6. (a) Pa wanta den e careda pa bida, na kico nos tin cu dedicá atencion? (b) Ki percuracionnan spiritual nos tin cu probechá di dje, i pakico?

⁵ Pegá cu e stad di Corinto, Grecia, tabatin e sitio caminda tabata tene e famoso weganan ístmico di antigwedad. Sin duda, Pablo tabata sa cu e rumannan corintio tabata conocé e competencianan atlético i otro competencianan organisá aya. Usando loke nan tabata sa, el a recordá nan dje careda pa bida den cua nan tabata participá: “Boso no sa cu tur coredó den un careda ta core, pero cu ta un so ta ricibí e premio? Core di tal manera pa boso por alcans’é.” Pablo a enfatisá e importancia di keda den e careda i forsa padilanti te ora nan yega e final. Pero kico lo a yuda nan haci esei? “Tur hende cu ta tuma parti den un competencia ta ehercé dominio propio den tur cos,” el a agregá. Sí, esnan cu a competí den e weganan di antigwedad a someté nan mes na entrenamentu vigoroso, a tene masha cuidou kico nan a come i bebe, i a controlá tur nan actividad pa por a gana.—1 Corintionan 9:24, 25.

⁶ Kico dje careda cu cristiannan a drenta? Un anciano den un congregacion di Testigonan di Jehova, ta bisa: “Bo tin cu duna atencion na bo nutricion spiritual si bo kier wanta den e careda pa bida.” Pensa riba ki alimento spiritual Jehova, “e Dios cu ta suministrá awante,” a duna nos. (Romanonan 15:5) Nos fuente principal di alimentacion spiritual ta su Palabra, Bijbel. Nos no mester tin un bon programa di lesa Bijbel? Tambe Jehova a percurá mediante “e esclabo fiel i discreto” e revistanan oportuno E Toren di Vigilancia i Spierta! i otro publicacionnan basá riba Bijbel. (Mateo 24:45) Dor di studia esakinan diligentemente, nan lo fortificá nos spiritualmente. Sí, nos tin cu saca tempu, esta, ‘cumpra e tempu oportuno’ pa studio personal.—Efesionan 5:16.

7. (a) Pakico nos no mester keda satisfecho cu djis un conocimentu básico di doctrinanan cristian? (b) Con nos lo por “sigui padilanti na madures”?

⁷ Pa keda riba e curso di un disipel cristian, nos tin cu bai mas ayá cu e “doctrina primario” básico i “sigui padilanti na madures.” (Hebreonan 6:1) Di manera cu nos tin cu desaroyá interes den “e hanchura i largura i haltura i profundidad” dje berdad i alimentá nos cu e ‘cuminda sólido cu ta pertenecé na hende maduro.’ (Efesionan 3:18; Hebreonan 5:12-14) Tuma por ehempel e cuater relatonan confiabel di Jesus su bida riba tera—e Evangelionan di Mateo, Marco, Lucas i Juan. Mediante un estudio cuidadoso dje Evangelionan aki, nos no solamente ta conocé e obranan cu Jesus a efectuá i e clase di persona cu e tabata, sino tambe nos ta percibí e forma di pensa cu a motivá su accionnan. E ora ei nos por yega di “tin e mente di Cristo.”—1 Corintionan 2:16.

8. Con reunionnan cristian ta yuda nos wanta den e careda pa bida?

⁸ Pablo a spierta compañeronan creyente: “Laga nos considerá un e otro pa incitá otro na amor i na obranan excelente, sin bandoná nos reunimentu huntu, manera algun tin pa custumber, sino animando un e otro, i tantu mas segun cu boso ta contemplá e dia yegando cerca.” (Hebreonan 10:24, 25) Esta un fuente di animacion reunionnan cristian ta! I esta refrescante pa ta huntu cu rumannan amoroso cu ta interesá den nos i cu kier yuda nos wanta te na fin! Nos no por permití nos mes e luho di trata e percuracion amoroso aki di Jehova como algu insignificante. Mediante nos studio personal diligente i asistencia regular na reunion, laga nos “bira plenamente desaroyá den e facultad di comprendimentu.”—1 Corintionan 14:20.

