Declara e Bon Nobo Ansiosamente

“Briya cu e spiritu. Traha como esclabo pa Jehova.”—ROMANONAN 12:11.

1, 2. Cristiannan ta haci esfuerso pa mantené ki actitud como predicadó di e bon nobo?

UN YONCUMAN ta excitá tocante su trabou nobo. Riba su promé dia di trabou, e ta warda ansiosamente riba instruccion di su doño di trabou. E ta anticipá su promé tarea i ta tum’é mashá na serio. E ta ansioso pa haci su best.

² Como cristian, nos por mira nos mes den un manera similar, esta, como trahadó nobo. Ya cu nos speransa ta pa biba pa semper, por bisa cu nos a caba di cuminsá traha pa Jehova. Sin duda, nos Creador tin diferente tarea na mente pa nos cu lo mantené nos ocupá te den eternidad. Pero e promé comision cu nos a ricibí ta esun di declará e bon nobo di su Reino. (1 Tesalonicensenan 2:4) Con nos ta sinti tocante e asignacion aki cu ta bini di Dios? Mescos cu e yoncuman, nos kier cumpli cuné haciendo nos máximo esfuerso cu celo, cu goso—sí, ansiosamente!

3. Kico ta ser rekerí pa nos por tin éxito como minister dje bon nobo?

³ Ta cierto cu por ta un desafio pa mantené un actitud positivo asina. Fuera di nos ministerio, nos tin hopi otro responsabilidad, di cua algun por exigí hopi di nos tantu físicamente como emocionalmente. Mayoria biaha, nos ta logra percurá pa e cosnan aki miéntras nos ta duna e debido atencion na e ministerio. Tog, e por ta un lucha continuo. (Marco 8:34) Jesus a enfatisá cu nos éxito como cristian lo nificá haci esfuerso vigoroso.—Lucas 13:24.

4. Con ansiedad di tur dia por afectá nos punto di bista spiritual?

⁴ Cu asina hopi cos di haci, ta masha fácil pa nos sinti nos aplastá of cargá de bes en cuando. “Ansiedadnan di bida” por sofocá nos celo i aprecio pa actividad teocrático. (Lucas 21:34, 35; Marco 4:18, 19) Dor di nos naturalesa humano imperfecto, nos por bandoná ‘e amor cu nos tabatin na principio.’ (Revelacion 2:1-4) Algun aspecto di nos sirbishi na Jehova por bira un poco rutinario. Con Bijbel ta percurá e animacion necesario pa nos por mantené nos celo p’e sirbishi bibu?

Manera “un Candela Ardiente” den Nos Curason

5, 6. Con apostel Pablo a mira su privilegio di predicá?

⁵ E ministerio cu Jehova a confia nos cuné ta muchu precioso pa lagu’é bira algu comun. Apostel Pablo a considerá e predicacion dje bon nobo un privilegio masha grandi mes, i e no a considerá su mes digno di a ser confiá cuné. El a bisa: “Na mi, un homber ménos cu esun di mas chikitu di tur e santunan, e bondad inmerecí aki a ser duná, pa mi declará n’e nacionnan e bon nobo tocante e rikesanan insondabel di e Cristo i haci hende mira con ta administrá e secreto sagrado cu desde e pasado indefiní tabata scondí den Dios, kende a crea tur cos.”—Efesionan 3:8, 9.

⁶ E actitud positivo cu Pablo tabatin pa cu su ministerio ta un ehempel excelente pa nos. Den su carta na e romanonan el a skirbi: “Di mi parti, mi ta ansioso pa declará e bon nobo.” E no tabatin bergwensa dje bon nobo. (Romanonan 1:15, 16) E tabatin e actitud corecto i tabata ansioso pa cumpli cu su ministerio.

7. Di kico Pablo a spierta e romanonan den su carta na nan?

⁷ Apostel Pablo a reconocé e necesidad pa mantené un punto di bista celoso, p’esei el a spierta e cristiannan na Roma: “No sea floho den boso trabou. Briya cu e spiritu. Traha como esclabo pa Jehova.” (Romanonan 12:11) E palabra griego traducí como “floho” ta carga e idea di “kier evitá trabou.” Aunke en realidad kisas nos no ta floho den nos ministerio, nos tur mester ta alerto pa cualkier síntoma di flohedad spiritual, i haci ahuste necesario den nos actitud si nos ta ripará e síntomanan ei den nos mes.—Proverbionan 22:3.

8. (a) Kico a bira manera “un candela ardiente” den e curason di Jeremías, i di con? (b) Ki les nos por saca for di Jeremías su experencia?

