“Sea Ferviente den Spiritu”

1. Kiko mester ta un karakterístika di nos predikashon?

¹ Nos sirbishi kristian no mester bira algu monótono. Mas bien, Beibel ta animá nos pa ta ‘ferviente den spiritu sirbiendo Yehova.’ (Rom. 12:⁠11) Sinembargo, tin hopi kos ku por mengua nos zelo, òf entusiasmo, pa nos sirbishi. Meskos ku ta waya un kandela pa e lanta atrobe, nos tin ku rebibá nos entusiasmo pa nos sirbishi di Reino. Kon nos por hasi esei?​—⁠2 Tim. 1:​6, 7.

2. Ki relashon tin entre estudio personal di Beibel i un sirbishi ku entusiasmo?

² Estudio Personal di Beibel: Un bon predikadó di Reino ta un persona ku ta stima Dios su lei i ku tin un amor profundo pa e bèrdatnan ku esaki ta kontené. (Sal. 119:⁠97) Ora nos deskubrí bèrdatnan bíbliko durante nos estudio personal, esaki ta konmové nos kurason i intensifiká nos zelo. I amor pa Esun ku a perkurá e bèrdatnan ei huntu ku nos deseo pa kompartí e bon notisia ku otro hende ta motivá nos pa duna alabansa na Dios i deklará su nòmber públikamente. (Heb. 13:⁠15) No tin duda, e entusiasmo ku nos ta demostrá ora nos ta presentá e bon notisia ta reflehá nos apresio profundo pa su balor.

3. Ki efekto Dios su spiritu santu por tin riba nos sirbishi?

³ Pidi Dios Spiritu Santu: Riba nos mes forsa, nos no tin un sirbishi efikas. Ora Dios su spiritu santu por flui libremente, e ta produsí berdadero zelo. (1 Ped. 4:⁠11) Si nos hala mas serka e Fuente di ‘forsa i poder,’ nos ta haña e fortalesa spiritual pa duna testimonio ku kurashi. (Isa. 40:​26, 29-⁠31) Ora ku apòstel Pablo a hañ’é ku oposishon den su sirbishi, el a risibí “yudansa di Dios.” (Echo. 26:​21, 22) Pues, Yehova su spiritu santu ku ta duna vigor por yuda nos tambe pa ta ferviente den nos sirbishi. P’esei, nos tin ku resa pidi p’e.​—⁠Luk. 11:​9-⁠13.

4. Ki bon resultadonan zelo por produsí, pero kiko nos mester tene kuenta kuné?

⁴ Hopi bes, nos zelo ardiente pa e trabou di prediká ta motivá nos kompañeronan kristian pa nan tambe desplegá mas zelo, òf entusiasmo. (2 Kor. 9:⁠2) Ademas, ora nos ta presentá e mensahe ku entusiasmo i konvikshon, tin mas chèns ku hende den teritorio ta reakshoná na un manera positivo. Sinembargo, semper nos zelo mester ta kompañá ku takto i suavedat. (Tito 3:⁠2) Semper nos ta hasi esfuerso pa respetá e doño di kas i su libertat di skohe.

5. Nos tin ku hasi esfuerso pa sigui ki konseho inspirá?

⁵ Komo proklamadónan di Reino, laga nos semper ta “ferviente den spiritu.” Laga nos kultivá zelo mediante estudio personal di Beibel i orashon ferviente na Yehova, esun ku por duna nos su forsa dinámiko, esta, su spiritu santu. Di e manera akí, nos ta kumpli ku nos sirbishi ku entusiasmo, ku ‘spiritu santu i pleno konvikshon.’​—⁠1 Tes. 1:⁠5.