Público Ta Animá Bo

9, 10. (a) Den ki manera e público por ta un fuente di animacion den un careda di awante? (b) Kico ta ‘e nubia grandi di testigo cu ta rondoná nos’ mencioná na Hebreonan 12:1?

⁹ Sin embargo, maske con bon prepará un coredó ta, por sosodé cosnan na caminda cu por pon’é faya. “Boso tabata core bon. Ken a stroba boso di sigui obedecé e berdad?” Pablo a puntra. (Galationan 5:7) Evidentemente, algun dje cristiannan galatio a cai den mal asociacion i, como resultado, a ser distraí den nan careda pa bida. Di otro banda, apoyo i animacion for di otro hende por haci e careda mas fácil pa wanta. Ta mescos cu e efecto cu e público por tin riba e participantenan durante un wega. Multitudnan entusiasmá ta intensificá e emocion cu ta tene esnan cu ta pusta motivá for di cuminsamentu te final. E animacion di esnan cu ta para mira, hopi bes combiná cu música duru i aplauso, por duna e participantenan e incentivo adicional cu nan mester miéntras nan ta acercá e final. Sí, un público simpático por ehercé un influencia positivo riba esnan cu ta den e careda.

¹⁰ Den e careda pa bida cu cristiannan a drenta, ken ta e público? Despues di a mencioná e lista di Jehova su fiel testigonan pre-cristian den capítulo 11 di Hebreonan, Pablo a skirbi: “Pues anto, dor cu nos tin un nubia asina grandi di testigo rond di nos, . . . laga nos core e careda cu ta poné dilanti nos cu awante.” (Hebreonan 12:1) Usando e comparacion di un nubia, Pablo no a usa e palabra griego cu ta describí un nubia cu un tamaño i forma specífico cu rand claramente definí. En bes di esei, el a usa un palabra cu segun e lexicógrafo W. E. Vine “ta denotá un masa di nubia sin forma cu ta cubri shelu.” Claramente, Pablo tabatin na mente un multitud grandi di testigo—asina tantu cu nan tabata manera un masa di nubia.

11, 12. (a) Con fiel testigonan pre-cristian por animá nos, na moda di papia, pa core e careda cu awante? (b) Con nos por beneficiá mas plenamente for dje ‘nubia grandi di testigo’?

¹¹ Ta e fiel testigonan pre-cristian ei por ta e público cu awe ta para wak nos? Claro cu no. Nan tur ta drumí den morto, sperando un resureccion. Pero, dor cu nan mes tabata coredónan exitoso tempu nan tabata na bida, nan ehempel ta bibu ainda den e páginanan di Bijbel. Ora nos ta studia e Scritura, e personanan fiel aki por bira bibu den nos mente i por animá nos, na moda di papia, pa core e careda te na final.—Romanonan 15:4.a

¹² Por ehempel, ora oportunidadnan mundano tenta nos, un consideracion dje manera cu Moises a rechasá e glorianan di Egipto no ta motivá nos pa keda den e careda? Si nos ta enfrentá un prueba cu ta parce severo, cordando e prueba duru cu Abraham a enfrentá ora Dios a pidié ofrecé su yu Isaac, sigur lo animá nos pa no entregá den e lucha p’e fe. E grado den cua e ‘nubia grandi’ di e testigonan aki ta animá nos den e caminda aki ta dependé di con cla nos ta mira nan cu nos wowo di comprendimentu.