⁸ E spiritu di Dios tambe por yuda nos ora nos ta desanimá. Por ehempel, na un ocasion profeta Jeremías tabata desanimá, i el a pensa di stop di traha como profeta. Asta el a bisa di Jehova: “Mi no ta bai haci mencion di dje, i lo mi no papia mas den su nomber.” Esaki tabata un prueba cu Jeremías tabatin un deficiencia spiritual serio? No. En realidad, Jeremías su spiritualidad fuerte, su amor pa Jehova i su celo p’e berdad, a dun’é forsa pa sigui profetisá. E ta splica: “Den mi curason [e palabra di Jehova] a resultá di ta manera un candela ardiente cerá den mi wesunan; i mi a cansa di contené, i mi no por a want’é.” (Jeremías 20:9) Ta normal cu tempu-tempu, sirbidónan leal di Dios ta experenciá desanimacion. Pero ora nan pidi Jehova yudansa den oracion, lo e lesa nan curason i libremente duna nan su spiritu santu si nan, mescos cu Jeremías, tin su palabra den nan curason.—Lucas 11:9-13; Echonan 15:8.

“No Paga e Candela dje Spiritu”

9. Kico lo por stroba e actividad di spiritu santu na nos fabor ?

⁹ Apostel Pablo a amonestá e tesalonicensenan: “No paga e candela dje spiritu.” (1 Tesalonicensenan 5:19) Sí, accion i actitud cu ta contrario cu principio divino por stroba actividad di spiritu santu na nos fabor. (Efesionan 4:30) Cristiannan djawe tin e asignacion di predicá e bon nobo. Nos ta trata e privilegio aki cu respet profundo. Pa nos no ta un sorpresa cu esnan cu no conocé Dios, ta trata nos trabou di predicá cu desprecio. Pero ora un cristian deliberadamente ta neglishá su ministerio, esaki por pone cu e candela di Dios su spiritu motivador, ta paga.

10. (a) Con e punto di bista di hende rond di nos por afectá nos? (b) Ki punto di bista elevá 2 Corintionan 2:17 ta expresá di nos ministerio?

¹⁰ Algun hende pafó dje congregacion cristian lo por mira nos ministerio simplemente como distribucion di literatura. Otro hende por concluí eróneamente cu nos ta bai di cas pa cas djis pa ricibí donacion. Si nos laga e puntonan di bista negativo ei influenciá nos actitud, esaki lo por haci nos ménos eficas den e ministerio. En bes di laga e pensamentunan ei afectá nos, laga nos mantené e punto di bista cu Jehova i Jesus tin di nos ministerio. Apostel Pablo a expresá e punto di bista elevá ei ora el a declará: “Nos no ta bendedó dje palabra di Dios manera hopi hende, sino como impulsá pa sinceridad, sí, como mandá di Dios, bou di bista di Dios, den compania di Cristo, nos ta papia.”—2 Corintionan 2:17.

11. Kico a yuda e cristiannan di promé pa keda celoso asta bou di persecucion, i con nan ehempel mester influenciá nos?

¹¹ Un poco tempu despues di Jesus su morto, su disipelnan den Jerusalem a enfrentá un periodo di persecucion. A menasá nan i a manda nan stop di predicá. Sin embargo, Bijbel ta bisa cu nan a ‘yena cu spiritu santu i tabata papia e palabra di Dios cu curashi.’ (Echonan 4:17, 21, 31) Pablo su palabranan na Timoteo algun aña despues a mustra e disposicion positivo cu cristiannan mester keda cuné. Pablo a bisa: “Dios a duna nos no un spiritu di cobardia, sino esun di poder i di amor i di sano huicio. P’esei, no tene bergwensa dje testimonio tocante nos Señor, tampoco di mi, un prizonero pa su causa, sino aceptá bo parti den sufri maldad p’e bon nobo segun e poder di Dios.”—2 Timoteo 1:7, 8.

Kico Nos Ta Debe Nos Próhimo?

12. Cua ta e motibu principal cu nos tin pa predicá e bon nobo?

¹² Pa nos por tin un actitud apropiado pa cu nos ministerio, nos mester tin e motivacion corecto. Pakico nos ta predicá? E motibu principal ta bisto den e palabranan dje salmista: “Bo lealnan lo bendicioná bo [Jehova]. Dje gloria di bo gobernacion nan lo papia, i di bo poder nan lo papia, pa duna di conocé n’e yunan di hende su obranan poderoso i e gloria dje splendor di su gobernacion real.” (Salmo 145:10-12) Sí, nos ta predicá pa alabá Jehova públicamente i pa santificá su nomber dilanti henter humanidad. Asta ora poco hende ta scucha nos, nos proclamacion fiel dje mensahe di salbacion ta trece alabansa na Jehova.

13. Kico ta impulsá nos pa conta otro hende tocante e speransa di salbacion?

¹³ Tambe nos ta predicá pasobra nos ta stima hende i pa evitá culpa di sanger. (Ezekiel 33:8; Marco 6:34) Esaki tin di haber cu e palabranan di Pablo ora el a bisa di esnan pafó dje congregacion cristian: “Tantu pa griegonan como pa bárbaronan, tantu pa sabínan como pa bobonan mi ta un debedó.” (Romanonan 1:14) Siendo cu ta Dios su boluntad pa “tur clase di hende ser salbá,” Pablo a sinti cu tabata su deber pa declará e bon nobo na nan. (1 Timoteo 2:4) Awe, nos ta sinti e mésun amor i obligacion pa nos próhimo. Jehova su amor pa hende a conmov’é pa manda su Yu na tera p’e muri pa nan. (Juan 3:16) Esei tabata un sacrificio grandi. Nos ta imitá e amor di Jehova ora nos ta dedicá tempu i ta haci esfuerso pa conta otro hende tocante e bon nobo di salbacion basá riba e sacrificio di Jesus.

14. Con Bijbel ta describí e mundu pafó dje congregacion cristian?

¹⁴ Testigonan di Jehova ta mira nan próhimo como posibel miembro dje hermandad cristian. Nos tin cu predicá cu curashi, sin embargo e echo cu nos tin curashi no kier men cu nos mester ta cla pa discutí. Ta berdad cu Bijbel ta usa términonan fuerte ora e ta papia di mundu en general. Pablo a usa e palabra “mundu” den un sentido negativo ora el a papia di “e sabiduria dje mundu aki” i di “deseonan mundano.” (1 Corintionan 3:19; Tito 2:12) Tambe Pablo a corda e cristiannan di Efeso cu ora nan a cana “conforme cu e sistema di cosnan dje mundu aki” nan tabata “morto” spiritualmente. (Efesionan 2:1-3) E declaracionnan aki huntu cu otronan cu ta similar na nan, ta na armonia cu apostel Juan su palabranan: “Henter e mundu ta drumí den poder dje malbado.”—1 Juan 5:19.

15. Kico nos no ta haci relacioná cu hende pafó dje congregacion cristian, i pakico no?

¹⁵ Corda sí cu e declaracionnan ei ta referí na e mundu en general cu ta alehá for di Dios, i no na hende individual. Cristiannan no ta pretendé di sa di antemano con ningun individuo lo reaccioná na e trabou di predicá. Nan no tin base pa yama niun hende cabritu. No ta keda na nos pa bisa kico lo ta e resultado ora Jesus bini pa separá “carné” for di “cabritu.” (Mateo 25:31-46) Jesus ta e hues nombrá; i no nos. Banda di esaki, experencia a mustra cu asta esnan cu tabata profundamente enbolbí den e conducta di mas malu cu por tin, a aceptá e mensahe di Bijbel, a cambia i bira cristiannan cu ta hiba un bida limpi. P’esei, aunke nos no ta busca asociacion cu cierto hendenan, nos no ta vacilá pa papia cu nan tocante e speransa di Reino ora e oportunidad presentá. E Scritura ta papia di cierto hendenan cu, miéntras nan tabata incrédulo ainda, “tabata corectamente dispuesto pa bida eterno.” Finalmente nan a bira creyente. (Echonan 13:48) Nunca nos no por sa ken ta corectamente dispuesto si no ta te ora nos a duna nan testimonio—kisas hopi bes. Cu esaki na mente, nos ta trata esnan cu ainda no a aceptá e mensahe di salbacion, cu “suavedad” i “respet profundo,” sperando cu algun di nan lo respondé tog na e mensahe di bida.—2 Timoteo 2:25; 1 Pedro 3:15.

16. Cua ta un motibu pakico nos kier desaroyá e “arte di siña”?

¹⁶ Desaroyo di nos abilidadnan como maestro lo aumentá nos entusiasmo pa declará e bon nobo. Pa ilustrá: Un wega of deporte interesante lo por ta laf pa un persona cu no sa con pa hungu’é. Pero pa esun cu ta hungu’é bon, e ta dushi. Di igual manera, cristiannan cu ta desaroyá e “arte di siña” ta aumentá nan goso den e ministerio. (2 Timoteo 4:2; Tito 1:9) Pablo a consehá Timoteo: “Haci bo sumo posibel pa presentá bo mes aprobá na Dios, un trahadó sin nada di tene bergwensa di dje, manehando e palabra dje berdad corectamente.” (2 Timoteo 2:15) Con nos por desaroyá nos abilidad di siña?