13. Den ki manera Jehova su Testigonan dje tempu actual ta animá nos den e careda pa bida?

¹³ Tambe nos ta rondoná pa un gran cantidad di Jehova su Testigonan dje tempu actual. Esta un ehempel magnífico di fe cristiannan ungí i tambe homber i muhernan dje “multitud grandi” a pone! (Revelacion 7:9) Tempu-tempu nos por lesa nan historia di bida den e revista aki i den otro publicacionnan di Watch Tower.b Segun cu nos ta meditá riba nan fe, nos ta ser animá pa wanta te na fin. I ta ki maraviyoso pa por tin e sosten di amigu íntimo i famia kendenan mes ta sirbiendo Jehova fielmente! Sí, nos tin hopi ruman pa animá nos den e careda pa bida.

Fiha Bo Velocidad na un Manera Sabí

14, 15. (a) Pakico ta importante pa fiha nos velocidad na un manera sabí? (b) Pakico nos mester ta razonabel den fiha meta?

¹⁴ Ora un coredó ta core un careda largu, por ehempel un máraton, e tin cu fiha su velocidad na un manera sabí. “Si bo sali muchu duru, bo por fracasá,” segun e revista New York Runner. “Probablemente, e resultado ta sea un lucha largu durante e último kilometernan of cai afó.” Un coredó di máraton ta corda: “E orador di un charla cu mi a bai como preparacion p’e careda, a spierta bon cla: ‘No purba core mes duru cu coredónan mas rápido. Core segun bo mes velocidad. Sino lo bo cansa i kisas asta cai afó.’ Dor di haci caso dje conseho aki, el a yuda mi finalisá e careda.”

¹⁵ Den e careda pa bida, Dios su sirbidónan tin cu haci esfuerso vigoroso. (Lucas 13:24) Sin embargo, disipel Santiago a skirbi: “E sabiduria djariba ta . . . razonabel.” (Santiago 3:17) E bon ehempel di otronan por animá nos pa haci mas. Pero si nos ta razonabel, esei lo yuda nos fiha metanan realístico na armonia cu nos abilidad i circunstancianan. E Scritura ta corda nos: “Laga cada un duna prueba di loke su mes trabou ta, i e ora ei lo e tin motibu pa hubilá en cuanto su mes so, i no den comparacion cu e otro persona. Pasobra cada un lo hiba su mes carga di responsabilidad.”—Galationan 6:4, 5.

16. Con modestia ta yuda nos fiha nos velocidad?

¹⁶ Mikéas 6:8 ta haci nos e pregunta penetrante aki: ‘Kico Jehova ta pidi bek di bo sino di ser modesto canando cu bo Dios?’ Modestia ta encerá ser conciente di nos limitacionnan. Problema cu salú of edad avansá a limitá un poco loke nos por haci den sirbishi di Dios? Laga nos no bira desanimá. Jehova ta aceptá nos esfuerso i sacrificionan ‘segun loke nos tin, no segun loke nos no tin.’—2 Corintionan 8:12; compará cu Lucas 21:1-4.

Tene Bo Bista Riba e Premio

17, 18. Teniendo kico na bista a yuda Jesus wanta e staca di tormento?

¹⁷ Ora Pablo a mustra e cristiannan corintio e necesidad pa wanta den e careda pa bida, el a mencioná un otro aspecto dje weganan ístmico cu tabata digno di nan atencion. Relacioná cu e competidónan den e weganan ei, Pablo a skirbi: “Awor nan, naturalmente, ta [core] pa nan obtené un corona coruptibel, pero nos unu incoruptibel. P’esei, e manera cu mi ta core no ta insigur; e manera cu mi ta dirigí mi golpinan no ta pa dal den laira.” (1 Corintionan 9:25, 26) E premio p’e ganadó den e weganan antiguo ei tabata un corona, of krans, trahá di blachi di pino of otro mata, of asta di selder shimaron secá—berdaderamente un “corona coruptibel.” Pero, kico ta spera cristiannan cu ta wanta te na fin?