17. Con nos por “desaroyá un anhelo” pa conocimentu di Bijbel, i con e conocimentu ei lo beneficiá nos ministerio?

¹⁷ Un manera ta dor di gana mas conocimentu exacto. Apostel Pedro ta animá nos: “Manera criaturanan recien nací, desaroyá un anhelo p’e lechi no-adulterá cu ta pertenecé n’e palabra, pa mediante dje boso por crece na salbacion.” (1 Pedro 2:2) Un baby saludabel ta anhelá lechi instintivamente. Sin embargo, un cristian kisas mester “desaroyá un anhelo” pa conocimentu di Bijbel. Por cultivá e anhelo aki dor di desaroyá bon custumber di studia i lesa. (Proverbionan 2:1-6) Esfuerso i disiplina propio ta necesario si nos kier bira maestronan ábil dje Palabra di Dios, pero e esfuersonan ei ta trece recompensa cuné. E goso cu nos ta haña ora nos examiná e Palabra di Dios lo haci nos briya cu e spiritu di Dios, ansioso pa compartí cu otro hende e cosnan cu nos ta siña.

18. Con reunionnan cristian por ekipá nos pa manehá e palabra dje berdad corectamente?

¹⁸ Reunionnan cristian tambe ta hunga un papel importante den e manera ábil cu nos ta usa e Palabra di Dios. Ora ta lesa textonan di Bijbel durante discurso público i otro consideracionnan bíblico, ta bon pa nos sigui e lesamentu den nos mes Bijbel. Ta sabí pa nos presta bon atencion na partinan den e reunion, incluso esnan cu ta trata nos trabou di predicá specíficamente. Nunca nos mester balotá demostracionnan, i kisas laga nos mente dual. Atrobe, disiplina propio i concentracion ta necesario. (1 Timoteo 4:16) Reunionnan cristian ta edificá nos fe, ta yuda nos desaroyá un anhelo p’e Palabra di Dios i ta entrená nos pa ta proclamadónan ansioso dje bon nobo.

Nos Por Conta cu e Apoyo di Jehova

19. Di con participacion regular den e trabou di predicá ta vital?

¹⁹ Cristiannan cu ta “briya cu e spiritu” i cu ta ansioso pa declará e bon nobo ta haci esfuerso pa participá regularmente den e ministerio. (Efesionan 5:15, 16) Ta berdad cu circunstancia ta varia, i no ta tur hende por dedicá e mésun cantidad di tempu na e trabou di salba bida aki. (Galationan 6:4, 5) Sin embargo, kisas mas importante cu e cantidad di tempu cu nos ta pasa den e trabou di predicá ta e regularidad cu nos ta papia cu otro hende tocante nos speransa. (2 Timoteo 4:1, 2) Mas nos predicá, mas nos lo balorá e importancia di e trabou aki. (Romanonan 10:14, 15) Nos compasion i empatia lo crece ora cu riba un base regular, nos tin contacto cu hende sincero cu ta suspirá i keha i cu ta sin speransa.—Ezekiel 9:4; Romanonan 8:22.

20, 21. (a) Ki trabou tin ainda nos dilanti? (b) Con Jehova ta apoyá nos esfuersonan?

²⁰ Jehova a confia nos cu e bon nobo. Esaki ta e promé comision cu nos a ricibí for di dje como su “colaboradó.” (1 Corintionan 3:6-9) Nos ta ansioso pa cumpli cu e responsabilidad aki cu Dios a duna nos cu henter nos alma, haciendo nos máximo esfuerso. (Marco 12:30; Romanonan 12:1) Ainda tin hopi hende cu ta corectamente dispuesto den mundu cu tin hamber p’e berdad. Tin hopi trabou pa haci, pero nos por conta cu Jehova su apoyo tanten cu nos ta cumpli cu nos ministerio plenamente.—2 Timoteo 4:5.

²¹ Jehova ta ofrecé nos su spiritu i ta ekipá nos cu “e spada di spiritu,” e Palabra di Dios. Cu su yudansa nos por habri nos boca “cu tur frankesa di expresion, pa duna di conocé e secreto sagrado dje bon nobo.” (Efesionan 6:17-20) Laga cu loke apostel Pablo a skirbi na e cristiannan di Tesalónica por ser bisá di nos tambe: “E bon nobo cu nos ta predicá no a resultá di ta entre boso cu papiamentu so, sino tambe cu poder i cu spiritu santu i conviccion fuerte.” (1 Tesalonicensenan 1:5) Sí, laga nos declará e bon nobo ansiosamente!

Un Repaso Breve

• Dor di ansiedadnan di bida, kico lo por pasa cu nos celo den e ministerio?

• Di ki manera nos deseo pa declará e bon nobo mester ta manera “un candela ardiente” den nos curason?

• Ki actitud negativo relacioná cu sirbishi nos mester evitá?

• En general, con nos mester considerá esnan cu no tin e mésun fe cu nos?

• Con Jehova ta yuda nos mantené nos celo den e trabou di predicá?

[Plachinan na página 9]

Cristiannan ta imitá e celo di Pablo i Jeremías

[Plachinan na página 10]

Amor pa Dios i pa próhimo ta motivá nos pa ta ansioso den e ministerio