¹⁸ Refiriendo na nos Modelo, Jesucristo, apostel Pablo a skirbi: “P’e goso cu a ser poné su dilanti el a wanta un staca di tormento, despreciando bergwensa, i a sinta na man drechi dje trono di Dios.” (Hebreonan 12:2) Jesus a wanta te na fin di su bida humano dor di wak mas ayá cu e staca di tormento na su recompensa, cu a incluí e goso cu e tin den contribuí n’e santificacion di Jehova su nomber, rescatá e famia humano for di morto, i goberná como Rey i Sumo Sacerdote ora e restorá hende obediente na bida sin fin riba un tera paradísico.—Mateo 6:9, 10; 20:28; Hebreonan 7:23-26.

19. Kico nos mester enfocá ariba miéntras nos ta sigui e curso di un disipel cristian?

¹⁹ Considerá e goso cu ta poné dilanti nos miéntras nos ta sigui e curso di un disipel cristian. Jehova a duna nos e trabou profundamente satisfactorio di predicá e bon nobo dje Reino di Dios i di compartí cu otro hende e conocimentu di Bijbel cu ta salba bida. (Mateo 28:19, 20) Ta ki un deleite pa haña un hende interesá den e Dios berdadero i pa yuda e persona ei drenta e careda pa bida! I sin importá e reaccion di hende na ken nos ta predicá, ta un privilegio pa por participá den e trabou conectá cu e santificacion dje nomber di Jehova. Ora nos wanta den e ministerio, apesar di indiferencia of oposicion di parti di esnan den nos teritorio, nos tin e goso di alegrá Jehova su curason. (Proverbionan 27:11) I e recompensa magnífico cu e ta primintí nos ta bida eterno. Esta un goso esei lo ta! Nos tin cu tene e bendicionnan ei na bista i persistí den e careda.

Segun cu e Fin Ta Yega Mas Cerca

20. Con e careda pa bida por bira mas difícil segun cu su fin ta yega mas cerca?

²⁰ Den e careda pa bida, nos tin cu lucha cu nos enemigu principal, Satanas e Diabel. Segun cu nos ta acercá e fin, e ta trata incesantemente di pone nos trompecá of baha man. (Revelacion 12:12, 17) I debí na guera, hamber, pest i tur otro contratempu cu ta marca “e tempu di fin,” no ta fácil pa sigui como fiel proclamadó dedicá di Reino. (Daniel 12:4; Mateo 24:3-14; Lucas 21:11; 2 Timoteo 3:1-5) Ademas, tin bes e fin por parce mas leu cu nos a kere, foral si nos a drenta e careda décadanan pasá. Sin embargo, e Palabra di Dios ta garantisá nos cu e fin lo yega. Jehova ta bisa cu lo e no ta lat. E fin ta na bista.—Habacuc 2:3; 2 Pedro 3:9, 10.

21. (a) Kico lo fortificá nos miéntras nos ta sigui den e careda pa bida? (b) Kico mester ta nos determinacion segun cu e fin ta yega mas cerca?

²¹ Pues, pa logra den e careda pa bida, nos tin cu saca fortalesa for di loke Jehova a percurá amorosamente como nos alimentacion spiritual. Tambe nos tin mester di tur e animacion cu nos por haña for di asociacion regular cu nos compañeronan creyente, kendenan tambe ta coriendo den e careda. Asta ora persecucion severo i suceso imprevisto na caminda haci nos careda mas difícil, nos por wanta te na fin pasobra Jehova ta duna “e poder mas ayá di loke ta normal.” (2 Corintionan 4:7) Ki trankilisante ta pa sa cu Jehova kier pa nos finalisá e curso triunfalmente! Cu determinacion firme, “laga nos core e careda cu ta poné dilanti nos cu awante,” cu e confiansa completo cu “n’e debido tempu nos lo cosechá si nos no cansa.”—Hebreonan 12:1; Galationan 6:9.

[Nota]

Bo Ta Corda?

◻ Pakico nos tin cu wanta te na fin?

◻ Ki percuracionnan di Jehova nos no mag neglishá?

◻ Pakico ta importante pa fiha nos velocidad na un manera sabí?

◻ Ki goso ta poné nos dilanti miéntras nos ta sigui den e careda?

[Plachi na página 18]

Saca animacion for di reunionnan cristian